অমুকোনা আগরতলাদা নুপীলান নীংশিং থৌরম পাঙথোক্কদৌরি
ইম্ফাল, ডিসেম্বর ২ : ওল মণিপুর য়ুনাইতেদ ক্লাবস ওর্গানাইজেশন (অমুকো) অমসুং মণিপুরী লিতরেরি এন্দ কালচারেল ফোরাম, ত্রিপুরা অনীনা খূৎশম্নদুনা মমাঙগী চহীদা তৌখিবগুম্না দিসেম্বর ১২ দা আগরতলাগী বামুটিয়া বেরিমুরাদা ৮৩ শুবা নুপীলানগী থৌরম মণিপুর অমসুং ত্রিপুরাগী কালচারেল ওর্গানাইজেসনশিংনা মখল মথেল কয়াগী কালচারেল প্রোগ্রাম কয়া য়াওনা পাঙথোক্লগনি হায়রি।
অমুকোগী সেক্রেটারি পাব্লিসিটি, লাইশ্রম কৃষ্ণচন্দ্র খুমন্না থাদোরকপা চেরোল অমনা মখা তানা হায়, মণিপুরী নুপীশিংগী থৌরা লিংজেল অদু মণিপুরগী ৱাংমদসু পাক শন্না খঙহন্নবগী পান্দমদা অমুকোন ত্রিপুরাগী আগরতলা অমসুং আসামগী হোজাইদা চৎতুনা মফম অদুগী নুপী কয়াগা খুৎশম্নরগা নুপীলানগী থৌলম পাঙথোক্কদৌরি। থৌরম অসিগা মরী লৈননা আগরতলাগী রানির বাজারদা লৈবা নলগড়িয়া রাধা মাধব দেবতা রানি কমপ্লেক্সতা নুপীলানগী মীতম (স্টেচু) অমা খিন্নবগী উরেপ অয়ূংসু তমগনি।
নুপীলানগী মীতম খিন্নবগী মফম অসি শ্রী রাধা মাধব জিউ মন্দিরগী প্রেসিদেন্ট শ্রী হরানা সিংহ অমসুং সেক্রেটারি শ্রী দিলিপ সিংহ অনীনা খূৎয়েং পীদুনা অয়াবা পীবীবনি। মণিপুরগী থৌনা ফরবা ইপা-ইপু অমসুং ইমা-ইবেলশিংনা মণিপুরী খুন্নাইগীদমক তোপ তোপ্পা থৌনা ঊৎতুনা মরৈবাক অমসুং মফরূপকীদমক তৌরম্বা থবকশিং অদুনা মণিপুরগী ৱাংমদা খুন্দারিবা মণিপুরীশিংদা মতম চুপ্পদা ঈথিল পীদুনা লৈহন্নবগীদমক্তা অমসুং মপান লমগী মীশিংদসু মণিপুরীশিংগী থৌনা লিংজেল খঙহন্নবগী পান্দমদা অমুকোনা থৌনা লিংজেল খঙহন্নবগী পান্দমদা অমুকোনা মণিপুরগী মপান লমদা অথৌবা অথৌবীশিংগী মীতম শাবদা হেন্না পূক্নিং চঙলি।
আগরতলাদা পাঙথোক্কদৌরিবা নুপীলানগী থৌরম অসিগীদমক অমুকোগী প্রেসিদেন্ত ফৈরোইজম নন্দো লুৱাং, এদভাইজর য়াংসোসোং কোইরেং, ভাইস প্রেসিদেন্ট এম এম থম্বৌ অমসুং এসিস্তেন্ত সেক্রেটারি নিংথৌজম লোকেননা শরুক য়ারুনবগীদমক দিসেম্বর ১০দা ইম্ফালদগী আগরতলাগীদমক খোঙশানগনি। অমুকোগী টিম অসিনা ত্রিপুরাদা মৈতৈ পাঙল অমসুং কোইরেং ফুরুপ্না খুন্দারিবা খুল খরদা চৎতুনা নুংশি চান্নবগী ৱারী ৱাতাই তৌগনি। দিসেম্বরগী তাং ৯দসু আসামগী হোজাইনা য়ুনাইতেদ মণিপুরী এসোসিয়েসন, আসাম হেন্দলুম কমিটি হোজাই দিস্ত্রিক্ত অমসুং মণিপুরী উইমেন এসোসিয়েশন (মণিপুরী নুপী লুপ)অনীনা খূৎশম্নদুনা হোজাইগী মণিপুরী সাহিত্য পরিষদকী শঙলেন্দা পাঙথোক্কদবা নুপীলানগী থৌরম অদুদা অমুকোগী ভাইস প্রেসিদেন্ত কোইজম হেলেন মৈতৈ অমসুং সেক্রেটারি জেনারেল দাঃ নোরেন্দ্রে থোকচোমনা লুচিংবা মী তরুক্কী তিম অমসু য়াওবা চৎকনি।
আগরতলাগী বামুটিয়া বেরিমুরাগা পাঙথোক্কদৌরিবা ৮৩ শুবা নুপীলান নুমিৎকী থৌরম অসিদা মণিপুরী লিটরেরি এন্দ কালচারেল ফোরাম, ত্রিপুরানা চহী খুদীংগী ফোঙবো লিতরেচারদা য়ূম্ফম ওইবা ‘তখেল্লৈ নাচোম’ হায়না মিংথোনবা সোভেনর অমসু ফোঙগনি। নুপীলাল নুমিৎকী থৌরমখক্তদা ফোঙবা ‘তখেল্লৈ নাচোম’ অসি হন্দক্কী অসি থারগা মঙারক শুবনি। নুপীলানগী থৌরম নুমিৎ অসিদা ‘মণিপুরী লিতরেরি এন্দ কালচারেল ফোরাম, ত্রিপুরা’ না মৈতৈগী কালচার অমসুং সোসিয়েল সার্ভিসতা মশক নাইবা থবক তৌরিবা।
ত্রিপুরাগী নুপী অহুম নহাকপম ভাগ্যবতি, নোংশাতাবম নানাথোই, ফিজবা চন্দ্রকলাবু ওক্তুনা ইকায়খুম্নবা ঊৎকনি। নুপীলান নীংশিং নুমিৎকী থৌরম্বু হেন্না মশক মচু থোকহন্নবগীদমক মণিপুর অমসুং ত্রিপুরাগী কালচারগী লুপশিংনা মখল কয়াগী কালচার শো উৎকনি। সাউদার্ন মণিপুর আর্ত এন্দ কালচার প্রমোসন সেন্টার, ককচীং খুনয়াই লৈকায়গী আর্তিস্তশিংনা তখেল জগোয়, থাঙগী লৈতেঙ হাইবা, লৈবা জগোয় অমসুং থাঙ চাইনবগী আইটেমশিং অসি উৎকনি। ত্রিপুরাগী কালচারেল আর্তিস্তশিংনা লৈবাক নিংবদা য়ূম্ফম ওইবা ত্রেদিসনেল দান্স অমসুং গ্রুপ দান্স উৎকনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু