মীয়ামগীদমক সিএমনা গোবিন্দজিদা মহাযজ্ঞ পাঙথোক্তুন থৌনিজখ্রে

Homeস্ক্রলবার

মীয়ামগীদমক সিএমনা গোবিন্দজিদা মহাযজ্ঞ পাঙথোক্তুন থৌনিজখ্রে

ইম্ফাল, ৪ জুনঃ স্তেত অসিগী মীয়াম্বু কোভিদ-১৯দগী ঙাকথোক্নবা অমসুং তমথিরবা লাইচৎ অসি মপূং ফানা লাকশিনবা ঙম্নবগী ৱাখল্লোন্দা চীফ মিনিষ্টার নোংথোম্বম বীরে

ইম্ফাল, ৪ জুনঃ স্তেত অসিগী মীয়াম্বু কোভিদ-১৯দগী ঙাকথোক্নবা অমসুং তমথিরবা লাইচৎ অসি মপূং ফানা লাকশিনবা ঙম্নবগী ৱাখল্লোন্দা চীফ মিনিষ্টার নোংথোম্বম বীরেন সিংহনা মহাক্কী পূক্নিংদা অচেৎপা থাজবা থম্লদুনা ঙসি ইম্ফালগী শ্রীশ্রী গোবিন্দজি মন্দিরদা ‘মহাযজ্ঞ’ পাঙথোক্তুনা থৌনিজখ্রে।
লমদম অসিগী অখঙ-অহৈশিংনা ঙসি অয়ূক পূং ৮.৩০দগী পূং ১০ ফাওবগী মতম অসি খ্বাইদগী অফবা পূংফমনি হায়রকপগী মতুংইন্না চীফ মিনিস্টারনা মতম চানা শ্রীশ্রী গোবিন্দজিগী মন্দিরদা ‘মহাযজ্ঞ’ অমসুং ‘পূর্ণহুতি’ গী থৌরমশিং পাঙথোকখি।
ইম্ফালগী পেলেস কম্পাউন্দদা লৈবা শ্রীশ্রী গোবিন্দজি মন্দিরদা হিন্দু লাইনিংগী খঙ-হৈরবা পন্ডিতশিং য়াওনা বিষ্ণুগী মূর্ত্তি লেঙথোক্লগা পাঙথোকখিবা লাইশোন থৌরম অদুদা মণিপুর মীয়াম্বু কোভিদ-১৯গী লাইচৎ অসিদগী ঙাকথোক্তুনা তেক্ত-কায়দনবা অমসুং লাইচৎ অসিবু মণিপুরদা নত্তনা মালেমদগী লাকশিনবা ঙম্নবা শ্রীশ্রী গোবিন্দজি মন্দির বোর্ডকী চেয়ারমেনসু ওইরিবা চীফ মিনিষ্টার এন. বীরেন সিংহনা ঈশ্বরগী মফমদা ‘দন্ডবত প্রণাম’ তৌখি।
ঙসিগী থৌরম অদুদা গোবিন্দজি মন্দির বোর্ডকী ষ্টিয়ারিং কমিটিগী চেয়ারমেনসু ওইরিবা কেফ এন্ড পি দি মিনিস্টার থোকচম সত্যব্রত অমসুং টেম্পল বোর্ড অসিগী মরু ওইবা মেম্বারশিংসু শরুক য়াখি।

         শ্রীশ্রী গোবিন্দজি মন্দির

নীংশিংবা য়াই, মণিপুরদা ইপিদেমিক নৎত্রগা অৱা-অনা তারকপা মতমদা গোবিন্দজি তেম্পলদা মহাযজ্ঞ পাঙথোক্তুনা ঈশ্বরগী মফমদা চঙজবা, খুরুমজবা থৌরম অসি নিংথৌ পাল্লিঙৈ মতমদগী অদুমক চৎনরগা লাকই। অহানবা ওইনা ইং ১৮৯৮ গী মতমদা লমদম অসিদা কোলেরা লাইচৎ অহানবা শন্দোরকপা মতমদসু গোবিন্দজিদা থৌনিজবগী থৌরম অসি পাঙথোকপা লৈখ্রে। মসিগী মতুং চুরাচান্দ মহারাজ (১৮৮৫-১৯৪১) না নিংথৌ ওইনা পাল্লিঙৈ মতম ইং ১৯০৮দা অমুক হন্না কোলেরা লাইচৎ শন্দোরক্তুনা মী ১৫,০০০ রোম শিখি। হায়রিবা মতম অসিদসু মণিপুরগী নিংথৌ চুরাচান্দ মহারাজনা লুচিংদুনা পন্ডিত কয়াগা লোয়ননা গোবিন্দজি দা মহাযজ্ঞ পাঙথোক্তুনা থৌনিখি। মণিপুরগী অপূনবা মীশীং লাক্ষ ১.৫ রোমতমক লৈবা মতম অদুদা কোলেরা লাইচৎনা মী কয়াগী পুন্সি মাঙহন্দুনা অঙকপা ফংনা চৈথেং পীরকখিবা মতম অদুদা নিংথৌনা গোবিন্দজিদা মহাযজ্ঞ অদু পাঙথোকপদগী লাইচৎ অদু লাকশিনবা ঙমখিবনি হায়না মতমদুগী মীয়াম পূম্নমক্না থাজনখিবগী ৱারী লৈরি।
থাজনবী অসিগী মতুং ইন্না ইং ১৯৬৮-১৯৬৯ গী মতমদা মণিপুরদা ঈকং থোক্তুনা ৱানরবদা অখঙ-অহৈশিংনা হায়বিবগী মতুং ইন্না মতমদুদা ওকেন্দ্রো মহারাজনা গোবিন্দজি তেম্পলদা ষণবী ১০৮ পুখৎতুনা শঙ্গোম শুমখি। মসিগী মতুং ৱাহেংবম নিপামচানা চীফ মিনিষ্টার ওইবা মতমদসু লমদমসিদা ঈকং থোকপদা গোবিন্দজি তেম্পলদা ষণবী শঙ্গোম শুম্বদগী নোং তারকখিবগী ৱাফমসু লৈখ্রে। অদুগা মণিপুরদা লাইচৎকী চৈথেং ফংবা মতমদা গোবিন্দজি তেম্পলদা মহাযজ্ঞ পাঙথোক্তুনা ঈশ্বরদা খুরমজবা অসিদি চুরাচান্দ মহারাজগী মতমদা পাঙথোকখিবা অদুগী চহী ১১০ রোমগী মতুংদা ঙসি চীফ মিনিষ্টার নোংথোম্ব বীরেননা পাঙথোক্লিবা অসিনা অহানবা ওইরি।
পনবা য়াই, হৌখিবা য়ুমশকৈশা নুমিত্তা হৌজিক কোভিদ-১৯গী অনীশুবা ওয়েবনা লমদম অসিদা পীরক্লিবা চৈথেং অসিগী মতাঙদা চীফ মিনিষ্টারগী অফিসতা শ্রীশ্রী গোবিন্দজি তেম্পল বোর্ডকী মেম্বারশিং তোঙান-তোঙানবা লাইনিং চৎলিবা ফুরুপশিংগী লুচিংবাশিংগা ফম্মিন্নদুনা তানরবা মতুং কোভিদ-১৯ অসি লাকশিন্নবা মাগী মাগী লাইনিংগী হৌনবী মতুং লাইশোন থৌরম পাঙথোক্নবা ৱারেপ লৌখিবনি। ৱারেপ অসিগী মতুং ইন্না ঙসি ইসলাম লাইনিং থাজবশিংনসু মসজিদতা লাইশোন থৌরম পাঙথোকখি হায়রি। লাক্লিবা নোংমাইজিং নুমিত্তনা খৃষ্টান লাইনিং চৎপশিংনা চার্চতা লাইশোন পাঙথোক্কনি। জুন ৭কী অয়ুক্তনা কাংলাগী নোংচুপ সনথোঙদা ধর্ম খুদীংমক্কী লুচিংবা অনী/অনী শরুক য়াদুনা মাগী মাগী লাইশোল থৌরম পাঙথোক্নবা শেম-শারি।

সোর্স : পোক্নফম

COMMENTS

WORDPRESS: 0
DISQUS: