কেন্দ্র সরকারগী কন্সটেবল জব পরীক্ষা মণিপুরী লোলনা থাবা য়ারগনি
আগরতলা, এপ্রিল ২১: কেন্দ্র সরকারগী মিনিষ্ট্রি অব হোম এফেয়ার্সকী মখাদা সেন্ট্রাল আর্মড পুলিশ ফোর্সেস (সি.এ.পি.এফ) কী কন্সটেবল (জি.ডি) ফমগী পরীক্ষা লৌবদা মণিপুরী লোল য়াওনা লম লমগী লোল ১৩দা পীবা য়ারগনি হায়রে।
হায়রিবা সি.এ.পি.এফতা নহারোলশিংবু মশীং য়াম্না শরুক য়াহন্নবা থৌগৎপগা লোয়ননা লম লমদুগী লোলশিংবুসু পুক্নিং থৌগৎপগী পান্দমদা কেন্দ্রগী স্বরাষ্ট্র মন্ত্রী অমিত শাহনা লৌখৎপা খোঙথাং অমসুং ৱারেপ অসি ঐতিহাসিকনি হায়রি। হায়রিবা ফমসিগী পরীক্ষাগী ৱাহং-চে শেম্বগা ইংলিশ অমসুং হিন্দি লোলগী মথক্তা অতৈ লোলশিং অদুদি আসামীজ, বেঙ্গলী, গুজরাটি, মালয়ালম, কানাড়া, তামিল, মারাঠি, তেলেঙ্গু, উর্দ্দু, পাঞ্জাবী, ওরিয়া, কোঙ্কনী অমসুং মণিপুরী অসিনি।
ষ্টাফ সিলেকশন কমিশন্না লৌবা পরীক্ষা অসি মথং চহী জানুয়ারীদগী হায়রিবা লোলশিং অসিদা পরীক্ষা থাবা য়ারগনি হায়রি। কেন্দ্রগী হোম মিনিষ্ট্রিনা সি.এ.পি.এফকী কন্সটেবল (জি.ডি) ফমগী পরীক্ষা লৌবদা মণিপুরী লোল যাওনা লোল ১৩দা পীবা য়ারগনি হায়না লাওথোকপসিদা মণিপুরী ল্যাঙ্গুয়েজ ডেভেলপমেন্ট সোসাইটি (মালাদেশ), ইন্ডিয়াগী প্রেসিডেন্ট ড.এম. এস. নিঙোম্বা অমসুং লুপসিগী জেনারেল সেক্রেটারী ইঙদম বিনোদনা থাগৎপা চেরোল অমদা হরাও নুংঙাইবা ফোঙখ্রে।
মণিপুরী য়ুথ ফ্রন্ট আসাম (মাইফা) নসু হোম ডিপার্টমেন্টকী কন্সটেবল থবক লৌবদা মণিপুরী লোলনা পরীক্ষা থাবা য়াহনবগী হরাওবা অমদি নুংঙাইবা ফোঙদোকখি। লোয়ননা কেন্দ্র অমসুং আসাম লৈঙাক্কী অতৈ অতৈ থবকশিং লৌবদসু খুদোংচাবসি পীবিয়ু হায়না আপীলসু তৌখি।
ভারত সংবিধানদা চল্লবা মণিপুরী লোলবু অসুম্না কেন্দ্রনা শক খঙবিবগীদমক মাইফানা ইনার মণিপুর লোকসভা কেন্দ্রগী এম.পি ড. আরকে রঞ্জন অমসুং রাজ্যসভাগী এম.পি নিংথৌ লৈশেম্বা সনাজাওবগী মফমদসু ঙমখৈ লৈতনা থাগৎপা ফোঙদোকখি। লোয়ননা মণিপুরী লোলবু আসাম লৈঙাক্না শক খঙবিদুনা লৈঙাক্কী এসোসিয়েট অফিসিয়েল ল্যাঙ্গুয়েজ ওইহন্নবা মতেং পাংবীয়ু হায়না মাইফা প্রেসিডেন্ট থাংজম ব্রজেন অমসুং চীফ এডভাইজর শেরাম হেরাজিৎনা মণিপুরগী এম.পি অনীগী মীৎয়েংসু চৎঙশিনখি।
সোর্স : মরূপ
0 কমেন্ট:
কমেন্ট তৌবিয়ু