স্তেত সোং লাউথোকখিবসি সাহিত্যগী মমল খঙবীরকপনি

Homeস্ক্রলবার

স্তেত সোং লাউথোকখিবসি সাহিত্যগী মমল খঙবীরকপনি

ইম্ফাল, আগস্ট ২১ : কোনুং লম্পাক্তা লৈবা ইবোয়াইমা শুমাঙ লীলা শঙলেন্দা পাঙথোকখিবা মণিপুরী লোলনা নিপালশুবা সেদ্যুলদা চনখিবগী ৩০ শুবা মণিপুরী লোলগী নুমিৎ

ইম্ফাল, আগস্ট ২১ : কোনুং লম্পাক্তা লৈবা ইবোয়াইমা শুমাঙ লীলা শঙলেন্দা পাঙথোকখিবা মণিপুরী লোলনা নিপালশুবা সেদ্যুলদা চনখিবগী ৩০ শুবা মণিপুরী লোলগী নুমিৎ থৌরমদা ‘সনা লৈবাক মণিপুর’ হায়বা ঈশৈ অসিবু ‘স্তেত সোং’ ওইনা লাউথোকখিবদা অপেনবা ফোঙদোক্নখিবগা লোয়ননা গভর্ণমেন্তকী খোংথাং অসি সাহিত্যগী মমল খঙবীবনি হায়না তরাম্না ওকখ্রে।
মণিপুরদা লৈরিবা তোঙান তোঙানবা লূপ ১৫ না পূনশিন্দুনা শেমখিবা মণিপুরী লেংগুয়েজ ডে স্তেত লেবেল সেলেব্রেসন কমিটিনা শীন্দুনা ঙরাং পাঙথোকখিবা থৌরম অদুদা কমিটি অসিগী চেয়ারমেনসু ওইরিবা এমএলএ লাংপোক্লাকপম জয়ন্ত কুমার সিংহনা থৌরম মপু ওইনা শরুক য়াখি অদুগা হান্নগী মিনিষ্টার তোংব্রম মঙ্গিবাবু সিংহ অমসুং শক্নাইরবা অইবা অরিবম কুমার শর্ম্মানা অখন্নবা মীথুংশিং ওইখি।
থৌরম মপু ওইনা শরুক য়াখিবা জয়ন্তকুমারনা হায়খি, ইং ১০০২দা মণিপুরী লোলনা নিপালশুবা সেদ্যুলদা চল্লবা মতুংদা ঐখোয় য়াম্না হরাওখি। অদুবু লোলগীদমক তৌগদবা য়াম্না ৱাৎলি। মসি ঐখোয় পূম্নমক চপ মান্ননা প্রেসার পীবা চঙলি। হৌজিক ঐখোয়গী মাংদা তাদুনা লৈরিবসি ক্লাসিকেল লেংগুয়েজ স্তেতসতা মণিপুরী লোল অসিবু য়াওহনবসিনি। মসি য়াওহন্নবা হোৎনবদা ঐখোয়গী লোল অসিগীদি চপ চাপা মচাক ময়াম লৈরবনি। মসি পূম্নমক অসি মরী লৈনবশিংদা খঙহনবা মথৌ তাই। মসিদা ঐখোয় পুম্নমক্না অমত্তা ওইনা চঙশিনহৌদ্রবনি হৌরক্লিবা মীরোলনা ঐখোয়বু ফজনা ঙাঙনবীরোই। ইপা ইপুনা থম্বীরম্বা মমল য়াম্লবা পুক্কৈ অসি নীংথিনা শিন্নরম্বা হায়বসিগী দায়িত্ব ঐখোয়দা চাউনা লৈ।
অখন্নবা মীথুং ওইখিবা মঙ্গিবাবু সিংহনা হায়খি, মণিপুরদা পাঙথোক্লিবা থৌলমশিংদা ইংলিশনা হেক্তা মপূং ওইনা শীজিন্নবসি য়াম্না তোইনা থেংনৈ। মসি অফবা অমদি নত্তে। মসিনা ইমালোল অসি শিথরক্নবগী মরম ওইহল্লি। ঐখোয় ইংলিশ হায়বসি খঙদবা য়াদে। অদুবু মফম মতম হায়বা অমা লৈ। অখন্নবা মীথুং ওইনা শরুক য়াখিবা অরিবম কুমার শর্ম্মানা হায়খি, লোলবু নুংশিবা লোলগীদমক কত্থোক্লবা মী ময়াম অমা মণিপুরসিদা লৈ। ময়াম অসিগী মপান্দগী ঐখোয়গী মণিপুরী লোল অসিনা নিপালশুবা সেদ্যুলদা চনবা ঙমখিবনি। হৌজিকসু ঐখোয় ক্লাসিকেল লেংগুয়েজ স্তেতসনা চন্নবা অকনবা ঈহৌ অমদি মথৌ তারে।
মণিপুরী লোলগী নুমিৎ অসিগা মরী লৈননা শরতচান্দ থিয়াম, সগোলশেল টিজেন্দ্র, মখোনমণি মোংশাবা, ৱারেপ্পা নবনসু ৱাফম কয়া হৌদোক্তুনা লোল অসিবু হেন্না চাওখৎহন্নবা হোৎনবদা চঙলিবা তঙাইফদবশিংদু মরি চুম্না ফোঙদোক্নখি। মণিপুর স্তেত অসিগী ওইজবা স্তেত সোং অমা মণিপুর গভর্ণমেন্তন থম্বীবা ঙম্বা অসিগীদমকসু থাগৎপা অমসুং তৌবীমল খঙবা উৎখি। লৈখিদ্রবা বি জয়ন্তকুমার শর্ম্মানা ইরম্বা সনা লৈবাক মণিপুর হায়বা ঈশৈ অসিমক শকখঙবীবা হায়বসি গভর্ণমেন্তনা সাহিত্যগী মমল অদুসু শকখঙবীরে হায়না লৌবা য়ারে হায়না ফোঙদোক্নখি।
মণিপুর য়ুনিভার্সিটি অব কালচারগী ভাইস চেন্সেলর প্রোফেসর পাওনম গুনিন্দ্রোনা হায়খি, মণিপুরী লোলগী অৱাংবা থাক অসি ক্লসিকেল লেংগুয়েজ স্তেতসতা চনবা য়াবগী মরম য়াম্না লৈ। হৌজিক ক্লাসিকেল লেংগুয়েজ স্তেতস অসিদা য়াওরিবা লোল তরুক অসিদা টিবেতো বর্মনগীদি য়াওদ্রি। মণিপুরী লোল অসিদি মসিগী কাঙলূপ্তা য়াওবা য়াম্না ইনাকখুনবা লোল অমনি হায়নসু মহাক্না মখা তাখি।
সোর্স: পোক্নফম

COMMENTS

WORDPRESS: 0
DISQUS: