লৈঙাক্না অথুবা মতমদা হেরিটেজ সাইট ওইনা লাউথোকপীয়ু

Homeকমিউনিটি

লৈঙাক্না অথুবা মতমদা হেরিটেজ সাইট ওইনা লাউথোকপীয়ু

নোংদোন লাইরেম্বী ডিভেলপমেন্ট এসোসিয়েসনগী এক্সিকিউটিভ মীটিং অমা হৌখিবা এপ্রিল ২৫দা পাঙথোক্তুনা হন্দক কৌব্রু চীংখোংদা তাবা খোংজাই ফুরুপকী মীওইশিংনা চীং

নোংদোন লাইরেম্বী ডিভেলপমেন্ট এসোসিয়েসনগী এক্সিকিউটিভ মীটিং অমা হৌখিবা এপ্রিল ২৫দা পাঙথোক্তুনা হন্দক কৌব্রু চীংখোংদা তাবা খোংজাই ফুরুপকী মীওইশিংনা চীং কানবগী লম্বীগী থোং থুগায়বা অমদি চীংখোংদা লৈবা কৌব্রুগী লাইশঙ মৈ থাবনচিংবা তৌখিবা অদুগী মতাংদা কুপ্না খন্নখিবগা লোয়ননা লৈঙাক্না অথুবা মতমদা কৌব্রু লাইফমলেনবু হেরিটেজ সাইট ওইনা লাউথোকপীনবা তকশিল্লক্লি।

কৌব্রু চীংশাং অসি য়েলহৌমীশিংগী হৌরকফমনি অমদি তাইবংপান অসিনা লৈরিমখৈদি মীতৈ সলাই ৭কী থাদোক্নবা য়াদ্রবা মফম অমা ওইদুনা লৈগদবনি। মতম শাংনা লৈঙাক্না অমদি তম্পাক্তা তারিবা মীতৈশিংনা তুংদা অসিগুম্বা থোক্লক্কনি হায়বা খঙদবা অমদি থওইদবদগী ইপা-ইপুশিংনা নৌনা চঙলকপা খোংজাই হায়না খঙনবা চীংমী কাংবু অসিনা তম্পাক্কা তায়নবা চীংখোং চীংয়াদা মচোই মচোই তারম্বদগী হৌজিক পাক-শন্না রিজার্ভ ফরেস্টকী লমশিংদা খুন্দাশিল্লক্লি।

ফম্বা চল্লগা হিপ্পা চল্লি হায়বগুম য়েলহৌমী শাদুনা য়েলহৌমী মীতৈগী থাদোক্নবা য়াদ্রবা চীংগী লাইফমশিংদা অরোনবা এজেন্দা অমগী মখাদা থুগায়নবা হোৎনরক্লি। মসিগী খুদম হায়ববু, থাংজিং চীংবু থাংতিং ওন্থোক্নবা হোৎনখিবা, কৌনু লাইরেম্বীগী শঙলেন থুগায়খিবা অমদি হন্দক্তা কৌব্রু চীংখোংদা নিয়ম লান্না খুন্দাশিল্লকপা খোংজাই (কুকি) কাংবুনা শেম্বা অথোরিটি লৈতবা লুপ প্রোটেক্সন এন্ড প্রিজার্বেসন কম্মিটি মাউন্ট কৌব্রু কৌবা লুপ অমনা লাই খুরুম্বদি য়াগনি, লাইশঙ শাবদি য়ারোই ফোঙদোরকপগা লোয়ননা কৌব্রু লৈখাদা লৈরিবা ইপুথৌগী লাইশঙগা মরি লৈনবা শঙ মৈ থাবা অমদি চীং কাফম থোং থুদেকপনচিংবা কয়া চত্থরক্লিবা অসিনি।

তৌরক্লিবা থৌওং অসিদি মৈতৈগী পাউরৌদা লৌ মপু য়োংনা তানবা হায়বদুনি। ইপা-ইপু হাক্তক্তগী মীতৈশিংনা য়েক্নবা কয়াগা লান্থেংনদুনা লৈবাক অসিবু কন্দুনা লাক্লি। মীতৈশিংনা মরৈবাকপু কনবদগী ঙসিগী মণিপুর হায়রিবা স্টেট অসি লৈরিবনি। মীতৈনা মমা লৈবাকপু থওইদ্রবা, মশাগী শক্তম ঙাকপা ঙমদ্রবা অমদি মমা লৈবাক্কীদমক কৎথোকপা ঙমদ্রবা মতম অদুদা মণিপুর লৈররোই অমদি মীতৈগী শক্তমসু মাঙলগনি। মীতৈ হায়বসি পুকচেল চাওবা মীনুংশি খঙবা অমদি মফুরুপকী খন্দবা কাংলুপনি। পুকফবগী শরুক থুংদে হায়বা ইপা-ইপুগী পাউরৌদু ঙসিদি থোক্লরে। ঐখোয়গী চাকলুক্তা মীতোপনা খুজাই থাংজিল্লক্লে হায়রি।

হৌজিক থেংলবসু থেংনা মরৈবাক মফুরুপ্পু নুংশিজবা লুপ কয়ানা চোংথোরক্তুনা লাউনরক্লিবা অমদি থবক ওইনা পাঙথোরক্লিবা অসি তরাইনা লৌফম থোক্তে। অচৌবা কাংলুপকি ইরাং অমা থোরকপসু য়ারিবনি। মীতৈগী ইপা-ইপুশিংনা থম্বিরম্বা লাইগী খুভমশিং থুগায়নবা অতোপ্পা ফুরুপনা হোৎনরক্লিবা অসি থেংনবা হায়বসি ঐখোয়গী লেংদ্রবা থৌদাং ওইগদবনি।

মণিপুরগী শরুক তরা থোকপগী শরুক অমখক্তমক চাওবা তম্পাক্কী লম অসিদা আইনগী ওইবা অথিংবা অমত্তা লৈতনা ফুরুপ কয়ানা খুন্দারি। য়েলহৌমীশিং লৈফম লৈরক্তবা চাওখৎ থৌরম কয়া তৌফম লৈরক্তবদগী লৌফম কয়াদা মী লৈশিনবা অমদি ইন্দাস্ট্রি কয়া তৌশিনবদগী লৌ উফম লৈরক্ত্রে।

ঐখোয়গী ইপা-ইপুশিংনা ঙাক্তুনা লৈরকপা লমদম অসিদা ইন্দিয়াগী লোনা ঐখোয়বু লম লৈজদবা শৈদাংবা হায়বদু ওইহনগদৌরে। ঐখোয়গী লমদম অমদি ফুরুপ্পু কঞ্জনবগীদমক ইন্ডিয়া অমদি মণিপুর লৈঙাক্তা হনবা লৈতনা ঐখোয়গী হক তনাগদবনি হায়রি। য়েলহৌমীগী শেংলবা লাইফমলেন ওইরিবা থাংজিং, কৌনু অমদি কৌব্রুদা হন্দক থোক্লক্লিবা থৌদোকশিং অসি মতুংদা অমুকহন্না থোক্তনবা মণিপুর লৈঙাক্না অথুবা মতমদা হায়রিবা মফমশিং অসি হেরিটেজ সাইট ওইনা লাউথোক্তুনা আর্কিওলোজিকেল সাইট ওইনা ঙাক শেনগদবনি।

হায়রিবশিং অসি অথুবা মতমদা মণিপুর লৈঙাক্না থবক পায়খৎ পীদ্রবা অদুগা খোংজাই ফুরুপনা য়েলহৌমী মীতৈবু শিংদুনা মখা তানা অরানবা থবক কয়া তৌরক্লবদি থিংবা ঙমদ্রবা অচৌবা মীশি-মীনা য়াওবা থৌদোক থোক্লকপা য়াই হায়রি।

সোর্সঃ সঙাই এক্সপ্রেস।

COMMENTS

WORDPRESS: 0
DISQUS: