ৱার্ল্ড মীতৈ কনভেন্সনগী ৪ শুবা মীফম
চহী ২০-৩০ গী মতুঙদদি মীতৈশিং করম্বা ফীভমদা লাক্কদগে হায়বা ঙমদে: এমএলএ রামেশ্বর
ইম্ফাল, জানুয়ারি ২৯ : ইপা ইপুশিংনা চৎলম্বা, তৌরম্বা অমসুং থম্লম্বা থবক তৌরমশিং ওইরবসু ফিদম্নিংঙাই ওইদবা অমদি লৈবাক মচা তাদবা ফত্তবা ৱাখল্লোনশিং অদুদি ঐখোয়না লৌগুমসি। শুপ্নতগী ফিদম্নিংঙাই ওইবা অফবা ৱাখল্লোন অুদখক্তমক লৌসি হায়না এমএলএ ময়াংলম্বম রামেশ্বরনা ফোঙদোকখ্রে। ৱাফম অসি ঙসি শুগনুগী বালিকা লম্পাক্তা পাঙথোকখিবা ৱার্ল্ড মীতৈ কাউন্সিলগী মরিশুবা প্লিনারি সেসন (মীতৈশিংগী ৪শুবা চহীগী মীফম) দা অথোইবা মীথুংলেন ওইখিবা এম এল এনা ফোংদোকখিবনি।
‘রিএওয়েকনিং অৱার স্পিরিট অব ৱাননেস ইন থোট এন্দ এক্সন’ হায়বা ৱাখল্লোন্দা পাঙথোকখিবা শুগনু মীফমদা এমএলএনা মখা তানা হায়, ইপা ইপুশিংনা থম্বীরম্বা ইনাৎ, চৎনলোন কয়া অমা মাঙহন্দনা য়োকখৎতুনা থমগদবনি। ঐখোয় মীতৈশিং অসি ঐনা মহেল্লে হায়বা ৱাখলনা লোইনা মাঙদা থম্নৈ। মী অমনা লৈবাক্কী/খুন্নাইগী অফবা থবক অমা তৌরকপদা থাগৎপীনবা লৈতে। অশোয়বা য়েংদুনা লৈনবা ঙাক্তা ওইনা তৌই। মসি অফবা নত্তে। ঐখোয় মীতৈ অসি লুচিংবা ঙাক্তা ওইননবা হোৎনবদৌনা তৌই। মী অমনা অফবা থবক তৌরবা অমসুং থবক অদু অফবনি হায়রবদি লুচিংবা ওইহন্দুনা মহাক্কী মতুং ইন্নদুনা অফবা মায়কৈদা চৎমিন্ননবা হোৎনবা মথৌ তারে হায়খি।
ৱার্ল্ড মীতৈ কাউন্সিলগী মরিশুবা মীফমগী তাংকক অমা
লোয়ননা মণিপুরদা খুন্দারিবা মীশিংগী ১০০দা ৯০ ওইরিবা মীতৈনা মণিপুরগী অপূন লমগী ১০০দা ৮ মখায় রোমদা খুন্দারকপা অদুগা লেমহৌরিবা চাওরবা লমগী শরুকশিংনা ত্রাইবেলশিংগী ওইখিবনা মরম ওইরগা থোরক্লিবা খুদোংচাদবশিং কোকহনসি হায়রবদি মীতৈসু এসটিলিষ্টতা অমুক হন্না হঞ্জিনবা নত্তনা অতোপ্পা পাম্বৈ লৈতে হায়খি।
কুমজা ১৯৩১ দা এস টি ওইনা লৈরম্বা মীতৈ ফুরুপ কুমজা ১৯৫১ দা খঙহৌদনা এস টি ষ্টেটসতগী লৌথোকখিবনি। থৌশিল অসি কনানা তৌখিবনো, কমদৌনা থোকখিবনো হায়বসি খঙমিন্নবা চঙই হায়খি। মীতৈবু এস টি ষ্টেটসতগী লৌথোকখিবনা মরম ওইদুনা ঙসিদি শেম্মীৎলোন্দা, লৈঙাক্কী থবক তৌবদা, লৈঙাকলোন্দা মীতৈ অসি মাইনোরিটি ওইরক্লে। চহী ২০/৩০ গী মতুংদদি মীতৈশিং করম্বা ফীভমদা লাক্কদগে হায়বা অদু তম্বা ঙমদ্রে। মরমশিং অসিনা ঐখোয় মশেল পুন্না থেংনমিন্নসি হায়রবদি ঐখোয়গী অশোয়বদা অমনা মেনখৎপা অমসুং ঙাক্নদুনা শেমদোকমিন্নরগা পূন্না এস টি ষ্টেটসতা হঞ্জিন্নবা হোৎনমিন্নগদবনি। অমত্তা ওইনা পূন্না হোৎনমিন্নরকপা মতমদা চাওখৎমিন্নবা মীতৈ খুন্নাই অমসুং মণিপুর পুরকপা ঙমগদৌরিবা হায়খি। ঙসিগী দব্লিয়ু সিএম সীনা শীন্দুনা মণিপুরগী মপান্দা চোইনা তাখ্রবা মীতৈশিংবু পূন্না ফম্মিন্নদুনা তাথোক তাশিন তৌনমিন্নদুনা মাঙলোমদা চঙশিনবা মীতৈ খুন্নাই অমা পুরক্নবা লৌরিবা থৌদাং অসিবুসু থাগৎলি হায়খি।
ঙসিগী শুগনু মীফমদা কাউন্সিল অসিগী চেয়ারমেন হৈগ্রুজম নবশ্যামনা থৌরম মপু, মিনিষ্টার ওইরম্বা ডা. নিমাইচান্দ লুৱাংনা অখন্নবা মীথুং অমসুং হান্নগী মণিপুর হিউমেন রাইটসকী এক্টিং চেয়ারপার্সন খাইদেম মনি, লালহৌলূপ অমগী চেয়ারমেন ওইরম্বা আর কে মেঘেন অমদি শক্নাইরবা মীওই কয়ানা অখন্নবা লেংবীরকপশিং ওইনা শরুক য়াখিবগা লোয়ননা থৌরমগী মনুং চন্না নাৎকী ওইনা জগোয় ঈশৈ অমসুং থাঙ-তানচিংবগী থৌরম কয়াসু উৎখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু