অইবা গুনচন্দ্র অমসুং ক্ষেত্রি বির ইকায়খুম্নবগা লোয়ননা ক্ষেত্রিময়ূম সুবদনিনা ইবা লাইরিক ‘অশেংবা ইরল’ ফোংখ্রে
ইম্ফাল, অক্টোবর ০২: লৈমরোল খোর্জৈকোল (লৈকোল) না শীন্দুনা ক্ষেত্রিময়ূম সুবদনিনা ইবা ৱারীমচাগী লাইরিক ‘অশেংবা ইরল’ গী মতাংদা নৈনবগী থৌরম পাঙথোকপগা লোয়ননা অইবীগী মায়কৈদগী অহল ওইরবা অইবা আর কে গুনচন্দ্র অমসুং ক্ষেত্রি বিরদা শেল অমসুং সালগী মনা লান্থোক্তুনা ইকায়খুম্নবা উৎখ্রে।
প্রেস ক্লাবতা পাঙথোকপা থৌরম অসিদা এম য়ুগী স্কুল ওফ হ্যুমেনিটিজ গী দিন প্রোফেসর নহাকপম অরুনানা থৌরম মপু ওইরদুনা হায়খি লাইরিক নৈনবা হায়বসি খোরিরোলদা চাওখৎহন্নবগী থবকনি। ক্রিয়েটিভ ওইবা অইবনা পীরিবা কান্নবা লৌশিং কয়ানা মীওইবদা খরদা ওইরবসু নৈনহনবা ঙম্মী। অপাশিংবু নৈনহনবা ঙম্বা লাইরিক হায়বসি খোরিরোলগী থাক্তা অদুক্কী মতিক ৱাংনা লৈরবা লাইরিক অমনি হায়খি।
নৈনরোই ওইখিবী এময়ুগী ফেকালটি মেম্বার ডা. ৱাহেংবম কুমারি চনুনা অশেংবা ইরল হায়রিবা ৱারীমচাগী লাইরিক অসিদা নুপীগী শক্তমগী মতাংদা পনবশিংগী মরমদা ঙাঙখি। নুপীশিংনা মচাশিংবু মমা ওইনা শেমজদুনা মহৈ মশীন তমহল্লগা মপানগী কোম্পানিদা থবক তৌদুনা লৈখিবদগী মমাদুনা অহল ওইরক্লগা মচা-মমৌ অমসুং মশু কোন্দুনা লৈমিন্নবা ঙম্লক্তবা, অহল ওইদুনা শোল্লক্লবা মতমদা মহাক্কী মতেং পাংবীনবা লৈরক্তবা অমসুং ভিডিও কোল্লিংদা মমাবু নুংঙাইরিব্রা হংলকপা মতমসিগী চৎনবীবু পুথোক্লি।
ওর্ফান হোমদা থেংনখিবা মতুংদা খাইনরকপদগী চেকশিনহৌদদুনা কোমদা তাবগা মান্নখিবগী ৱারীনি। নুপীগী শক্তমদা য়েক্লিবশিং অসি অয়াম্বা নুপীশিংগী পুন্সি ৱারীগা শাগোন্নবা অমসুং থোক্লিবা থৌদোকশিংগা শাগোন্নবা ৱারীশিং ওই হায়খি।
অতোপ্পা নৈনরোই অমা ওইখিবা দি এম য়ুগী ফেকালটি মেম্বার ডা. হৈক্রুজম রাইবালানা অইবীনা নুপীগী পুন্সি য়েক্ননবা হোৎনবদা নুং-পানগী ওইবা কয়া য়াওনা ইরি। নুপীনা অৱাবা কয়া থেংনদুনা লাক্লি হায়বগা লোয়ননা লাইরিক অসিগী তোঙানবা মশক্তা নুপীগী শক্তম নীংথিজনা য়েক্লি হায়খি।
নৈনবদা শরুক য়াখিবা ইম্ফাল কোলেজগী প্রিন্সিপাল প্রোফেসর মোইরাংথেম প্রিয়োব্রতনা লাইরিক অসিগী খূৎই অমসুং মফোঙদোক্কী মতাংদা ৱা ঙাঙখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু