• 906
• ৫ই সেপ্টেম্বর ২০২২ ইং
• Share on:

আসামদা মণিপুরী স্কুল থিংজিনগদৌরে! থিংজিনবা নত্তে, তিনশিনবনি  -- শিক্ষামন্ত্রী

 শিলচর, সেপ্টেম্বর ০২ : আসামদা ইস্যু কয়াগী মনুংদা হৌজিক হৌজিক ফোং-ফোং শারিবা ইস্যুদি আসাম লৈঙাক্না স্কুল কয়া থিংজিল্লগনি, মদুদা মণিপুরী মেডিয়ামসু য়াওরবনা হায়বসিনি। আসাম লৈঙাক্না থোকপা নোটিশকী মতুং ইন্না মণিপুরী মিডিয়াম স্কুল কয়াসু মথং মথং এমালগেমেশনগী থবক অসুম্না চত্থরক্লবদি তুংদা মণিপুরী মিডিয়াম স্কুল অমসুং মণিপুরী লোলগী মরাইবক করি ওইরক্কদবগে হায়বসিদা খুন্নাই অসিনা নুংনাংদবা ঙমদে। মসিগী মতাংদা তোঙান তোঙানবা লুপ কয়ানা লৈঙাক্কী থৌওংসিবু পেন্দবা ফোঙবতা নত্তনা খোঙজং চঙশিনবগী শেমগৎ শাগৎপসু হৌখ্রে হায়রি।
আসোমদা আসামগী শিক্ষামন্ত্রী রনোজ পেগুনা স্কুল অমত্তা থিংজিনবগী ৱাফম লৈতে হায়না শেংদোকখ্রে। অনৌবা এডুকেশন পোলিসিগা মরী লৈননা এস.সি.ই.আর.টি ডিরেক্টর, অতৈ মকোক থোংবা মীওইশিং য়াওনা মীফম পাঙথোকখিবা অদুদা মন্ত্রীনা আসামদা স্কুল অমত্তা থিংজিনবা নত্তে, অতোপ্পা স্কুলদা পুনশিনবনি হায়খি। তৌববুদি মাইকৈ কয়াদগী প্রেসার পীরকপদগী এমলগেমেশনগী মতাংদা য়ানিংদবা স্কুলশিংদুগী হীরমদা মখাতানা অমুক খন্নগনি হায়না ঙরাং লাওথোকখ্রে। অদুবু য়ৈথোকপগী ৱাফমদি লৈতে।

অমারোমদা আসামদা স্কুল কয়া এমালগেমেশনগী মতাংদা ওল আসাম মণিপুরী ষ্টুডেন্টস ইউনিয়ন (আমসু) গী মীহুৎ কাঙবু অমনা লক্ষিপুর এম.এল.এ কৌশিক রায়গা উন্নদুনা মেমোরেন্ডাম পীদুনা মণিপুরী মেডিয়াম স্কুলশিং এমলগেমেশেন তৌবিদনবা হায়জখ্রে হায়রি। এম.এল.এনা হিরমসিদা মরী লৈনবা অথোরিটিগা ৱারী শান্নগনি হায়খ্রে। হিরমসিদা তোঙান তোঙানবা মফমদা মীফম পাঙথোক্তুনা আমসুনা তৌফম থোকপা খোঙথাং লৌখৎনবা শেম শাগৎলক্লি। চৎখিবা আগস্ট ২৯, লুপ অসিগী এডভাইজর সাইখো কমলাকান্তনা মীফম মপু ওইদুনা লক্ষিপুরদা পাঙথোকখিবা মীফমদা মণিপুরী এল.পি. হাইস্কুলনা থেংনরিবা ইস্যুশিংগী মতাংদা কুপ্না খন্ন-নৈনখি।

অথুবা মতমদা শিক্ষা মন্ত্রী অমসুং মরী লৈনবশিংদা মেমোরেন্ডাম পীশিল্লগনি হায়রি। মীতৈ য়েলহৌ ময়েক কনবা অমদি শন্দোকপা লুপ, আসামনসু লৈঙাক্কী থৌওংদা পেন্দবা ফোঙখি। ইমারোনবু কন্নবগীদমক লুপ অসিনা অকনবা খোঙজং চঙশিল্লগনি হায়খ্রে।

সোর্স: মরূপ