চহী তরেৎ খুন্তাকপগী থৌদোক অমুক হন্না থোক্তনবা ঐখোয় অমত্তা ওইনা পুনশিনবা তঙাইফদে হায়বসি কাউরোইদবনি: টি মনিহার
ইম্ফাল, জানুয়ারি ১১ : চহী তরেৎ খুন্তাকপগী থৌদোক অমুক হন্না থোক্তনবা ঐখোয় অমত্তা ওইনা পুনশিনবা তঙাইফদে হায়বসি কাউরোইদবনি হায়না মণিপুরী সাহিত্য পরিষদ আসাম হোজাই দিষ্ট্রিক্ট কম্মিটিগী প্রেসিদেন্ট টি মনিহারনা ফোঙদোকখ্রে।
য়ুনাইটেদ লিটরেরি এদ্যুকেসনেল সোসেল এন্দ কালচারেল ওর্গানাইজেসন মণিপুরনা থম্বাল রাইজিং ক্লাব এন্দ লাইব্রেরী গোবিন্দপুর হোজাইদা পুন্না খুৎশম্নদুনা আসাম হোজাইগী গোবিন্দপুরদা পাঙথোকপা চহী তরেৎ খুন্তাকপা নীংশিং থৌরমগা মরী লৈননা মহাক্না মখা তানা হায়খি, চহী তরেৎ খুন্তাকপা মতমদা থেংনখিবা অৱাবা কয়া, মীওৎ-মীনৈ কয়া দুবু থেংনখিবা ঐখোয়গী ইনিংথৌ গম্ভির সিংহ, নরসিংহবু ঐখোয়না ঈকায় খুম্নবা উৎপা অমদি লৈ মনা কৎতুনা নীংশিংজবিন। মরুওইনা মপান্দা লৈরিবা মণিপুরীশিং অসি ৱাখল পরিং অমদা অমত্তা ওইনা পুনশিনবা তাই।
মচোই মচোই তাবগী ৱাখল্লোন থাদোকপা মথৌ তাই। ইনিংথৌ গম্ভির সিংহনা লৌখিবা থৌদাং অদু ঐখোয় খূদিংমক্না কাউফম থোক্তে। মরম অদুনা ব্রহ্মপুত্র ভেলিগী অকোয়বদা লৈরিবা মণিপুরীশিং ঙসিদি মীকপ থোকপগী মতম ওইরে হায়নসু ফোঙদোকখি।
থৌরম অদুদা চহী তরেৎ খুন্তাকপা নীংশিং থৌরমগী রিসিপসন কম্মিটিগী প্রেসিদেন্ট এল. শ্যামকিশোর, য়ুসীএমগী ভাইস প্রেসিদেন্ট ৱাই কে ধিরেন, অমকিলগী প্রেসিদেন্ট এল ঙানবী, হোজাই জি পিগী চেয়ারপার্সন ঐচ রোমোবালা, মণিপুর ষ্টেট শুমাং লীলা কাউন্সীলগী লাইফ টাইম সেক্রেটারী এস ঐচ হেমন্ত, অম্মিক্কী প্রেসিদেন্ট খাইদেম থোইবী, ফিল্ম ফোরাম মণিপুরগী চেয়ারমেন এল সুর্জকান্ত, মণিপুর ফিল্ম এন্দ টেলিভিশন টেক্নিকেল ইন্সটিট্যুট ইম্ফালগী দিরেক্টর বিরেন্দ্র সালাম, এম দি সী মেম্বার টি ঐচ ইরাবোত, ইচেম্মাগী এদিটর ডা. পি ঐচ বিরমনি, দি দি কে ইম্ফালগী প্রোগ্রাম এগজিক্যুটিভ টি ঐচ ব্রজবিধু, মণিপুরী পিপলস ফ্রন্ট আসামগী সেক্রেটারি জেনারেল এল ইঙাঙম্বা, সিনিয়র এক্টর এল জয়বিদ্যা, এমসুগী সেক্রেটারি জেনারেল টি ঐচ বিক্রমজিৎ, ওল আসাম মণিপুরী ষ্টুদেন্টস য়ুনিয়নগী প্রেসিদেন্ট এন জি সনাহল, অপূনবা মৈরা পায়বী লূপ ব্রহ্মপুত্র ভেলি আসামগী প্রেসিদেন্ট এল বোইজান্তি য়াওনা মীওই কয়াসু শরুক য়াখি।
থৌরম অদু লৈখিদ্রবা মহারাজ গম্ভির সিংহ অমদি হেরাচন্দ্রগী মফমদা লৈ-শু কৎতুনা ঈকায় খুম্লবা উৎপগা লোয়ননা চহী তরেৎ খুন্তাকপা নীংশিং থৌরম হৌদোকখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু