শক্নাইরবা অইবা রঘু লৈশাংথেম লৈখিদ্রে, খোরিরোলগী তোঙান-তোঙানবা লূপশিংনা অৱাবা ফোঙদোক্নরক্লি

Homeস্ক্রলবার

শক্নাইরবা অইবা রঘু লৈশাংথেম লৈখিদ্রে, খোরিরোলগী তোঙান-তোঙানবা লূপশিংনা অৱাবা ফোঙদোক্নরক্লি

ইম্ফাল, সেপ্টেম্বর ১০ : মণিপুরী লোলগী শক্নাইরবা অইবা সাহিত্য একাডেমি এৱার্দী রঘু লৈশাংথেম ঙসি লৈখিদ্রে। শক্নাইরবা অইবা অসিনা লৈখিদবদা খোরিরোলগী তোঙান-

ইম্ফাল, সেপ্টেম্বর ১০ : মণিপুরী লোলগী শক্নাইরবা অইবা সাহিত্য একাডেমি এৱার্দী রঘু লৈশাংথেম ঙসি লৈখিদ্রে। শক্নাইরবা অইবা অসিনা লৈখিদবদা খোরিরোলগী তোঙান-তোঙানবা লূপ কয়া য়াওনা মায়কৈ কয়াদগী অৱাবা ফোঙদোক্নরক্লি। দি কালচারেল ফোরাম মণিপুরগী জেনারেল সেক্রেটারি ক্ষেত্রি রাজেননা থাদোকরপা চেরোল অমনা হায়, ঙসি দি কালচারেল ফোরাম মণিপুরগী প্রেসিডেন্ট হুইরেম বিহারীনা থৌরম মপু ওইদুনা ফোরাম অসিগী লাইফ মেম্বার ওইরম্বা মীয়াম্না শকখঙনরবা থাংমৈবন্দ মৈস্নাম লৈকায়দগী রঘু লৈশাংথৈমনা ঙসি অয়ুক অঙনবদা লৈখিদবগা মরী লৈননা অনলাইনগী খুত্থাংদা ফোরাম অসিগী মেম্বারশিংনা অৱাবা ফোঙদোকপগী মীফম অমা পাঙথোকখ্রে। রঘু লৈশাংথেম মণিপুরী সাহিত্যদা মমিং লৈরবা অইবা অমনি। মহাক সাহিত্য একাডিমী নিউ দিল্লীনা পীবা লেমজনিংঙাই ওইরবা সাহিত্য একাডেমী এৱার্দ ২০০৯ অমসুং বাল সাহিত্য পুরস্কার ২০১৩ ফংলবা লৈবাকসিগী শক্নাইরবা অইবশিংগী মনুংদা অমনি। মহাক্না মণিপুরী লোলবু য়োকখৎনবা অচৌবা থৌদাং লৌবীরম্মী। মনিপুরী লোল অমসুং সাহিত্যগী লমদা কত্থোকপগা লোয়ননা মহাক্না লৌখিবা থৌদাং কয়াবু শকখঙবা ওইনা মণিপুরগী তোঙান তোঙানবা সাহিত্য লূপশিংনসু মনা কয়া পীদুনা ঈকায় খুম্নখ্রবনি। লোয়ননা দি কালচারেল ফোরাম মণিপুরগী লাইফ মেম্বার অমা ওইনা ফোরাম অসিবু চাউখৎননবা হোৎনবদা চাউরবা থৌদাং লৌবীরম্বা অইবা অসিনা লৈখিদবা অসি মণিপুরী সাহিত্য অমদি মণিপুরী খুন্নাইগী মেনখৎপা ঙম্লরোইদবা মাঙজবা অমনি। মহাক্না লৈখিদবদা ফোরাম অসিগী মেম্বারশিংনা মিনিট অনী তুমীন্না লেপ্তুনা অৱাবা ফোঙদোকপগা লোয়ননা মহাক্কী থৱায়না তাইবং মপুগী খুয়াদা ঈংনা চিক্না লৈরুনবসু থৌনিজখি। লৈখিদ্রবগী ইমুং-মনুংগী অৱাবদসু ফোরামগী মেম্বারশিংনা শরুক য়াজরি হায়নসু ফোঙদোরক্লি।


রাইটার্স ফোরাম ইম্ফালগী সেক্রেটারি মোইরাংথেম নোটিলালনা থাদোরকপা চেরোল অমনা হায়, মণিপুরী খোরিরোলগী মমিং লৈরবা সাহিত্য একাদেমী মনা ফংখ্রবা অইবা রঘু লৈশাংথেমন খঙহৌদনা লৈখিদবদা রাইটার্স ফোরাম ইম্ফালনা অনলাইনগী খুত্থাংদা থম্মোয় শোক্না অৱাবা ফোঙদোকখ্রে। লূপ অসিগী প্রেসিডেন্ট কৈশাম প্রিয়োকুমারান থৌরম মপু ওইদুনা অৱাবা ফোঙবগী থৌরম অদুদা লৈখিদ্রবগী থৱায় মীরেলনা লাইরম্লেন্দা ঈংনা চিক্না লৈরুনবা তাইবং মপুগী মফমদা থৌনিজখি।
চেরোল অসিনা মখা তানা হায়, রঘু লৈশাংথেম কুমজা ১৯৫৯গী মার্চ ১দা থৌবাল লৈশাংথেমদা পোকখি। হৌজিক্না থাংমৈবন্দ শৈস্নাম লৈকায়দা লৈবনি। মণিপুর লৈঙাক্কী এক্সাইজ দিপার্টমেন্টতা ডিপুটি সুপারিন্টেন্ডেন্ট অব এক্সাইজ ওইরম্মী। মহাক্না হিংলিঙৈদা শৈরেংগী লাইরিক ৯, অঙাংগী লাংরিক ৬ ফোঙলম্মী। মহাক্কী শৈরেংগী লাইরিক ‘খুঙ্গংগী চিঠিদা’ কুমজা ২০০৯গী সাহিত্য একাদেমী এৱার্দ অদুগা মহাক্কী অঙাংগী লাইরিক ‘পাৎপানগী থোইবী’দনা কুমজা ২০১৩ গী বাল সাহিত্য পুরস্কার পীদুনা ইকায় খুম্নখি। মহাক্না হিংলিঙৈদা মণিপুরী খোরিরোলগী মমিং লৈরবা লূপ কয়াগীসু অচঙবা থৌমী ওইবীরম্মী। অসিগুম্লবা তাঙলবা অইবা অসিনা খঙহৌদনা লৈখিদবা অসি মণিপুরী খোরিরোলগী ওইনদি মেনখৎপা ঙম্লরোইদবা মাঙজবা অমনি। লোয়ননা ফোরাম অসিনা ইমুং-মনুংগী অৱাবদসু শরুক য়াজরি হায়নসু ফোঙদোরক্লি।

বাংলাদেশতা ফোংবা বাংলা লোনদা হন্দোকপা, অইবা রঘু লৈশাংথেমগী অখন্নবা শৈরেংগী লাইরিক

প্রেট্রিওটিক রাইটার্স ফোরাম মণিপুরগী সেক্রেটারি রাকেশ নাওরেমনা থাদোরকপা চেরোল অমনা হায়, শক্নাইরবা অইবা সাহিত্য একাডেমী এৱার্দী রঘু লৈশাংথেমনা ঙসি খঙহৌদনা লৈখিদবদা পেট্রিওটিক রাইর্টারস ফোরাম মণিপুরগী প্রেসিডেন্ট নাওরোইবম খম্বা লুৱাংনা মীফম মপু ওইদুনা অনলাইনগী খুত্থাংদা অৱাবা ফোঙদোকখ্রে। অৱাবা ফোঙবগী মীফম অদুদা ফোরামগী ভাইস প্রেসিডেন্ট সোবিতা মোংজম, হান্নগী প্রেসিডেন্ট য়াইস্কুল খ্বাইরাকপম, সেক্রেটারি রাকেশ নাওরেম অমদি ডা. উমাবতি অথোকপম, ডা. লৌরিয়াম শান্তনিনচিংবা ফোরামগী মরুওইবা লুপলোয় কয়ানা শরুক য়াখি। মহাক প্রেট্রিওটিক রাইটার্স ফোরাম মণিপুরগী প্রেসিডেন্ট ওইনসু থৌ পুরম্মী। রঘু লৈশাংথেমনা ইরম্বা লাইরিকশিংগী মনুংদা পনবা য়াবা খরদি- পুন্সি তেলঙ্গা (পোইট্রি এন্থোলোজি ১৯৯১), লালবু লৈ ওইনা শান্নরিবা ( পোইট্রি এন্থোলোজি ১৯৯৫), নুঙ অসি লাইনি লৈ অসি ঈনি (পোইট্রি ১৯৯৯), হনুবগী ঈশিং পূন (পোইট্রি ২০০২), অতিথি উচেক (চিলড্রেন্স ষ্টোরিজ ২০০৩), খুঙ্গংগী চিঠি (পোইট্রি ২০০৫), তেঞ্জৈ অমসুং ঙা মমিৎ (চিলড্রেন্স ষ্টোরিজ ২০০৫), চীংশাং নাপোম কপ্লি (পোইট্রি ২০০৯), পাৎপানগী থোইবী (পোইট্রি ২০০৯), য়েনবা লাবা খোংলক্লে (চিলড্রেন্স ষ্টোরিজ ২০১১), বসন্ত ওইগেরা নাকেন্থা ওইগেরা (পোইট্রি ২০১১), খোরিফাবা (নোভেল ২০১৩) অমদি শৈরেংগী খুঙ্গং (পোইট্রি ২০১৪) অসিনচিংবনি। রঘু লৈশাংথেম মণিপুর ষ্টেট লাইব্রেরী প্লান্নিং বোর্ডকী মেম্বার ওইরম্বদা নত্তনা মণিপুরী সাহিত্য পরিষদ ইম্ফালগী এডিটরসু ওইরম্মী। লোয়ননা নহারোল সাহিত্য প্রেমী সমিটিগী সেক্রেটারিসু ওইরম্মী হায়নসু ফোঙদোরক্লি।
অসিগুম্বা তাংলবা কবি অসিনা খঙহৌদনা লৈখিদবসি মণিপুরী খোরিরোলগী ওইনদি মেনখৎপা ঙম্লরোইদবা মাঙজবা অমনি। মহ্ক্না লৈখিদবদা রাইটার্স ফোরাম ইম্ফাল, কালচারেল ফোরাম মণিপুর, নহারোল সাহিত্য প্রেমী সমিটি, ইরমদম মীয়ামগী অপুনবা খোর্জে লুপ, মণিপুরী লিটরেরি এন্ড কালচারেল ফোরাম ত্রিপুরা, প্রোগ্রেসিব রাইটার্স এসোসিয়েসন মণিপুর, অসৈলুপ মণিপুর, নোর্থ ইষ্ট রাইটার্স ফোরামনা তোঙান তোঙান্না থাদোরকপা চেরোলশিংদা থম্মোয় শোক্না অৱাবা ফোঙদোরক্লি অমসুং বাংলাদেশকী মণিপুরী খোরিরোলবু নুংশিজবা পুম্নমক্নসু বাংলাদেশকী লোকেল মিডিয়াদা শক্নাইরবা অইবা অসিনা খংহৌদনা লৈখিদবদা থম্মোয় শোক্না অৱাবা ফোঙদোকতুনা শৈথারকখি।

COMMENTS

WORDPRESS: 0
DISQUS: