আপডেট:
image

ইরাবত নীংশিং থৌরমদা আর্টিষ্ট মঙাদা নীংশিং মনা খুদোল তমদুনা ঈকায়খুম্নখ্রে

ইম্ফাল, সেপ্টেম্বর ১০ : ইরাবত সেলেব্রেসন কম্মিটিগী লমজিং মখাদা মণিপুর জগোয় মরুপ, ইন্দিয়ান পিপলস থিয়েটার এসোসিয়েসন অমদি নাৎ একাদেমী তেন্থানা পুন্না খুৎশম্নদুনা ঙসি তেন্থাগী মাল্টিপ্লেক্সকী শঙলেনদা ইরাবতকী ১২৬শুবা মপোক কুমওন থৌরম পাঙথোকখিবগা লোয়ননা মণিপুরগী শক্নাইরবা আর্টিষ্ট মঙাদা ইরাবত নীংশিং মনা খুদোল তমদুনা ঈকায়খুম্নবা উৎখ্রে।

ঙসিগী চীংলেম্লবা ষ্টেটকী থাক্তা পাঙথোকপা লুচিংবা অসিগী মপোক কুমওন থৌরম অদুদা সী পি আইগী লুচিংবা অমসুং হান্নগী মিনিষ্টার ডা. এম নর, প্রোগ্রেসভি রাইটার ফোরাম মণিপুরগী হান্নগী প্রেসিদেন্ট লাঙ্গোল ইবোয়াইমা, মণিপুরী জগোয় মরুপকী হান্নগী প্রেসিদেন্ট এন জি অমু মচানা লুচিংদুনা লময়ানবা ইরাবতকী অয়েকপা মমিদা লৈ-শু কৎতুনা ঈকায়খুম্নবা উৎখি।

ঙসি পাঙথোকখিবা নীংশিং থৌরম অদুগী শরুক অমা ওইনা অখঙ-অহৈ কয়ানা ইরাবতকী পুন্সিগী মরমদা ৱা ঙাংখি। ৱা ঙাংখিবশিং অদুনা লুচিংবা ইরাবত অসি য়াম্না তাঙনা মীওইবা খুন্নাইগী মরক্তা তোল্ল-তারবশিংগীদমক্তা য়াম্না খন্না মারেমগী ওইনা শীংথানিংঙাই ওইবা মীওইশিংগী মরক্তা অমনি। মহাক্তি আর্টিষ্টনি, এক্টরনি, সোসল ৱার্কারনি, স্পোর্টস পার্সননি অমদি জার্নেলিষ্ট অমসুনি হায়না শীংথানখি।

ঙসিগী থৌরম অদুদা মণিপুরদা লৈরিবা তোঙান-তোঙানবা আর্ট ফোর্মদা থোইদোক হেন্দোক্না শীংথানিংঙাই ওইরবা মীওই মঙাদা ইরাবত নীংশিং মনাসু খুদোল তমদুনা পূক্নিং থৌগৎখি। ইরাবত নীংশিং মনা ফংখ্রবা আর্টিষ্টশিং অদুদি মণিপুর থিএটরদা ইরাবত নীংশিং মনাদা বিরেন্দ্র ৱাহেংবম; মণিপুর পুঙ-ঈশৈ জগোয়দা মোইরাংথেম সুরচন্দ্র; শুমাং লীলাদা নুপী শাবী আর কে সনাতোন অমসুং ওইনাম অরুননি। লৈমা শিশক হেনবী ইরাবত নীংশিং মনানা ব্রহ্মচারিময়ুম ওংবী চনচন এলিয়স বেবি চনচনদা পীখি।

নীংশিং মনা ফংখ্রবা মীওই মঙা অসিদা থৌরমগী লেংবীরকপা অথোইবা মীথুংলেনশিংনা সাইটেসন, মমেন্টো অমদি শেলগী মনা ওইনা লুপ লিশিং ১০/১০ খুদোল তমদুনা ঈকায়খুম্নবা উৎখি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু