• 25
• ৩১শে অগাস্ট ২০২৬ ইং
• Share on:

ত্রিপুরাদা ইমালোনগী কুহ্মৈ পাংথোকখ্রে

"ত্রিপুরাদা মৈতৈশিংনা ইহান হান্না খুন্দাখিবা মফম মেখলিপারা শেমগৎ শাগৎলকপা মতমদা পাংবা য়াবা মতেং পাংগনি" -- এম.এল.এ থাংজম অরুণকুমার

আগরতলা, আগষ্ট ৩০ : "ত্রিপুরা লমদমদা মৈতৈশিংনা ইহান হান্না খুন্দাখিবা মফম মেখলিপারা অসি তুংগী মীরোলনা খঙহৌনবগী ৱাখল্লোন্দা পেট্রিওটিক রাইটার্স ফোরাম মণিপুর, ত্রিপুরা অমদি ত্রিপুরাগী অতৈ লুপশিংনা শেমগৎ শাগৎপা য়াওনা মফম অসিদা নিংশিং য়ুম্বী অমা য়ুংনবগী থবক পাইখৎলকপা মতমদা পাংবা য়াবা মতেংশিং পাংলগনি।" হায়না ৱাংখৈ এ/সিগী এম.এল.এ থাংজম অরুণকুমারনা ফোঙদোকখ্রে।

                            ৱাংখৈ এ/সিগী এম.এল.এ থাংজম অরুণকুমার

ৱাফম অসি ঙরাং আগষ্ট ২৯, নুমিদাংৱাইরামদা পেট্রিওটিক রাইটার্স ফোরাম মণিপুর অমদি ত্রিপুরা অনিনা খুৎশম্নরগা ৩৫ শুবা মণিপুরী ল্যাঙ্গুয়েজ ডে সেলিব্রেশনগা মরী লৈননা আগরতলাগী মুক্তধারা ওডিটোরিয়ামদা পাংথোকখিবা "ইমালোনগী কুম্মৈ" থৌরমগী অথোইবা মিথুংলেন ওইনা শরুক য়াখিবা ৱাংখৈ এ/সিগী এম.এল.এ থাংজম অরুণকুমারনা ফোঙদোকখিবনি।
ত্রিপুরাগী হৌরক্লিবা আর্টিষ্টশিংখক্তগী ওইবা মণিপুরী জাগোই, পুং, ইশৈ অমদি মিউজিক্যাল কনসার্ট য়াওনা পাংথোকখিবা থৌরম অদুদা মণিপুর অমদি আসামগী ডেলিগেট ২৩ অমদি ত্রিপুরাগী তোঙান তোঙানবা লুপশিংগী শকনাইরবা মীওই কয়ানা শরুক য়াখিবা থৌরম অদুগী মনুং চন্না মোইরাংথেম রাজকুমারনা ইবা শৈরেংগী লাইরিক "অহিংবা মীতম" ফোঙদোকখিবগা লোয়ননা শকনাইরবা অইবা অইবাশিংনা ইমালোনগী শৈরেশিং পাথোকখি হায়রি। 

শৈরেংগী লাইরিক "অহিংবা মীতম" ফোঙদোকখিবা

চিংলেম্লবা থৌরম অদুদা পি এ ডব্লিয়ু এফ, মণিপুরগী প্রেসিডেন্ট নাওরোইবম খম্বা লুৱাং, পি এ ডব্লিয়ু এফ, ত্রিপুরাগী পেট্রন মেম্বার ড. অনুরাধা নোংমাইথেম অনিনা পুন্না প্রেসিডিয়াম মেম্বারশিং ওইনা শরুক য়াখি। লোয়ননা পি এ ডব্লিয়ু এফ মণিপুরগী পেট্রন মেম্বার ড. য়াইস্কুল খ্বাইরাকপম, মণিপুরী সাহিত্য পরিষদ ত্রিপুরাগী প্রেসিডেন্ট লাঙ্গোলজম বীরমঙ্গল, ত্রিপুরাগী শকনাইরবা অইবা অমদি স্কোলার ৱাংখেম বীরমঙ্গলনা পুন্না অখন্নবা মিথুংলেন ওইনা শরুক য়াখি হায়রি।

 থৌরম অদুদা  পি এ ডব্লিয়ু এফ ত্রিপুরাগী সেক্রেটারি নিঙোম্বম প্রণয়না তরাম্না ওকপগী ৱারোল থমখি অমসুং পি এ ডব্লিয়ু এফ, মণিপুরগী সেক্রেটারি রাকেশ নাওরেমনা  নুংগী ওইবা ৱারোল থমখি ।

অথোইবা মিথুংলেন ওইনা শরুক য়াখিবা এম.এল.এ থাংজম অরুণকুমারনা ফোঙদোকখিবদা "ত্রিপুরাগী মৈতৈ ইচিল ইনাওশিংনা মৈতৈগী চৎনা লোনচৎ, লোন-ময়েক, লিটারেচার অমদি নাৎ য়োখৎনবা হোৎনরম্বসি উবদা অপেনবা পোকই। অচৌবা ফুরূপশিংগী মরক্তা মীশিং লীক্না লৈবা ফুরূপ অমা ওইরগসু লাইওইখ্রবা ইখোয়গী ইপা ইপুশিংনা থম্বিরম্বা নাৎ অমদি শক্তম চেকশন্না ঙাক্তুনা থম্বা অসিমক চাওথোকচনিংঙাইনি।"
এম.এল.এ না মখা তানা,  "নিংথৌ পাল্লিঙৈ ইপা ইপুশিংগী হাকতক্তগী মণিপুর অমদি ত্রিপুরাগী মরক্তা চারৌ মরৌনাদুনা নুংশি চান্ননা লৈমিন্নরকখি। মৈতৈ নিঙোল কয়া ত্রিপুরাগী মহারানী ওইখি। মসিগী অচেৎপা মরী অসিমকনা মৈতৈশিংনা ত্রিপুরা লমদম অসিদা খুন্দা লৈতাদুনা লৈবা মতমদা থোইদোক্না চাওথোক্না হিংবা ঙম্লিবনি। রাজর্ষি ভাগ্যচন্দ্রগী মচানুপী হরিশ্বরীনা ইহান হান্না ১৭৯৮ এ.ডি. গী মতম ঙসিদগীনা চহী ২০০ গী মমাংদা মণিপুরী জাগোই - রাস লীলা শান্নখিবা অসি ত্রিপুরাগী রাধা মণ্ডপতনি। ঙসিদি মণিপুরী জাগোই রাস লীলা অসি মালেমগী মীয়াম্না পাম্নবা জাগোই মখল অমসু ওইবা ঙমলে। পুৱারীগী লতম ফাকত্তুনা য়েংবদা ত্রিপুরা অমদি মণিপুর অনিগী মরক্তা হিস্টোরিক্যাল ওইবা ইভেন্ট কয়া অমসু লৈরি। মরম অসিনা স্টেট অনি অসিগী মরক্তা অফবা মরী শাগৎনবগীদমক ঙসি পাংথোক্লিবা থৌরম অসিগুম্না য়াম্না তোইনা কালচার এন্দ লিটারেচারগী থৌরমশিং পাংথোকপা য়াম্নমক তঙাইফদে ...''  হায়দুনা ফোঙদোকপিরম্মী হায়রি।

থৌরমগী অরোইবদা পুং-ঈশৈ, জগোয়না চিংবা লমদম অসিগী কলাকারশিংনা মখল মথেলগী ওইবা নাৎকী থৌরম উৎখি হায়না আগরতলাদগী ফংবা পাউ অসিনা হায়রি।