লেনিন খুমনচাগী  ৱারীমচা- কোনুং

Homeআর্টসৱারি মচা

লেনিন খুমনচাগী ৱারীমচা- কোনুং

'' ফক্লাং ঘড়ীনা য়ৈরকপা মখোল অদুদা সনাজাওবদু মীৎকপ থোক্লকই। চাকচা মতুংদা চাখিবা গুলি অদুগী ময়াইনা মহাক ফনা কুইনা তুমথরুরে। ফক্লাং ঘড়ীদুদা যেংলকই। ম

” ফক্লাং ঘড়ীনা য়ৈরকপা মখোল অদুদা সনাজাওবদু মীৎকপ থোক্লকই। চাকচা মতুংদা চাখিবা গুলি অদুগী ময়াইনা মহাক ফনা কুইনা তুমথরুরে। ফক্লাং ঘড়ীদুদা যেংলকই। মহাক্না চাক চারগা মথক্তা কাখৎলকখিবদু নুংথিলগী পূং অমা হেনখ্রবনি। মহাক্না মীৎকপ থোক্লক্লিবসিনা পূং মরি তাবগী খোংলকপা অদুদনি। মসিগী মমাঙদা পূং অনীগী খোংলকপা অদুদি মহাক তাখি। মতমসিদদি মহাক তুমথদ্রি। ফমুংদা হিপতুনা লৈরবনি। অদুবু পূং অহুমগী খোংলকপা অদুদি সনাজাওবা তাহৌদ্রে। ”

‘‘পুপু ষণ শায়ো ঐ তোংলক্কে…।’’
‘‘হোয়, হোয় ইশুগী পুপুনা ষণ শানি…।’’
‘‘কুদুক কুদুক…., অম্বো, অম্বো…।’’
‘‘মশু….।’’
‘‘কৈ হায়গে পুপু….?’’
‘‘নুঙাইবরা…?’’
‘‘নুংঙাই …।’’
‘‘কুদুক, কুদুক…, অম্বো, অম্বো…।’’
মপুনা মশু অদুবু মনঙ্গলদা তোংহল্লগা ষণ শাদুনা কোয়চৎ চৎলি। মশুদুনা নোক্লি। মপুসু নোক্লি। মশু-মপুনা ইমুং অদু পূমনিল নিল্লি।
‘‘মশু…।’’
‘‘কৈ হায়গে পুপু…।’’
‘‘পুপু ৱারেবো…।’’
‘‘অদুদি পুপু ঐ কুম্লগে…।’’
‘‘হোয়, হোয়… ঙাইহাক লৈরগা অমুক শান্নসিকো…।’’
‘‘হোয় পুপু…।’’
মশুদুনা মপুগী মনঙ্গলদগী কুমথখ্রবা মতুংদা মপু অদু ফম্লগা নীংশা শ্বর অশাংবা অমা হোন্দোকই।
‘‘মশু…।’’
‘‘কৈ হায়গে পুপু…।’’
‘‘পুপু ইশিবরা….।’’
‘‘ইশি…।’’
‘‘কয়াম ইশিবা…?’’
‘‘ময়াম ইশি….।’’ মখূৎ মচাদুনা তিংথোক্লগা মশাদু থেক্তোক্লগা তম্মী।
তাঞ্জা অসিদা মবোক কৈথেল চৎলুবদগী হল্লকই।
‘‘মশু…।’’
‘‘কৈ হায়গে বুবোক…?’’
‘‘বুবোক্না নঙগী খোঙজি লৈবিরকই। শিবিগে লাকউ।’’
‘হোয় বুবোক…।’’
মবোক্কী মনাক্তা চেনশিল্লনা খোঙজি শিহল্লি। শ্রিক, শ্রিক… মখোল থোক্লি। মসি মঙোন্দদি অঙকপা অমনি। হরাওরদুনা কোয়চেল চেল্লি। মশুগী মতৌদা মপু মবোক হরাওনা থৱায় তানা নোকচৈ। মশুনা মখোয়গী মমাঙদা হঙ্গৎ-হন্দা চেল্লি শ্রিক, শ্রিক….।
ফক্লাং ঘড়ীনা য়ৈরকপা মখোল অদুদা সনাজাওবদু মীৎকপ থোক্লকই। চাকচা মতুংদা চাখিবা গুলি অদুগী ময়াইনা মহাক ফনা কুইনা তুমথরুরে। ফক্লাং ঘড়ীদুদা য়েংলকই। মহাক্না চাক চারগা মথক্তা কাখৎলকখিবদু নুংথিলগী পূং অমা হেনখ্রবনি। মহাক্না মীৎকপ থোক্লক্লিবসিনা পূং মরি তাবগী খোংলকপা অদুদনি। মসিগী মমাঙদা পূং অনীগী খোংলকপা অদুদি মহাক তাখি। মতমসিদদি মহাক তুমথদ্রি। ফমুংদা হিপতুনা লৈরবনি। অদুবু পূং অহুমগী খোংলকপা অদুদি সনাজাওবা তাহৌদ্রে।
মীৎকপ থোক্লক্লবা মতুং অদুদগীদি সনাজাওবা তপ্না হৌগৎলকই। ঙসাই মহাক্না থম্লম্বা ঈশিংগী বটল অদুগী মখূমদু হাংদোক্লগা ঈশিং য়াউম অহুম-মরি থকচিল্লি। মশাদু ইহৈ হৈনীংদে। ইতন তল্লি। ইনম নম্লি।
‘‘…. হোয় হোয় নপাবুং পায়হল্লক্কেকো….’’
মাগী নুপীনা ফোন্দা ঙাঙ-ঙাঙদুনা লাক্লিবা অদু সনাজাওবা তাই। খঙই মহাক্কী নুপীনা ৱারী শানরিবসি মচানুপা নৎত্রগা মচানুপী অমা শোয়দনা ওইরম্লগনি।
‘‘নচানুপানি…।’’
ফোন অদু পীরগা হাযরকই শিজনা।
সনাজাওবা ফোন অদু লৌরগা মনাকোং মনাক্তা ইনশিল্লি,
‘‘হল্লো…’’
‘‘পাবুং হকচাং খরা নুংঙাইরব্রা…?’’
‘‘করিসু থোইদোকপা তৌদ্রে…।’’
‘‘হেন্দা হেঞ্জিল্লক্লবদি অসিদা  য়েংলবসু য়েংসি…।’’
‘‘য়নিদা… য়নিদা… করিসু অরুবা নত্তেদা… নত্তে নখোয়দি অনা-অয়েক য়াওদবা নৎত্র?’’
‘‘ য়াওদে পাবুং…।’’
‘‘হোয়, হোয় নখোয়গী য়াওদ্রবদি য়ারেদা ঐখোয়গীদি থোইনা খল্লুরনু… মতম লোইরক্লবনি।’’
মচানুপা অদু ঙাইহাক খুম্লক্তে। সনাজাওবনা মখা তাই, ‘‘নমা পায়হল্লক্কেকো।’’
‘‘ইবুংঙো নুপামচা, নখোয়বু য়ারবদি অমুক্তদি য়ূমদা থোক্লক্নবা তৌনে, নপাবুংসে হন্দক মরকসি মপূক্নিং য়াম্না নুংশিবা মাল্লিনে। নচলনুপী অদুসু নখোয় অনীনা কয়াদি কুইরে য়ূমদাকা থোক্লক্ত্রিবসে?’’
‘‘ইমা য়দদনা তৌরিবনিবা… ঐ ইচলদা ফোন তৌগে… য়রবদি মা থোকউ হায়গে।’’
‘‘ মানা অমুক নঙোন্দা অমুক হায়গে হায়… খঙদ্রে ইৱুংঙো….।’’
সনাজাওবা করিগুম্বা অমা হায়গে খল্লম্বনি। অদুবু হায়রমদ্রে। কাদুদগী মপান থোক্লকই। টেরেসতা থারিবা চৌকি অদুদা ফম্লৈ। মফমসিদগী ইঙান ঙান্না উরি– লৈকায়গী লৈরক, কৈথেল মচা, ইবোমচাহোয়গী য়ূম।
ইবোমচাগী উনা শাবা পীক্তক তৌবা য়ূমগী শুম্মাঙগা ইঙ্গোলগা তায়নবা পরিং অদুদা সনারৈ পরেং শানা শাৎলিবদু উরকই। ইঙ্খোল অদুসু পঙচাউ চাউবা নত্তে। অদুবু মদুদা মখল মখা কয়াগী এঞ্ছাং-নাপীশিং অদু নুমিদাংৱাইরমগী লীরি শিৎপা মালঙগী শাহুমদা লেং-লেং চৎলি। থম্মোয় মথুম-মরাং হৌহনবগুম তৌরি।
সনাজাওবগী মীৎ অদু কদায়দা মীৎয়েং থম্লিবগে হায়বা মশানা খঙজদে। করিগুম্বা ৱাখল খরা য়ম্না লূনা খনবগী মতৌদা য়েংই। অতিয়াদা মনীং তম্না পাইরিবা লৈচীলশিংদসু অমুক য়েংলকই। লৈকায়গী লৈরক অদুদা অমুক য়েংলকই। লৈকায়গী মীওই খরা, মশক খঙদবা খরা, গাড়ী মচা, অচৌবা…।
লৈকায়গী কৈথেল মচা। ইবোমচাহোয়গী চাগী হোটেল। ইবোমচাগী মমানা ফম্লম্বা হোটেল। মীয়ামগী পূনফম। সনাজাওবসু ইবোমচাগা পূল্লকখি। অদুঙৈ লৈকায় এলপিদা তম্মীন্নরকখি। কৈথেল মচা অসিদা ইবোমচাগী মমানা ফম্বা হোটেল অদুদা চা থক্লকখি। এলপিদগী প্রাইমারি, প্রাইমারিদগী হায় স্কুল। অদুদগী মথং-মথং…।
সনাজাওবা– মপা অদু লৌয়াম চাবনি। থাইনা নিংথৌ হাক্তক মতমদগী নুংঙাইরক্লবা ইমুংনি। মদুগী মনীল অদু ঙসিসু ইমুং অসিদা কাদুনা লৈরি। সনাজাওবা মেত্রিক থারে। পাস তৌরবা মতুংদা মপাল লমদা মখা তমথবা চৎখি। মহৈ নীংথিনা হৈরগা থোক্লকই। থোরকপা সরকারগী থবক অমা তৌখি। ইবোমচাদি? ইবোমচাদি হায় স্কুল কাবা হৌরম্লগা মখা তানা লাইরিক তম্বা তোকখি। হোটেল ফম্লম্বা মমা অদু য়ম্না কন্না নারকপদগী হোটেল অদুসু লোনখি। ইকুই কুইদনা তাইবংপাল থাদোকখি। ইবোমচা হজিরা শুবা চৎখি। নক্না চেনমিন্নরম্বা ঈচেল অনী মতমগী ঈরৈনা মায়কৈ ফাংনা তাম্নহনখ্রবদা করম্বা মতমদা নকশিন্নরকপা য়াওখ্রবগে? হেন্না-হেন্না তাম্নখিবা নত্তনা। ইবোমচাগা সনাজাওবগসু হেন্না হেন্না তাম্নখিবগী মরম অমগসু লৈরি। ইবোমচাগী মপাগী লায়েংবগী মতাং অমদা শীজিন্ননবা হায়দুনা সনাজাওবগী মপাদগী শেল খরা পুরুই। মদু কুইনা শিংবা ঙমখিদে। মদুগী মতাংদা ইমুং অনীগী মরক্তা অকনবা লাঞ্জাউ অমা থোকখি। লাঞ্জাউ অদুগী মতুংদা ইবোমচানা য়াম্না ৱানা হোৎনদুনা সনাজাওবগী মপাবুংদগী পুখিবা শেলফম অদুগী শেন্দোয়গা শেল্লেপকা শীংলকখি। মসি শিংনবা হোৎনবদা ইবোমচাগী নুপীনা কুইনা হাংলুদ্রবা মনেম্বোক্না ফম্লম্বা হোটেল অদু অমুক হন্না হাংলকখি। ইবোমচানা মচানুপা অদুবু মাগী থবক শুবদা মতেং পাংহনখি। লাইরিক তম্বা তোকহনখি।
লাঞ্জাউ অসিগী মতুংদা সনাজাওবনা চাউরবা কোনুংগুম্লবা মথোল অহুমগী যূমজাও অমা শাগৎলকখি। ইবোমচাবু করেম্নরকখি। অদুগুম্বা কোনুংগুম্লবা য়ূমগী অনীশুবা মথোলগী টেরেসতনি সনাজাওবনা ঙসি নূংশুক নূংজাননা কদায়দা য়েংলিবনো খঙদনা ফমদুনা লৈরিবা!
সনাজাওবা মাগী মচা অনীদু মপান লমদা থাদুনা মহৈ-মশিং তমহনখিবনি। লাইরিক তম্বা লোইরবা মতুংদসু মাগী মাগী মহৈগা চানবা মপান লমগী কম্পনি অমমমদা থবক তৌনখি। অদুগী মতুংদা মতমগী মতুংইন্না লোয়না লুহোংখি মখোয়না থবক তৌরিবা মফমদুদা থেংনবা খঙনরকপা নুংশিনরকপশিংগা। লুহোংলবা মতুংদসু অমুক চংনখি। মখোয়-মখোয়গী থবক্তা অয়ূক-নুংথিল-নুমিদাং হোৎনদুনা লৈখি। সনাজাওবনা কোনুংগুম শাজখিবা ইচিক চীক্তুনা লাক্লবা য়ূম অদু হেন্না হেন্না চীক্লক্লি। করিগুম্বদা মী লৈনদ্রবা য়ূমগুম্মী। মতম অমগী মাগী নাপল পূম্বা ময়াক চম্লকপগুম তৌরকই। নাপল হায়বদু মহাক শুকপাম পাম্লক্ত্রে। হৌজিক্তদা খঙলকই, নাপল হায়বসি কান্নদবনি। মসিনা মমৈদা তীঙ্খং ওইরকপা নত্তনা অনৌবা আশাগী ময়োল অমত্তা চোংহনবা খক ঙমদে। মাগী মচা-মশু লৈ। অদুবু লৈতবগুম্মী। থাঙ্গৈশেংনা লৈত্রবা অমা ওইরম্লবদি খরসু ফরমগদবনি। ঙসি মহাক্না খল্লিবা ৱাখল অসি য়ৌনা খল্লমদবসু য়াই। অদুবু হায়রিবশিংসি লৈনা লৈনা মাগী অমত্তা ওইদবগুম তৌবসিদনি সনাজাওবনা হেন্না হেন্না নীংঙমদবা পোক্লি। ঙসাইদগী কদায়দনো, করিদনো খঙদনা য়েংদুনা লৈরকপা অদু হৌজিক্তদা খঙজরকই।
য়েংথোরকপদা ইবোমচাগী মমৌনুপীনা সন্ধ্যা য়াচংবগী লাইগী ধুপ-থাউমৈ কৎনবা তৌরিবদু উরকই। ফিদোন চিংখৎলি। মকোসু ফি অমনা খুম্লি। অদুগা অমম-অঙান শীন্নরমদাই মতমসিদা তাইবংমপুবু পূক্নিং চংনা খুরুমজরি। সনাজাওবা ঙাইহাক যেংই। ইবোমচানা মশুগা থোঙ্গাল্লোমদগী খূৎ শম্নরগা চংলক্লিবা অদু অমুক উরকই।
‘‘পুপু…।’’
‘‘হাও…।’’
‘‘ঐ শগোল মচা লৈবিযু।’’
‘‘ লৈবিনি।’’
‘‘ঙসি লৈবিয়ু।“”
‘‘ঙসিদি য়াদে। হয়েং পুপুনা থবক হল্লকপদা লৈরিক্কনি।’’
‘‘প্রোমিজ…।’’
‘‘প্রোমিজ…।’’
ইবোমচা মঙ্গোলদা থারিবা ফক অদুদা ফমথৈ। মশুদুনা মঙ্গোল শীন-থুংনা কোয়চেন চেন্দুনা লাংলি।
‘‘অথোইবা…।’’ অঙাংসিগী মমাননি। ইমুংদগীনি।
‘‘মমা করি হাযগে…?’’
‘‘লাংগনুকো… য়াচংবদা লাংবা ফত্তেকো…।’’
‘‘ঔ মমা…।’’
অঙাং অদু মপুগী মন্নাক্তা চংলকই। মশু-মপু করি হায়ন্নখিবনো হায়বদুদি সনাজাওবা তাবা ফংদ্রে। ঙাইহাক লৈরগা ইবোমচানা ষণ শারক্লে। মশুনুপা অদুনা মপুগী মনঙ্গলদা তোংদুনা শান্নরক্লে। কুদুক, কুদুক… অম্বো, অম্বো…।
‘‘বাজি, করি এঞ্ছাং থোংশিগে…?’’
মমৌনুপীদুনা থোরক্লগা হংলকই।
‘‘ঐনা ঙসাই লৈরকপদো অদুদগী নঙনা চানীংবা অমহেক থোংলুরোদা। ইবুংঙোদি কদায় চৎখি?’’
‘‘মখারমথংবগী ইনে অমুরৈহোয়দা মরুপকী পৈশা থিনবা চৎখিবনি।’’
মমৌনুপীদু চংখ্রে।
মশু-মপুদু মখা তানা অমুক শান্নরক্লে।
কুদুক, কুদুক… অম্বো, অম্বো…।
সনাজাওবদি? টেরেসতা ফম্লি। মদোম ফম্লি। নুংশুক-নুংজাননা ফম্লি। ইবোমচাগী মঙ্গোলদা মশু-মপুনা শান্নরিবা অদু য়েংলি। ঙসাই নুংথিল মাগী মঙলান্দা মাগী মশুনি হায়বা অমগা শান্নমিন্নখিবদু নীংশিংলকই। মাগী মশুদু কয়া য়াম্না চাউরম্লগনি হায়বা সনাজাওবা খঙদে। চহীবুদি মরি শুগে তৌরবনি। মশু পোকপা নৌরিঙৈদা সনাজাওবা মাগী নুপী শিজগা চৎলুই। অঙাং অদু মাগী মশক য়াম্না মালহৌবনি। অদুই মতুংদা মশুগী মশক অদু মমিৎনা উবা ফংজদ্রি। মশুগী নুংশিরবা মচিন মচানা ‘‘পুপু’’ হায়না হকথেংননা কৌবদু তাদ্রি। মশুগী নুংশিরবা খজাই অনীদা পেন্না চুপচবা ফংদ্রি।
‘মশু….।’’
‘‘কৈ হায়গে পুপু….?’’
‘‘নুংঙাইবরা…?’’
‘‘নুংঙাই …।’’
‘‘কুদুক, কুদুক…, অম্বো, অম্বো…।’’
সনাজাওবা ফম্লম্বগী হৌগৎকে তৌই। মকোক অদু খরা ঙাওবগুম তৌই হায়দুনা অমুক ফমথৈ। ইবোমচাগা মশুগদি মখোয়গী অপীকপা মঙ্গোল অদুদা নোক খেদুনা শান্নরি।
‘‘কদায়দা লৈবিবগে?’’ সনাজাওবগী নুপী শিজনি।
‘‘অসিদা লৈ।’’ সনাজাওবননি।
শিজ মাগী মপুরোইবগী লৈফম খঙলদুনা টেরেস অদোম্না লাকই।
মাসু ইঙান ঙান্না অদুম উই। ইবোমচাগা মশুগা মখোয়গী মাঙ্গোলদা শান্নরিবা অদু।
‘‘ ইমুংদা চংনবা তৌরসি…।’’
‘‘ কোক অসি খরা ঙাওবগুম তৌই… ঙাইহাক্তং ফমখিগে।’’
‘‘ৱাখলদু জাৎ-জাৎ য়াম্না খনমল্লিকো…। খরসু পেন্থোকপা তমগদবনি।’’
সনাজাওবা খুমদে। মাসু খঙদবা নত্তে পেন্থোকপা হায়বসি হিংহনবগী অতোপ্পা পাম্বৈ অমনি হায়বসি। অদুবু মা ঙমদ্রে। অদুগা অসিমসু খঙই শিজনা মহাক্কী মফমদা ৱাফম অসি হাযরক্লিবসি মাগী পূক্নিং পেন্থোক্নবনি। নুমিদাং ফমুংদা হিপমিন্নবা মতমদা শিজনা হেন্না পেন্দবগী নীংঙমদবগী ৱরী শাদুনতা লাকখ্রবনি। হন্দক নোংমা নীনিসিদা সনাজাওবা মশা খরা অদুক নুংঙাইতবগী ৱাখল খরা হেঞ্জিন্না খনবগী ৱাতনি।
‘‘অথোইবা বুবোক হল্লক্লে…।’’
ঙসাইখৈ লৈকায়গী কৈথেল মচাদা হোটেল ফম্লম্বী ইবোমচাগী নুপীনি। মশুনা চানবনি হায়দুনা ঙামোকসু পুরক্লি। মশুনুপা অদু চেন্থোরকই। নুমিদাং ওইরবসু মৈনা পূমঙান ঙানবনিনা ইঙান ঙান্না উই। মবোক্তগী মাগী ঙামোক অদু লৌরগা মুক মুনা মবোক্কী মমাঙদা চৎলি। মবোক্না মশুগী মতৌদু যেংলগা নোকচৈ।
‘‘অফাওবা মাল্লে ইশুদি…।’’
মবোক্কী ৱাহৈসি তারগা অঙাং অপীশক অদুদি হেন্না হেন্না মুক্লক্লি। ফল্লগা চৎলি।
মবোক্তু মহাক্না পুশিল্লকপা খাউ অদু ইমুংদা থম্লুরগা ইরু লুজনবা মফি মরোল হোংদোক্লগা থোক্লকই। মমাঙ ইঙ্গোলগী নাকওইননা লৈরিবা ইরুজফম অদুদা চংলগা ইরুজথোক্লুরে। ইরুজবা লোইরগা থোক্লকপা অদুদা মমৌনুপীনা মকুবোক্তা চাক লোইরে হায়বগী পাউ পীবা থোরকই।
‘‘ইবুংঙোদি…?’’ ইবোমচাগী নুপীনি।
‘‘মখারম থংবগী ইনে অমুরৈহোয়দা মরুপকী পৈশা থিনবা চৎখিবনি। ঐনা চাক লোইরে হায়না ফোন তৌখ্রে ইমা।’’ মমৌনুপীননি।
‘‘হোয়, হোয়…।’’
ইবুংঙোসু হল্লক্লে। ইমুংসিগী মীওই পূম্নমক শুরবা চাক চারুরসি হাযদুনা ইমুংদা লোইনা চংখ্রে। মঙ্গোলগী থোং অদু লোনশিল্লম্লে।
ঙাইহাক ইচিক চিকই। অচিকপা অসি শিজগী ঙকশমদা য়াল্লিবা ফোন অদু খিংলকপদা কায়খি।
‘‘হল্লো…।’’
‘‘ইমা ঐনে…।’’ মচানুপীগী খোঞ্জেলনি।
‘‘তারে, তারে…।’’
‘‘ইমা বাবা মশা ঙমদে হাযরিদুবু…।’’
মচানুপীনা হংলক্লিবা ৱাহং অদুগী পাউখুম পীদ্রিঙৈদা শিজ মপুরোইবদা য়েংলকই।
‘‘সে, সে… নঙ পাবুং পাহয়ল্লক্কেকো…।’’
শিজ ফোনদু সনাজাওবদা পীরকই।
‘‘বাবা…।’’
‘‘ইবেম্মা তারে, তারে….।’’
‘‘বাবা মশা ঙমদে হাযরিদুবু করি ওইনা ঙমদ্রিনো…?’’
‘‘কৈসু থোইদোকপা তৌদেদা…। ইশা খরা অদুক নুংঙাইতবগী ৱানি। নখোয়দি অনা অয়েক য়াওদেকো?’’
‘‘য়াওদে বাবা…।’’
‘‘হোয়, হোয় ফরে, ফরে… অনা-অয়েক য়াওদনবা কন্না হোৎনৌকো।’’
‘‘ঔ বাবা…।’’
মখা তানা মচানুপীনা করি-করিনো খরা ঙাঙলি। মদু সনাজাওবা থওইনা তাশিল্লুদ্রে। ফোনদু মাগী নুপীদা পীথোরকই। শিজ ফোন অদু লৌই।
‘‘ইবেম্মা… ঐনি ইমানি…।’’
‘‘ইমা… ঐসি সোমদা ফরক খরা তারেবা…. মখোয় কম্পনিগী ফোরেনদা টুর চৎকনি হায়বা অদুদা ঐসু য়ওহৌগে তৌবনিবা…. শিঙ্গাপুরদনি। ইমা বাবাগী করি লৈরকউইগে…?’’
সনাজাওবা ফম্লম্বগী হৌগৎলগা ইমুংদা চংলকই। শিজদি মচানুপীগা ৱারী শান্নহৌরি।

COMMENTS

WORDPRESS: 0
DISQUS: