জিরি সাহত্যি লৈকোল --আই এস থিংগোম
জিরিবাম হায়রিবসি মণিপুরগী জিলা অমা ওইরবসু ইম্ফালদগী চাওরাক্না কিলোমিটার ২০০ রোম লাপ্না লৈখিবনা য়ুমথংনবা কাছাড়গা হিরম কয়াদা য়াম্না হকচিন্না মরি লৈনৈ। মরম অসিদগী জিরিবামগা কাছাড়গা সাহিত্যগী মতাংদসু য়াম্না লোনদিম্ননা চৎমিন্নৈ। ঐগী লাইবক ফবদগী জিরিবামদা পাঙথোকপা সাহিত্যগী থৌরম অনীখক্তা য়াওজবা ফংখি। মদুদগী হৌবা ঐগী পুক্নিংদা জিরিবামগী সাহিত্যবু নুংশিবা অমসুং জিরিগী সাহিত্যগী মরমদা খরদং ইনিংবগী ঈথিল অমা কন্না ফাওরকখি। শম্না হায়বা তারবদি জিরিবামদা লাইরিক ফোঙবা হৌরকপসি ১৯৮০ গী ডিকেটতগীনি।
ইহান হানবা শৈরেং লাইরিক অসি খৃঃ কুমজা ১৯৮৭ দা ফোঙখিবা ঙাথেম নিঙোল হেমাবতীগী ৱাখলগী ঈথক হায়রিবসিনি। লাইরিক অসিমক ২০১০ দা অনীশুবা এডিশন ফোঙখি। মথংগী শৈরেং লাইরিকশিংদি টি. সি কব্রবমগী থিয়েটারগী লাইবক (১৯৯৪) অমসুং শরত থোকচোমগী কুম্মৈগী শৈরেং (২০০০) অনী অসিনি।
খৃঃ চহী ২০০০ গী মতুংদগীদি শৈরেং লাইরিক কয়ামরোম ফোঙবা হৌনরক্লে। ২০০৬ দা ফোঙখি সিনাম তনুবাবুগী অমঙবা নোং, অরিবম গৌরমনি শর্ম্মাগী লাওরকখিবা খোঞ্জেলদুনা, জয়শঙ্কর হৈস্নামগী মাংখিগদৌরবা মনি অমসুং শরত থোকচোমগী সাগর অমসুং ঐগী চফু মচা। খৃঃ কুমজা ২০০৮ তসু ফোঙলকখি জয়শঙ্কর হৈস্নামগী খোর্জৈদগী সেলফোন্দা ইবা মেসেজ, চান্দম বীরেনগী মাংশিল্লক্লবা মঙাল। ২০১০ গী ডিকেটতগী হৌরগা হৌজিক ফাওবদা ফোঙলবা শৈরেং লাইরিকশিংগী মশিং য়ামখৎলক্লি। মদুদি-এস খগেন্দ্র-মকুমঙ (২০১২), মোইরাংথেম সত্যবতী-নীংশিং খুনগী ইপু (২০১২) অমসুং বরাক তম্পাক্কী মরাইবক (২০১৬), থিংবাইজম মাধবী-থীরসি মখোয়গী খোঙ্গুল (২০১৬), মলয়া মোইরাংথেমগী অমঙবা নোংলক্তা (২০১৮), নঙগী চিম্বানগী মচুনা (২০২২), লাইশ্রম মেমচা-অশেংবা শক্তম (২০১৯), অহোংশাংবম সুশিলা-ইরোলনুংদগী (২০১৯), রোমিও মোইরাংথেম-নুংশিবা অমসুং নীঙতম লান্মী (২০১৯), লাইশ্রম লোইদামতোম্বী-ইমাগী খোঙজুম (২০২১), কব্রবম বাবাতোন-নোংচুপ খোঙগী হী-য়াই (২০২১) অমসুং শরত থোকচোমগী অইংবদসু অশাবদসু (২০২৩)।
শৈরেংগী মথংদা ৱারী মচারোমদা মীৎয়েং থমজরি। জিরি লমদমগী ওইনা হৌজিক ফাওবদা ৱারী মচাগী লাইরিক ১১খক ফোঙখ্রে। ৱারী মচাগী লাইরিকশু শৈরৈংগী মতম ১৯৮৭ দা অহৌবনি হায়ববু খোমজিনবা লাইরিকনি। ফোঙখ্রবা লাইরিকশিংদুদি বীরেন পুখ্রম্বমনা এডিট তৌবা খুদোম্বীদা উংলিবা থাজ (১৯৮৭), মৈনম জয় মঙ্গলনা খোমজিনবা নোরোক-পাতাল (১৯৮৮), থা পান্থোইবগী ৱারীগী ঈচেল (১৯৯৭), শরত থোকচোমগী ফৈবাক্কী মপু (২০০৬), নবকুমার সিনামচানা ২০০৭ দা ইবা ঐগী ৱায়েল লোয়শঙসিদা, সিনাম তনুবাবুগী বরাক তোর্ব্বানগী খোন্থাং (২০০৯), গোপীমোহন শর্ম্মানা ইবা থৱান মিচাক অমনা কৌরি (২০১০), বীরেন খুমনপুগী লাইরিক লৈবদি লৈরি টুয়েল্ব অৱার্স লেট (২০১১), এস খোগেন্দ্রগী নুংশিবনা অথোইবনি (২০১২), সত্যবতী মোইরাংথেমগী লাইরিক অনী ৱারীদুবু লোইদ্রিবা (২০১২) অমসুং কিন্থরক্লবা শম্বল (২০১৪)।
সাহিত্যগী য়াম্না মরু ওইরিবা মচল উপন্যাস অনীখক জিরি সাহিত্যগী লৈকোল অসিদা লৈশাৎ তমখ্রে। মদুদি এস খোগেন্দ্রনা ২০১৭ দা ইবা উতাংবী অমসুং কব্রবম বাবাতোনগী চিম্বান ময়াগী শমব্রু (২০২১)। য়াম্না থাগৎনিঙাই ওইরিবনি আসামদা শুপ্নগী লাইরিক ৭ খক্তং লৈজবা লমকোয় ৱারীগী লাইরিক মরিখক জিরিবামগী সাহিত্যদা উবা ফংলি। অইবা থা পান্থোইবগী লাইরিক শিংদুদি লম লমগী ৱারী (১৯৮৮), ইম্ফালদগী কন্যাকুমারী (১৯৮৮), বাংলাদেশ খোঙচৎ (১৯৯৪), গুজরাট খোংশান (১৯৯৬)।
মথক্তা পঞ্জখিবা সাহিত্যগী ওইবা লাইরিকশিং অসিতা নত্তনা মখল কয়াগী ৱাখল মীৎয়েংদা ইবা লাইরিক কয়ারোমসু জিরিদগী ফোঙখ্রে। মখোয়শিংদুদি- থা পান্থোইবগী-মীওইবা অমসুং নুঙাইবা, মীতৈগী অৱাবা, মীতৈগী ৱাফম, অনৌবা মালেমদা মীতৈ, অনৌবা মতমগী মহৈলোন, মীতৈগী খুনাই, ঐখোয় লান হৌগদবনি, এস খোগেন্দ্রগী ওজা ফৈজোম, শরত থোকচোমগী অৱাবা অমসুং নুঙাইবগী গুন, মীথোইনবগী লম্বী, ইচা থোইদা ইবা চিঠি, অচোয়বা ৱারেং খরা, এ হ্যান্ডবুক ওফ মীতৈ স্কৃপ্ট, নবকুমার সিনামচাগী লুহোংবগী চৎন পথাপ, ময়োন থৈরক্নবা সৌরজগৎ, আজাদ অথৌবগী ভারতনা নীংতম্লকপা চহী য়াঙ্খৈগী ফিবান্নুংদা পাঙল, এম কুঞ্জেশ্বরী সিংহগী সাহিত্যগী নৈনরোল অসিনংবনি।
চিথ্বনান্থহৌবা খরা লৈজরবসু পঞ্জখিবা লাইরিক ময়াম অসিনা ময়েক শেংনা ফোঙদোকলি মদুদি জিরিবাম লমদমগী সাহিত্য লৈকোলদা মচু মখল কয়াগী লৈরাংমরাং কায়না শাৎলি। মীশিং পংয়াম য়াম্না লৈজদ্রবসু জিরিবামগী মণিপুরী সাহিত্যগী থৌদাংদি অত্য অথম লৈতনা চৎথরি, সাহিত্যবু শেমগৎ শাগৎলি। থোইনা হেন্না মকা লাম্না শাৎপা ওইরক্কনি হায়না আশা থমজরি অমসুং মপুং ফারবা ৱারী অমা ইরক্কনি হায়নসু খঞ্জরি।
0 কমেন্ট:
কমেন্ট তৌবিয়ু