অরিবম শ্যাম শর্ম্মাবু দাদা সাহেব ফাল্কে এৱার্দকী নোমিনেসন তৌবীনবা তকশিন্নরক্লি
ইম্ফাল, জুলাই ২৮: লৈবাক অসিগী ফিল্মগী শক্নাইরবা মীওইশিংগী মনুংদা অমা ওইরিবা হৌজিক মশাগী চহী ৮৬ শুরক্লবা ফাওবদা ফিল্ম অমসুং মসিগা মরী লৈনবা থবক থৌরমশিংগা শেৎন-খাইনদ্রিবা মণিপুরগী ফিল্ম হৌদোরকপগী পুৱারীগা য়াওন্নরক্লিবা শক্নাইরবা ফিল্ম মেকার/দিরেক্টর অরিবম শ্যাম শর্ম্মাবু লৈবাক অসিগী খ্বাইদগী ৱাংলবা ফিল্মগী মীওইশিংদা পীবা মনা ‘দাদা সাহেব ফাল্কে এৱার্দ’ কীদমক নোমিনেস তৌবীনবা তোঙান তোঙানবা ফিল্মগী লূপশিংনা য়ুনিয়ন ইনফোর্মেসন এন্দ ব্রোদ কাষ্টিং মিনিষ্টারদা তকশিন্নরক্লি।
এসোসিয়েসন অসিগী তকশিন চেরোল অদুদা অরিবম শ্যাম শর্ম্মা অসি কুমজা ১৯৭২ দা মণিপুরী সিনেমা পোকখিবদগী য়াওন্নদুনা লাকপগী মথক্তা ফিচার ফিল্ম /ডকুমেন্টরি/টেলি ফিল্মনচিংবা পুথোরক্লিবা ফিল্মগী শক্নাইরবা মীওইনি হায়রি। লৈবাক অসিগী খ্বাইদগী শক্নাইরবা মীওইনি হায়রি। লৈবাক অসিগী খ্বাইদগী পীক্লবা ষ্টেট অমা ওইরিবা মণিপুরদগী মহাক্না পুথোকপা ফিল্মনা মালেমগী ফম্বাক্তা য়ৌরকখ্রে হায়রদুনা মহাক লৈবাক অসিগী ফিচার/নন ফিচার ফিল্মগী কেটেগোরিশিংদা নেসনেল এৱার্দশিং ফংলবা মীওইনি হায়বগা লোয়ননা হৌজিকসু মহাক অৱাং নোংপোক ইন্দিয়াদগী ফিল্ম মেকার ওইবদা নত্তনা মহাক্কী ফিল্ম ‘ইশানৌ’ বু ওফিসেল সিলেক্সন তৌদুনা কুমজা ১৯৯১ দা কেন ফিল্ল ফেষ্টিবেলদা উৎখি হায়রি।
মণিপুরগী ফিল্মগা য়াওন্নরকখিবা অরিবম শ্যাম শর্ম্মা নীংথিজনা খঙ হৈরবা মিজিসিয়ান অমা ওইবগী মথক্তা হৌজিক ফাওবদা মহাক্না ফিচার ফিল্ম ১৪ অমসুং নন ফিচার ফিল্ম ৩১ দিরেক্সন পীখ্রে। অদুগা এক্টর ওইবগী মথক্তা মিউজিক দিরেক্টরসু ওইদুনা কুমজা ১৯৭২ দা মণিপুরগী অহানবা ফিল্ম ‘মতমগী মণিপুর’ পুথোকখি হায়রি। মরম অসিনা মহাক্কী মফমদগী মণিপুরী সিনেমাগী মশক শেৎতোক্নবা য়াররোইদবা ফিল্মগী শক্নাইরবা মীওইনি হায়রি।
মহাকপু ফিল্মগী খ্বাইদগী ৱাংলবা এৱার্দ অসিগীদমক নোমিনেসন তৌবীয়ু হায়খিবা এসোসিয়েসন অসিগী চেরোল অমনা মখা তানা হায়বদা মহাক্না পুথোকপা ফিল্মশিংনা মালেমগী থাক্তা মনা কয়া ফংখিবগা লোয়ননা মহাক মুম্বাই ইন্টারনেসনেল ফিল্ম ফেষ্টিবেলদা ফিল্মস দিভিজননা মহাকপু ভি শান্তারাম লাইফ টাইম এচিভমেন্ট এৱার্দ পীদুনা ইকায়খুম্নখ্রবনি। মসিগী মথক্তা মহাক লৈবাক অসিনা পদ্মশ্রী এৱার্দসু লৈতেংখ্রবনি হায়রি।
মরম পুম্নমকশিং অসিনা মহাকপু ফিল্মগী খ্বাইদগী ৱাংলবা লৈবাক অসিগী দাদা সাহেব ফাল্কে এৱার্দ পীনবগীদমক নোমিনেসন তৌবদা মতিক চারে হায়বা ৱাফমসু প্রদ্যুসরস কাউন্সিলগী জেনরেল সেক্রেটারি দিপক কুমার দত্ত অমসুং প্রেসিদেন্ট মঞ্জু বোরাগী চেরোল অসিনা মখা তানা ফোঙদোক্লি।
পনবা য়াবদি, ফিল্ম ফোরাম মণিপুরগী মায়কৈদগীসু থা অসিগী ১৮ দা য়ুনিয়ন মিনিষ্টর (ইনফোর্মেসন এন্দ ব্রোদকাষ্টিং) অনুরাগ সিংহ থাকুরদসু অরিবম শ্যাম শর্ম্মাগী বাইওগ্রাফি য়াওনা মহাকপু মণিপুরী সিনেমানা চহী ৫০ (১৯৭২-২০২২) শুরকপগী কুমওন থৌরমদগা মরী লৈননা লৈবাক অসিগী খ্বাইদগী ৱাংলবা ফিল্মগী এৱার্দ অসি পীবিনবা হায়জখিবা লৈখ্রবনি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু