ইম্ফাল, সেপ্টেম্বর ৬ : বিষ্ণুপুর দিস্ত্রিক্তকী মনুং চনবা তোর্বুংদা সেক্যুরিতিনা শাজিল্লিবা বঙ্কর অমদি খাজিল্লিবা বেরিকেদশিং নমখায়নবা কোকোমি অমদি মীয়াম্না ঙসি চঙশিনখিবা খোঙজংদা ফৌগাকচাও ইখাই বাজারদা সেক্যুরিতিগা অকনবা মওংদা মূক্নরকপদগী সেক্যুরিতিনা টিয়ার গ্যাস সেল অমদি রবার বুলেত কাপ্পদা পাউমী অমা য়াওনা মীওই ৬০ রোম অশোক-অপন নংখ্রে।

কোকোমিনা লাউথোকখিবগা খোঙজং অদুগা মরী লৈননা ঙসি তম্পাক্কী দিস্ত্রিক্তশিংদা কার্ফিয়ু থম্বগা লোয়ননা ক্বাক্তা তাবা তিদিম লম্বীগী কৈশাম্পাৎতগী হৌরগা তোঙান-তোঙানবা মফম কয়াদা মণিপুর পুলিসনা চেক পোইন্ত কয়া হাংদুনা অচৎ-অওকশিং চেক তৌবগী থবক চত্থখি।

মণিপুর পুলিসনা মফম কয়াদা অসুম্না অকনবা মওঙদা চেক তৌবগী খোঙথাং লৌখৎলবসু অয়ূক পূং ১১ রোম তাবদা তম্পাক্কী তোঙান-তোঙানবা মফমশিংদগী মশীং য়াম্লবা নুপী অমসুং নুপা কয়া ক্বাক্তা বাজারদা থুংজিল্লকখি। ঙসিগী খোঙজং অদুগা মরী লৈননা অয়ূক অঙনবদগী হৌদুনা স্তেত পুলিস, আর এ এফ, সি আর পি এফ, আই তি বি পি অমসুং কুমাওন রেজিমেন্তকী পার্সোনেলশিংনা ক্বাক্তা বাজারদগী হৌরগা তোর্বুং ফাওবগী মফম কয়াদা বেরিকেদ খাজিন্দুনা খোঙজং চঙশিল্লক্লিবশিং অদু থিংনবা অকনবা খোঙথাং লৌখৎখি।

অয়ূক্কী পূং ১১ রোম তাবদা ক্বাক্তা বাজারদা মীয়াম থোমজিল্লক্লিবা অদু থিংনবা স্তেত সেক্যুরিতি ফোর্সনা বেরিকেদ খাজিন্দুনা থমখি। খোঙজং অদুবু  লুচিংলকখিবা কোকোমিগী লুচিংবশিং অমসুং মীয়ামগী ওইবা মীফম অমা ক্বাক্তা বাজার কম্যুনিতি হোলদা পাঙথোক্লবা মতুং বিষ্ণুপুর দিস্ত্রক্ত পুলিসকী এস পি য়াওনা তকথোক্কদৌরিবা বঙ্কর অমদি বেরিকেদশিং অদু পূন্না চৎতুনা য়েংশিন্নমিন্নখি। বঙ্কর অমসুং বেরিকেদশিং অদু য়েংলুরবা মতুঙদা কোকোমিগী কনভেনর জিতেন্দ্র নিংঙোম্বা, কো-কনভেনর জয়চন্দ্র কেন্থৗজম, মিদিয়া কো-ওর্দিনেতর সোমোরেন্দ্রে থোকচোমনা লুচিংবা তিম অদুগা তম্পাক্কী তোঙান-তোঙানবা , মফমশিংদগী থোমজিল্লক্লিবা মীয়াম অদুগা ক্বাক্তা পাব্লিক গ্রাউন্দদা মীফম অমা পাঙথোকখি।

মীফম অদুদা কোকোমিগী মায়কৈদগী ফৌগাকচাও ঈখায়দগী তোরবুং ফাওবগী মনুংদা ইন্দিয়ান আর্মি অমসুং কুকি লালহৌবশিংনা শাজিল্লিবা বঙ্করশিং আগস্ত ৩০ ফাওবগী মনুঙদা তকথোক্নবা খঙহনখিবা লৈখ্রে। অদুবু মসিগী ওন্ন-তৈনবদা ফৌগাকচাও ইখাইদগী মিতর ২০০ রোমদমক চত্থরগা আর্মিনা বঙ্কর শাজিল্লম্বা থেংনরে। মীয়াম্না পাম্বদি তোর্বুং কম্যুনিতি হোল ফাওবা তকথোকপনি। সরকারনা মীয়ামগী অপাম্বা অদু থবক্তা ওন্থোক্নবা থা অসিগী ১৫ ফাওবদং ঙাইবীয়ু হায়রকপা লৈরে। সরকারনা হায়রিবা মতম অসি ফাওবা ঙাইবা নত্ত্রগা ময়িামগী অপাম্বগী মতুং ইন্না সেন্ট্রেল ফোর্সশিংনা শাজিল্লিবা বঙ্করশিং অসি তকথোকপা হায়বদু ঐখোয় পুন্না ৱারেপ লৌমিন্নরগা পাঙথোকসি হায়খি।

মীফম অদুদা শরুক য়াখিবা তোর্বুংদগী ভোলুন্তিয়র অমনা, চহী অসিগী মে ৩ দগী হৌরকখিবা ঈরাং অসিনা মরম ওইরগা তোর্বুং গ্রাম পঞ্চায়তকী মনুংদা লৈবা মীওইশিং লাঞ্জেন্নদুনা হৌজিক রিলিফ কেম্পতা লৈরি। অদুবু স্তেত ফোর্সনা ঙাক শেন্দুনা খুঞ্জাশিং য়ূমদা হঞ্জিন্নরকপসু য়াওরে। ঙসি বঙ্করশিং তকথোক্লম্লগা মখা তানা কনানা খুঞ্জাশিংবু ঙাক শেনবীগনি হায়বা ৱাফমসু থম্লকখি।

মীফম অদুগী মতুংদা মীয়ামনা ঈরাং হৌরকপগা লোয়ননা ক্বাক্তা বাজারদা থিংলিবা বেরিকেদ অদু নমখায়নবা হোৎনবদা স্তেত ফোর্সকী মায়কৈদগী টিয়ার গ্যাস সেল কয়া কাপখি। অদুবু মীয়াম্না স্তেত ফোর্সকী অথিংবা অদু নমখায়দুনা ফৌগাকচাও ঈখায় বাজার ফাওবা তকশিনখি। ফৌগাকচাও ঈখায় বাজারদা আর এ এফ অমদি অতৈ সেক্যুরিতি ফোর্সশিংনা থিংবদগী মতম শাংনা ৱারী শান্নখি। অদুবু নাকল অনীগী মরক্তা য়ানবা পুরকপা ঙমদবদগী মীয়াম অমদি সেক্যুরিতি ফোর্সকী মরক্তা অকনবা মওংদা মূক্নরকখিবগা লোয়ননা সেক্যুরিতি ফোর্সকী মায়কৈদগী টিয়ার গ্যাস সেল কয়া কাপ্পদা নৎতনা ব্লেঙ্ক ফায়ারসু তৌখি। থৌদৈাক অদুদা নুপী কয়া অশোক-অপন নংখিবদা নত্তনা থৌদোক অদুবু কভর তৌরিবা এ এন আইগী পাউমী এল কান্তসু শোকখি।

শোক্লবশিং অদু খূদক্তা মোইরাং প্রাইমারী হেলথ সেন্টর, বিষ্ণুপুর দিস্ত্রিক্ত হোস্পিতাল অমসুং রাজ মেদিসিতদা পুখৎতুনা লায়কন্নখি। ঙসিগী থৌদোক অসিদা পুন্না নুপী অমদি নুপা ৬০ রোম অশোক-অপন নংখি হায়রি।

সোর্সঃ পোক্নফম