আপডেট:
image

টাকুমা আসানোগী অথেংবদা চনখিবা গোলনা জাপাননা জার্মানিবু ২-১ মায়থীবা পীখ্রে

কাতার, নভেম্বর ২৩ : টাকুমা আসানোনা শান্নবগী ৮৩ শুবা মিনিটতা চনখিবা গোলগী মতেংনা জাপাননা জার্মানিবু ২-১ দা ফিফা ৱার্ল্ড কাপকী ঙসি খালিফা ইন্টারনেশনেল ষ্টেদিয়ামদা শান্নখিবা গ্রুপ ঈগী অহৌবা মেটচতা মায়থীবা পীখ্রে। জার্মানিনা জাপানগী মখূৎতা মায়থীখিবা অমদি লৈবাকপোকপা নুমিৎতা আর্জেন্টিনানা সৌদি আরবিয়ান মখূৎতা মায়থীখিবা অসিনা ফিফা ৱার্ল্ড কাপ ২০২২ গী নুমিৎ নীনি অসিদা খ্বাইদগী অচৌবা নুঙাইতবা অনী ওইরি।

সৌদি আরবিয়ানা মেসিগী গোল হন্দোক্তুনা মায় পাকখিবগুম্না গোল অমা পুত্থরগা লৈরম্বা জাপাননা মাইটি জার্মানবু ২-১দা মায়থীবা পীখি। ইলকে গুন্দোগননা শান্নবগী ৩৩ শুবা মিনিটতা পেনাল্টি অমগী মতেংদগী চনখিবা গোলনা জার্মানিনা ১-০ দা জাপানবু অহানবা হাফ লোইবা ফাওবদা মাংজিল থাখি। অনীশুবা হাফতা সাবষ্টিট্যুট ওইনা চঙলকখিবা জাপানগী রিটসু দোউন অমদি টাকুমা আসনোনা নোর্মেল টাইম লোইগদবা মিনিট ১৫ ৱাৎলিংঙৈ জাপানগী মায় পাকপগী গোলশিং চনখি। রিটসু দোউননা শান্নবগী ৭৫ শুবা মিনিটতা ইক্কেলাইজ গোল চল্লবা মতুং আসানোনা শান্নবগী ৮৩ শুবা মিনিটতা জাপানগী মায় পাকপগী মরুওইবা গোল চনবা ঙমখি। জার্মানিনা মথংগী মেটচ স্পেনগা থা অসিগী ২৮গী অঙনবদা শান্নরগনি অদুগা মায় পাকখিবা জাপাননা কোষ্টারিকাগা থা অসিগী ২৭ কী নুংথিল পুং ৩.৩০ দা লম্বা তৌনরগনি।

অমরোমদা, আল জানোব ষ্টেদিয়ামনা নোংয়াই মতুংদা শান্নখিবা গ্রুপ দিগী মেটচ অমদা ওলিভার গিরোদনা চনখিবা গোল ২গী মতেংনা দিফেন্দিং চেম্পিয়ন ফ্রান্সনা অষ্ট্রেলিয়াবু ৪-১দা মায়থীবা পীখ্রে। মেটচ অসিদা অষ্ট্রেলিয়াগী ক্রেইগ গুদউইননা শান্নবা হৌরকপগী ৯শুবা মিনিটতা মেটচকী অহানবা গোল চনশিন্দুনা ফ্রান্সপু ১-০দা মাংজিল থাখি। এদ্রিএন রেবিওটনা শান্নবগী ২৭ শুবা মিনিটতা ইক্কেলাইজ গোল চনশিন্দুনা স্কোর ১-১ দা লৈহনখি টিম অনীনা স্কোর মান্নরবা মতুং ওলিভর গিরোদনা শান্নবগী ৩২ শুবা মিনিটতা ফ্রান্সকী অনীশুবা গোল চনবা ঙমখি। মহাক্না মখা তানা অনীশুবা হাফকী শান্নবগী ৭১ শুবা মিনিটতা মায় পাকপগী ৪শুবা গোল চনবা ঙমখি। কিলিয়ন এমবাপ্পেনা শান্নবগী ৬৮ শুবা মিনিটতা ফ্রান্সকী মায় পাকপগী অহুমশুবা গোল চনবা ঙমখি।

দিদিয়ার দেসচেম্পগী ফ্রান্সনা দেনমার্ককা থাংজ নুমিৎতা শান্নরগনি। নুমিৎ অসিমক্তদা অষ্ট্রেলিয়ানা টুনিসিয়াগা লম্বা তৌনরগনি। অমরোমদা, ঙসি নুমিদাং অল থুমমা ষ্টেদিয়ামদা শান্নখিবা গ্রুফ ঈগী মেটচ অমদা স্পেননা কোষ্টারিকাবু লাকচনা ৭-০ দা মায়থীবা পীখ্রে। দেনি ওলমোনা শান্নবা হৌরকপগী ১১শুবা মিনিটতা স্পেনগী অহানবা গোল চনবা ঙমখি। মার্কোয়েসন্সিওনা শান্নবগী ২১ শুবা মিনিটতা স্পেনগী অনীশুবা অমদি ফরান টোরেসনা শান্নবগী ৩১ শুবা মিনিটতা পেনাল্টি অমগী মতেংদগী মায় পাকপগী অহুমশুবা গোল চনবা ঙমখি।

মহাক্না মখা তানা অনীশুবা হাপকী শান্নবগী ৫৪ শুবা মিনিটতা গোল ১গা হাপচিনবা ঙমখি। গাবি, কালোর্স সোলর অমদি অলভারো মোরটানা অনীশুবা হাফকী শান্নবগী ৭৪, ৯০ অমদি ৯০+২দা স্পেনগী মায় পাকপগী ৫শুবা, ৬শুবা অমদি ৭ শুবা গোলশিং চনবা ঙমখি। অতোপ্পা আল বেইট ষ্টেদিয়ামদা ঙসি নুমিদাংৱাইরম শান্নখিবা গ্রুপ এফকী অহানবা মেটচতা মোরোক্কো অমদি ক্রোয়েসিয়া গোল অমত্তা চান্নদনা দ্রো ওইখ্রে।

সোর্স: হুইয়েন লানপাউ  

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু