• 456
• ৩০শে জুলাই ২০২৩ ইং
• Share on:

খুদৈ মতেকনা ফিরাল ওইরকপা ইমেজরীগী তন্দন মরক্তা

লাইরিক্কী মিং: নাকেন্থানা লাকপদা

অইবা: হামোম প্রমোদ

অফোঙবা: বাংলাদেশ মণিপুরী সাহিত্য সংসদ

ফোঙবা মতম: জুলাই, ২০২৩

লাইরিক অসিদা ‘কোভিদ অমসুং ঐগী ৱারী’ মীংথোল মখাদা শৈরেংগী সিরিজ অমসু হাপ্লকখি। কবিনা কোভিদ১৯ লৈনাগা লান্থেংনদুনা লৈরুবা মতমগী অৱাববু শৈথাবনি, প্রোজ-পোয়েট্রিগী মওংদা ইরকপনি, অরিবা শৈরেংগী চৎনরোলশিংবু থাদোক্লগা মহৌশাগী জগৎতা লেপ্তুনা ইনৌ নৌবা শৈরেংগী মশক উৎলকপনি। ৱারেংগী মওংদি ওইরগা শৈরেংগী রিদম হাপ্তুনা ইবনি। শাথেক কায়রবা ছন্দশিং শিজিন্নদুনা ৱারেংগী মওংদা ইজরবসু শৈরেংগী ছন্দ অদুবুদি পুমথা থাদোকখিবদি নত্তে। শৈরেং খরসিদা কবিনা সিম্বোল, সিমিলি, মেটাফোর, ইল্যুশন মরাং কায়না শীজিন্নরকই। 

বাংলাদেশকী মণিপুরি সাহিত্যগী তম্পাক্তা ‘দ্বীপান্বিতা মথংগী যুগ’ হায়না খঙনরবা সাহিত্য য়াওল অসিগী লূচিং ফীরাল পাইরিবা কবি হামোম প্রমোদনি। মহাক্না মনিপুরি শৈরেংগী ইচেলদা অনৌবা অহোংবা কয়া পুরকখি। শৈরেংগী ফোর্ম, স্টাইল, টেকনিক, ৱাহৈ-ৱাতা, পান্দম-পুদম শিজিন্নবদা, শৈরেংগী নুংগী ওইবা ৱাখল্লোনদা, সিম্বোল-ইমেজরিনা চিংবা শাগৎপদা অনৌবা অহোংবা শক্তমগা শাগোন্নদুনা সাহিত্যগী লমদা খোঙদারকখি। খ্রিস্ট চহি ২০০৫ দা অহানবা শৈরেং লাইরিক ‘ৱাখলগী নাচোম’ ফোঙখিবা মখাদা অনিশুবা শৈরেং লাইরিক ‘নাকেন্থানা লাকপদা’ তাইবং মঙফাওনরে।

ঐখোয়গী অকোয়বদা লৈরিবা মনুং-মপানগী পুন্সি অসিগা ঐখোয়গী ইন্দিভিজুয়াল সোল অমদি নুংগী পুন্সি অসিগা থেংনরুবদগী থোরকপা রিয়েকশন অদুনা ফাওহল্লকপা ‘য়ুনিফাইদ সেন্সিবিলিটি’ অদুনা প্রমোদগী শৈরেংগী অশেংবা শক্তমনি। মৈতৈ ঐখোয়গী পুৱারী, নাৎ অমদি লীচৎতা খোয়দাজবা কবি হামোম প্রমোদনি।

লাইরক অসিগী মীংথোল শৈরেং ওইরিবা ‘নাকেন্থানা লাকপদা’ শৈরেংসিদা কবিনা মমালোন, মজাতিবু নুংশিববু শৈথারকই অসুম্না -

নুমিদাং ৱাইরমগী নুমিৎনা

কৈদৌঙৈদসু ৱারৌখিদে মেরাগী পূর্ণিমাদা

ঐখোয়তনা পেঞ্জদবনি

ইমালোনগী নুংশিরবা খোঞ্জেল

তান্থা ওইনা য়ৈরখি

ঐখোয়গী রকি মাউন্টেনদা। [নাকেন্থানা লাকপদা; ল: ৫৭]

নীংবা কায়রবা কবিগী লৈকংলাগুম্লবা থম্মোয়নদি ঈংলবা শান্তিগী ঈচেল অমত্তং খৌরাংনা ৱাখলগী উমংদা চঙলগা থিজরি। কবিগী শৈরেং খরদা নুংশিবনা মপুঙ ওইরগা মীওইবা পুন্সিগী অমম-অঙান, অৱা-নুংঙাইগী শক্তম্বু নীংঙমদবা অমগা লোয়ননা য়েক্লকখি। 

নোঙাল্লমদাইগী ঊন তোপ্ তোপ্ তারকখি, লেংজুমদা

নোকমি নোকমি ঙঙ্রানরবা নুমিৎ

শম্বলগী অহোবা থিদুনা

মীৎচিনা য়েঙকখি কনা উখিগনী মতাগুম

মফি-মরোল থৌশাদনা, য়াহৌঙনবী মৌ নহা

তরক তরক য়েঙকখি, মমিৎ অদু ফাকলি ফাকলি

তাইবং কনা খংহৌদনা উচিন নাচিন,

তুমিৎ ওন্দুনা পাইশনলি ঐগী কাদুদা

[লমজেল তানবা; ল: ৩৭]

ইমোশোনগী তিঙ লাউবা খোঞ্জেলবু ইমেজরি অমসুং মেটাফোরগী চরাং-খরাংনবা মরক্তা ফোঙদোরকই কবিনা অসুম্না -

''চিন্বানদা কয়ারক হায়গে খনখি, হায়ঙমদনা নঙগী য়োংখম মনাক্ত লেপ্তুনা লৈখি, নঙগী পাঙনদেম তারকপা ঙাইদুনা। ফিকোনচৈনা অসুম অসুম চাওথোরক্লবসু পাখং থৌনা অসুম অসুম শোন্থরকখি। হংগৎনা য়েংবা ঙমখিদে নঙগা মীৎচানখিনি খনলুবদা। লংচাক্কী শাংলবা লংলাদি লোইখিদে,তারকখিদে পাঙনদেম অমুক্তংসু।''

ওইদবনা অওইবা শারকপা, অরানবনা অচুম্বা শারকপা থৌদোকশিংনা হামোম প্রমোদবু খোয়শাউনহল্লি, ফোঙদোরকলি মহৌশাগুম ফাথবা ঙমদ্রবা পূক্নীংগী ইহুল শৈরেং ওইনা। খুন্নায়গী নাকয়েত্তা থোক্লিবা থৌদোক ৱাথোকশিংনা কবিগী থম্মোয়দা ফাওহল্লিবা পেন্দবা কয়ানা অশাউবগী মৈরী ওইনা কামথোরকপা ৱাহৈনা শাগৎপা শৈরেংগী মশক কয়াসু লাইরিকসিদা থেংনখি। ‘ল্যাম্পপোস্ট’ মীংথোনবা শৈরেংদা শহরগী মীরাওখোল মরক্তুদা ল্যাম্পপোস্ট অদুনা খংলাউ লাউরকখি মীওইবারোমদা ওনশিন্দুনা-

অমমবদা থোক্কদবা অকি তুজুংলবা থৌদোকশিংদো

ইমুং খুদিংগী ঙহাকলৈতনা থোক্লিবনি, নোংমগী কায়দনা

মমলবা শহরগী লম্বী নত্তে, শেন্নবিগদবদি য়ুম য়ুমগী কা মনুংদনি

মুথৎপিরম্মু ঐগী মঙাল, ঙালহনবিয়ু শহরগী কা পুম্নমক, অমত্তা চিৎথদনা

[ল্যাম্পপোস্ট; ল: ৫১]

প্রমোদকী মীৎয়েংদা উরিবা অথীবা, অমোৎপা খুন্নায়গী শক্তম অসিদি অহানবা শৈরেং লাইরিক 'ৱাখলগী নাচোম’দগী উৎথোকপা হৌরক্লবনি। রিয়েলিস্ট অমা ওইনা অশেংবা শক্তম উৎননবা হৌরম্বা কবিনা মনুং-মপান ফাওনা উৎননবা হোৎনরকই। অয়াম্বা শৈরেংগী থীমদা মমাঙগী শৈরেংশিংদগী পংখেন খেন্নদ্রবসু ৱাহৈনা হেন্না লুনা লৌদুনা মেটাফর মরাং কায়না শীজিন্নরকই। 

হিংবদা চোকথরবা ঐ 

নুঙাল্লমদাইগী লিক্লানা চামথোকপি

পেন্দবগী চৈসু পাইরগা অমুক

কোইথি থিবা চৎলি নুমিদাংগী

লানমৈ থাউমৈদো 

[লানমৈ থাউমৈ; ল: ৫২]

হামোম প্রমোদকী শৈরেংদা প্রকৃতিগী ফজরবা ইমেজরী য়াওরি, অদুবু মমাংঙৈগী লিরি খোইরীবা প্রকৃতিদু নত্তে। হায়বা য়াই- হার্দ এন্দ দ্রাইনি। 

লমহুক্নরবা লমখুনু পাইশিল্লকই য়েনখাদা

নুমিৎনা সনথোংদা ঙাইদুনা লৈরিঙৈদা

শাইজিনগী শেন্দ্রাংনা চাকতাবা চৎত্রিঙৈদা

শুমাংদা চোংঙাশিংনা মতু ফোইনরিঙৈদা। 

 [কোকিল অমসুং লমখুনু; ল: ৫০]

মজাতিগী মিথ, লেজন্দ, ফোকটেলগী মচলশিংদগী লৌবা সিম্বোল, ইমেজরি অমদি মেটাফোর মরাং কায়না শিজিন্নৈ। অদুনা কবিগী শৈরেংদা  মণিপুরদা চেনলিবা নমবোল তুরেলনা মথং মথং লাক্তুুনা কবিগী য়েন্নখাদা লৈবা বোরাক তুরেলদা চুমদ্রিং হেক্তা ফেনজিনখি। কৌব্রু চীংদোন্দগী শিন্থরক্পা পিরাং নুঙাল্লকপদা লিক্লা ওনদুনা লৈরম্মি, কবিগী হিংগোন্দা হৌরিবা হঙ্গাম মতোন্দা। কবিনা মীওই লমচৎকী অমোৎপা, অশোনবা মশক কয়াবু পুথোক্লগা ডি হু্মেয়নাইজেসনগী মশক উৎতুনা শৈরেংগী শক্তম শাগৎলি। প্যারাডোক্সিকেল ওইবা মীৎয়েংদা মশক তাক্নবা হোৎনরকই।

অহিং কয়া 

নুংথিল কয়া

য়োংখমগি নাকন্দা লেপ্তুনা লৈখি

নাকল অমদগী নাকল অমদা 

পাঙনদেম অদুনা হাই-হুমদুনা চৎলিবদো য়েংদুনা ।

লংলা অমমম তৌদুনা ফেনজিনলগা ওইরকখি

মোইরাংকাবি, কবোক চাইবি, শাংলবা ফিদুপ, 

ফিকোনচৈনা নোংমগী চাওথোরকলি, 

থম্মোয়না নোংমগী শোন্থরক্লি। 

[ঈ তোৎলবা পাঙনদেম; ল: ১৪] 

ঙসিগী পৎথ-পুমথরবা খুন্নায় অমদি মসিদা হিংলিবা মীওইশিংগী শক্তম্বু য়েক্লকপা শৈরেং কয়াসু য়াওরি লাইরিক অসিদা। ঐখোয়গী মাঙথরক্লিবা নাৎ-লীচৎ অমদি খুন্নায়সিগী শক্তম নোংমা নোংমাগী লৈই খোয়জিল্লক্লিবা অসিনা কবিবু তত্তনা লাংতক্নহল্লি। অসিগুম্বা চৈথেংশিংসিগী নুংহীক্নরবা চৈনাখোলদা য়ুম্ফম ওইবা শৈরেং কয়াদং য়াওরি লাইরিকসিদা। খূদম ওইনা-

ঙরাংতা শগোল কাংজৈ শান্নরম্বা কাংজৈবুং ঙসিনা চাওরবা মার্কেট ওন্থোকখ্রবদা

খম্বা থোইবীগী মপান নাইদ্রবা লোক্তাক পাৎ মখোয়গী শেন্দান লম্বী ওইনরক্লবদা

মোইরাংগী য়ুমথোং খুদিংগী য়োংখমদা ফিদুপকী মহুৎতা অঙৌবা ফি মতেকঙাক্ত

ঐদি থাজদ্রে, 

অন্দ্রোগী মৈরাদো হয়েংসু চাকখিগনি হায়বা। সুক থা থাজদ্রে। 

[অন্দ্রোগী মৈ; ল: ৪৫]

প্রমোদকী শৈরেংশিং মশাগী নাক-য়েৎ অমদি অকোয়বদা লৈরিবা মশক উবা অমদি উবা ফঙদবা কয়ানা পীরকপা মপুক্নীংগী ইথিলনা পুন্সিগী খোঙচত্তা খুরৌ থাংলকপদগী মশাগী ওইবা এক্সপেরিয়েন্সতা য়ূম্ফম ওইবনি। মহাক্কী শৈরেংদা মণিপুরনা চাওরবা ইথিল পীরকই। অয়াম্বা শৈরেংদা মণিপুর সনা লৈপাকপু নীংশিংলি, মণিপুরগীদমক হরাওরি, তেংথারকই, পেন্দবা ফোঙদোকই। ‘ইম্ফাল, ঐসু লাক্কনি নোংমদি’ হায়বা শৈরেংদা মহাক্না হয়িং, কুরাক, কাং, তুমিৎ, কাকফৈ নত্রগা ঙাখা, পুথি, ক্বাক ওন্দুনা ওইরবসু মণিপুর সনা লৈপাক্তা খোংদারুবগী আশা থমখি। নোংমৈ চিদোন্দা হিংলিবা মণিপুরগী পুন্সিবু তেংথাদুনা কবিনা হায়রকই-

লাক্কনি ইম্ফাল নোংমদি, কুরাক ওন্দুনা

তোংলগনি তমথিরবা, লান্মীগী নোংমৈ চিদোন্দা,

শিগনি খঙনা খঙনা 

অদুগা অমুক স্যাটায়ার তৌরকই- 

লাক্কনি ইম্ফাল, নোংমদি শোয়দনা

কাকফৈ ওন্দুনা, কাফৈ কাফৈ

কাবিনগনী ময়ামগা নোংমাইজিং চীংগী চীংদোন্দা।

[ইম্ফাল, ঐসু লাক্কনি নোংমদি; ল: ৩২]

মীওইবনা স্বার্থগী তোব্বার্ন্দা লেপ্লুবদগী অশেংবা নুংশিবা মাঙখ্রবা, অচুম্বা থিবা ফঙদ্রবা খুন্নায় অমা ওইরকপদগী মীনম্বনা থল্লবা ঐখোয়গী শাজৎ-লিচৎপু ময়েক শেংনা য়েক্লকখি ‘ইম্ফাল ডায়েরী: ১৩ আগস্ট ২০১৭’ মীংথোনবা শৈরেংদা। 

মমীংতমক মঙাইরে, মমীংতমক!

লম্বীগী মমীং, কৈথেলগী মমীং

বীরটিকেন্দ্রজীৎ রোড

থাঙ্গালবাজার

পাওনাবাজার

লৈবাক নিংবা ৱাহৈগী লৈপরেং, লমজাওদা থরোমারো

লৈনম য়াওদ্রবা লৈরাং, খুজোক খুজোক, নুঙগী মুর্ত্তীমাংদা।

[ইম্ফাল ডায়েরী: ১৩ আগস্ট ২০১৭; ল: ৪৩]

ঐখোয়গী সমাজবু মথক-মখা ওন্না য়েংলবগী তুংদা মীৎমাঙদা উরিবা ফজবা, অথীবা, পেন্দবা অমদি থম্মোয় শোকপনাচিংবা অয়ূক-নূংথিল থোক্লিবা থৌদোকশিংবু প্রমোদকী শৈরেংশিংনা ফাদুনা পুরক্লগা ময়ামদা য়েংহন্নবা হোৎনৈ। সমাজগা মীগা অমদি থৌদোক-ৱাথোকশিংগা লৈনবা মরীনা থম্মোয়দা রিয়েক্ট তৌরকপা অদুমক উৎথোরকপনি। অদুগা লোয়ননা মতমনা পুরকপা অকনবা নোংলৈ নুংশিৎকী শহুমদা কবি অসিনা তোপ-তোপ্পা চাংয়েং তৌরকই। 

''খামেনশীনবিনা পোকখাইরক্লবদা, বাধাকোপীনা শাৎকাইরক্লবসু, মোনশাউবিনদি কৈদৌনুংদসু শাউরকখিদে। ঐতনা নুঙাইজখিদবনি, খুইজিল্লবা পাম্বিশিংদো উবদা।

হিদেনপানগী ৱারক্তগী উচিন নাচিন লিৎথোক্তুনা, ঙারিনদুনা থরো থরো ওনখিবদো মনিং লৈকাইগী পুখ্রিচৌদুদা, ঙা লুমলিবা ঙালাকপিনা উহৌদ্রবসু, ঐনদি করম্না কাউথোক্লুনি, পাবুংনা পুনদা য়োক্লিবা ঙামুশিংদো।''

[নোংমাইথেম লৈকায়গী লৈহাউ শাৎলরোইদো হয়েংদগী; ল: ২০]

একজিস্টেনসোলিস্টগী ৱাখল্লোন চেনবা শৈরেংসু য়াওদবা নত্তে প্রমোদকী শৈরেং য়েন্দায়দা, তৌবগীদি স্যাটায়ার মীৎয়েংনি।

খরুবি ওনলুরবা ঐসে অমুক্কসু উতিন ওন্নিঙলক্লবনি

''তৌববুদি মিরাং মহুমদা মিরাং অমা ওন্না লৈবসিনা মনুঙাইখি

তিলগী লাংদা ফারবা মখল মথেলগী তিল-কাং শান্ন শান্নদুনা''

[নিংথমথাগী লিরি হুমবা নুংশিৎ; ল: ৩৬]

লাইরিক অসিদা ‘কোভিদ অমসুং ঐগী ৱারী’ মীংথোল মখাদা শৈরেংগী সিরিজ অমসু হাপ্লকখি। কবিনা কোভিদ১৯ লৈনাগা লান্থেংনদুনা লৈরুবা মতমগী অৱাববু শৈথাবনি, প্রোজ-পোয়েট্রিগী মওংদা ইরকপনি, অরিবা শৈরেংগী চৎনরোলশিংবু থাদোক্লগা মহৌশাগী জগৎতা লেপ্তুনা ইনৌ নৌবা শৈরেংগী মশক উৎলকপনি। ৱারেংগী মওংদি ওইরগা শৈরেংগী রিদম হাপ্তুনা ইবনি। শাথেক কায়রবা ছন্দশিং শিজিন্নদুনা ৱারেংগী মওংদা ইজরবসু শৈরেংগী ছন্দ অদুবুদি পুমথা থাদোকখিবদি নত্তে। শৈরেং খরসিদা কবিনা সিম্বোল, সিমিলি, মেটাফোর, ইল্যুশন মরাং কায়না শীজিন্নরকই। 

ওহ! ওহ! শ্বোর ফুল্লে ও ও২ ও ও২ ওক্সিজেন! ওক্সিজেন! ... খজিক্তংগা, কোলিংবেল নম্মী, কৌই, নার্স! নার্স! ও ও২, ও ও২ ওক্সিজেন ... শ্বোর হোন্বা ঙমদ্রে, ৱারে। ঐ ৱারে, শ্বোর হোন্বা ...। শ্বোর হোন্বা, শ্বোর হোন্বা ৱারে, ৱারে ...।

ইমা! ইমা! ইমা! 

নার্স! নার্স! নার্স! ... 

আহ! আহ! আহ! আহ! 

ঐ ৱারে, ইমা!  

[কোভিদ অমসুং ঐগী ৱারী—০১; ল: ৬০]

অদুবু, অপাবদা ঙকহনগদবা মতাংদি, অসুক্কী মতিক অৱাবা তঞ্জাসিদসু হাসপাতালগী ফমুংদা মেশিনগী মরি-মরাং মরক্তা হিপ্লীবা কবিনা নীংশিংলকখি মোন্ত্রিয়লগী লৈরক লৈরক খুদিংদা, কানাদাগী লৈকায় লৈকায়দা, নাকনদা, চিদাইদা, থোঙ্গাান্দা, য়েন্নখাদা শাৎলিবা হাইড্রেঞ্জা, রোদাদ্রেনদ্রান, ক্যামেলিয়াবু অদুগা সিঙ্গারৈ অমতং, লৈহাওপাম্বী অমতং, চীকোংলৈগী চারা অমতং থীবা ফঙদবগীদমক কবিনা লাংতক্নবা ফোঙদোকই।

''ঐনা মাউন্টরোয়েলগী লৈখোং লৈরক পুম্নমক কোয়থি থি-খি, লা-ফোন্তেন পার্ককী মায়কৈ মরীদা কোয়চৎ চৎতুনা য়েংখি, চাওখ্রবা জেরীপার্ককী মায়কৈ অমদগী মায়কৈ অমদা কোয়চেন চেনখি। অহিংদা, নুংথিলদা, নোঙাল্লকপদা, নুংথিন পোবোপতা, ইদোমতা, মরূপ মপাংগা, ইচাশিংগা। নোংজুথাগী নোংমরক্তা, কালেনগী নুংশামরক্তা, ইংথমথাগী ঊনমরক্তা। সিঙ্গারৈ অমতং, লৈহাওপাম্বী অমতং, চীকোংলৈগী চারা অমতং। টরন্তোগী অকাসিয়া পার্ককি খা-ৱাং, নোংপোক-নোংচুপ কোইথুং থুংনা য়েংলুবনি, সিঙ্গারৈ পাম্বি অমতং। নায়াগ্রাফোলস তোর্ব্বানগী ফজরবা লৈকোন পুম্নমক চং-চংদুনা য়েংজবনি-লৈহাও পাম্বি অনিতং। ''

[কোভিদ অমসুং ঐগী ৱারী—০৪; ল: ৬৮]

সিরিজ অসিগী শৈরেংশিং কোভিদ লৈনানা অৱাবা মায়োক্নরবা মীওইগী ফীভমদুবু পাউদম্বা ওইরবসু অসিদা ফজরবা মেসেজ খরা অদুমক য়াওরকই। হায়রক্লিবা ৱাহৈশিং ইচম চম্বা শৈরেং নত্তে, অৱাবা পুন্সিগী পাউদমখক্তসু নত্তে, মীওইবা পুন্সিগী সিদা-হিদাকনি কবিনা তাক্লিবা। য়েংসি মতেক অমা-

 ... চেনগনু, পোত্থাও, ঙহাক লেপ্পু, অদুবু থেংনগদবনি, ইশিংদা, কংফালদা, চীংদোনদা, মোংশোংদা, মীরক্তা, উরক্তা, অমম্বদা, অঙানবদা। মীয়াম মরক্তসু, ইদোমতসু থেংনগদবনি। থেংনগদবনি, খংহৌদবা মীকুপ্তা মাংখিবা, চেকশিন্দবা ক্ষেনফমদা লমহুক্নখিবা য়াই। অদুবু চেনগনু, মীচেন ওইগনু। চেনগনু, থেংনগদবনি। মীয়াম মরক্তসু, ইদোমতা ওইরসু, থেংনগদবনি।

[কোভিদ অমসুং ঐগী ৱারী০২; ল: ৬২]

শৈরেং ইবা হায়বসি ৱাখলগী নীংতম্বা চঙঙি। তশেংনা হায়রবদা, কবি অমা ওইবা তারবদি মঙ মঙবা হৈবা তাই, মঙলানদসু, তাইবংদসু। মঙলানগা তাইবংগা লংদাই তাইশিল্লগা শাগৎপা ফজরবা শৈরেংগী শক্তমনি লাইরিকসিদা য়াওরিবা ‘কোভিদ অমসুং ঐগী ৱারী’ মীংথোনবা শৈরেংগী সিরিজ। 

মহাক্কী শৈরেং খরদা অতোপ্পা লোনগী ৱাহৈবু লৈথেৎ ওইনা শীজিন্নরগা শৈরেংগী হকচাং শাগৎলি। খুদম ওইনা খরা-

  *   এক্সরসাইজ, হেলথি এন্ড স্ট্রোং

 *   টেনশন লৈত্রবা লাইফ স্টাইল

 *     য়ূম্বাল্লোন-ডিপ্লোমেসিগী ফিদুপ্না খ্বাঙদা খাঙজেৎ লাক্তুনা

 *     ব্যাল্যান্স মথৌ তাদ্রবা নীংথিরবা নিংজোম

  *   মাইনাস ফোরটি’দা য়োমশিল্লগা পুরকপনি

হামোম প্রমোদকী শৈরেং অয়াম্বা ফজরবা সিম্বোল কয়া, ইমেজরি মচা মচানা শাগোন্নহল্লগা অপাবশিংগী মাঙদা লান্থোরকপনি। খুদৈ মতেক অমবু ফিরাল ওইনা উবা ঙম্লবা কবি হামোম প্রমোদকী কল্পনাগী কল্লবা পাঙ্গল অমনা শাগৎলকপা শৈরেংশিং মচং ঙাক্তনি, খৈদোক্নিঙায় লৈতে। ফ্যান্টাসি মচা মচা শিজিন্নদুনা ন্যারেটিভ স্টাইলদা ইবা শৈরেংনা অয়াম্বা ওইনা তৌই। অদবু ইম্পরেটিভ স্টাইল অমসুং ইচম চম্না ল্যান্ডস্ক্যাটচ অমা য়েক্লগা থম্লম্বা ডেসক্রিপ্টিভ স্টাইল ওইনা ইবা শৈরেং খরসু য়াওই। মঙ-হাগী ইমেজরিশিংনা অমগা অমগা উরীগুম য়েৎশিনহন্দুনা শাগৎলকপা শৈরেংসু য়াওই। রোমান্টিক পোয়েটগুম্না পোয়েট্রি মেটরদা পোয়েট পার্সোননা য়াওশিনবগী মতৌসিমদি শৈরেং অয়াম্বদা উবা ফঙঙি। 

হামোম প্রমোদকী শৈরেংগী খোঙচৎ লেপ্পা লৈতবা ওইসনু।