মহৌশাগী তান্থাদা মুতুম রমণীগী ‘ইঙাগী নোংজু’ শৈরেং লাইরিকসিনা তম্লিবা মপাউঃ মীৎয়েং অমা   

Homeআর্টস

মহৌশাগী তান্থাদা মুতুম রমণীগী ‘ইঙাগী নোংজু’ শৈরেং লাইরিকসিনা তম্লিবা মপাউঃ মীৎয়েং অমা   

লাইরিক্কী মমিংঃ      ইঙাগী নোংজু অইবীঃ                    মুতুম রমণী দেবী লাইরিক্কী মখলঃ       শৈরেং অফোংবাঃ               লৈকোল,ইম্ফাল, ২০২০ লা

তোংব্রম অমরজিত

লাইরিক্কী মমিংঃ      ইঙাগী নোংজু

অইবীঃ                    মুতুম রমণী দেবী

লাইরিক্কী মখলঃ       শৈরেং

অফোংবাঃ               লৈকোল,ইম্ফাল, ২০২০

লাইরিক্কী মমলঃ       লুপা ৪০০

লমায় মশিংঃ            ১০৮

তম্থিরবা মীওইবগী থৌইনশিন্না হৌজীক হোংলক্লিবা মহৌশাগীদমক মীপাইদবা ঙমদে অইবীনা অদুনা ইরক্লি, খোঙজেল য়াম্না তপ্পি ঙসি ইঙাগী নোং/ ঙাইঙমদা ফাওরকই মালেম…মরু তাখ্রবা ফৌ মরুশিং মালেম লৈতঙ্গাইদা/ ময়োল-থোকনিং থোকপা ঙমদ্রি… অদুবু আশাদুদি খক থাদোকপা লৈতে অদুনা হন্না হন্না খুৎলাম তোইনা কৌজরি, চুথরো চূথরো ইঙাগী নোং-ও   

হৌশাগী খোঙচত্তি থিংলুবা ঙমগনি কনানা। লেপ্তনা অদুম্মক চৎখি। ফজবা শক্তম, নুংশিবা মিকুপ, পামমুজবা কয়া মতমগী ইরোন্নুংদা অদুমক লুপখি। অদুবু মহৌশা মহাক্তি অদুম লৈহৌই। চীং পাৎ তুরেল লোইজিং লোয়া, লৌবূক লমহাং; উপাল ৱাপাল, হৈপাল লৈপাল, শা-কৈ, ঊচেক ৱায়া পুম্নমক মহৌশাগী মশাইকোলসিদা হীংলি নুংঙাইনা। ইংথমথাগী ফীজংনা তপ্না তপ্না হাইদোকখিবদা লাকই ফাইরেল লমতনা লেংগোন্নরদুনা অদুদগী অমুক মোমোন মীনোক্কা লোয়ননা থুংলরি য়েন্নিং পান্থা। পুকনিংনা ইথক ইপোম হৌরক্লবা মতমদা অমুক লেংশিল্লকলনি ইঙা ইঙেলনা খিক্লদুনা নোংলিক শিদ-য়াই নাদ-য়াই মালেম শিনবা থুংনা। করম্নদি শক্তবা ঙমগনি নোংজুগী তান্থদা পুন্সি ঈশৈ। অদুনা অইবী মুতুম রমণীসু শকলকই ইংনা মেংলবা খোঞ্জেলদা ইঙাগী নোংজু। থম্মোয় লাইয়ুমদা লেংদনা লৈরিবা অশৈবী অমগী মপাঊ অদু মাগী মাগী পান্থা লাকপদা য়েন্নিং হুল্লকপগুম্না থোকলকখি শৈরেংগী ইফুৎ লেপ্তনা। ইঙা নোংজুদা পুকনিং লুপচরিবী অইবীনা হায়, ‘নুংশিজখিবা ইঙা নোংজুগী মখোলশিংদো নীংশিংজবতনা কলমগী খোঙচৎ লেপ্তনা চৎপা হৌরকলি’ পুন্সিদি নীংশিংকোলদা হেক হেক ইরুপ্তুনা চান্নজৈ। অদুনা ইঙা নোংজুগী তান্থালক্তা হেক হেক থোকলকই খোন্থাং কয়া মহৌশা অমসুং মীওইবগী, তাইবঙপান অসিগী নুংশিবা শক্তমশিং। মহৌশাবু নুংশিনা শৈথাদুনা ইদবা অইবা লৈতে। তোইগুম্বসুং শৈরেং লাইরিক অমা অককনবা থিমদা অদুগা হীরম অমদা ইবদি অমুক অঈবা খুদিংমক্কি লাইরিক্তা থোক্তে।

মনিপুরী খোরিরোলগী পূক্কৈদা শৈরেং লাইরিক অণী অমসুং ৱারীমচাগী লাইরিক অমা খুদোল তমখ্রবা অইবীনা ‘ইঙাগী নোংজু’ অমুক নৌনা খুদোল তম্লকলি। শৈরেং লাইরিক অসিগী মিংথোল ওইরিবা ইঙাগী নোংজু হায়বসিদা মপুংদা নোংজু অসিবু শৈথাদুনা ইবা মখলগী শৈরেংনি। ইঙা নোংজু-১ হায়না হৌদুনা ২১ ফাওবা পান্দুপ নাইনা ইবা শৈরেংসি মনিপুরী খোরিরোলদা খরা তাংনা ফংই। অইবীনা ইঙা নোংজূগা লোয়নদুনা চৎলিবা মহৌশা খুৎশেমগী ফজবা কয়া মতাং চানা মফম চানা ইয়োংগী ফী শাবগুম্না মফম চানা চানা নীংথিজরবা পুকনিং পেন্নঙাই ওইরবা ৱাহৈশিংনা ফেঞ্জিনলি। ঈংনা মেংলবা নোংজুগী মখোলদা/ নোংগী নোংলিকনা উনাশিংদা তত্তনা তান থারি/ লৈরাংগা লৈনাগা অমুক-অমুক পুন্না খূবাক খূমিন্নরি/ য়েংঙু হৈরাংগা লৈরাংগা লোন্না মীৎপু চান্নরি (ইঙাগী নোংজু লাঃ ১) কবিশিংগী পুকনিং ৱাখলদি পাক্লবা সামুদ্রগী ঈপাক্কুমই অদুনা মালেম শিনবা থুংনা মমিং লৈরবা কবি খরনা নোংজু শৈরেং কয়া ইরমখি। হৌজীকসু মহৌশা খুশেমদা ঙাওজবা কবিশিংদি ইরি অদুমক। “Rain in Summer” হায়বসিদা কবি H.W. Longfellow অসুম্না ইরি “How beautiful is the rain!/How it clatters along the roofs,/Like the tramp of hoofs/ How it gushes and struggles out.”  মীওইবনা মহৌশাগী নীংথিজরবা শক্তমশিং অমদি তোঙান তোঙানবা শক্লোণশিংদা অদুমক ঙাওজদুনা অঙকপা কয়া ফাওদুনা লাক্লি। মালেমসিদা লৈরিবা মীওই ফুরুপ কাংলুপ কয়া অসি আমেরিকাদা পোক্লবসু য়ুরোপ্টা চাওরক্লবসু হ্যুমেন কন্সিইয়সনেস অসিদি চপ মান্ননা অদুমক পুকনিংদা ফাওহল্লি। মসিসু মহৌশাগী অঙকপা খুদোল অমনি। ইংলিস্কি কবি Emily Dickinson Dickinson না অসুম্না ইরি,”A drop fell on the apple tree/ Another on the roof; A half a dozen kissed the eaves,/ And made the gables laugh.” চীংলোন মপাল ৱাংমদা অদুগা পাক্ল সামুদ্র লান্না লৈখ্রবা ইংলিস কবি অসিনা ফাওরিবা ইঙা নোংজুগী তান্থা অদু অইবী মুতুম রমণীদসু ফাওরম্লি অদুসু য়াম্না ঙল্লিঙৈ অইবীনা লৈশা ফারকপা মতম অদুদা। থৱান লাংবন নুংশাগী মৈশাদা অমদি ইংথম উলেন খাংদুনা লৈরুরবী খৌগংলবা মালেমদা লাইজ ইরিক ইশেং খিক্লিবা থৌজাল হৈরবী ইঙা নোংজুবু অইবীনা নুংশিনা শৈথারি, ঝম-ঝম-ঝম লেপ্তনা চূথরো- চূথরো/ অখাক-অরাও য়াওদনা শীন থুংনা চূথরো/ নহাক্কী খোম্লাংগী নুংশিবা মনমদা/ লৈহাও ফবনা হম-হম চাউরিবা/ ইনখৎলক্লি মালেমদগী লৈশি-লৈথোণ ফজবী কয়া। নোংগী চেংহীদা মকোক লুজরদুনা ইগী য়ুমজাওনা/ প্রোপ প্রোপ তারি মচুম মনম নুংশিনা…/ মচু তরেৎকী ফীজংদা চুমথরকপা কুমগী নোংদা/ মীৎচান্নগে খল্লবোই ঙসি নোংথাংলৈমগা মমিং লৈরবা ইংলিস কবি William Wordsworth না মহাক্কী শৈরেং How beautiful is the rain! হায়বসিদা অসুম্না ইরম্লি, After the dust and heat,/ In the broad and fiery street,/In the narrow lane,/ How beautiful is the rain!/ How it clatters along the roofs/Like the tramp of hoofs/ How it gushes and struggles out/ From the throat of the overflowing spout! অইবীনা য়াম্না নহা ওইরিঙৈদা কবি গুরু রাবিন্দ্রনাঠকী শৈরেং কয়া পারক্লগসু ইরিবা খুৎই অসিদি তশেংনা কবি অমদা ফাওরকপা থিংঙমদ্রবা মহৌশা খুশেম্বু নুংশিজবা পামমুনা চেকশিন্না থমজনিংবগী মমি তারি। মহৌশাগী চৎলিবা খোঙচৎ অসিদা থাজবা থম্লি। ৱারী শারি কবিনা মহৌশাগী লৈরিবা চীং পাৎ তুরেল, লৌবূক লমহাংশিংগা।

তম্থিরবা মীওইবগী থৌইনশিন্না হৌজীক হোংলক্লিবা মহৌশাগীদমক মীপাইদবা ঙমদে অইবীনা অদুনা ইরক্লি, খোঙজেল য়াম্না তপ্পি ঙসি ইঙাগী নোং/ ঙাইঙমদা ফাওরকই মালেম…মরু তাখ্রবা ফৌ মরুশিং মালেম লৈতঙ্গাইদা/ ময়োল-থোকনিং থোকপা ঙমদ্রি… অদুবু আশাদুদি খক থাদোকপা লৈতে অদুনা হন্না হন্না খুৎলাম তোইনা কৌজরি, চুথরো চূথরো ইঙাগী নোং-ও   

মালেম শিনবা থুংনা হৌজীক অইং আসাগী খল কায়থরকপনা ওইহল্লিবা ফিভমশিং অসিদা অইবা অইবীশিংনা মহৌশাগী কায়ফদ্রবা খোঙচৎ অসিনা তাইবঙপান অসি শেম্বদা, মীওইবনা তুং কোইনা নুংঙাইনা হিংনবা হোৎনবদা  লৌরিবা শক্লোণ অসি খঙদবা য়াদে হায়না ইরকপসি পুকনিং থৌগৎনিংঙাই ওই। মহৌশাবু নুংশিনা য়েংবা ঙম্বা মতমদা মালেম অসিসু মারা তপ্না লৈবা ঙমগনি হায়না থাজরি কবিনা।  সাইন্সকী হীরমশিং নৈনবা মতমদা লিটরেচর অসি খক মিরাইবা য়াদে অমদি লাইনিং লাইশোলগী লমদা ওইরবসু খোরিরোলদা য়াওরিবসি লাইয়েকনি। পুম্নমকপু নুংশিনা ফজনা উবা, য়েংবা অমদি মমল লৈনা লৌবা মতমদা মীওইবনা হৌজীক থেংনরিবা ঈশিং ফংদবগী অৱাবা, চানিংঙাই লৈতবগী অরাম খৌরাংবা, খাংবা ঙমদ্রবা নুংশাগী মৈশা কয়াসিদ্গী খরমখৈদি হন্থহনবদা মতেং ওইগনি।

মহৌশা অমসুং তাইবঙ পুন্সিবু নুংশিনা পামমুজনা খঞ্জরিবী অইবীনা ফজরবা ইমেজরি কয়াদা ইঙা নোংজু অমদি পুন্সি খোঙচৎপু শৈথারি লাইরিক অসিগী অরোইবা পান্দুপ ২১ দা, “ পাম্মুজবা মরুপশিং পুন্সি লম্বী চৎপগী/ মতেক মতেক খোঙবুরোই!/ মাঙনদি তেল্লকপা তুংনদি শাংহৌবা/ মহৌশা ফীজোলনা চীরাই ঙৌনা ফিফৌবা/ মায়থোং কাচিল কোয়াদা চহীনা লৈই চিংলকপা/ ৱাখলনদি নুংওনবা পাঙ্গলনদি হন্থরক/ মহৌশাগী খোঙচত্তা ঈরোইনরকপী…/থম্মোয় হুবা নাউথেমখোল পুরদুনা/লাকউকো মহৌশাগুম অনৌবা নোংহৌওই…/ পোত্থাজগে থৱায়সে নহাক্কী নোংজুখোলদুদা/

COMMENTS

WORDPRESS: 0
DISQUS: