মণিপুরী সাহিত্য পরিষদ ত্রিপুরাগী ৫৯ শুবা চহীগী মীফম পাঙথোকখ্রে, মনাশিং লান্থোকখ্রে
ইম্ফাল, এপ্রিল ৯ : মণিপুরী সাহিত্য পরিষদ ত্রিপুরাগী ৫৯ শুবা চহীগী মীফম অমসুং চহীগী মনা য়েন্থোকপগী থৌরম ঙসি ত্রিপুরা ষ্টুদেন্তস হেলথ হোম, আগরতলাদা পাঙথোকখ্রে।
মণিপুরী আইদেন্তিতি এন্দ লেংগ্বেজ হায়বা থিমদা পাঙথোকখিবা থৌরম অদুগী অহানবা সেসন্দা মণিপুরী সাহিত্য পরিষদ ইম্ফালগী প্রেসিদেন্ত লোংজম জয়চন্দ্রনা চীফ গেস্ত, মণিপুরী সাহিত্য পরিষদ ত্রিপুরাগী প্রেসিদেন্ত এন দিলিপ কুমারনা প্রেসিদেন্ত, বাংলাদেশ মণিপুরী সাহিত্য সংসদকী প্রেসিদেন্ত এ কে শেরাম, লিতরেরি সোসাইতি সিলচর, আসামগী প্রেসিদেন্ত এল মংলেম্বা, মণিপুরী সাহিত্য পরিষদ মেঘালয়গী প্রেসিদেন্ত এন মুনিশ, মণিপুরী সাহিত্য পরিষদ ইম্ফালগী জেনারেল সেক্রেটারি ই প্রিয়োব্রত, মণিপুরী সাহিত্য পরিষদ মেঘালয়গী জেনারেল সেক্রেটারি কমলজিৎ চিরোমনা গেস্ত ওব ওনারশিং ওইখি।
অনীশুবা সেসন্দা কাছারগী সিঐচ কমলা দেবীনা থৌরম মপু ওইদুনা ত্রিপুরা অমসুং মণিপুরগী অইবা অইবী ৩০ না শরুক য়াদুনা শৈরেং শৈদিন্নবা অমা পাঙথোকখি। অহুমশুবা সেসন্দনা এক্সতর্নেল এফিয়ার্স অমসুং এদজুকেসনগী য়ুনিয়ন স্তেত মিনিস্তর দা: আর কে রঞ্জন সিংহনা চীফ গেস্ত ওইনা শরুক য়াদুনা মণিপুরী সাহিত্য পরিষদ ত্রিপুরানা পীবা তোঙান তোঙানবা মনাশিং লান্থোকখি।
চহী অসিগী ওইনা নিংথৌখোংজম চন্দ্রহাস নীংশিং মনানা আগরতলাগী রাজকুমার জিতেন্দ্রজিৎ সিংহদা, য়ূম্নাম চন্দ্রকীর্ত্তি সাহিত্য সংস্কৃতি মনানা আসামদগী ওক্রম চুরামণিদা, দা: তোনাবম বিরেন্দ্র চন্দ্র নীংশিং মনানা গুৱাহাতিদগী নিঙোম্বম অনীতাদা, রাজকুমার সুরেন্দ্রজিৎ-শিজ বিধু দেবী নীংশিং মনানা বামুতিয়াদগী এম পুর্ণধ্বজ দত্তদা, দাঃ ভুপেন্দ্র নীংশিং মনানা বামুতিয়াদগী এন নন্তুদত্ত অমসুং কৈলাসহরদগী য়েংখোম নীলকুমার অনীদা, লৈশেংথেম গোকুল সিংহ নীংশিং মনানা আগরতলাদগী রাজকুমার প্রফুল্লজিৎ সিংহদা অমসুং খোইস্নাম বাবুধন নীংশিং মনানা বামুতিয়াদগী তখেল্লম্বম কৃষ্ণমনি দত্তদা লান্থোকখি।
সোর্স: পোক্নফম
0 কমেন্ট:
কমেন্ট তৌবিয়ু