মেরি কোম্না সাই ইম্ফালগী স্পোর্টস সাইন্স সেন্টার হাংদোকখ্রে

Homeস্ক্রলবার

মেরি কোম্না সাই ইম্ফালগী স্পোর্টস সাইন্স সেন্টার হাংদোকখ্রে

ইম্ফাল, আগস্ট ২৩: স্পোর্টস অথোরিটি অব ইন্দিয়া (সাই) নেশনেল সেন্টার অব এক্সলেন্স (এন সি ও ই) ইম্ফালগী স্পোর্টস সাইন্স সেন্টার ঙসি হৌনবী মতুংইন্না অলিম্

ইম্ফাল, আগস্ট ২৩: স্পোর্টস অথোরিটি অব ইন্দিয়া (সাই) নেশনেল সেন্টার অব এক্সলেন্স (এন সি ও ই) ইম্ফালগী স্পোর্টস সাইন্স সেন্টার ঙসি হৌনবী মতুংইন্না অলিম্পিক মেডেলিষ্ট বোক্সার এম সি মেরি কোম্না হাংদোকখ্রে। স্পোর্টস সাইন্স সেন্টার অদু হাংদোকপগী থৌরমদা চীফ গেস্ট ওইনা শরুক য়াখিবী রাজ্য সভাগী এমপিসু ওইরিবী পদ্ম ভূষন এৱার্দি এম সি মেরি কোম্না হায়, ঙসি মহাক্না হাংদোক্লিবা সেন্টার অসিনা সাইগী শান্নরোয়শিং খক্তা নত্তনা মনিপুরগী শান্নরোয়শিংদা চাউনবা কান্নবা ফংহল্লগনি। সেন্টার অসিনা শান্নরোয়শিংবু হেন্না ফীভম ফগৎনা মখোয়গী মতোন লোম্লবা পারফোর্মেন্স পীনবা হোৎনবদা শোয়দনা মতেঙ ওইগনি অমসুং মাঙজিন থারবা ৱার্ল্ড ক্লাস শান্নরোয় কয়া থোরক্নবগী উপায় ওইরগনি।
মহাক্না মখা তানা হায়, সাইন্স সেন্টার অসি ফজনা চল্লায়দুনা অমসুং অৱাংবা থাক্তা রিসার্চ কয়া চত্থদুনা তুংগী মশক থোক্লবা চেম্পিয়ন কয়া স্তেত অসিদগী পুথোকপা ঙমগনি। কত্থোকপা অমগা লোয়ননা সাইন্স সেন্টার অসিনা পীগদৌরিবা কান্নবা কয়া অদু ফংহন্নবা হোৎনবীয়ু। সেন্টার অদুবু হাংদোকপগী থৌরম অদুদা শরুক য়াখিবা রিমস ইম্ফালগী সাইক্যাত্রি ডিপার্টমেন্তকী হেড ডাঃ লেনিন সিংহনা হায়, স্পোর্টস সাইন্স সেন্টার অসিগী তোঙান তোঙানবা ফেকাল্টি লৈরে। স্পোর্টস সাইকোলোজিগী ওইনা অৱাৎপা লৈরিবা অসিদা মহাক্কী মায়কৈদগী মতেঙ পাংনবা হোৎনগনি। মশক নাইরবা শান্নরোয়শিংবু ফিজিকেল, মেন্টেল অমসুং ইমোশনেল ওইনা ঙাক্লৌ তৌবা মথৌ তাই। মসিনা মখোয়গী পান্দম অদু ফংনবা হোৎনবদা চাউনা মতেঙ ওইগদৌরিবনি।
ঙসি হাংদোক্লিবা সেন্টার অসিনা অফবা শান্নরোয়শিং পুথোক্নবা হোৎনবদা চাউনা মতেঙ ওইরগনি হায়না ডাঃ লেনিন্না থাজবসু ফোঙদোকখি। সাই ইম্ফালগী ডিপুটি ডিরেক্টর লৈশাংথেম ইবোমচানা হায়, মেরি কোম্না ঙসি ফাওবা ইন্টারনেশনেলগী থাক্তা পাঙথোকপা কম্পিটিসন ৩১দা কম্পিত তৌখিবগা লোয়ননা কম্পিটিশন খুদীংমক্তা লৈবাক অসিগী মেডেলশিং পুরকপা ঙমখি। মহাক্না অৱাৎ অপানা থল্লবা ফীবমশিংদা মহাক্কী মেডেলশিং অদু তাল্লকপা ঙমখিবনি। ঙসিদি স্পোর্টস সাইন্সকী অৱাৎপা লৈরম্বা অদু হাংদোক্লিবা সেন্টার অসিনা খরমখৈদি মেনখৎপা ঙম্লগনি। মসিনা ষ্টেত অসিদগী মখা তানা অলিম্পিয়ান কয়া পুথোক্নবা হোৎনবদা চাউনা কান্নবা ফংহল্লগনি হায়না মহাক্না চপ চানা থাজৈ।
থৌরমগী প্রেসিডেন্টকী ৱারোল পীরদুনা সাই নোর্থ ইষ্ট রিজনেল সেন্টার ইম্ফালগী রিজনেল ডিরেক্টর ফ্রান্সিস মারউইন্না হায়, হৌখিবা চহীদগী স্পোর্টস সাইন্স মপূং ফাহন্নবা থবক থৌরমশিং পায়খৎতুনা লাকখি। অৱাৎপা লৈরিবশিং অথুবা মতমদা মেনশিন্দুনা মপূং ফানা থবক থৌরমশিং চত্থনবা হোৎনরি। রিমসনা চাউনা মতেঙ পাংদুনা সেন্টার অসি হেন্না ‍মপূং ফানবগী লম্বীরোমদা চঙশিল্লক্লি।
মারউইন্না হায়, স্পোর্টস সাইন্স সেন্টারদা অনৌবা টেক্নোলোজিগী ইকুউপমেন্টশিং ইনস্টোল তৌবগা লোয়ননা হৌজিক শান্নরোয়শিংনা মখোয়গী মতোন লোম্লবা পারফোর্মেন্স অদু পীনবা হোৎনবদা চাউনা মতেঙ ওইরগনি। সেন্টার অসিগী মতেঙগা লোয়ননা সাইগী শান্নরোয়শিংদা নত্তনা স্টেত অসিগী শান্নরোয়শিংনা মালেমগী থাক্তা মশক থোক্না কম্পিউট তৌবা ঙম্নবগী ফীভম অদু হেনগৎহল্লগনি হায়না মহাক্না থাজৈ।
সোর্স: পোক্নফম

COMMENTS

WORDPRESS: 0
DISQUS: