শক্নাইরবা ‘চাকথেকপী নব’ লৈখিদ্রে

Homeস্ক্রলবার

শক্নাইরবা ‘চাকথেকপী নব’ লৈখিদ্রে

ইম্ফাল, সেপ্টেম্বর ২১ : মণিপুরী শুমাঙ লীলাদা থোইদোক্না মীয়াম্না ‘চাকথেকপী নব’ হায়না খঙনবা চৌধুরিময়ূম নবচন্দ্র শর্ম্মা মশাগী অনাবা অমনা মরম ওইরগা ঙসি ন

ইম্ফাল, সেপ্টেম্বর ২১ : মণিপুরী শুমাঙ লীলাদা থোইদোক্না মীয়াম্না ‘চাকথেকপী নব’ হায়না খঙনবা চৌধুরিময়ূম নবচন্দ্র শর্ম্মা মশাগী অনাবা অমনা মরম ওইরগা ঙসি নুংথিল পূং ২.৩০ রোম তারকপদা জেনিমস হোস্পিটালদা লৈখিদ্রে। লৈখিদবা মতমদা মশাগী চহী ৭০ রোম শুখ্রে। মহাক্কী লোয়নবী, মচানুপী ৬ অমসুং মচানুপা ১ থম্লম্মী।
শুমাঙ লীলাগী শক্নায়রবা নুপী খোঞ্জেল শৈশকপা নবচন্দ্র শর্ম্মা বামোন লৈকায় ব্রহ্মপুরদা পোক্লবা মতুং খুম্বোংদা মতম কুইনা লৈরম্মী। মসিগী মহাকপু মীয়াম্না ‘খুম্বোং নব’ হায়নসু খঙনখি। হৌজিক্না মহাক্কী পোক্নফম বামোন লৈকায় ব্রহ্মপুরদা লৈরে। ইং ১৯৭৭ তা দি নহারোল খোঙথাং আর্টিষ্ট এসোসিয়েশন (চাকথেকপী পার্টি) হায়রিবা লীলা কাঙবুসিদা নুপী খোঞ্জেলগী শৈশকপা অমা ওইনা য়াওদুনা শুমাঙ লীলাগী লমসিদা খোঙদাবা হৌরকখি। লীলা কাঙবু অসিদগী শুকহোং হোংদনা চাউরাক্না চহী ৩০ রোম লীলা য়াওরম্লগা মহাক শুমাঙ লীলাদগী পোত্থাখি। শৈশকপা অসি মণিপুর ষ্টেট ফিল্ম ডিবেলপমেন্ট কোর্পোরেসন্দশু থবক তৌরম্মী।
থোইদোক্না লীলা কাঙবু অসিগী ‘অসিরা মীওইবগী পুন্সি’ হায়রিবা লীলাসিদা য়ুম্না খুনৌদগী মমিং লৈরবা নুপী শাবী কুলানা চাকথেকপীগী শক্তাম লাংলগা মহাক্না নুপী খোঞ্জেলদা শকখিবা ‘ইচোয় চোইরে ৱাখলসে নুংশিবনা শুমহৎলে’ হায়রিবা ঈশৈ অসি মীয়াম্না য়াম্না পাম্নখিবা অমদি চুনখিবদুনা মহাক্কী ‘খুম্বোং নব’ হায়বা মিং অসিদগী ‘চাকথেকপী নব’ হায়বসিদা মীয়াম্না হেন্না খঙনরকখিবদা নৎতনা লীলা পার্টি অসিসু ‘চাকথেকপী পার্টি’ হায়না খঙনখি।
শৈশকপা অসিগী শুমাঙ লীলাদা ঙসিফাওবদা মীয়াম্না কাউদনা লৈহৌরবা ঈশৈশিংগী মরক্তা ‘শঙবান্নবা আতিয়া’ লীলাগী ‘ঙসি লোক্তাক খোঙবানসিদা’, ‘স্বর্গগী লৈকোল’ লীলাগী ‘নঙবু অঙাঙবা কুরাও মপালদা খোইনীংনা তোংবা উরক্তবরা, নহা ওইরক্তবরা’, ‘নাইট ক্লাব’ কী ‘লমদম তাম্না লৈখ্রবা’, ‘অপাইবা লৈচিল’ গী ‘কনাগী শক্তম্বু’ হায়রিবশিং অসি পনবা য়াই। শুমাঙ লীলাদতা নৎতনা মহাক্না নুপী খোঞ্জেলদা শকপা অডিও কেসেট কয়া অমসুং খূদোল তৌরম্মী।
সোর্স: পোক্নফম

COMMENTS

WORDPRESS: 0
DISQUS: