লৈপাক্কী ঈশৈ ওইখ্রবা ‘সনা লৈবাক মণিপুর’ -মাখোনমনি মোংসাবা

Homeস্ক্রলবার

লৈপাক্কী ঈশৈ ওইখ্রবা ‘সনা লৈবাক মণিপুর’ -মাখোনমনি মোংসাবা

  পূম্নমক ইমা লৈবাকপু ইকায় খূম্নবা উৎচবনি। ইরমদম ইমা লৈপাকপু নুংশিনা শৈথাদুনা শীজ্ন্নিরকপসি তম্পাক্কী লমদদি ঙল্লিঙৈদগী লেপ্তনা শক্নরক্লিবা অমনি।

 

পূম্নমক ইমা লৈবাকপু ইকায় খূম্নবা উৎচবনি। ইরমদম ইমা লৈপাকপু নুংশিনা শৈথাদুনা শীজ্ন্নিরকপসি তম্পাক্কী লমদদি ঙল্লিঙৈদগী লেপ্তনা শক্নরক্লিবা অমনি। ঐখোয়গী ওইনা অনৌবা অমদি ওইদ্রে। মীয়াম্না কাওনখিবা, চৎনরক্তবনা খঙবীদবা থৌশাবীদবনি পেনা অশৈবশিংনা -সনা লমওক, খোইজু লমওক, খেনচো, হিজন হিরাউ শক্তুনা লাকখ্রবনি। ঈশৈশিং অসি অচম্বা অমত্তা নত্তে। নিংথৌরোল কয়াগী হাক্তক্তগী মতাং মতাংগী শীজিন্নরকখিবা মমল য়ামখ্রবা কয়া লৈজরকই।

লৈপাক্কী ঈশৈ হায়বসি করিনো? করি মরমগী লৈপাক্কী ঈশৈ থমগদৌরিবনো? ৱাহং অনী অসি ঐখোয়না য়াম্না লূম্না লৌরগা খঙমিন্নবা চঙলি। ঐখোয় পূম্নমক ইমা হায়বসিনা থাবুম তারা নাওপুরগা তাইবংপানবদা পোকপীরকপা ঙাক্তনি।
ইমানা পোকপীরকপদনি ইমানা অমুক শীন্নবীগদৌরিবা অসি মালেম ইমাগী মতম্পাক্তনি। লোইনরকপা খোইরি লিনশাং ফুমগদৌরিবা, হৈনা চৎপা তমগদৌরিবা, চেন চোংদুনা চাওবা শারেপ তম্লকপদগীনা অরোয়বা মতম লাক্তুনা থৱায়গা হকচাংগা শেৎনা খাইনদুনা তীনখিগদৌরিবা মফমসু মালেম ইমাগী লৈশাদনি। তাইবং মীওইবগী মাগী মাগী খোংদাফম পোকফম শাৎফম অসি, মীওই অদুগী মরমদম্নি, মরৈবাক্কি। অপোকপী ইমাগী মথংদা অনীশুবা ঈমাদি ঈরৈবাক্না ওইরি। মরৈপাক মরমদম নুংশিদবা মীওইবা লৈতে। মীওইবনা মাগী মাগী মরৈবাক মরমদমবু চাউখৎহনবা পাম্মী। মরৈবাক মরমদমবু মীখা পোলহনবা পামদে। মরৈবাক নুংশিজবগীদমক থৱায় থাদোকপা পাম্মুদে।
মরৈবাক্কী মরমদা শৈথাদুনা তুংদা হৌরক্লিবা মীরোলদা খঙহৌনবা মফম খূদিংদা শেমদুনা থম্নৈ। অৱাবা, মীওৎ মীনৈ ফংখিবা লোই চনশিনখ্রবা লৈপাকশিংনা নীংতম্বা পামলকপদগী থম্মোয়গী খোল্লাওদগী নীংতম্বগী ঈশৈ থোকলকখি। নীংতম্বগী খোল্লাও ঈশৈ অসিনা থৌনা হাপলক্তুনা মীপূম খূদিংনা মরৈবাক নুংশিবা পোক্নরি। মালেমগী লৈপাকশিংনা মাগী মাগী মরৈপাক মরমদমগীদমক ঈশৈ শেমলকপগী ৱারী লৈনৈ। মরৈবাক নীংবগী ঈশৈ অসিনা মীয়ামবু থৌনা হাপলকখিবদগী মীয়ামগী ওইরকখি।
ঙল্লিঙৈদগী নিংথৌ পাল্লকপা লৈপাকশিংদা নিংথৌনা নুংঙাই য়াইফনা তাইবং মপুগী থৌজাল লৈনা লৈপাক্কী থৌদাং লৌবা ঙম্লবগীদমক ঈশৈশিং লৈনরকই। রোয়েল এন্থম, কোর্ট সিঙ্গার হায়দুনা য়ুরোপিয়ান মোনার্কিজশিংনা ঙল্লিঙৈ কুমশীং ১৬১৯দা ‘তাইবং শেম্বা মপুনা লৈপাক নিংথৌবু কনবীসনু’ ‘‘গড সেভ দি কিং’’ হায়না ঈশৈ শক্নরকখিবা ঐখোয়না তাখ্রে। স্পোইন, ডেনমার্ক লৈপাকশিংনসু মখোয়গী মরমগী মরৈবাক নীংবা ঈশৈ ঙল্লিঙৈদগী শক্নরকখ্রে। লেটিন আমেরিকান ৱারস অব ইন্ডিপেন্ডেস হায়দুনা আর্জেন্টিনানা, পেরুনা, ব্রাজিলনা মখোয় মখোয়গী নীংতম্বা ফংনবা মরৈবাক নীংবগী ঈশৈ কয়া মালেমগী অহানবা অমদি অনীশুবা লাঞ্জাও মমাং অমসুং মতুংদা ঈশৈ কয়া শক্তুনা লৈনখ্রবনি। ডটস নেশনেল এন্থম হায়দুনা মালেমদা শোন্নরিবা মরৈবাক মরমদগী শৈথাবা নুংশিবা ঈশৈ সোভিয়েটকী, জাপান লৈবাক্কী নীংতম্বা হঞ্জিল্লকপগী য়াম্না লৈনখ্রে। ঈশৈগী মখলশিংনা নেশনেল এন্থেম, কান্ত্রি সোং, স্টেট সোং হায়না লৈনরি। ইন্দিয়াগীসু নীংতম্বগা মরীলৈননা বঙ্কিমচন্দ্রনা-‘বন্দে মাতারম’ অমদি রবিন্দ্রনাথনা ‘জন গন মন..’ কুমশীং ১৯৫০ অদুৱাইদা শেমখ্রে।
ঐখোয়গী মণিফুর লমদম অসিগী ওইনসু তুমিন্না লৈরকখিবদি নত্তে। অশৈ লোইশঙনা অমদি পেনা খোংজোম পর্ব শকপা ওঝাশিংনা নিংথৌগী মতীক ময়াই, কন থৌবা শৈথাদুনা শকপা ঈশৈ ঙল্লিঙৈদগী লৈরকই। মণিপুরগী শুম্মাং লীলা ফাওবনা, “মৈতৈ লৈমা ইমাগী মিঙ্খৈ শোল্লসি” হায়দুনা খুল্লক লৈরক, লৈকাই কয়াদা ঙল্লিঙৈদগী মরৈবাক শৈথাদুনা শকচদুনা লীলা শান্নবা হৌদ্রিঙৈদা শৈহৌ ওইনা লীলারোই খূদিংমক্না ঙসি ফাওবা শকচরি। মসিগী মমলসু ঐখোয়না খঙবীফম থোকই। মতম ঈশৈ কাঙলুপনসু ঈশৈ থৌরম অমা হৌদ্রিঙৈদা মণিপুরবু শৈথাবা ঈশৈ হান্না হৌরগা শক্নরি। পূম্নমক ইমা লৈবাকপু ইকায় খূম্নবা উৎচবনি। ইরমদম ইমা লৈপাকপু নুংশিনা শৈথাদুনা শীজ্ন্নিরকপসি তম্পাক্কী লমদদি ঙল্লিঙৈদগী লেপ্তনা শক্নরক্লিবা অমনি। ঐখোয়গী ওইনা অনৌবা অমদি ওইদ্রে। মীয়াম্না কাওনখিবা, চৎনরক্তবনা খঙবীদবা থৌশাবীদবনি পেনা অশৈবশিংনা -সনা লমওক, খোইজু লমওক, খেনচো, হিজন হিরাউ শক্তুনা লাকখ্রবনি। ঈশৈশিং অসি অচম্বা অমত্তা নত্তে। নিংথৌরোল কয়াগী হাক্তক্তগী মতাং মতাংগী শীজিন্নরকখিবা মমল য়ামখ্রবা কয়া লৈজরকই।
ঙল্লিঙৈগী মতম অল ইন্দিয়া রেডিও ইম্ফালনা ঈশৈ ময়েক কৌবদা লৈপাক নীংবা ঈশৈ, লাইশোন ঈশৈ অমদি মতম ঈশৈ অহুম অসি পূন্না পূন্না ময়েক ইরক্নবা কৌখৎপগী চৎনবী লৈরকই। লাইশোন ঈশৈ অমদি লৈপাক নীংবা ঈশৈ অসি অল ইন্দিয়া রেডিও ইম্ফালনা য়াম্না মরুওইনা ঙল্লিঙৈদগী লৌরকখিবা থেংনরকই। অল ইন্দিয়া রেডিও ইম্ফালনা পুথোকখিবা লৈপাকনীংবা ঈশৈ কয়া লৈখি। ঈশৈগী কাঙলুপশিংদা মতম মতমগী শৈথাদুনা শকপা মশীং য়ামখ্রে খরদং পল্লবদা-হো ইমা পোক্নফম ইমা নঙগুম্বী লৈতে ইমা/ সনা লৈবাক মণিপুর কোলোয় নঙগী মণিপুর/ ঈরৈবাক কন্দৌবা নহারোল ঐখোয়নি/ কয়াম ৱাৎলি লমদমদো / লাও য়েংলুসি লাও / মৈতৈ লৈকোন্দা নৌনা পোম্লিবী… অসিনচিংবনি। ঈশৈশিং অসি রুপ রাগনা শকপীখিবনি। শৈরেংবশিং খুরাইজম ফুলেন্দ্র, বি জয়ন্ত কুমার অমদি কোনসবা ইবৌচৌনি। লৈপাক নীংবগী ঈশৈ খক নত্তনা মরৈবাক নুংশিনবা নহারোলশিংদা থৌনা হাপখিবা ঈশৈশিংনি। নীং-খা তম্নবগী মীনাই নাইথাংগী পূন্সিদগী নীংতম্বা ফংনবা, নহারোলশিংদা মরৈবাক নুংশিনবগী থৌনা হাপখিবা ইমাসি এম কে বিনোদিনিনা ইখিবা ঈশৈ অমসু লৈরি। “শূক্ন মম্ল গুহানুংদা তূম্লিবা নোংশা পাঙ্গনবা, হৌরো হৌরো হৌরো মতম য়ৌরে।” অরাম্বাম সমরেন্দ্রনা ইবা অমসু লৈরি-“চাইখ্রে ঙসি নঙগী লৌবুক্তা নচাশিংগী ঈখৈংনা”। ঈশৈ অয়াম্বা রুপ রাগনা শকখি। অল ইন্দিয়া রেডিও ইম্ফালনা ঙল্লিঙৈগী ফজবা কাওঙমদবা লৈপাক নীংববু ওইরগসু লাইশোন ঈশৈ ওইরগসু য়াম্না পুথোকপীখি। অল ইন্দিয়া রেডিও ইম্ফালনা লমদমসিদা লৈপাক নীংবা ঈশৈ তাহনবদা অচৌবা থৌদাং লৌরকখি হায়বসিমসু পঞ্জনিংঙি। রুপ রাগনা মমিং লৈখিবসু অল ইন্দিয়া রেডিও ইম্ফালগা মরী লৈনরকপদগীনি। অল ইন্দিয়া রেডিও ইম্ফালগীদমক ঙল্লিঙৈদা ঈশৈ নোংমাইগী থৌরমশিংগী মরুওইবা থৌদাং লৌরকখিবসি রুপ রাগনি। নাকল অমরোমদা তামো নোংমাইথেম পাহারিনা শকখিবা লৈপাকনীংবা ঈশৈ-“খোম্লাং লমন শিংঙম্লোই নঙগী মীনুংশি চাওবী হে ইমা” মীপুম খূদিংগী নাকোংদা চুদুনা লৈরিবা লৈপাক নীংবা ঈশৈনি।
কুমশীং ১৯৮০ দা অপূনবা খেঅঞ্জেলদা শকখিবা ঈশৈ অমা ঐগী নাকোংদা তারি ঈশৈ অসি বিরমনি হৈস্নামগী ময়েক্নি নোংমাইথেম পাহাড়ি, নিংথৌজম নবচন্দ্রা, খুন জয়কুমার নুপীদা অরাম্বম যমুনা, লাইশ্রম মেম্মা অমদি গীতা মৗওইশিং অসিনা ইম্ফালগী গান্ধী মেমোরিয়েল হোলদা শান্নরোইশিংগীদমক পূক্নিং থৌগৎপা ফাংশন অমদা শকখি। “ঐখোয়গী ঈরৈবাক ঐখোয়গী কংলৈপাক/ ৱাত্ত পাদবী ইমা মীথোই মীহেন পোকপী মণিপুর/ ঈংনা নৌজবী মোমোন নোকচবী / তম্বীবা জগোয়বু শাজরি লেপ্তনা/ শীংথারি মালেমদা শক্নরি শোন্নরি খঙনরি তাইবংনা / ইপা ইপুগী লোনচৎ শাজৎ / মূক্নাদা কাঙজৈদা চেনজোংদা মাংজোংদা/ লাইজ থক্তা ইরোইবদা, ঙসিদি খঙনরে মালেমদা।” শৈশক অসি ঐগী নাকোংদা ঙসিসু ময়েক অসিগা কোন্ননা লৈরি। ময়াম্না খঙনবীদবা ঈশৈনি। শান্নরোই পুথোকপা লমদম অসিনা শঅন্নবগা লোয়ননা ইরৈবাকপু নীংজবগী পূক্নিং ইথিল পীবা ঈশৈ ঙল্লিঙৈদা লৈখি হায়াব কাওথোকপীরে। রুপ রাগ খক্ত নত্তনা মণিপুরদা খর ঙল্লিঙৈদা ঈশৈ কাঙলুপ খরনা শকখিবা অমদি ঈশৈ ওইনা ফোঙখিবা লৈপাকনীংবা ঈশৈ কয়া অমসু লৈরি। ঈশৈ নোংমাইগী কাঙবু কয়ানা ঙল্লিঙৈদা ফজবা মতীং লৈবা, তু চুংবা ঈশৈ য়াম্না পুথোকপীখি। মখোয়বসু ঐখোয়না নীংশিংলি।
সোর্স: হুইয়েন লানপাউ, ১৫ আগস্ট ২০২১
হন্দক মণিপুরগী লৈঙাক্না ঐগ্যা বি. জয়ন্ত কুমার শর্ম্মানা ইবা অরিবম শ্যাম শর্ম্মানা শৈপানবা রুপ রাগগী কাংবুনা শকপা লৈপাক নীংবা ঈশৈ-“সনা লৈপাক মণিপুর / কোলোয় নঙগী মণিপুর” অসি লৈপাক অসিগী ষ্টেট শোং ওএর হায়না কেবিনেট তা পুথোকপীদুনা গেজেটতা হাপতুনা লাওথোকপীবদা অসুক্কী মতীং নুঙাইজৈ, থাগৎচরি। চেকশিন্দবা য়াদবা খঙমিন্নদবা য়াদবা অমদি লৈরি। অসুক মমল লৈনা লৈঙাক্না লাওথোক্লিবা ঈশৈ অসি চাকচা হৈজানবগী, পীকনিক চৎপদা শক্নবা ঈশৈদি নত্তে। মসিগী মমল খঙহনজনিংঙি। লৈপাক্কী ঈশৈ ষ্টেট সোং, নেশনেল এন্থেম হায়বসি শকপা তারবদি মফম লৈগনি। ঈশৈ অদু শকলকপা মতমদা চৎলম্বা মী লেপ্তুনা লৈগনি। ফমলম্বা মহাক হৌগৎকনি। ৱারী শারম্বা লেপকনি। মসি খঙনা শীজিন্নহন্নিংঙি। আগস্ট ১৩ মরৈবাক নীংবা অথৌবা নীংশিং নুমিৎকী থৌরমদা ‘সনা লৈপাক ঈশৈ..” অসি হরাউনা শক্তুনা মীয়ামদা লান্থোকপা মতমদা ইকায় খূম্নবা উৎপদি লাইরদনা চঙশিল্লগা পৈশা থাবা মীওই মিডিয়াদা উখি। মফম অসিদা পৈশা থাগদবা নত্তে। লৈপাক্কী ঈশৈ ষ্টেট সোং শকপদা চঙশিল্লগা পৈশা থাকে খনবীরিবদু হান্না ৱাখন তাহনবা চঙলি। অসুক মমল লৈনা লৈঙাক্না লাওথোকলিবা ঈশৈ অদুগী মমল করি ওইগদগে ঐখোয় হান্না খঙমিন্নদবা য়াদ্রি। ঐহাক নীংশিংলি কিউবাদা ঐখোয়না ফেষ্টিভেলগী চৎপদা ঐখোয়বু পুরিবা বাস ড্রাইভার অদুনা বাস থৌরম্বদগী খাম্লগা কুমথরগা মকোক নোন্দুনা তুপী লৌথোক্লগা লেপখি। ঐখোয়না গাড়ি য়াদ্রব্রা হংলুবদা, নত্তে মখোয়গী লৈপাক্কী ঈশৈ অমা শক্লি অদুগী ইকায়খুম্নবা উৎপনি হায়রকখি। য়েংথোকলুবদা খরা লাপ্না ময়াম লেপ্লগা লম্বীগী মতাই অমদা মলৈবাক্কী ঈশৈ শকপা থৌরম অমা উখি। থাপ্না শক্লিবা থৌরমগী ঈশৈদু ফাওবা মহাক্না অরাপ্পা মফমদগী গাড়ি থৌবা লেপ্লগা ইকায়খুম্নবা উৎলি। ঐখোয়গীনা ঈশৈ শক্লিঙৈদা মাইক্রোফোন পীশিল্লি। শৈশকপা অমসু থেঙনা লাক্লগা চঙশিল্লগা ঈশৈ শকপা অদুম য়াওশিল্লি, মীয়ামসু মরেং মরেং কোইচৎ চৎলি ৱারী শানখি, মিডিয়াসু ফোটো চেনশিন্দুনা পংকাপ্তা কাপখি। অহানবা ওইবদুদা তৌবদি ওইরম্বা য়াই মসি তুংদসু অদুম হৈনখিনি। মওংসি ঐনা মিডিয়াদা উজখিবনি।
লৈঙাক্না ময়েক শেংনা ষ্টেট সোং ওইনা লাওথোকপীরে থাগৎচরি। নুংঙাইবা ফোংদোকচরি অদুবু ইকায়খুম্নবা উৎপগী থৌরাম অদুসু ফজবা ৱাৎলি। মশক থোক্না ঈশৈ ময়েক পাথোক্তুনা অমদি ঈশৈ অদুগী শৈপানবা য়াওনা মখোয়বুসু ইকায়খুম্নবীরগা মওং তানা তৌরম্লগদি হেন্না মশক থোক্কনি। ৱাফম অমনা, ঈশৈ অসিমক্তি ১৯৭২ মণিপুর ষ্টেটহুড ফংবগী থৌরমদা মতম অদুগী সোং এন্ড ড্রামা ডিভিশন্না শিন্দুনা তম্ফাসনা স্কুলগী, ৱাঙ্খৈ গার্লসকী, সিসি স্কুলগী অমদি রাজা ডুমব্রা স্কুলগী মহৈরোইশিংদা তম্বীরগা ‘সনা লৈবাক মণিপুর’ ঈশৈ অসি ষ্টেটকী থৌরমদা লাওথোক্তুনা শকখ্রবা অমনি। থৌরম অদুমক করা মনমুহোন্না ডকুমেন্টারী ফিল্ম ওইনা ‘মণিপুর ষ্টেটহুড ডে সেলেব্রেশন’ হায়না নমদুনা কুমশীং ১৯৭২ দা পুথোকখিবা অদুদসু হাপ্তুনা ঈশৈ অসি ঙন্না শীজিন্নরকখ্রে। লৈপাক খঙনা লাওথোকখিদবগী ৱানি ঙল্লিঙৈদা সনা লৈপাক মণিপুর ঈশৈ অসি লমদমসিগী ওইরকখ্রে। ঐখোয়না অঙাং ওইরিঙৈ স্কুলগী থৌরমশিংদা যাম্না শক্নখি। কনা অমত্তনা থৌশাখিদে। ঐখোয়নসু মপান লৈপাক মীরমদা চৎপা মতমদা ঐখোয়গী ঈশৈনি হায়দুন রাশিয়াদা, কিউবাদা, জাপান্দা মফম খুদিং শকলমখি। ঙসি ঈশৈ অসি লৈঙাক্না খঙবীদুনা ষ্টেটকী সোংনি ঈশৈনি হায়না লাওথোকপীরকসি মমল য়াম্মি। শিল্লোংগী রাজবাড়ী অসিসু লৈঙাক্না লৌশিল্লে হায়বা ৱাফম অমসু মিডিয়াদা থেংনজরে। মমল য়াম্লবা ৱাফম ঙাক্তনি। পুৱারীগা শাগোন্নবা কোনুং অমদি মফমশিং লৈরিবসিসু মিৎয়েং চঙহঞ্জনিংঙি। লৈপাক্কীনি মীয়ামগীনি, মমল খঙনা শীজিন্নবনা ঐখোয়গী থৌদাংনি।

COMMENTS

WORDPRESS: 1
DISQUS: