রাজেশ্বরী য়েংখোমগী ৱারীমচা- হিংমিন্নখিসী

Homeস্ক্রলবার

রাজেশ্বরী য়েংখোমগী ৱারীমচা- হিংমিন্নখিসী

ৱাখলনা লূমথরবা ইবোতোম্বা ময়ুম মায়কৈ পাংলকই মতম পূম্বদা মপাঙ্গল শোল্লবা মখোঙগী খোঙবুরোই ওইরিবা সাইকলদু থৌরদুনা। মকুম মথা শুজিল্লক্লবা সনাতোম্বীগী তাই

ৱাখলনা লূমথরবা ইবোতোম্বা ময়ুম মায়কৈ পাংলকই মতম পূম্বদা মপাঙ্গল শোল্লবা মখোঙগী খোঙবুরোই ওইরিবা সাইকলদু থৌরদুনা। মকুম মথা শুজিল্লক্লবা সনাতোম্বীগী তাইফেৎ তাইরবা শকফম নীংশিংলকই । করম্না ইংখোল কোইবা ঙমদৌরিবা মানা। মমায় মমিৎ পাঙবনা কদায়দা কমদৌবা ? হৌজিক হৌজিক্কী চাকখুমগী লান ফাওবা মা‌য় পাকপা ঙমদ্রি।

” নঙ অমুক লাক্লব্রা?”
” হোয়, খুরা ইবুঙো।”
“হৌজিক লাকখিনু হয়েং লোকডাউন লোইরগা লাকউ। সিমেন্ট সু মমল আ য়ৌখ্রে থবকসি মতম খরগা লেপ্পা তারি।” ইহৈ হৈনীংদে থম্বালঙৌ মখোঙ শেক্লি শেক্লিবা মপাঙ্গল শোনবা ইবোতোম্ববু উবদা।
তুমিন্না লেপ্তুনা লৈ ইবোতোম্বা হায়নীংবা পাক হায়বা ঙমদ্রমাল্লে। য়েংশিন্নদে থম্বালঙৌসু পাউচেদা মায় লূপশিনখি।
” খুরা ইবুঙো!” ইবোতোম্বনা তপ্না কৌই মরু লুকচনা।
” করিনো” মীৎয়েংদি লৈথোরক্তে পাউচেদগী।
” খুরাইবুঙো, হন্দকসে শুফম চৎফম লৈতদুনা য়াম ৱারে। করি করি অতোপ্পা শুবা য়াবা লৈরগসু হায়বীয়ু শুজগে।
” হোয়, লৈরদি হায়রক্কে।” থৌশাদে থম্বালঙৌ।
” অদু খুরা ইবুঙো, হান্নগী নুমিৎ হুম্নিগী খূৎশুমল ৱাৎখিবদু পীবিবা য়ারদ্রা? চেঙ চাক খর ৱান্দ্রবদি …….”
” লাইমা থৌইদা। ঐ হাৎলোইনে নঙগী শেলদো .. ফরক অমা তাদুনা তৌরিনি হায়রেদনা” পাউচেদু তেবলদা থম্লগা ফ্রং শাউগৎনা হায়রকপনী। মখা তারকই
” মথং হাপ্তাদরা কৈনো লাকউ, য়ানবা শীনগে ।”
ইবোতোম্বা উ য়ুংবগুম ঙাইহাক লেপ্লম্লগা তপ্না মমায় লৈথোরকই চৎনবা। সুমাং য়ৌরকপদা ইমুংদগী লৈবাক্লৈনা অমুক উরাউ থরাউরকই
” হায় ইবোতোম্বা! নঙ চৎলবরা, ঙাইখো লাকখো।”
” ইন্দোন ইবেম্মা করি তাকপিগদবা?” ইবোতোম্বা চঙবদি চঙলক্তে মমায় হন্না য়েংলগা সুমাঙদা লেপ্তুনা লৈ।
লৈবাক্লৈ ময়োম অচৌবা অমগা মচা অমগা পায়রগা থোরকই।
” সে, সি অমোৎ অকাই, লিক্লী চেগাইনী। মফম চাবা য়েংলগা খরা হুন্দোক্লম্মু নঙনা। শ্বাইদা হুনফম লৈত্রে। অমোৎপা খোম্বসু লাক্ত্রে।” ময়োম অচৌবদু পী ।
” হোয়, ইন্দোন ইবেম্মা।” ময়োমদু লৌরগা সাইকল মমাঙদা য়ানশিল্লী।
ময়োম মচাদু অমুক পীরগা মখা তারকই
“অদুগনে সিননে, হৱাই মরূনী থাননবা। শুফম লৈত্রিঙৈসিদা ইংখোলগাদু খর কোইবা হৌনৈনে নোইবো।”
“অসুক য়াম্বদি থাফম লৈতেদা ইন্দোন ইবেম্মা।” য়ামদ্রবদা কেজী অনী অহুমদি ওইদৌবা ময়োমদু উবদা হায়জৈ ইবোতোম্বা।
” হাইত্, মসে! পীদা পীয়ু সনাতোম্বীদা মানা থোকপা তৌজনী।” চৈরকই লৈবাক্লৈনা।
“হৌজিক মতমগী অঙাং শিংসিনা শুনীঙদবসিদি” ঙাঙনা ঙাঙনা চঙখি ইমুংদা।
মখা তারমদ্রে ইবোতোম্বা। ৱাখলনা লূমথরবা ইবোতোম্বা ময়ুম মায়কৈ পাংলকই মতম পূম্বদা মপাঙ্গল শোল্লবা মখোঙগী খোঙবুরোই ওইরিবা সাইকলদু থৌরদুনা। মকুম মথা শুজিল্লক্লবা সনাতোম্বীগী তাইফেৎ তাইরবা শকফম নীংশিংলকই। করম্না ইংখোল কোইবা ঙমদৌরিবা মানা। মমায় মমিৎ পাঙবনা কদায়দা কমদৌবা? হৌজিক হৌজিক্কী চাকখুমগী লান ফাওবা মা‌য় পাকপা ঙমদ্রি।
য়ুম য়ৌরগা সনাতোম্বীদা পীশিল্লী লৈবাক্লৈনা পীরকপা হৱাই মরূগী ময়োমদু
” সি ইন্দোন ইবেম্মনা নঙোন্দা পীরকপনী, থানবনী। শেলদি পীরক্তে ইনাক খুনবনা খর খীৎ হেনমাল্লে লৈতবসি” হায়রম্লগা মাদি মনীংগী ৱাখোঙগী কোম তান্না চৎখি অমোৎপা ময়োমদু হৈদোকপা। মনীংদগী থোরকপদা সনাতোম্বী মপূক্নীং নুংশিনা কপ্তুনা লৈরম্মী। মমাঙদা ময়োমদু হাংদোক্তুনা লৌথোরকপা চাননবা হৱাই মখল খর মুসোরী, মুগ, কংতক তোঙান তোঙান্বা চেরংদা য়োমদুনা লৈবা উই।
” হাইমা কৈদৌরে কপ্লিদি? থানবা ওইরমদ্রবরো হৱাই সিসু? ওন্ন তৈননা পীরক্লবরা মাবু? অদু নঙনা কপ্লিববু করিগীনো হায়বনী?”
” তু, সি য়াওরম্মী হৱাই মরক্তা।” সনাতোম্বীনা মপি তৈথোক তৈথোক্না কৌতা মচা অমা লানশিল্লকই ইবোতোম্বদা।
” করিনো সিবু? ” হায়না হায়না হাংদোক্ই। লুপা চামঙা চৎপীগী নোট তরাখক উরু উরু লৈশিল্লগা হাপলম্বদু চিংথোক্তুনা য়েংই মাসু। ঈরা চেল্লবা মমীত্তা লৈবাক্লৈগী শক্তম উরকই।

COMMENTS

WORDPRESS: 1
DISQUS: