• 452
• ২৮শে এপ্রিল ২০২৫ ইং
• Share on:

ইবোয়াইমদা থিয়াম প্রেমকুমার এৱার্দ-২০২৫ পীরগনি

ইম্ফাল, এপ্রিল ২৭ : চহী খুদীংগী সাহিত্য থৌপাং লূপ (সাথৌলূপ) না পীবা থিয়াম প্রেমকুমার এৱার্দ-২০২৫ চহী অসিগী ওইনা ইবোয়াইমা লাইথংবমদা পীরগনি হায়না সাথৌলূপকী মায়কৈদগী ফোঙদোরক্লি।

সাথৌলূপকী সেক্রেতরি এম উত্তমকুমারনা থাদোরকপা চেরোল অমনা হায়, চহী খুদীংগী মেগী তাং ৩ অসি ‘ৱার্ল্ড প্রেস দে’ হায়না মালেমগী মফম কয়াদা পাঙথোক্নবগুম সাথৌলূপনসু নুমিৎ অসিদা মণিপুর প্রেস ক্লবতা হায়রিবা পালন থৌরম অসি পাঙথোক্কনি।

নুমিৎ অসিগী মরী লৈননা লূপ অসিনা চহী খুদীংগী মিদিয়াগী লমদা শীংথানিংঙাই ওইবা থবক তৌররিবশিং দা পীবা থিয়াম প্রেমকুমার এৱার্দ চহী অসিগী ওইনা শক্নায়রবা জর্নেলিস্ত ইবোয়াইমা লাইথাংবমদা পীরগনি। ঙসি ফাওবদা মহাক্না মিদিয়াগী লমদা কত্থোকপগা লোয়ননা তৌরিবা কন্ত্রিব্যুসন অদুবু শকখঙবা অমসুং ইকায় খুম্নবা ঊৎপা ওইনা এৱার্দ অসি মঙোন্দা পীবনি। এৱার্দ অসিদা শেল ওইনা লুপা লীশীং ১০ গা লোয়ননা সাইতেসন অমসুং শাল অমা য়াওরি।

লাক্লিবা মে ৩ দা মণিপুর প্রেস ক্লবতা পাঙথোক্কদৌরিবা ‘ৱার্ল্ড প্রেস দে’ গী থৌরম অদুদা পাউমী ওয়েলফিয়ার ফাউন্দেসনগী চেয়ারমেন নিংথৌখোংজম তোম্বী রাজনা চীফ গেস্ত অমসুং এ আই আর ইম্ফালগী এসিস্তেন্ত দিরেক্তর (নিউজ) তি ঐচ জোগেন্দ্রজিৎ (আই আই এস) না প্রিসাইদ তৌগনি।

লোয়ননা নুমিৎ অসিদা কলম্নিস্ত, ক্রিতিক অমসুং ত্রান্সলেতর তোংব্রম অমরজিৎনা ৱা ঙাঙগনি হায়নসু চেরোল অসিনা মখা তারি।

সোর্স: পোক্নফম