লেনিন খুমনচাগী শৈরেং

Homeআর্টসশৈরেং

লেনিন খুমনচাগী শৈরেং

করিনো হায়ফম খঙদবা খরা ফমুংদা তুম্লম্বদগী ফুক লাউনা হৌগৎলদুনা থোঙনাউগী পর্দা হায়দোক্লদুনা ঐনা য়েংখৎলি নোংদোলথক্তা নুমিৎকী খোঙচৎ কদায় য়ৌরবগে? করি

করিনো হায়ফম খঙদবা খরা

ফমুংদা তুম্লম্বদগী ফুক লাউনা হৌগৎলদুনা
থোঙনাউগী পর্দা হায়দোক্লদুনা
ঐনা য়েংখৎলি নোংদোলথক্তা
নুমিৎকী খোঙচৎ কদায় য়ৌরবগে?
করিগুম্বা নুমিৎনা ঐগী কোকতোন লান্না চৎলম্লবদি
ঐগী মায়থোঙদা মশা মথন্নতা মোমোন মীনোক অমা
কদায়দগীনো খঙদনা ফাওজিল্লকই
অদুগা করিগুম্বা
নুমিৎনা কোকতোন লান্না চৎলমদ্রগনা
খোইরাং খোইশাওনবা মীনোক অমা…

ঐনা খল্লিঃ
মসিদি হৌজিক হিংলিবা মীওই খূদিংগী কোক্তা চুদুনা লৈরগদবা
শেত্তোক ফক্তোনবা য়াররোইদবা অমনি|

ফমুংদগী হৌগৎলগা
থোঙনাওগী পর্দা হাযদোক্লুবা
নুমিৎনা কদায় য়ৌখ্রবগে য়েংলুবা
হরাও মীনোক তম্বা
নৎত্রগা তমদবা

ঐনা থোঙনাও ময়াদগী অমুক হল্লক্কনি
অদুগা চোংখৎকনি ফমুংদা
কোক্না খাঙলিবা মোন অদু শত্তোক্লগা
মায়দা শুরু-শুরু নৈশিনগনি
ইশা পূম্বা ৱাহনগনি
অদুগা নিংশা স্বর শাংনা-শাংনা হোনগনি
অদুগী সুর তাবা তাদবা
ঈশৈ অমুক শক্কনি
অমুক নোক্কনি
অমুক্না পেন্না লাউগনি
অমুক্না কপকনি|

হায়রিবশিংসে
ঐখোয়গী পুন্সিশিংদা
চুশিল্লক্লিবা
কোকপা নাইররোইদবা মচুশিং ওইরক্লিবনি|

তশেংনা হায়রবা
পুন্সিশিংসিনা
অনৌবা অয়ূক অমা লাকপদা
হরাও মীনোক তম্বা ঙম্লিবরনে?

অয়ূক অমা লাকপদা
য়ূম্বুরেম্বীনা
ইরু-মাইথজরগা
তাইবং মপুগী মফমদা
ঙমজবা খরা কৎচরদুনা
খুরুমজবা, থৌনীজবা
হৌজিকপু তৌনরিবরনে?
তৌনরম্বা তারবসু
করি হায়নবু নীজরমগনি
মপু মাগী মফমদা?

অসিগুম্বা শোইরোম্নবা ৱাখলশিং অসি
ঐনদি নুরাফদি ওইনীংখিবনি
মদুমক্তনবু
শিংকুপ শানা থুগায়খিবগনি
ঐগী কাগী শকয়েং মিংশেল অদুসু|
মরমদি
মসিদা য়েংলুবা খূদিং
তারিবা, উরিবা মমি অদুনা
ঐবু নোরোক্কী কোমদা
খূৎ পাযদুনা চিংথরিবগুম
থম্মোয় অসিদা লোইনাইদ্রবা
অকিবা কয়া ফাওহনখিবনি।

হায়রিবশিংসে
ঐগী কোক মনুংদা
মহুম শারক্লিবা,
পোম্লক্লিবা, লৈশাৎলক্লিবা,
করিনো হায়ফম খঙদবা খরনি।

 

মঙলাক-হারাক্নবা

অমম্বগী থাকন্না মরোল তরেৎ
খনজিনখ্রবা লমদম অমদা
লম্বী লম্মাংনবা মীশক অদুগা
ঐগী ৱাখল অসিগবু
করিদা খেন্নরিবগে?

লম্বী অসিদা
ঐনা
ফুকপা ঙমদ্রবা ইখোঙ অসি
অমুক্না থাং,
অমুক্না কোন,
অমুক্না চিং,
শন অমুক শা…
লমজাউ তাবা লম্বী তম্না
লাকখিবনি|

লমজাউ অসিগী
মতাই অমদা
ইশং কারবা
নুংদুম অমগুম ঐনা তাশিন্দুনা
লৈরক্লিবা অসে কয়া কুইরবনো?

ঐনা উই
লম্বী অসিদা
খোঙনা, গাড়ী তোংদুনা চৎখিবা মীপূম খূদিংনা
ঐঙোন্দা চিংনা-চিংনা য়েংলম্বা অদুসু|

নোংমদি
মমিৎ লৈনুং য়ৌনা কূৎলবা
মোৎতাই শুদাইনরবা
মীওই অমা য়াম্না লাপ্না লাকপদু ঐনা উরম্মী|
মহাক্নসু
ঐঙোন্দা চাগদৌ য়েংলক্লম্মী|

মহাক্না
ইনাক্তা
অসুম-অসুম নকশিল্লকপদা
কূৎলবা মাগী মীৎকী মরুদা
ঐগী ইমি তাবদু ঐনা
তরং-তরং
উরম্মী|

মহাক্না
ইনাক্তা চংশিল্লক্তুনা
ৱারী শাবা হৌরক্লম্মী|

ঐ খঙলে,
মহাক ঐবু
মালেম শিনবা থুংনা থিরুরবা
মীশক অমনি হায়বা|

ঐগা উনজবা ফংবা অদুদা
মহাক্না কয়াদা হরাওজবা!
অউবা মীনা অঙাওবনি হায়রবসু
করিসু নাচুংলরোইদবা মওংদা
চোং-ফন্দুনা হরাও জগোই শারম্মী|

হরাওবনা
মশা পূম্বা ইরু-শিৎ নান্না লুথোক্লদুনা
মশা খিং-খিং লাউনা
মহাক অমুক হন্না চৎখ্রে
ইনাক্তগী|

খঙহৌদনা
অতিয়ানা
নাউয়েক্লবীগুম
খাক-লাউরক্লম্মী
মতম নত্তনা
লংজা ক্বাক্না
লাক্না-লাক্না খোংলক্লম্মী
অহিংদুদা|

অকিবনা
হূগী নুংশিৎ ওইনা শিৎলক্তুনা
ইশাদা য়ৈরবদা
ইশা অসে পুমপঙ পঙথখিরম্মী|
তাঞ্জা অদুদা
খারৌ অমনা
ঐ তম্না শক্তি পূম্বা ফুদোক্লদুনা
পাইশিল্লক্লপদু উই।

লৈজবা থৌনা লিংজেল পূম্বা ফুদোক্লদুনা
মহাকপু ঐনা
হাৎলম্মী।

অথাপ্পদগী
খোঞ্জেল অমা তারকইঃ
‘‘চীংঙু খোইমোম লাইনিংথৌ
ইনুং ঙাল্লে য়াওল্লো
হাওরৈ নোংপোক পাংবদা
সনা চীংদোন পোক্তগী
মশেক মঙাল লোয়ননা
মঙাং গুরু চাকৱায়রে…’’

 

কেল্লবা ঊনাশিং

লৈমায়দা চোইনা কেল্লবা
অকংবা ঊনাশিং অদুগী মনাক্তা ফম্লদুনা
ঐনা অৱাবা ইতৌ উৎলুই।

অকংবা ঊনাশিং অদুনা
ঐঙোন্দা শংত্রিক য়েংলদুনা
হংলকইঃ
‘‘মালেম তাইবংপালসিদা
নঙনা করি-করিদি উরক্লবগে?’’

ঐনা খুম্মীঃ
নোংদোলথক্তা
নুমিৎ অমসুং থানা থোকপা
অতিয়াগী মখাদনা
মশীং থিঙমদ্রবা
উপাল-ৱাপালশিং হৌরি…
সনা মচুগী
পাক্লবা লৌবুক-লহ্মাং…
লৈখল মান্নদবা উরৈ কয়ানা
শাৎলিবা চীংমায়শিং…
উরিরৈনা উপালদা য়েৎপা

লংজা ক্বাক্না
চেরোইনা শেন্দ্রাংনা
নোংদোল অতিয়াদা পাইবা…
তারে খোইনিংনা নুংশিনা খোংবসু
অয়ূক য়েন্দা অঙনবদা
য়েনবানা য়াকাইরোল শক্লকপসু

জ্বাই-জ্বাই চেল্লিবা
তুরেলগী ঈচেলগী ঈরাওখোল…
নোংজু থা য়ৌরক্লবদা
হঙোইনা গো-গা খোংলকপা…
শনবী-শন্নাউগী খোঞ্জেল
উথুম্না তুম-তুম খোংলকপা…

চীংলোন অমদগী চীংলোন অমদা শন্দোকখ্রিবা
লোইনাই খম্নাইদ্রবা
চীংশাং পরেংশিং…

থরো-থম্বাল, লৈহাও
মালিকা, থাবল্লৈগী
লৈনমতানা হারবা
খুঙ্গং কয়া…
মচু-মচুগী কুরাক কয়ানা
কোইপাই পাইবা
লৈকোল কয়া…
হৈখা, মাল্লৈ,
হৈনৌ, থৈবোং,
হৈনীং, কফোইনা
মুল্লকপগী নুংশিরবা মনমতনা
শিল্লবা হৈকোল কয়া…|

লৈমায়দা চোইনা কেল্লিবা
ঊনাশিং অদুনা নোকফেৎ তৌরগা
চিরোল তৌরকইঃ
নঙনা উরক্লিবা পূম্নমক
ঐখোয়নসু উরক্লবনি।

COMMENTS

WORDPRESS: 0
DISQUS: