অইবা শৈরেং চাংদম্নবগী ফল লাউথোকখ্রে
ওক্তোবর ৫, ২০২২ : লাক্লিবা মেরাগী থানিন (পূর্ণিমা) ওক্টোবরগী তাং ৯, ২০২২ নোংমাইজিং নুমিৎতা পাঙথোক্কদৌরিবা ‘মণিপুরী শৈরেংগী নুমিৎ, ২০২২’ কা মরী লৈননা ফিক্সন এন্দ পোইট্রি ক্লব, মণিপুরনা শীন্দুনা ‘ৱাক্মা মখোঙ শোম্বা’ হায়বা পান্দমদা পাঙথোকখিবা “অইবা শৈরেং চাংদম্নবা” গী ফল লাউথোকখ্রে।
চাংদম্নবা অসিদা লাইশ্রম সনাতোম্বী দেবী, শিজ হোস্পিটাল কমপ্লেক্স, লাঙ্গোলনা ইবা শৈরেং “অঙাংশিংগী মরায়বক” না অহানবা তাখ্রে। রাজকুমার সনাজাওবা, নোংমৈবুং, ইম্ফাল ইষ্টনা ইবা শৈরেং “ঙসিগী ৱারী” না অনীশুবা তাখ্রে। সুরেশ খুন্দোংবম, পোইরৌখোংজিন মখা লৈকাই, য়াইরিপোকনা ইবা “চেরংদা চেঙ” না অহুমশুবা তাখ্রে অমসুং কন্সোলেসন প্রাইজনা অব্দুস সত্তার সাজবম, জিরিবমনা ইবা “খুবীগী পাঙ্গল”, সোরোজিনী লিসম, শিংজমৈনা ইবা “ঐ হিংখিনি” অমসুং নোংমাইথেম মণিশ্বর সিংহ, সামরামনা ইবা “নুংশিবী ইমা মণিপুর” না ফংখ্রে হায়দুনা সেক্রেটরি, ফিক্সন এন্দ পোইট্রি ক্লব, মণিপুরনা চেরোল অমদা খংহনলকখি।
চাংদম্নবা অসিগী মকোক মথং অমসুং কন্সোলেসন প্রাইজতা মথংশিৎনা শেল ওইনা লুপা লীশিং ৪০০০, লীশিং ৩০০০, লীশিং ২০০০ অমসুং লুপা ৫০০/৫০০ গা শকখঙচে অমমমগা পীগনিসু হায়রকখি।
চাংদম্নবা অসিগী মনা-মথুংনা লাক্লিবা মেরাগী থানিন (পূর্ণিমা) ওক্টোবরগী তাং ৯, ২০২২ নোংমাইজিং নুমিৎতা জেএন মণিপুর দান্স একাদমিদা পাঙথোক্কদৌরিবা ‘মণিপুরী শৈরেংগী নুমিৎ, ২০২২’ তা লান্থোক্কনি। চাংদম্নবা অসিগীদমক মণিপুর মনুং অমসুং মপান্দগী পূন্না অইবা য়াঙ্খৈমঙা (৫৫) না মশা-মশানা ইজবা শৈরেংশিং থাজিল্লকখি হায়নসু খংহনলকখি।
চাংদম্নবা অসিগী ফাইনেল জ্যুরি মেম্বরশিংনা সাহিত্য অকাদমি এৱার্দী কৈশাম প্রিয়োকুমার, সাহিত্য অকাদমি এৱার্দী রাজকুমার ভুবস্না অমসুং নৈনরোয় নন্দো নিঙোম্বনা ওইখি হায়দুনা চেরোল অদুনা খংহনলকখি।
0 কমেন্ট:
কমেন্ট তৌবিয়ু