কবি চাউবগী ১২৯ শুবা মপোক কুমওন পাঙথোকখ্রে
ইম্ফাল, জানুয়ারি ২৩ : মণিপুরী লিতরেচরদা মীয়াম্না ‘মৈতৈ কবি’ হায়না খঙনবা সাহিত্যরত্ন খ্বাইরাকপম চাউবগী ১২৯ শুবা মপোক কুমওন থৌরম ঙসি নহারোল সাহিত্য প্রেমী সমিতি, ইম্ফালনা শীন্দুনা লংথাবাল কুঞ্জ ময়াই লৈকায়দা লৈবা দাঃ কমল লিতরেরি কমপ্লেক্সতা পাঙথোকখ্রে।
নহারোল সাহিত্য প্রেমী সমিতি, ইম্ফালগী প্রেসিদেন্ত নাওরোইবম ইন্দ্রমণিনা প্রিসাইদ তৌখিবা থৌরম অদুদা মণিপুরী লেংগ্বেজ এদভাইজরি বোর্দ, সাহিত্য একাদেমিগী কনভেনর প্রোফেসার রাজেন তোইজাম্বনা চীফ গেস্ত ওইনা শরুক য়াখি।
থৌরম অদুগী মপূং ওইবা শরুক্তা ‘খ্বাইরাকপম চাউবাঃ সাহিত্যকার অমসুং ক্রিতিক অমা ওইনা’ হায়বসিদা মণিপুর য়ুনিভার্সিতিগী ভাইস চাঞ্জেল্লর (ইন-চার্জ) ওইরম্বী প্রোফেসার এস সনাতোম্বীনা ৱা ঙাঙখি।
নহারোল সাহিত্য প্রেমী সমিতি, ইম্ফালগী জেনারেল সেক্রেটারি দাঃ হুইরেম তেম্বনা হায়খি, সমিতি অসি লিংখৎখিবা চহী ৬৪ মপূং ফারে। শাংলবা চহী কয়া অসি সমিতি অসিনা লমদম অসিগী খোরিরোল চাওখৎনবা হোৎনবদা থৌদাং লৌদুনা লাক্লি। সমিতি অসিনা মোর্দন মণিপুরী লিতরেচরগী লময়ানবা খূৎমাবা কবি তরেৎকী মপোক কুমওন থৌরমশিং পাঙথোক্তুনা লাকপনি। মসিগী মনুং চন্না ঙসিগী সাহিত্যরত্ন খ্বাইরাকপম চাউবগী মপোক কুমওন অসি পাঙথোকপনি।
মনিপুরী লিতরেচরগী পূক্কৈগী মচাক ওইহৌনবা সমিতিনা পাঙথোকপা মপোক কুমওন খুদীংগী মণিপুরী খোরিরোল অমসুং হায়রিবা কবি অদুগা লৈনবা মরীদা য়ূম্ফম ওইবা তোপিক্তা রিসোর্ছ পার্সনশিংগী পেপর পাথোকহল্লি। মখোয়না পাথোকখিবা পেপর অদু সমিতিগী সোভেনরগা ফোঙদুনা মণিপুরী লিতরেচরগী পূক্কৈ ওইহৌনবা হোৎনবনি হায়না তেম্বনা ফোঙদোকখি।
ঙসিগী থৌরম অদুদা মরু ওইবা শরুক অমা ওইনা লৈখিদ্রবা সাহিত্যরত্ন খ্বাইরাকপম চাউবগী ফোতোদা হৈকৎ-লৈকৎ তমদুনা ইকায়খুম্নখি।
সোর্স: পোক্নফম
0 কমেন্ট:
কমেন্ট তৌবিয়ু