বাংলাদেশকী মমীং লৈরবী জগোয় শাবী অমসুং শৈশকপী শেরাম ওংবী চন্দ্রকলা দেবী লৈখিদ্রে
সিলেট, সেপ্টেম্বর ০৯ : বাংলাদেশকী মমীং লৈরবী জগোয় শাবী অমসুং শৈশকপী শেরাম ওংবী চন্দ্রকলা দেবী মশাগী অনাবা অমনা মরম ওইরগা ঙরাং সেপ্টেম্বরগী তাং ৮ নিংথৌকাবা নুমীৎতা সিলেট সিটিগী হোসপিতাল অমদা লৈখিদ্রে, মহাক্না লৈখিদবদা মশাগী চহী ৬৭ শুখ্রে। পনবা য়াই শেরাম ওংবী চন্দ্রকলা দেবী বাংলাদেশকী শক্নাইরবা কবি এ কে শেরামগী লোয়নবিনী। মহাক সিলেট সিটিগী লালাদিঘিরপার অদুগা মৈতৈশিংনা শাপমলৈকায় হায়না খংনবা লৈকায়গী থোকচোম শাগৈদা পোকপনি। মহাক্কী মচানুপা অমা, মচানুপী অমা, মমৌ অমদি অতৈ মরি মতা লৈহৌরি।
বাংলাদেশকী মফম কয়াদা মণিপুরী জগোয় শাদুনা জগোয় অসিবু মশক তাকখিবী অমসুং বাংলদেশ রেদিওদা মণিপুরী ঈশৈ শক্তুনা মীয়ামগী মফমদা মণিপুরী ঈশৈবু শক্তাকখিবী মশক নাইরবী আর্তিস্ত অমা ওইনা মহাকপু শীংথানরিবনি। নিংশিংবা য়াই, ১৯৬৯ ইংদা ঈস্ট পাকিস্তান(হৌজিক্না বাংলাদেশ)গী মতম অদুদা ন্যাসনেল ডান্স কম্পিটিশন অমদা গোল্ড মেদেল ফংলকখিবনি।
বাংলাদেশকী শক্নাইরবি শৈশকপি অমদি মণিপুরী জগোয়দা নেশনেল থাক্তা মনা ফংখ্রবি চন্দ্রকলা দেবীনা মনুং মতম চাদনা লৈখিদবদা ইন্ডিয়া অমসুং বাংলাদেশকী লূপ কয়ানা নুঙাইতবা অমদি অৱাবা ফোংদোক্নরকলি। বাংলাদেশ মণিপুরী সাহিত্য সংসদ, মণিপুরী ভাষা গবেষনা ও উন্নয়ন সংস্থা, বাংলাদেশ মণিপুরী যুব সমিতি, মণিপুরী মিরর অমসুং ইন্ডিয়াদগী মণিপুরী সাহিত্য পরিষদ, ত্রিপুরা অমদি সাহিত্য থৌপাং লূপ (সাথৌলূপ) ইম্ফাল, মণিপুরনা চিংবা লূপ কয়ানা অৱাবা ফোঙদোরকপগা লোয়ননা লৈহৌরিবা ইমুং-মনুংগী অৱাবদসু শরুক য়ারি হায়দুনা সোস্যাল মিডিয়া অমদি প্রেস ব্রিফিং ওইনা পুম্নমক্কী মায়কৈদগী অৱাবা-নুঙাইতবা ফোঙদোরকপা অমসুং ইকায়খুম্নবসু উৎলকখি।
0 কমেন্ট:
কমেন্ট তৌবিয়ু