য়েন্দ্রেম্বম রনধির কুমারগী ৱারীমচা – নহালসু লৈচিল, ঙরাংসু অদুগা হয়েংসু

Homeআর্টসৱারি মচা

য়েন্দ্রেম্বম রনধির কুমারগী ৱারীমচা – নহালসু লৈচিল, ঙরাংসু অদুগা হয়েংসু

-“ মীশিংসিনা লৈচিল ওনখিদনবা মফম অসিদা লৈঙাক্না লৈরাং কয়ানা ফূগায়না শাৎলবা ফজরবা লৈকোল অমা মীশিংনা মতম লেনজনবা শেম্বীবা য়ারিবনি । মসি নৎত্রে হায়রগনা

-“ মীশিংসিনা লৈচিল ওনখিদনবা মফম অসিদা লৈঙাক্না লৈরাং কয়ানা ফূগায়না শাৎলবা ফজরবা লৈকোল অমা
মীশিংনা মতম লেনজনবা শেম্বীবা য়ারিবনি । মসি নৎত্রে হায়রগনা লাইরিক লাইসু পাজরগা মীশীংনা নোংমগী
মতম লেন্নবা লাইব্রেরি অমা শাবিবা য়ারিবনি মসুম তৌরবদি ইচিন ইনাউ ঐখোয় নুমিদাংৱাইরমসিদা লৈচিল
ওইবগী অৱাবা লৈজরম্লোইদৌবনি । ৱাখলসু অফবা খল্লনি । মফম অসি অফবা মী কয়া পোকখিবা ঐনা তাখ্রে ।
অদুবু মখোয়না অসিগুম্বা অফবা ৱাখল অসিমদি খনবীরমদ্রে । লৈচিলশিংগী অৱাবা মাঙজৌননা উবিরম্দ্রে । ”

লৈচিল মপৈ কয়া কয়া অতিয়াদা কঙাওননা পায়দুনা লৈবা উই । মেরা থাদগীনি ঐনা ক্লাস ত্বেলব থাগদৌবী ইচানূপী অদুগী কেমিস্ত্রি ত্যুসনগীদমক নুমিদাংৱাইরম খূদীং ওজাগী ময়ূমদা থিল্লক্লিবা । হৌজিক হৌজিক অসিনা ৱাকচীং থা হায়বদু য়ৌশিল্লক্লে । য়ুমগা ত্যুসন মফমগা কিলোমিতর তরেৎলোমদগী ৱাদনি । ইচানূপীবু
গাড়ী মচাদা হাপ্লগা ঐনা য়ুমদগী থৌদোরকপদা লূ য়াঙ্গাসি পূমতেক তেকপা শুগৎ শুগৎলগা থৌবা খুল্লক্কী লম্বীনি । লম্বী অফবা য়ৌরগনা অমুক ত্রাফিক জামগী ৱাফমনি । লম্বীনা ফরবদি ত্রাফিক জামনা লৈত্রবদি মীৎনা কূপ্পদা য়ৌবা মফমনি ।

লৈবাক্কী চাঊখ্রবা কৈথেল কাফম অমসু ওইরিবা মফম অমগী মনাকমক্তদনি ইচানূপীগী ত্যুসন মফম অদু । ওজা অদুগী ময়ূমদা ইচানূপী লৈশাবী মচাদু ত্যুসন লোইরগা ঐবু কৌরক্নবা ফোন অমা পায়হল্লগা থনম্লে । ইচানূপীবু ঐনা নুমিদাংৱাইরম খূদীংগী ঐগী গাড়ীমচাগী মনীংদা তোংহন্দুনা ওজাগী ময়ুমদা পুবসি নহানমুক
মপোক্তা ঐনা করি করম্বা ইরাল অমা লঙজরুবগী দন্দিনো হায়না হন্দক মরক্তি চাননা খনগৎলক্লি । লাইবক্তা খেৎতোকপা য়াদনা তমখ্রবা ইশিনজাংনি খনজরগা অমুক পুক্নীংবু তপ্না ফাথজৈ ।

মাবু তেক্তা কায়দনা মফমদুদা থনম্লবা মতুংদা ঐনা তৌগদবা মথংগী থবক্তি ঙরাংগী মতৌগা চপ মান্ননা চা য়োনফম অদুদা চঙলগা ইথন্নতা তূমিন ফম্লগা চা থকপনি । হান্নদি চা অসি থকপদি ঙমদি ঙম্লগা কয়া থকচদবনি হন্দক্তি নুমীৎ খূদীংগী পায়বা সুম হৈনখ্রে । লূপা তরা পীবা চা গিলাস অমা থকপদা লূপা তরা কুনগী
বোরা কাংহৌ , মদুগী মথক্তা মহীক মতায় য়াওরমগনি মফম মরাং খঙদবা ঈশিং থকপা কিজৈ হায়দনা লীক্লীদা লূপা তরা পীবা ঈশিংদু অমমুক লৈরগা থকই । নোংমদা কৈসু নত্তবদা অহেনবা লূপা নিমফু অমা য়াঙখৈ অমদি অদুম অহেনবদা চৎলি । থা অমদদি লূ্পা লীশীং অমা চামঙানি । কনাগুম্বা অমদবুদি করিসু লৈতবা শেলফমনি । লীকপগী ৱা নত্তবীদা য়ূম অমা পাল্লিবনিনা খরা কূপ্নসু পাদবা য়াদ্রি ।

পূং মরিদগী হৌরগা পূং মঙা তাবদা লোইগদৌবা ত্যুসননি । পঙশাং শাংবা মতমদি নত্তে অমরোমদা । পূং মঙা হেক তাবগা পন্থবা তৌদনা কদাই কদাইদনো কোয়খৈ কোয়রুরগা ত্যুসন মফমদুদা অঙাং লৌবা হাইজিনগনি ।

ঐনা চা থকফম অদুদা ঐনা ফমগেনা ফম্লবদা মিনিট তরা মঙায়, মসিদগী হেন্থনা ফম্লবদি অউবনা করিগিনো হংনরনি । চা য়োল্লিবী মৌ নহা অদুনা ইফ ফজনা তাদা ফানদু মী অমুক্তা ফমহনজগে হৌগৎপিগেরা হায়না তৌঙমদনা হায়রক্লবদি ঐসু মায় হেক্তা ঙাঙগনি । য়াম্না তোয়না কুইনা কুইনা ফমজিল্লবসু মাগী নূপা অদুনা
ভাপ লান্না অমুক খনখিবসু কনানা খঙবনো , মওল মওল অদুম খন্দবা য়াপোৎ নত্তে । মী হায়বসি ফনা ঙাক্তসু খন্দোকউবা য়াবা নত্তে । ফত্তনসু খরসু খনবা তমগদবনি । ইতোমদা খংনুং নুংঙাইরক্ত্রদুনা, মীনা তাল্লক্ত্রিঙৈ বেন্চতগী ফূক হৌগত্তুনা অতাবা শেলদু শৎ পীথোক্লম্লগা থোরক্লে ।

গাড়ী মচা স্তার্ত তৌরগা ঐ ঙরাংগী মতৌগুম্না সেকেন্দ হেন্দ ফি য়োনফম্লোমদা অমুক চৎলে । নিংথমথা মতমগী অথা অথাবা জেকেৎ,খোঙগ্রাউ,বেগ,খোঙূপ মরাং কায়না লৈমায়দা থা থাদুনা লম্বী মপালদা নূপা অমদি নূ্পী কয়ানা য়োল্লি । মী কয়ানা সেকেন্দ হেন্দগী ফি রোল লৈনবা য়োমশিল্লিবদু য়েংবদা মতম লেনবা
নুঙঙাইরবা কূম্মৈ অমনি ঐঙোন্দা । নুমিৎ খূদিংগী সুম সুম চৎলবনিনা ফি রোল য়োল্লিবা চীংমী ,মুস্লিম অমদি মীতৈ ইচে ইচল ইচীল ইনাউ ময়াম অদুনা ঐবু মিং লৈকাই খঙদদুনা কৌরক্তে হায়বদা খাক্লবনি । ঐগী গাড়ীগী মচু মমেন,ঐগী হেলমেটকী মচু , ঐগী নোংজু নুংশা নাইদনা হোংবা নাইদ্রবা ফূরীৎ খোঙগ্রাউগী মচু
মখোয় লোইনা শৃৎ নান্না মখোয়না চীনফা পুনরবনি । কৈসু কায়দেদা তোয়না শুম উমল্লবদি মসিদি মশানা অদুম তাদুনা লৈজরবনি । কনাগুম্বী হায়ঙম তৌঙমদবী মখোয় খরদি মীৎচিবু খৎপও তৌদুনা ঐবু লঙনৈ ঙরাংগী পোৎ শূক্লৈদি লৈদনা পোৎকী মমলদা পঙহংদা হংবা অরীকপা নূপা অসে অমুক লাক্লেনেহে তু তু হায়না
মোবাইল ফোন্দা লুদো শান্ন শান্নদুনা ৱা ৱাগা নোকশিল্লক্তুনা লঙনরকপা নোংফাদোক য়াওরবনি । মখোয়না মীমাঙ পুমাঙ খঙদনা লঙনরকপদা ওনশিন্দুনা খৎনরুবদি য়াদবনিনা ইতোমদা মায় ঙাঙজরগা হুৎ লৈথোক্লগা লাকপা য়াওখ্রে । চৎফম লৈশিল্লক্তদুনা নুমীৎ খূদীং চৎপদগী মদুগী মীনোক অদু তৌজরকপনি । ওইরিবা ফিবমননি । ময়েক্কীদি ঐসু নুংতিগী সুম য়েংশিল্লক্লবনিনা অপাম্বা পোৎ ইয়াও য়াওরক্ত্রে ।

ইচানূপীনা মখোয়গী ওজাগী মনাক্তা ত্যুসন তৌহৌরিঙৈ চৈরক্তা য়ুমদা ঙাইহাক্তা ওইরবসু হল্লুরগা পোৎথারুগে হায়রবসু তৌরিবা ত্যুসন অসিনা পূং অনী অহুম তৌবমক নত্তবনিনা য়ূমগী থোঙ্গাল য়ৌরুরগা চঙলমদনা থোঙ্গালদৈ গাড়ী মমায় হুৎ লৈরক্লগা ইচানূপীগী মনাক য়ৌবদা ইচানূপীনা ত্যুসন লোইবগা অমহা
অমহা তাবগী ফিবম্নি । হৌজিক্তি ঐ সেকেন্দ হেন্দ য়োনফমদা ঐনা লৈগেনা লৈরবদা মিনিৎ তরাদগী হেন্না লৈনীংদ্রে । ইশা ইতোমদা নোক্নীংবদুম ফাওরে ।

মথংনা কদাইদা ? কোক হোৎলি ঐ । হৈ রা য়োনফম্লোমদা হাইজিল্লগা ঙাইহাক অমুক মতম লেল্লুবনা চুম্নি । নম্বর থাবা সেম অমদি কোম্লা য়োনফনম্লোমদা গাড়ী অদু তপ্না তপ্না ঈল্লদুনা গাড়ী খামজিল্লদুনা অমুক ফমথরদুনা হাইফেৎ হাওগদবা য়াওব্রা তাপ তাপ পায়দুনা মেত্তুনা য়েংলুই । খোয়দাবা অমত্তা য়াওদে । ইচা
অতোম্বীনসু লৈরকপদা হরাউবা পোক্লরোই । মশক ফজবা অমদি তীক তীক লাউজবগী ৱাদনি মখোয়গীসিদি । মহাউদি মণিপুরদা ফংবা কোম্লাদগা মখোয়না উশিত্তদনা হাইজিন লাকশিনবা য়াবা নত্তে । মশক মশা খঙদবা ম্যানমাররোমদগীনি হায়বা করি করিনো শংত্রিক শংত্রিক শংবা উহৈ ৱাহৈ খরসু উবা ফংই । হাউরমদৌ মান্দে হায়দনা মমিংফাওবা হংলুদরে ।

ঘরী য়েংই মিনিট অহুমদগী হেন্না হৌখিবা ওইদ্রি । লাইবক ফবদি উচিন নাচিন্না পূন্না মিনিট তরামঙাদি হৌখ্রে । কূন্থ্রামঙাদি খূৎতা ইচাউ চাউনা লেম্লি করম্নো খল্লি । মথংনা কদাইদা অমুক দিন লেল্লুদৌরিবা ? মসিসু অরুবা অমনি । পাউনা বাজার থাঙ্গাল বাজার শেল য়াওদনা চৎপা য়াবা নত্তে। ম্যুজিয়মসু মতম লোইরে
ঙসিগীদি। মতম লৈরবসু লাপ্পি কান্নদে । হল্লকপা ফরক অমুক তানি । লুখ্রেদা সৈত্য তৌরিসে । মথং চৎফম খনবদা মাং তুং পূম্বা শূক সুনা মম্মী । নারুম খোৎলগা লেপ্তুনা অমুক লৈ ঐ । তেন্ত্রিক তেনখ্রবা সেকেন্দ অমনা মিনিট তরামুক শাংই , মিনিট অমমমনা পূং অমমুক শাংই । লেপ্পদা খোঙ শজীং হৌজিল্লকই । পুথোকপা
য়াম্না হৈবা ঐগী কোক্নি মথং কদাইদা চৎকনি থোকউ হায়বা য়াদে । চাউরাক্না লেমহৌরিবা মিনিট কূন্থ্রামুক অসিনা কদাইদমুক ? পি সি জৈনগী বূক স্তোরদা চত্তুনা সাহিত্যগী লাইরিক খরা য়েংলুশিরা ? অদুসু অমুক পাবা পাদবনা অমনি লাইরিক ময়ামদু লৈনীংলক্কনিনে তৌরিসে ! লাইরিক্নেনা মমলনা তাঙনা তাঙনা য়োল্লিবা
রস্কিন বোন্দ , চেতন ভগত, অমিতাব ঘোষ ইংরাজি হৈবোই হৈতবোই খরদি পাবুদি পানীংই , অতৈ অনৌবা অইবা কয়া পানীংবনি । অঙাংগী থাগী ত্যুসন ফী অসিদা হান্না পীথোকখ্রগা নোংমা গ্যান তানা লৈবা হায়বদুনি । অমরোমদা মতমসু ফরক তারনিদা খল্লিবাইদুনি । অদুবু হৌজিকসিবু কদাইদা চৎশিবা ঐবো গাড়ী শাবলদা খূৎ
থম্মগা ঙাইহাক খল্লি অদুগা ইতোমতা হায়জৈ ও ও লৈরে লৈরে ত্যুসন তৌফম মনাক্কী ইনাউ পৱনকুমারগীদা ! খংনীং নীংশিংলকপনি । য়াম্না ফবা ইনাউনি । মাগীদা চঙলুবা য়ারনিনা মাগীদা ঐনা ইকোন কোনবা চঙলুবা অদু নুমিৎ মঙানি শুররিনিনা খূৎ হাইফেৎ থেক্তুনা পাই । হৌখিবা মেরা থাদগীনা থা মরি মঙা অসিদা ঐনা মাগী য়ুমদা ইথৌ লৈতনা নুমিদাংৱাইরমসিদা চঙশিল্লগা মঙোন্দা থোক্ল থোক্লবা ৱারী ময়াম শাদুনা মতম লেল্লুবসি তরারক্কুম্বদি শুরে খল্লি । ইকোন কোনবগী মখোয়গীদা চঙলুবা অদু নুমিৎ মঙানিরোম কান্নরবনিনা চঙলুবদা থোইদোক্না মাগী নূপীনা মুরুম মুরুম শোন্দুনা শাউগদবদি অদুক হাক্নবুদি মান্দ্রে । মাসু য়ূম অমা পাল্লবনিনা মাগী নূ্পীনা ঐবু করি অমুক খনখিনি হায়বা অসিসু নৈনহৌদবা য়াদে । ঙসি চঙখিবদা মাগী নূপীনা চা লোনবিরক্ত্রবসু কায়দে মানা পীশুম শূকপা অদুতা উদ্রগা লোইরে । মাগীদা নত্তনা স্বাইসিদা ঐগী চঙফমসু অমত্তা লৈতে । মাগীদা তোয়না চঙলসু মাগী নূ্পীনা ঐবু উবদা লিন খারৌ ওন্দুনা ৱাদি ইঙাঙ ঙাঙদনা খু খু কামগনি । মদুসু হেক হৈনদে ।

ৱাখল খল্লিঙৈ উচিন নাচিন্না মিনিট মঙা অমগা লাইবক ফদুনা হৌবিখ্রে । ইনাক্তা অচৌবা মচা গাড়ীশিংনা ৱিং ৱিং লাউনা থৌরগা চৎলম্বদু ভাপ ওইশিল্লুদে । মিনিৎ কুনমঙাদা ঙায়রে লাইবক ফৈ ঐনা ৱাখল খনবদদা মতম খরা হৌখিবা ! ঐ পৱনকুমারগীদা চঙবা ঙম্লরোই চঙলবসু নুমিৎ খরনি কান্নহল্লগা কোন্না আমুক লেম্না
চঙলগে । মাগীদা ঐনা চঙদুনা মতম লেনবদু মাগদি হান্না লোয়না তিন্নরকপনিনা করি অমত্তা কায়দবা য়াই অদুবু মাগী নূপীদু ঐ কয়া মায় চানদে। চহী মতাং অসিদা নূপী অঙাংনা উশিৎহন্দনবা তৌবা ফত্তে। ওতোরিক্সো অদুগী মনাক্তা ঐ নাইতোম তানা লেপতুনা লৈরি । ত্যুসন অদু তোক্কে হায়রবসু য়াদবা অমা ওইরি। ত্যুসন অসি হৌজিক্কী অঙাংশিংনা মশাগী ফংফম থোক্লবা হক অমগী থাক্তা লৌনরক্লবনি । ঐনদুম অরানবা তাবগী ফিবমদা লৈরে ।

ঐনা মুরুম মুরুম শোন্দুনা লম্বী মতাইদা লেপ্পা অদু উরগা ঐগী নাক্তা লেপলম্বা ঐনা হান্না উখ্রবা মানবা নূপা অমনা ইনাক্তা চঙশিল্লক্তুনা য়াম্না থাজদবা মওংদা য়াম্না হকচিন্না হংলকই , “ ইয়াম্বসি ঐনা হান্না কদাইদনোমা খরা তোয়না উজখিবা মাল্লে । ”

“নহাকসু ঐনা উখিবা মাল্লেনে, ইনাউ । করি লমদগীনো ইনাউবো ? ”

“ক্বা কৈথেল্লোমদগীনি, ইয়াম্বা ।”

“কদাইদা উখিবনো,ইনাউ ?”

“ এ ! ইয়াম্বা মফম সিমক্তদনি, ইয়াম্বা ।”

“ নহাক্তি করি থবক্কী লাকপদনো ?”

“ অঙাং ত্যুসন থিনবা লাকপনি । মতম লেনফম লাকফম অমা খঙদদনা শ্বায়দা ইতৎ তৎতনা নুমিৎ খূদীংগী স্বাইদা মতম লেল্লিবনি ।”

“ ওহ ! নঙসু ত্যুসন থিনবা মী ওইরে , হা হা হা ঐখোয় পার্তিনিনে ৱারম্লনিদা অদুদি ?”

“ বোরিং য়াম্না চুরে , ইয়াম্বা । য়ুমদা হনবসু অমুক ফরক তাগুম তৌ ।”

“ নয়াম্বসু মদুমক্নিনে তৌরিসে ।”

লূপা লীশীং অমা পীবা য়োংচাক চরোং অমসু মতম লেনফম খঙদদনা লৈশিল্লে হায়না ঐঙোন্দা ঊৎলি । মাগা ঐগা ত্যুসন মফমমক্তি মান্নরমদ্রে মাগীনা অঙ্কগী ওইদুনা লৈরম্মে । য়োংচাক মঙা অমসু শিংজু চাও হায়না হরাউ হরাউ মানা ঐঙোন্দা পীরক্লে । লৌরোইগা য়াদে মাসু ।

“ ৱারবনি ,ইয়াম্বা, ঐসু মতম লেনফম খঙদদনা । ঐগীদি গাড়ীদু অঙাং ইচানূপাদুদা থৌহল্লগা ত্যুসন অদুম থাবা য়ারবনি অদুবু মাগী গাড়ী খূৎথৌ অসি এরোপ্লেন থৌবদৌনা য়াঙনা থৌই অদুদা নুংশা থিদুনা থৌহন্দবনি ঐনা । অদুদনি ঐবু মানা ঐবু ইচেন চেন্নরিবসি । তৌবগীদি ঐগীদি হয়েংদগী উচিন নাচিন্না ত্যুসন লোইজরে খরা পোৎথারনি ইয়াম্বা ।”

“ ঐগীদি খরা ৱাৎলি ইবুংঙো । খূৎৱা অমনি ঐসু । নঙনা হেন্না খঙলবনি ! ইথন্দা অঙাওবা তারবরবু খল্লক্লবনি । মীঙোন্দদি হায়দোক্তে অঙাওবা ওইনা অমুক শন্দোকপিনি হায়দুনা ।”

ঐগী ইচম চম্বা ৱা অদু তারগা মহাক্নদি শিথ শিথ নোকই । মী অতৈনদি ইনোক নোক্নীংলমদবদি য়াই ।

“ হা হা হা ।”

“ঐদি অমরোমদা পল্লেপফম খঙদ্রবা লৈচিল অমগুম্না খল্লক্লে হন্দক মরক্কী পুন্সিসে ,ইনাউ।”

“হা হা হা, ইয়াম্বা প্রমান ফজৈ । ইয়াম্বনা হায়গুম্লদনা ঐসু লৈচিল অমগা পাংখক্নিনে চুম্মিনে । নহানমখৈবু খনবু খল্লুদে ঐদি,ইয়াম্বা ।”

“ মীশিংসিনা লৈচিল ওনখিদনবা মফম অসিদা লৈঙাক্না লৈরাং কয়ানা ফূগায়না শাৎলবা ফজরবা লৈকোল অমা মীশিংনা মতম লেনজনবা শেম্বীবা য়ারিবনি । মসি নৎত্রে হায়রগনা লাইরিক লাইসু পাজরগা মীশীংনা নোংমগী মতম লেন্নবা লাইব্রেরি অমা শাবিবা য়ারিবনি মসুম তৌরবদি ইচিন ইনাউ ঐখোয় নুমিদাংৱাইরমসিদা লৈচিল ওইবগী অৱাবা লৈজরম্লোইদৌবনি । ৱাখলসু অফবা খল্লনি । মফম অসি অফবা মী কয়া পোকখিবা ঐনা তাখ্রে । অদুবু মখোয়না অসিগুম্বা অফবা ৱাখল অসিমদি খনবীরমদ্রে । লৈচিলশিংগী অৱাবা মাঙজৌননা উবিরম্দ্রে । ” “ চুম্মী চুম্মী ইয়াম্বা , ফরে অদুদি অঙাংনা কোল অমা তৌরক্লে । নোংমা অমুক উনশি ঐ অমুক হানজরম্লগে, ইয়াম্বা ।”

“ ফরে হাল্লো অদুদি ইনাউ , নোংমা অমুক উনশি । নয়াম্বা লৈচিল ঙাইহাক অমুক নীং তম্না পাইহৌখিগে অদুদি ।”

মমিং মথা ইহংদি হংনদনা নোংমা অমুক উনশি হায়রগা মহাক অদুম চৎখ্রে । মহাক্কী মমিংবু করি ওইগনি হায়গে লৈচিল মঙায়দনা ।
নূপা অদু চৎখ্রবা মতুংদা পৱনকুমার অদু কদাইদা চৎলুবনো ঐবু উরদুনা ঐবু কৌরকই,

“ তা সুরজ কদাইদা চৎলুবনো ?”

“ অঙাং ত্যুসন থিনবা লাকপনি , পৱন ।”

“ মতম কয়াম ৱাৎলিগে ঐখোয়’দা চঙলগা চা থক্লুখিসিদনা ?”

“ য়ারেদা ইবুংঙো, নয়াম্বদি লৈচিলনিনা লৈচিল ওইনা অদুম লৈজহৌখিগে ঙসিগীদি ।”

ঐগী ৱাদু মাদি মকোক খঙদবনিনা গ্যান তারম্লোই ।

“ হো ইবুংঙো ঐ নোংমা ঙন্তানা চঙলক্কে ।”

ইচানূপীনা কোল তৌরক্লে । এ ঙসিগীদি মতমসু লোইরম্লেদনা ইথন্দা হায়জৈ । পৱনকুমারসু গাড়ী থৌরদুনা চৎখ্রে । ঐসু ইচানূপী ত্যুসন মফমদগী মাবু লৌবিরুনবা গাড়ী স্তার্ত তৌরে । নুমিদাংৱাইরমগী অতিয়াদা য়াম্না ৱাংনা কঙাওনরবা লৈচিল মতূম অমা কায়দোঙফম লৈতনা কোয়পাই পাইবদু উরুরগা পূক্নীং নুংশিজরকই ।

COMMENTS

WORDPRESS: 1
DISQUS: