ইন্টারনেসনেল ম্যুজ দিজাইন এৱার্দ পীরক্লে
ইম্ফাল, সেপ্টেম্বর ৩: মাউন্ট মণিপুর মেমোরিয়েল প্রোজেক্ট দিজাইনা তৌবগীদমক ষ্টেট অসিগী হুইদ্রোম দিজাইন ষ্টুদিওনা মালেমগী মমিং লৈরবা ‘ইন্টারনেসনেল ম্যুজ দিজাইন এৱার্দ ২০২২’ ফংলক্লে। পনবা য়াবদি লমদম অসিগী ফ্রিদম ফাইটারশিংদা কৎতুনা স্কোয়ার ফিট ৪৫,০০০ পাক চাওনা শাবা মাউন্ট মণিপুর মেমোরিয়েল অসিদা নিংথৌরেলগী শমু য়াওবা ম্যুজিয়ম, থাংশাং য়াওবা ফুরা, গেল্লরিশিং, আউতদোর ওদিটোরিয়াম, কেফটেরিয়া অমসুং ফজরবা লৈকোল অমা য়াওরি।
মসিদা মহারাজ কুলচন্দ্র অমসুং অতৈ মণিপুরী ফ্রিদম ফাইটার ২২ দা কৎপা থাংশাংগী ফুরা য়াওবা মেমোরিয়েলসিনা মালেমগী মীওই কয়াগী পুক্নিং চীংশিনবা ঙম্বা স্ট্রাকচার অমা ওইরি। মতাং অসিদা পনবা য়াবদি নিংশিং ফুরা অসি লমদম অসিগী অথৌবশিংদা কৎপনি অদুগা মসি শারিবা মাউন্ট হেরিয়েট অসিনা আন্দমান এন্দ নিকোবর আইলেন্দদা খ্বাইদগী ৱাংবা অহুমশুবা চীংদোন ওইরিবনি।
কুমজা ১৮৯১ দা থোকখিবা এঙ্গলো মণিপুরী ৱারদা মহারাজ কুলচন্দ্র অমসুং মহাক্কী লান্মী ২২ কৈশুমশংদা ফাদুনা থমখিবনি। এঙ্গলো মণিপুরী ৱারদা লানফা ওইদুনা থমখিবা মণিপুরগী মহারাজ কুলচন্দ্র অমসুং মহাক্কা লোয়নখিবা থৌনা ফবা ইপা ইপু ২২ ইকায়খুম্নবা ওইনা গবর্ণমেন্ট ওফ ইন্দিয়ানা মাউন্ট হেরিয়েটপু ‘মাউন্ট মণিপুর’ হায়না কুমজা ২০২১ দা মমিং ওনখিবনি। মণিপুরনা বৃটিশ সম্রাজ্যদগী নিংতম্নবা হোৎনবগী শরুক অমা ওইনা এঙ্গলো মণিপুরী ৱার থোক্তুনা লানফম অসিদা বীর টিকেন্দ্রজিৎ অমসুং থঙ্গাল জেনরেলবু ফৈদাবুংদা ফাসি তৌদুনা হাৎখিবনি। মসিগী মতুংদা মহারাজ কুলচন্দ্র অমসুং লমদম অসিগী ইপা ইপু ২২ বু লানফা ওইনা বৃটিশ লোইলম লৈঙাক্না কলাপানি, মাউন্ট হেরিয়েট কৈশুমশঙদা থমখি।
থৌদোক অসিগা মরী লৈননা মাউন্ট হেরিয়েটতা শাবা মাউন্ট মণিপুর মেমোরিয়েল প্রোজেক্ট মশক খঙবদিুনা প্রোজেক্ট অসিবু দিজাইন তৌরিবা হুইদ্রোম দিজাইন ষ্টুডিওদা মালেমগী মমিং লৈরবা ইন্টারনেশনেল ম্যুজ দিজাইন এৱার্দ ২০২২ পীরকপদা ষ্টুডিও অসিনা নুংঙাইবা ফোঙদোরক্লি। ষ্টুদিও অসিনা ওফিসিয়েল ওইনা থাদোরকপা ষ্টেটমেন্ট অমদা এঙ্গলো মণিপুরী ৱার শিংথারদুনা কুমজা ১৮৯১ দা ইন্দিয়াগী কাচিন ইথং থংবা শরুক্তা খ্বাইদগী কনবা লানফম অমসুং খ্বাইদগী মথৌনা লৈবা অথৌবশিং লান্থেংনখি হায়না থম্লক্লি।
কুমজা ১৮৯১ গী মার্চ ৩১ দা বৃটিশ ইন্দিয়ানা মণিপুরদা লান্দারক্তুনা কোহিমা, সিলচর অমদি তমুরোমদগী মশিং য়াম্লবা বৃটিশ লান্মীশিং থাজিল্লকখি হায়নসু ষ্টেটমেন্ট অদুদা পল্লি।
0 কমেন্ট:
কমেন্ট তৌবিয়ু