মালেমগী শৈরেংগী নুমিৎ মার্চ ২১না লাকপদা  

Homeৱাখল্লোন

মালেমগী শৈরেংগী নুমিৎ মার্চ ২১না লাকপদা  

মালেমগী মমিং লৈরবা শহর কুনহুমদোইদা মার্চ ২১বু য়ুনেস্কোনা লাওথোকখিবগী মতুং ইন্না মালেমগী শৈরেং নুমিৎ হায়না তোঙান তোঙানবা থৌরমশিং পাঙথোকনগদৌরি। অসিগ

তোংব্রম অমরজিৎ

মালেমগী মমিং লৈরবা শহর কুনহুমদোইদা মার্চ ২১বু য়ুনেস্কোনা লাওথোকখিবগী মতুং ইন্না মালেমগী শৈরেং নুমিৎ হায়না তোঙান তোঙানবা থৌরমশিং পাঙথোকনগদৌরি। অসিগুম্বা থৌরমশিং অসিদা অশৈবা কয়া, অইবা কয়া, মনা মথুম পীদুনা, লাইরিক ফোঙদুনা, শৈরেং থিদুনা, চাওরবা কুমহৈ ওইনা শিন লাংদুনা পাঙথোকণগদৌরি। কোভিদ-১৯না মরম ওইদুনা কুমজা অমা ঐখোয় অমগা অমগা উন্নবগী তাঞ্জা ফংখিদ্রবসু দিজিটেল প্লেটফোর্মশিংদা, ভর্চ্যুএল প্লেটফোর্মশিংদা শিন্দুনা পাঙথোক্লিবা শৈরেং শৈদিন্নবা, সেমিনার, সিম্পোসীয়মশীং, লাইরিক ফোঙবা, খন্ন-নৈনবা কয়া অসিনা অহোয়নদুম মালেমসিদা খুন্দা লৈতাদুনা লৈরিবা খোরিলোলবু নুংশিজবা মীওই কয়াদা অমদি মসিগী থবক থৌরম কয়া চোকথবা লৈতনা চেন-চোংলিবা  মীওইশিংদা থৌনা অমদুম হাপ্ললবগুম তৌরক্লি। অসিগুম্বা থৌরমশিং অসিনা হেন্না অমগা অমগা নকশিনহল্লে হায়না লৌদবা য়ারোই। নোঠিংহাম ত্রেন্ট য়ুনিভর্সিতিদা, স্পেন্দা, সাউট কোরিয়াদা, ন্যু জিলেন্দদা, স্কোটলেনগী ইদিনবর্গতা, জর্মনিদা, য়ুনাইতেদ স্তেস্টতা, পোলেন্দা, ফিনলেন্দা, য়ুক্রেন্দা ইংলেন্দা, ইতলিগী মিলান্দা, চাইনাগী নাঞ্জিংদা, কানাদাদা, ইস্তোনিয়াদা, রুসিয়াদা, নেদরলেন্দ অসিনচিংবা লৈবাক কয়াদা মালেমগী শৈরেং নুমিৎ থৌরম পাঙথোক্কদৌরি। ইন্দিয়াদসু সাহিত্য একাদেমিনা শিন্দুনা মালেমগী শৈরেং নুমিৼ পাঙথোক্কদৌরি। মলতি লিংগ্যুএল পোইতস মিত কয়াসু লৈবাক অসিদা লৈরিবা খোরিলোলবু নুংশিজবা লূপ কয়ানা শিন্দুনা পাঙথোকনগদৌরি। অশৈবশিংবু ইকায়খুম্নবা উৎপা ওইনা মখোয়না খুনাই অসিদা পীরিবা মমল য়াম্লবা খুদোল অদুগীদমক এৱার্দ কয়াসু পীগদৌরি।

তাইবঙ থম্মোয়বু মতম খুদিং নৌহন্দুনতা লৈহনবা, ৱারবা মতমদা অমুক লমজিংলিবা, ৱাখল পুকনিংবু ইংথা তপথাহল্লিবা কলা অমা হায়রগদি শৈরেংনি। লাইয়েকপা আর্তিসশিংনা মচু মখল কয়া শিজিন্নদুনা তাইবঙ পুন্সি অমসুং মহৌশাগী শকলোন কয়াবু তোঙান তোঙানবা মচুগী মেদিয়মদা ফোঙদোকপগুম্না অশৈবা কবিশিংনা অথোতপা অমেংবা, নুংশিবা ৱাহৈনা, ৱাংউলোন্না থল্লবা পাউজেল কয়ানা শৈরেং ওইনা ইনরি। চেন্থরি তাইবঙ ঈচেলসু লেপ্নাইদনা। পুন্সি ঈচেলসিদা য়াওরি ৱাহং কয়া। মসিবু পাউখুম পীনবা হোতনবনা শৈরেংনা ওইরি। খুনাইদা অমদি হৌরক্লিবা নৌরিবা মীরোলদা শৈরেংনা অনৌবা ৱাখল কয়া পোকহল্লি। লৈবাক নুংশিবা, মালেম তাইবঙপালসিবু নুংশিবা ফাওহল্লি নুংশিবা শৈরেংগী ৱাহৈশিংনা। অদুবু হৌজীক্কি দিজিটেল এজকী মতমসিদা শৈরেংনা মীওইবগী পুন্সিবু হেন্না মগুন লৈহল্লম্বদু অতোপ্পা মায়কৈ অমদা লাক্লিবা টেকনোলোজিগী অহোংবা কয়া অসিদা কদায়দনো অমা অহোংবা অওনবা লাকপদৌনা থেংনদবা নত্তে। লোল, ময়েক, কলচর, পুৱারী, জাতি অমগী শক্তম, মীওইবা খুনাইগী মশক পুম্নমক অসিবু চেকশিন্না লাচন্দুনা থম্লিবসি শৈরেং হায়বা খোরিলোলগী কলা অসিননি। অদুনা য়ুনেস্কোনা ১৯৯৯ পেরিস্তা ফমখিবা জেনরেল কনফরেন্সনা  মার্চ ২১বু মালেমগী শৈরেং নুমিৎ হায়না থৌরম পাঙথোকনবা লেপখিবনি। ঙসি চাওখতলবা মালেম অসিদা লৈরিবা মীওইশিংনা লমন অমদি তোনশিল্লবনি মালেমসিদা লৈরিবা অশৈবশিংগী মফমদা। মরমদি পুন্সিবু মশক হেন্না থোকহল্লিবা, ৱাহন্থোক লৈহল্লিবা অদুগা পাউখোং কয়াগী পাউখুম পীরিবসি শৈরেংনি। নুমিৎ অসি ঙসিদি মালেমগী মফম কয়াদা হৌরক্লিবা নহারোল কয়াদা মখোয়বু পুন্সিগী থৌরম থৌদা কয়াদা অফবা মীওই ওইনবা, লৈবাক খুনাইগী য়াইফনবা ৱাখল খনবদা পুকনিং থৌগতপা, ইনোত হাপ্পা অমদি শৈরেংগী মরু ওইবদু খঙনবা হায়দুনা নীংশিং থৌরম পাঙথোকনরক্লি।

অইবা খুৎই লাইরিক লৈত্রিঙৈ, চে কলম হায়বদু খঙদ্রিঙৈ মতমদা মীওইবগী পুৱারী, ত্রেদিসন, লাইনিং লাইশোল, চতনবী থাজনি, কলচর অসিনচিংবা কয়া অসিবু মীরোল অমদগী অমদা পথাং পুথাং লান্না মীরোল অমদগী অমদা শম্নদুনা পুথারক্লিবা তৎফদ্রবা খ্বাইদগী মরু ওইবা লংলা অমা হায়রগদি শৈরেংনি, ঐখোয়গী ওরেল লিটরেচরগী ত্রেদিসন অসিনি। খুদম ওইনা খরদং য়েংলবদা, ঙসিদগী চহী লীশিং কয়াগী মমাংদা গ্রিস, রোম, পার্সিয়া, ইজিপ, ইন্দিয়া, চাইনা, জাপান্দ অসিনচিংবা লৈবাক কয়াদা অরিবা মতমদা লৈরম্লিবা ফোক লিতরেচর অমদি ওরেল ত্রেদিসন অসিগী য়াংলেন ওইরিবসি শৈরেংনি। মনিপুরী খোরিলোলদা খ্বাইদগী চাওনা ফিদা কল্লিবা ফোক এপিক, খম্বা থোইবী শৈরেং ইচম চম্না ইখিবা নত্তে। ইনাকখুল্লবা মনিপুরী খোরিলোলগী পূক্কৈদা লৈরিবা পাক চাওরবা চিনবুং সাহিত্যগী য়ূমফমসিনা হৌরক্লিবা মীরোল মীরোলদা মপাল নাইদ্রবা খুদোল তম্লি। মহাকবি হিজম অঙাংহলনা করিগুম্বা ঐখোয়গী চিনবুং সাহিত্যদা লৈরম্লিবা মোইরাং কংলৈরোলগী পুক্কৈদা ফংলিবা ফজরবা শৈরেংলেন অসি থেংনরমদ্রবদি ঙসিগী মীরোলনা ফংলিবা খোরিলোলগী মহাও অদু ময়েং তারম্বসু য়াই। লাইবক ফবনা লাইওইখ্রবা ইপা ইপুশিং অদুনা মপাল নাইদ্রবা খোরিলোলগী লনগৈদি থম্বীরম্লি। মসিদা য়ুম্ফম ওইদুনা ঙসিদি হেন্না হেন্না থাক ৱাংলবা খো্রিলোলগী পোতথোক কয়া লেপ্তনা পুথোকনরকলি। খুৎই ওইনা লৈত্রিঙৈদা লৈরম্লিবসি চিনবুংগী পুক্কৈদা য়াওরিবা ঐখোয়না লাইরোল তিনলোন ওইনা লৌরিবসিসু শৈরেংনি।

মালেমগী মমিং লৈরবা শহর কুনহুমদোইদা মার্চ ২১বু য়ুনেস্কোনা লাওথোকখিবগী মতুং ইন্না মালেমগী শৈরেং নুমিৎ হায়না তোঙান তোঙানবা থৌরমশিং পাঙথোকনগদৌরি। অসিগুম্বা থৌরমশিং অসিদা অশৈবা কয়া, অইবা কয়া, মনা মথুম পীদুনা, লাইরিক ফোঙদুনা, শৈরেং থিদুনা, চাওরবা কুমহৈ ওইনা শিন লাংদুনা পাঙথোকণগদৌরি। কোভিদ-১৯না মরম ওইদুনা কুমজা অমা ঐখোয় অমগা অমগা উন্নবগী তাঞ্জা ফংখিদ্রবসু দিজিটেল প্লেটফোর্মশিংদা, ভর্চ্যুএল প্লেটফোর্মশিংদা শিন্দুনা পাঙথোক্লিবা শৈরেং শৈদিন্নবা, সেমিনার, সিম্পোসীয়মশীং, লাইরিক ফোঙবা, খন্ন-নৈনবা কয়া অসিনা অহোয়নদুম মালেমসিদা খুন্দা লৈতাদুনা লৈরিবা খোরিলোলবু নুংশিজবা মীওই কয়াদা অমদি মসিগী থবক থৌরম কয়া চোকথবা লৈতনা চেন-চোংলিবা  মীওইশিংদা থৌনা অমদুম হাপ্ললবগুম তৌরক্লি। অসিগুম্বা থৌরমশিং অসিনা হেন্না অমগা অমগা নকশিনহল্লে হায়না লৌদবা য়ারোই। নোঠিংহাম ত্রেন্ট য়ুনিভর্সিতিদা, স্পেন্দা, সাউট কোরিয়াদা, ন্যু জিলেন্দদা, স্কোটলেনগী ইদিনবর্গতা, জর্মনিদা, য়ুনাইতেদ স্তেস্টতা, পোলেন্দা, ফিনলেন্দা, য়ুক্রেন্দা ইংলেন্দা, ইতলিগী মিলান্দা, চাইনাগী নাঞ্জিংদা, কানাদাদা, ইস্তোনিয়াদা, রুসিয়াদা, নেদরলেন্দ অসিনচিংবা লৈবাক কয়াদা মালেমগী শৈরেং নুমিৎ থৌরম পাঙথোক্কদৌরি। ইন্দিয়াদসু সাহিত্য একাদেমিনা শিন্দুনা মালেমগী শৈরেং নুমিৼ পাঙথোক্কদৌরি। মলতি লিংগ্যুএল পোইতস মিত কয়াসু লৈবাক অসিদা লৈরিবা খোরিলোলবু নুংশিজবা লূপ কয়ানা শিন্দুনা পাঙথোকনগদৌরি। অশৈবশিংবু ইকায়খুম্নবা উৎপা ওইনা মখোয়না খুনাই অসিদা পীরিবা মমল য়াম্লবা খুদোল অদুগীদমক এৱার্দ কয়াসু পীগদৌরি।

মনিপুরদসু সাহিত্য থৌপাং লূপ (সাথৌলূপ)না শিন্দুনা মালেমগী শৈরেংগী নুমিৎকী থৌরম ২০১৩দগী হৌনা পাঙথোক্তুনা লাক্লি। নুমিৎ অসিদা গোপাল শর্ম্মা এৱার্দসু শকনাইরবা অশৈবশিংদা চহী খুদিং লেপ্তনা পীদুনা লাক্লি। অশৈবা লাইশ্রম সমরেন্দ্রনা মনিপুরী খোরিলোলদা তম্লিবা চাওরবা খুদোল অদুবু ইকায়কুম্নবা উতপা ওইনা গোপাল শর্ম্মা এৱার্দসু শকনাইরবা থিএতর দাইরেক্তর রতন থিয়াম্না ২০১৩দা খুৎশিন্নখি অমদি নুমিৎ অসিদা কবি লাইশ্রম সমরেন্দ্রাগী শৈরেং “খুল অমগী ৱারী”গী ইংলিস ত্রান্সলেসন “টেল ওফ এ লেন্দ” হায়না থৌনাওজম রতনকুমারনা হন্দোক্তুনা ফোঙদোকখি। নুমিৎ অসিদা অশৈবা সমরেন্দ্রগী শৈরেংশিং, বি জয়ন্তকুমার, এস ভানুমতি, কে গুনিলৈমা, লোইতোংবম দরেন্দ্রজিত, য়াইমা হাওবা, তেজকিস্বর, এন বেবেকা, মনিপুরী ফিল্মগী এক্টর গোকুল অহন্থেম, এলাংবম অবেনাও, মঙাং চনু য়াইফবী, অনুপামা অমসুং এস পোইরৈতোন্না শৈরেং মখল মথেলশিং পাথোকখি। অসুম্না ২০১৪দা মালেমগী শৈরেংগী নুমিৎকা মরি লৈননা গোপাল শর্ম্মা এৱার্দ লান্থোকখি ওজা নোংথোম্বম কুঞ্জমুহোন্দা। শেল ওইনা লুপা লীশিং ১০ পীদুনা ইকায়খুম্নবা উৎখি। অসুম্না লাকপনা ওজা খুমান্থেম প্রাকাস্তা, এলাংবম দিনমণীদা, অরিবম চিত্রেস্বর শর্ম্মাদা, এব্দুর রহমন খুৎহৈবমদা, অরাম্বম ওংবী মেমচৌবীদা মথং মথং ইকায়খুম্নবা উৎতুনা লাক্লি। ২০২১গী ওইনা শকনাইরবা অইবা ক্ষেত্রি বিরাদা মালেমগী শৈরেংগী নুমিৎকা মরি লৈননা গোপাল শর্ম্মা এৱার্দ পীদুনা ইকায়খুম্নবা উৼকদৌরি।  মালেমগী শৈরেং নুমিৎকা মরি লৈননা লমদম অসিগী শকনাইরবা কবিশিংগী মরক্তগী লৌখত্তুনা ফেস্তিবেল ওফ লাইশ্রম সমরেন্দ্র, ফেস্তিবেল ওফ এলাংবম নিলকান্তা অমসুং ফেস্তিবেল ওফ শ্রি বিরেন সাথৌলূপ্না শিন্দুনা পাঙথোকখি। মনা মথুম কয়ানা লৈতেংলবা অশৈবা কয়াদি তপ্না তপ্না পুন্সি চেংজেল লোয়দুনা পুন্সি নুমিৎনা য়াচংবদা অমম্বগী ঈরেনবুংদা তিনখিবসু কয়া য়াওখ্রে। অদুবু মখোয়না নুংশিনা ইরম্বা শৈরেংগী খোইথুম্লবা ৱাহৈশিংদি ঙসিসু অদুমমক ইনৌতা নৌদুনা লৈরি। মখোয়না চল্লম্বা পাউখোংশিং ঙসিসু ফোঙবা ঙমদবা কয়া য়াওরি। অশৈবশিংনা ফোঙলিবা শৈরেং লাইরিকশিং, পীনিংলিবা পাউজেল, খুনাইদা অমদি পুন্সিদা য়েংলিবা মিৼয়েং পুম্নমক মীওইবা খুনাইবু, মালেম অসিবু হেন্না নুংঙাই য়াইফনা অমদি ৱাহন্থোক লৈনা লৈবদা মতেং খরদং ওইরবসু খন্দুনা ইরিবনি শৈরেং কয়া।

নুংশিবা ম্যুজিকনা য়ুনিভর্স অসিগী লোল ওইবগুম্না ফজবা মগুন লৈবা শৈরেংনা মালেমসিদা লৈরিবা তোঙান তোঙানবা লাইনিং লাইশোল চৼলিবা, তোঙান তোঙানবা লোল ঙাংলিবা লৈবাক কয়াগী য়াম্লবা মীয়ামগী থম্মোয়গী থম্মোয়দা মরি অমদি অদুমমক লৈনহল্লি। অদুনা ঙমখৈ শম্বল লান্না ফাওদোক্তুনা হেক্তা চৎখিনি ফজবা শৈরেংদি। পাউজেল পুদুনা সমুদ্রা লান্না চৎখিনি ফজবা শৈরেংনা। কবি গুরু রবিন্দ্রনাঠকী গীতাঞ্জলি খোরিলোলদা নোভেল প্রাইজ ফংখি। ওমার খায়মগী রুবাইয়ট মালেম শিনবা থুংনা ফাওরি। তি এস এলিয়টকি দি ৱেস লেন্দনা মীওইবদা ৱাখল খন্থহল্লি। শৈরেংনা পুন্সি কয়াবু শম্নহল্লি, পাউ ফাওনহল্লি, পুন্না য়াইফবা মালেম অমগী মঙলান মঙমিন্নহল্লি। মালেমগী শৈরেং নুমিৎনা লাকপদা অশৈবা কয়াগী মফমদা ইকায়খুম্না উৎচরি।

COMMENTS

WORDPRESS: 1
DISQUS: