কাছারগী বোন তারাপুরদা ৱারি লীবা ফেষ্টিবেল হৌখ্রে
ইম্ফাল, এপ্রিল ১৯ : লাক্লিবা এপ্রিল ২৩ ফাওবা নুমিৎ ৫ নি চুপ্না চত্থগদবা অহানাবা ৱারি লিবা ফেষ্টিবেল ২০২৩ ঙসিদগী আসামগী কাছার বোন তারাপুরদা রৈবা বরাক ম্যুজিয়ম এন্দ লাইব্রেরিগী কেম্পাসতা হৌখ্রে হায়না রিপর্টরি ওফ ৱারি লীবা মণিপুরগী ডাইরেক্টর শ্যামকহ্নাইনা থাদোরকপা চেরোল অমনা ফোঙদোরক্লি।
চেরোল অসিনা হায়, ফেষ্টিবেল অসি রিপর্টরি ওফ ৱারি লিবা মণিপুরগী মীৎয়েং মখাদা রিপর্টরি ওফ ৱারি লিবা বরাক ভেল্লি, কাছার, মণিপুরী দান্স একাডেমি, বোন তারাপুর অমদি বরাক ম্যুজিয়ম এন্দ লাইব্রেরি কাছারনা পুন্না খুৎশম্ননা শীন্দুনা পাঙথোকপনি। আসামদা খুন্দারিবা মৈতৈশিংগী চৎনবী মতুংইন্না অয়ুক্তা ফিরাল চিংখৎতুনা অমদি লৈখিদ্রবা ৱারি লিবশিংগী মফমদা লৈ-শু কৎতুনা ইকায়খুম্নবা উৎলবা মতুংদা নুংথিলদা হৌদোকপগী অফোংবা মীফম পাঙথোকখি।
থৌরম অদুদা রিপর্টরি ওফ ৱারি লিবা বরাক ভেল্লিগী প্রেসিদেন্ট হাজারিময়ুম শ্যামকিশোর শর্ম্মানা থৌরম মপু, রিপর্টরি ওফ ৱারি লীবা ব্রহ্মপুত্র ভেল্লি, হোজাই ব্রাঞ্চকী ভাইস প্রেসিদেন্ট লৌরেম্বম মণিনা অখন্নবা মীথুং ওইখি হায়রি।
ঙসিগী থৌরম অদুদা অতিথি ওইনা শরুক য়াখিবা রিপর্টরি ওফ ৱারি লিবা মণিপুরগী পেসিদেন্ট খোমদ্রাম সুরেন্দ্রনা ফেষ্টিবেল ওর্গানাইজিং কম্মিটিদা ৱারি লিবদা চঙদবা য়াদ্রবা কৌনাগী ফম্মেন ফক, মোন অমদি লাইরিক ফান অমমম লোয়ননা ফেষ্টিবেল মায় পক্না পাঙথোকপদা মতেং ওইনবা শেল ওইনা লুপা ১০,০০০ সু দান তৌখি। ফেষ্টিবেল অসিদা রিপর্টরি ওফ ৱারি লিবা, মণিপুরদগী ৱারি লিবা ৪, বরাক ভেল্লি, কাছার ব্রাঞ্চতগী ৱারি লিবা ৮ অমদি ব্রহ্মপুত্র ভেল্লি, হোজাই ব্রাঞ্চতগী ৱারি লিবা ৩ পুন্না ৱারি লিবা ১৫ না মহাভারতকী বিরাৎ পর্বদগী হৌদুনা মথং মনাও নাইনা লিদুনা শরুক য়াগনি।
ঙসি অহৌবা নুমিৎতা বন তারাপুর কাছারদগী মোইরাংথেম রাজমোহন, সিঙ্গরবোনদগী উশম চাওবা অমদি মণিপুরদগী গুরু লাইখুরাম মণি মণিপুর ষ্টেট কলা একাডেমি এৱার্দিনা ৱারি লিখি হায়রি।
সোর্স: সঙাই এক্সপ্রেস।
0 কমেন্ট:
কমেন্ট তৌবিয়ু