মুৎনাইররোইদবা জুন ১৮

Homeৱাখল্লোন

মুৎনাইররোইদবা জুন ১৮

মণিপুর য়ৌনা সিজ ফায়ার কোনশিল্লকপা অসিবু য়ানীংদবা উৎতুনা রতন থিয়াম অমদি এম কে বিনোদীনি মীওই অনীসিদা ইন্দিয়া লৈঙাক্না পীরকপা পদ্মশ্রী এৱার্দ হন্দোকখি। ম

মণিপুর য়ৌনা সিজ ফায়ার কোনশিল্লকপা অসিবু য়ানীংদবা উৎতুনা রতন থিয়াম অমদি এম কে বিনোদীনি মীওই অনীসিদা ইন্দিয়া লৈঙাক্না পীরকপা পদ্মশ্রী এৱার্দ হন্দোকখি। মীয়ামগী মীহুৎশিংনদি ইন্দিয়া লৈঙাক্কী মথক্তা হঙ্গৎনা করিসু হায়জবা ঙমজখিদে। অদুবু মথংগী মীখলদা মখোয় অয়াম্বা মীয়াম্না থাগৎলকখি। মসিনা ঐখোয় মীয়ামগী থাক্নি। মীশি মীনা য়াওবা খোঙজংশিংসিনা মরম ওইরগা অকোনবদা ইন্দিয়া লৈঙাক্না বেঙ্কোক দিক্লারেসনদগী অকক্নবা ঙমখৈ লৈতবা হায়বদু লৌথোকখি।

মালেমদা লৈরিবা লম খূদিংমক মশা শশাগী ঙমখৈ, বাউন্ডারি লৈজৈ। মদুবু লম লমদুনা ঙাক-শেন্দুনা থম্নৈ। য়ুম-কৈ শাদুনা লৈনরিবা ঐখোয় ঐখোয়গী লমসিগীসু ঙমখৈ লৈনরি।মসিবু অমা অমনা হেঞ্জিল্লক্তনবা, খোপচিনখিদনবা ইশা ইশানা শেন্নজৈ, ঙাকচৈ। ইশাগী ঙমখৈদুবু খাজিন্দুনা থম্নবসু য়াওনৈ। মালেমগী থাক্তা পাকথোক চাউথোক্লুবা তৌরুদনা ইন্দিয়াগী লৈরিবা স্তেত অমদি য়ুনিয়ন টেরিটোরি খূদিংমক্কী মশা মশাগী ঙমখৈ লৈজরিবনি। হায়রিবা ঙমখৈসিবু লম লমদুগী লৈঙাক্না চেকশীন্না ঙাক শেন্দুনা থম্নৈ। ঐখোয়গী ইরমদম মণিপুরগী ঙমখৈসু মীয়াম্না অমদি মপূং ওইনা লৈঙাক্না ঙাক্লি। লৈঙাক হায়বসিদা হেন্না থৌদাং লৌগদৌরিবসিনা মীয়ামগী মীহুৎশিং অসিননি।

মসিমক্না মণিপুর লেজিসলেটিব এসেমব্লিদা মীয়ামগী মীহুৎশিংনা ‘মণিপুরগী অপূনবা শক্তম কায়হল্লোই’ হায়না কুমজা ১৯৯৫গী মার্চ ২৪, কুমজা ১৯৯৭ কী মার্চ ১৪, কুমজা ১৯৯৮গী ডিসেম্বর ১৭ অমদি কুমজা ২০০১গী মার্চ ২২দা থেংখাঙ মরিরক ৱারেপ লৌখি। ৱারেপ্তি ফনা য়াম্না নীংথিজনা লৌখি। অদুবু হঞ্জিন হঞ্জিন লৌরগা মদুবু থবক্তা ওন্থোকপবুনি খ্বাইদগী মরু ওইরিবদি। কনাগুম্বনা মণিপুরগী ঙমখৈদা শীংনরক্লবা অমদি ঐখোয়গী ঙমখৈদগী ইঞ্চি অমগী লম লৌবা ঙমদনবা করিগুম্বা মখলগী থবক অমা ফাওবা পায়খৎপদি থেংনখিদে। অদুনা ৱারেপ্তুবু য়েংলুরগা য়ানবমক্তি নৎতবা ৱারোল ১৬ য়াওবা এগ্রীমেন্ট অমা কুমজা ১৯৬০ দা সোই তৌনখি। এগ্রীমেন্ততুগী ১৩ শুবদা অসুম্না পল্লি- মণিপুরদা নাগা তাবা লম পূম্নমক পূনশিনবা য়াই। পুনশিনবা হায়রিবসি নাগালেন্ডদনি। অসিগুম্বা এন এস সি এন (আই-এম) গী মঙলান অসি নাগালেন্ড স্তেত এসেমব্লিদা হৌজ হৌজ কুমজা ১৯৬৪গী ডিসেম্বর ১২, কুমজা ১৯৭০গী আগস্ট ২৮ অমসুং কুমজা ১৯৯৪গী সেপ্টেম্বরদা পুন্না অহুম্লক ৱারেপ লৌখি। মসিগী মতুং তারকপদা ইন্দিয়াগী প্রাইম মিনিষ্টার শ্রী নরসিংহ রাওনা কন্ডিশন অমত্তা য়াওদনা নাগা লালহৌবশিংগা ৱারি শানবগী অপাম্বা ফোঙদোকখি। মদুনা এন এস সি এন (আই-এম) না কন্ডিশন অহুম পুথোক্লকখি, ১) নাগাশিং গী নীঙতম্বা ৱাফমগী মতাঙদা শানবা, ২) অহুমশুবা লৈবাক অমদা চৎলগা শানবা, ৩) ৱা তাইশন্নবগীদমক অতোপ্পা পার্টি অমা য়াওহনবা, হাযবা অসিনি।

অহানবা তাঙ্কক্কী ওইনা ইন্দিয়াগী প্রাইম মিনিষ্টার শ্রীদেবী গৌড়াগা এন এস সি এন (আই-এম) গা জেনেভাদা ৱারী শানবা হৌখি। মতুং তারকপদা কুমজা ১৯৯৭ কী আগস্ত ১ দা ইন্দিয়া অমদি এন এস সি এন (আই-এম) গী মরক্তা থা খরা চৎনবা য়াবা সিজ ফায়ারগী য়ানা চে অমা সোই তৌনখি। সিজ ফায়ারনা কোনগদবা মফম্না নাগালেন্ড মনুং খক্তবুনি। থা খরা খরগী শাংদোক্লগা লাকপা সিজ ফায়ার অদু অকোনবদা চহী চহীগী ওইনা শাংদোকখি। কুমজা ২০০১ গী জুলাই ৩১ দা সিজ ফায়ারগী মতম লোইবা মরম্না মথং শাংদোক্নবগীদমক কুমজা ২০০১ গী জুন ৩ অমসুং ৪দা বেঙ্কোক্তা ইন্দিয়াগী মীহুৎ কে পদ্মনাভয়াগা এন এস সি এন (আই-এম) গী জেনারেল সেক্রেটারী মুইভাগা ৱারোল মঙাগী য়ান-চে অমা সোই তৌনখি। য়ান-চে অদুবু ‘বেঙ্কোক দিক্লারেসন’ হায়নসু খঙনৈ। য়ান-চেদুগী অহানবা ৱাফমদা, সিজ ফায়ারগী অকক্নবা লমখৈ লৈতনা মণিপুর, নাগালেন্ড, আসাম, ত্রিপুরা অমদি অরুনাচল প্রদেশ হায়রিবা লমশিংসিগী নাগা তাবা লমশিং ফাওবা কোনশিনবা অসিনি।

ইন্দিয়াগা লৈঙাক্কী ৱাঙাঙলোয় স্বরাজ কৌশালনা ৱাফম মসিগী মতাঙদা মাঙজৌননা অপাম্বা ফোঙদোকখিবা লৈখ্রবনি। অদুনা মসিগী ৱাফম অসি থোক্লকপা য়াই হায়বসি মণিপুরগী মীয়াম্না হীরম অসিগা মরী লৈননা খন্ন-নৈনবা য়াবা কয়া খন্নখি। মতুং তারকপদা অল মণিপুর য়ুনাইতেদ ক্লাবস’ অর্গানাইজেশন (অমুকো) না শীল্লগা কুমজা ১৯৯৭, আগস্ত ৪দা মণিপুরগী ঙমখৈগীদমক পুৱারীদা মূৎনাইদনা লৈহৌরগদবা মীওই লাক্ষ মঙামুক্না চাউরবা খোঙচৎ অমা চৎখি। লোয়ননা কুমজা ২০০০ গী সেপ্টেম্বর ২৮ দসু অপুনবা মণিপুর কনবা ‘ইমা লূপ (অমকিল) অমদি নেশনেল আইডেন্টিটি প্রোটেক্সন কমিটি (নিপকো) অনীনা শীল্লগা মণিপুরগী শক্তমগীদমক অচৌবা খোঙচৎ অমসু চৎখি। হায়রিবা খোঙচৎশিং অসিনা মণিপুরগী ঙমখৈগী, শক্তমগী মতাঙদা মীয়ামগী ইহুল ময়েক শেংনা তাকখ্রবনি, ঊৎখ্রবনি।

অসিগুম্বা মতমসিদা কুমজা ২০০১ গী জুন ৪ দা ইন্দিয়া অমদি এন এস সি এন (আই-এম) অনীগী মরক্তা সিজ ফায়ারগী য়ান-চেদা মণিপুরগী নাগা তাবা লমসু কোনশিল্লকপদা মণিপুরগী মীওই অয়াম্বগী থম্মোয়দা তাশোন্না থিনবা হায়বদুমক ওইখি। হৌনরুবা তৌদনা মায়কৈ খূদিংদগী খোয়শাওনরবা মীওই লীশীং লীশীংনা ৱারেপ্তুগী মায়োক্তা অকনবা ঈহৌ হৌবা হৌগৎলকখি। মতমদো তশেংনা কাং-খোংচাইবা হায়বদু ওইখি। ঈহৌ খোঙজং নোংমা নোংমাগী কনশিনবা হেনগৎলক্তুনা কুমজা ২০০১ গী জুন ১৮ দদি ঈহৌ খোঙজংগী খম থেংবা মতম য়ৌরক্তুনা মণিপুর এসেমব্লিগী বিল্ডিংনচিংবা মৈ থাবা হৌরকখি। সিকিউরিটি ফোর্সনসু ঈহৌদু লাকশিনবা ঙমখিদে।

মমৈথংদা টিয়ার গ্যাস সেল লীশীংগী মথক্তা কাপ্লবসু য়ারক্ত্রদুনা নোংমৈ কাপ্পা হৌরকখি। নুমিৎতুদা ঈহৌ খোঙজংলোয় ১৪ সিকিউরিটি ফোর্সকী মখূৎতা পুন্সি পিখম্নখি। মতুং তারকপা খোঙজং অসিগা মরী লৈনবা খোঙজংদা মীওই ৪ অমসু থৱায়না পোন্থা পীখি। মরিসি থারগা পূন্না মীওই ১৮ না ইমা লৈবাক্কীদমক থৱায়না পোন্থা পীখি। অথৌবা অথৌবীশিং অদুদি- ১) লাইতোঞ্জম রাজকুমার ২) লাইশ্রম ওংবী আর কে তম্ফাসানা ৩) ওক্রম রামানন্দ ৪) থোকচম ললিত ৫) খোইস্নাম সিংহজিৎ ৬)  ৱাচস্পতিময়ুম নাওচা ৭) অমোম রাজেন ৮) ক্ষেত্রিময়ুম রোমিও ৯) গুরুময়ুম দত্তা ১০) সগোলসেম সুরচন্দ্রা ১১) রিশিকান্তা য়ুম্নাম ১২) থোকচোম উইলসন ১৩) থৌদাম গুনেশ্বর ১৪) কোন্সম কামেশ্বর ১৫) চবুংবম ভারত ১৬) ক্ষেত্রিময়ুম জিবন ১৭) ময়াংলম্বম মনিকান্তা অমসুঙ ১৮) থিংঙোম বিরেন্দ্রা অসিনি।

মণিপুর য়ৌনা সিজ ফায়ার কোনশিল্লকপা অসিবু য়ানীংদবা উৎতুনা রতন থিয়াম অমদি এম কে বিনোদীনি মীওই অনীসিদা ইন্দিয়া লৈঙাক্না পীরকপা পদ্মশ্রী এৱার্দ হন্দোকখি। মীয়ামগী মীহুৎশিংনদি ইন্দিয়া লৈঙাক্কী মথক্তা হঙ্গৎনা করিসু হায়জবা ঙমজখিদে। অদুবু মথংগী মীখলদা মখোয় অয়াম্বা মীয়াম্না থাগৎলকখি। মসিনা ঐখোয় মীয়ামগী থাক্নি। মীশি মীনা য়াওবা খোঙজংশিংসিনা মরম ওইরগা অকোনবদা ইন্দিয়া লৈঙাক্না বেঙ্কোক দিক্লারেসনদগী অকক্নবা ঙমখৈ লৈতবা হায়বদু লৌথোকখি।

অথৌবা অথৌবী ১৮গী অরোইবা মথৌ-মঙম পাঙথোকখিবা মফম কেক্রু পাৎতা কুমজা ২০০২, জুন ১৮দগী হৌনা মখোয়গী মফমদা হৈকৎ-লৈকৎ তমজদুনা মখোয়বু ইকায় খুম্নবা ঊৎতুনা লাক্লি। মখোয়বু ইকায় খুম্নবা ঊৎতুনা নীংশিং থৌরম পাঙথোকপা অসিনা হৌজিক্কী মীরোলদা ইমা লৈবাক্কীদমক কৎথোকপা ঙম্বগী লম্বীসিদা চিংশিনবিবা ওইরসনু। মণিপুরগী ঙমখৈ কায়বা য়ারোঈ। মণিপুরগী অপূনবা শক্তম মাঙবা য়ারোই। খোল্লাও অসিনা হান্নগুম চীংমী তম্মী অমত্তা ওইবা ওইরসনু। খূদিংমক্কী থম্মোয়দা মসিনা লৈতানা লেঙদনা লৈখিবা ওইরসনু।

কার্টসিঃ পোক্নফম

COMMENTS

WORDPRESS: 0
DISQUS: