এম কে বিনোদিনী দেবীগী ১০৪ শুবা মপোক কুমওন পাঙথোকখ্রে
এম কে বিনোদিনী অসি লমদম অসিগী তাঙলবা লননিঃ অরিবম শ্যাম শর্মা
ইম্ফাল, ফেব্রুৱারী ৬ঃ মহারাজ কুমারী বিনোদিনী দেবীগী ১০৪ শুবা মপোক কুমওন নুমিৎকা লোয়ননা লৈমরোল খোর্জৈকোল (লৈকোল) গী জর্নেল ফোঙবগী থৌরম অমা লৈকোলনা শীন্দুনা মণিপুর স্তেত সেন্ত্রেল লাইব্রেরিদা ঙসি পাঙথোকখ্রে।
এম কে বিনোদিনীগী ফোতোদা হৈকৎ-লৈকৎ তমদুনা হৌদোকখিবা থৌরম অদুদা চীফ গেস্তকী ৱারোল পীরদুনা শক্নায়রবা ফিল্ম মেকর অরিবম শ্যাম শর্ম্মানা হায়, লমদম অসিগী লাইপোক্কুম্না পোকখিবা মীওই কয়াগী মনুং দা এম কে বিনোদিনী লমদম অসিগী তাঙলবা লন অমনি। মহাক্বা শম্লখিবা ইন্সতিত্যুতশিংগী মনুংদা রূপ রাগ, গবর্নমেন্ত দান্স কলেজ অমদি লৈকোল অসি য়ান্না মরুওইখি।
এম কে বিনোদিনীনা মচানুপী য়াওদবা অসি য়ান্না নুংঙাইজখিদে। মহাক্লা পামজখিবা মচানুপী অদু লৈকোল অসিদা শেমগৎখিবনি হায়না খল্লি। মরম অসিনা মণিপুরদা নুপী অইবী খক্কী ওইবা লৈকোল কৌবা ওর্গনাইজেসন অমা লৈ হায়বসি হেন্না পাক-শন্না খঙহনবা মথৌ তাই। অইবী অমা ওইনা এম কে বিনোদিনীনা সাহিত্যগী লমদা তন্বীরম্বা খুদোল অসি মমল নাইদে। সাহিত্যগী লমদখক নত্তনা তোঙান-তোঙানবা হীরম কয়াদসু মহাক্লা শীংথানিংঙাই ওইবা খৌদাং কয়া লৌরমখি হায়খি।
লৈকোলগী প্রসিদেন্ত সিঐচ সুবদনীনা প্রিসাইদ তৌখিবা থৌরম অদুদা জে এন এম দি এগী ত্রাইবেল দিপার্তমেন্তগী হেদ অমদি রিতায়র্দ গুরু অহল গাংমে আলুনা কবুইনিনা গেস্ত ওব ওনর ওইনা শরুক য়াখি।
থৌরম অদুদা ঙসি ফোঙখিবা জর্নেল অদুগী এদিতর ইন চীফ দাঃ সিঐচ শিলারমণিনা ৱাফম কয়া থমখি।
সোর্স - পোক্নফম
0 কমেন্ট:
কমেন্ট তৌবিয়ু