মরৈবাক নুংশিবগী ঈফুৎনা থল্লবা শৈরেং লাইরিক “লৈ কৎলুরা থাং কৎলুরা” –মীৎয়েং অমা

Homeআর্টসঅতৈ অতৈ

মরৈবাক নুংশিবগী ঈফুৎনা থল্লবা শৈরেং লাইরিক “লৈ কৎলুরা থাং কৎলুরা” –মীৎয়েং অমা

অইবাঃ সনাতন হামোম লাইরিক্কী মমিং- লৈ কৎলুরা থাং কৎলুরা, ২০১২ অফোংবাঃ মণিপুরী রাইটর্স ফোরম, বাংলাদেশ, কমলগঞ্জ মৌলভীবাজা। লাইরিক্কী মখলঃ শৈরেং লাইরি

অইবাঃ সনাতন হামোম
লাইরিক্কী মমিং- লৈ কৎলুরা থাং কৎলুরা, ২০১২
অফোংবাঃ মণিপুরী রাইটর্স ফোরম, বাংলাদেশ, কমলগঞ্জ মৌলভীবাজা।
লাইরিক্কী মখলঃ শৈরেং
লাইরিক্কী মমলঃ লুপা ১৮০/- লমায় মশিং-৮০
লাইরিক্কী মখুম য়েকপাঃ এন ষোগেশ্বর অপু

 

ইমা মনিপুরগী নুংঙাইবা পাউ তারগা বাংলাদেশতা লৈরিবা মনিপুরীশিংনা হেন্না হরাওজৈ। পুকনিং মকা লামজৈ। মনিপুরী মচাশিংনা মায় পাকপগী পাজেং ফিরাল থেৎলকপদা কয়াদা নুংঙাইজবা অমদি চাওথোকচবা। মসিনি ঈ মরিগী ইচিল ইনাওশিংনা পেঞ্জরিবসু মীরমদুদা। অদুবু মনিপুরদা অমুবা আইনগী মরুমদা চৎথখিবা তমথিরবা মীওৎ মীনৈ, তাহৈ ঊহৈদ্রবা, কি তুজুংনীংঙাই ওইরবা থৌদোকশিংগী মরক্তা ২০০৪গী মনোরমা মীশিগী মতাংদা অইবদি কপখি। থম্মোয় কায়খি।

ইমালোলগী নুংশিবা মশক অমা উবা ফংলিবসি কনাগুম্বা মীওই অমনা মীরৈবাক্তা ইমালোলদা ৱা ঙাংবা থেংনবা অসিসু অমনি। অদুগা হায়রিবা থাপ্লবা তামখ্রবা লমদম অমদা ইরৈবাক্কী মীওইনা ইনাৎকি ওইবা ফিজোলদা ফিজেৎ লৈতেংদুনা লৈরম্বা থেংনবদা পুকনিংদা নুংশিবা অমদি নুংঙাইবসু পোকই। মসিনা ওইবা তাই ইংলিস লোলবু ইংগ্রেজশিংনা মালেমসিদা লৈরিবা কাংলুপ ফুরুপ মান্নদবা লৈবাক কয়ানা খুন্দাদুনা লৈরিবা তোঙান তোঙানবা লাইনিং চৎলিবা মীপুম খুদিংবু ইংলিস লোল তম্লম্লিবসিসু। মসি লোইলম শন্দোক্লিবা লৈবাক খুদিংনা তৌবা পোলিসি অমা ওইনা তৌখ্রবসু ঙসিদি মালেমগী লৈবাক কয়াগী মীওইশিংনা ইংলিস লোল অসিবু মালেমগী ফাওন-লোল ওইনা শিজিন্নরি। অমরোমদা মনিপুরী হায়রিবা লোল অসিসু ভারত সংভিধান্না শকখঙলবা অদুগা সাহিত্য একাদেমিনসু রিককনাইজ তৌরবা লোলশিংগী মনুংদা অমা ওইরি। অসিগুম্বা লোল অসিবু বংলাদেশ্তা খুন্দাদুনা লৈরবা মনিপুরীশিংনা চাওখ্রবা বাংলা লোলনা মমালোল ওইনা ঙাংলিবা লৈবাক অমা ওইরিবা লমদম অদুদা মতৌ কমদৌনা ইমালোল অসিবু হীংহন্নবা হোৎনরিবগে অমদি মীশিং লিকনা লৈরবসু কয়াম মতিং লৈনা থৌনা লৈনা হীংলিবগে অমদি ইমা লৈবাক মনিপুরবু মখোয়না নুমিৎ থা ওইনা য়েংদুনা কয়াম নুংশিনা শোন্দুনা মতম খুদিং লৈরি হায়বদু সনাতন হামোম্না মহাক্কী শৈরেং লাইরিক “ লৈ কৎলুরা থাং কৎলুরা” হায়না মিংথোনবা শৈরেং অসিদা ময়েক লানা শৈথারি।

অইবা সনাতন হামোম ১৯৬০দা মৌলভীবাজার জেলাগী কমলগঞ্জ উপজেলাগী মনুং চনবা হামোমখুলদা লৈবা হামোম চাউবা অমসুং লৈনুংশী অনীগী মপারী ওইনা তাইবঙদা খোঙদারকখি। চহী কুন্থ্রানিথোয়রোম হেন্না মীরোল বাংলা মরক্তা সরকারগী থবক অমসু তৌরমখি। হৌজীক থবক্তগী পোত্থারে। মনিপুরী লোলদা ইবা লাইরিক অহুম হেন্না ফোঙখিবা লৈরে অমসুং বাংলা লোলদা হন্দোকপা য়াওনা লাইরিক অহুম অমসু ফোঙখ্রে। বংলাদেশকী মনিপুরী সাহিত্যদা ইহৌ ঈপোম কাহল্লক্লখিবা পনবা য়াবা সাহিত্যগী চেফোং “ইপোম”গী এডিটর ওইদুনা লাকখি। অইবা অসি বাংলাদেশ মনিপুরী সাহিত্য সংসদ কমলগঞ্জ ব্রাঞ্চ কি হৌদোকপা মতমদা সেক্রেটরি ওইখি। মনিপুরী রাইটর্স ফোরম, বাংলাদেশ অসিনচিংবা লূপশিংগী মরু ওইবা থৌমী ওইদুনা লাকলি। মহাক্কী লোইনবী উষা হামোম প্রাইমরি স্কুলগী ওজানি। মচা অনী ঐশী হামোম অমসু সাগর হামোম ফংজদুনা চোকথবা নাইদনা পুন্সি শিন্থা পাংদুনা লৈরি।
শৈরেং লাইরিক অসিমক মলেমসিদা শান্তি করম্না পুরকসিগে হায়না খন্দুনতা লৈরিবী অমসুং অমুবা ৱায়েল পথাপ, মীওৎ মীনৈ কয়াগী ময়োক্তা মতম খুদিং লেপ্লিবী আইরন লেদী ওইরবী লমদম অসিগী নিংঙোল ইরোম চনু শর্মিলাগী মফমদা অমসুং মনিপুর অমসুং মনিপুরগী মপান্দা মনিপুরী সাহিত্যবু করম্না চাউখৎহনসিগে অমদি ইমালোলবু করম্না ঙাক কন্দুনা থমগনি হায়না থৱায় য়াওনা হোৎনরিবা কবি শরৎচান্দ থিয়াম মখোয় অনিগী মফমদা শেংলবা শ্রদ্ধাঞ্জলি কৎচরি হায়না ইরি। শৈরেং লাইরিক অসি অইবগী তরেৎশুবা লাইরিকনি। লাইরিক অসিদা পুন্না শৈরেং ৬৮ য়াওরি। বাংলা লোল মরক্তা হীংলকপনিনা ইমালোল শুনা ঙাংবা ঙমদবগী থম্মোয়নুংদা নুংঙাইজদবা অমদি মতম খুদিং ফাওদুনা লাক্লি অদুবু অইবনা ইমালোল নুংশিজবা অমসুং ইজাতিগী শক্তম ঙাকনা মতিং লৈনা হিংজনিংবগী থৌনা অদুনি লাইরিক অসিদা শৈথারিবসিসু।
ইমা মনিপুরগী নুংঙাইবা পাউ তারগা বাংলাদেশতা লৈরিবা মনিপুরীশিংনা হেন্না হরাওজৈ। পুকনিং মকা লামজৈ। মনিপুরী মচাশিংনা মায় পাকপগী পাজেং ফিরাল থেৎলকপদা কয়াদা নুংঙাইজবা অমদি চাওথোকচবা। মসিনি ঈ মরিগী ইচিল ইনাওশিংনা পেঞ্জরিবসু মীরমদুদা। অদুবু মনিপুরদা অমুবা আইনগী মরুমদা চৎথখিবা তমথিরবা মীওৎ মীনৈ, তাহৈ ঊহৈদ্রবা, কি তুজুংনীংঙাই ওইরবা থৌদোকশিংগী মরক্তা ২০০৪গী মনোরমা মীশিগী মতাংদা অইবদি কপখি। থম্মোয় কায়খি। অদুনা ইরকখি “কোক্কি শিংলি মরক্তা তাশন্না লৈরে পেলহৌদবগী মনিন/ নুঙাইতবগী মনিন/ কপখোংবগী অৱাবা মনিন/ থম্মোয় কায়রবা মনিন খোংলি অৱাং নোংপোক্কী চীংদা তমদা/ ঐবু পোকপিবা ইমা মনিপুরদা।/” অদুক তমথিনা অদুক মীনুংশি য়াওদনা চৎথখিবা থৌওং অদুনা মরম ওইদুনা মনিপুর মৈ হৌখিবনি। ইমাশিংগী ফি থোংদবগী প্রোতেস মালেমগী পুৱারীদা অমুবা মুকনা ইখি। লৈঙাকপশিং ইকাই ফিরুক খুমখি। ওমচাকনদুনা লৈরবা থম্মোয়দা ৱাহংশিংনা লাঙ্গোই চল্লকখি। পাম্বৈদি লৈতা পেঞ্জদনা শোল্লি অমুকসু, “নিংতম্ববু পুয়া মৈ থাবগুম অমুক থাদোকপীরে” লমন খুমনিংবগী মৈরিনা মৈৱাইখি, চাক্লি ঙসিসু নীংশিংবা খুদিং অদুনা হায়রক্লি “ৱারৌগনুকো মনোরমা- নঙগীদমক নোংমতং ওইরবসু মীহাৎপা ওইজগে পেঞ্জহৌদ্রবা মবুং অমনা ইম্ফালদা লাকপা মতমদা চনু নিঙোল মহাক্কি “নিংশিং ফুরাদা লৈ মনা অমত্তং ওইরবসু কৎচগে, খুরুমজগে হায়না পাউমেল্লি অইবগী হেক ইহান হানবা লমায়দা য়াওরিবা “ৱারৌগনুকো মনোরমা” হায়না মিংথোনবা শৈরেং অসিদা।
ইরৈবাক ইজাতি নুংশিবগী ঈরিকতু কদায়দনো অমা মাংখ্রবগুম্না ঐখোয়গী লৈঙাকপশিংগী মরক্তা উরকপা মতমদা করম্নদি মীয়াম্না থাজবা অমুক লৈখিগনি লুচিংবা মখোয়গী মফমদা। মঙ কয়াদি মঙনরি। মঙ ময়ামদুগী মরক্তা অমত্তং ওইরবসু উনিংলি অদুবু মথং মথং কেনখি। “ঈশিং ইচাওরক্লবা তুরেল ফিবানগুম” কিন্থখি। তম্বা ঙমদবা ফিভম্বু খঙহৌদনা পাইশিল্লকপা নোঙগা চাংদম্নরি। অসিগুম্বা তাঞ্জাসিদা ওইরিবা শক্তম্বু চংখোল্লবা ইমেজরিনা অমুক ইরি “কিন্থদুনা কেনখ্রে উরোকথোং, থোং মচা, থোং পাকা অদুবু আশা পুম্বদি মাংদ্রি মরমদি নিংশিংলদুনা হৌখ্রববু হিংবা তম্লি। মরমদি হিংবা হায়বসিনি খ্বাইদগী মরু ওইরিবসি। ইমা লৈবাক্কীদমক হিংবনা শিবদগী হেন্না থবক কয়া লেপ্তনা পাংথোকপা ঙম্মি।


মালেমগী মীয়াম মমাংদা মনিপুরনা মশাগী লোল অমা লৈজবতা নত্তনা ঐখোয়গী ইয়েক অমা লৈজবসিনা কয়াদি চাওথোকচবা অমদি ফাওরিবা ঙসি ঐখোয়না। ইরোল ইয়েক্তা মহৈ মশিন তম্নবা হৌজীক্তি ন্যুউ ইদুকেসন পোলিসি ফাওবা লাক্লে। অসিগুম্বা ফিভম অসিদা হৌজিকসু মীরোল হেন্না ঙাংলগা লাইরিক হৈবা চাওখৎপা শাবা মীওইশিংসু অদুমক লৈতবা নত্তে। অপিকপা স্তেত অসিগী য়ামজখিদ্রবা মীশিং অসিনা ঙাংলিবা লোল অসিনা অমুক স্তেত অসিদা লৈরিবা তোঙান তোঙানবা অপিকা ইথনিক কাংলুপ কয়াগী ফাওনলোল ওইরি। অমদি মালেমগী মফম কয়াদা খুন্দাদুনা লৈখ্রবা মনিপুরীশিং ঙসিদি ইমালোল য়োকখৎনবা, লোল অসিবু হৌরক্লিবা অঙাংশিংদা তাকপীনবা থৌরাং কয়া পায়খৎপা লেপত্রি। অসিগুম্বা মতাং অসিদা খোল্লাও খরদি তঙাইফদনা লাওদবা য়ারক্তে। মরমদ খুনাই অমদা লৈরিবা মীওইশিং অসি করিগুম্বা মতাং অমদা তুমদুনা লৈবসু য়াওদবা নত্তে। অদুনা কবি সনাতননা খোন্থাং য়াওনা “ইমালোলগী খোল্লাও” অমা লাওরকলি, “হৌজিকনি মতম লময়ানবগী, মাংথানা চৎপগী/ হৌজিকনি মতম ময়োকনবগী/ হৌজিকনি মতম ৱাশকপগী/ হৌজিকনি মতম ইমালোল কনবগী মতাং মতম চানা থবক থৌরাং কয়া ইমালোল চাওখৎনবা হোৎনমিন্নবগী তঙাইফদবদুসু ময়েক লানা ফোংদোক্লি। লৌশিংগী মঙাল পীরিবা, খঙদববু খঙহল্লিবা, ইনাৎকি লিক্লম পুম্নমক ইরিবা লাইরিক্কি ময়েক ইরোল ইয়েক অসিবু অৱাংবা থাক্তা পুখৎনবা হোৎনমিন্নবগী ইনোৎ অমদি চেল্লি। অদুনা হায়রক্লি, “অমম্বদা মৈ থাজল্লু/ মৈরিক মৈশাদা হকচাং ফেংজল্লু…নোংপোক মৈরা ঙালহল্লু (লাঃ ৩৩) শৈরেং অসিগী হেক থংনবা লমায়শিংদা য়াওরিবা, “মীতৈ ময়েক তমহৌশি”, “ইমালোল তমশি, নুংশিশি মীতৈ ময়েক তমলশি, ইমাদি ইমানি, (লাঃ -৪৪) অসিনচিংবা শৈরেংশিং অসিদা ইমালোল মনিপুরীবু কয়াম নুংশিজবগে হায়বদু ময়েক শেংনা শৈথারি। মনিপুরগী মপান্দা খুন্দা লৈতাদুনা লৈখ্রবা মফমশিংদা হৌজিক ইরোল ইয়েকনা হৌরক্লিবা অঙাংশিংদা মপী লাইরিক তাকপী তম্বীবগী থৌরাংশিং পায়খৎনরক্লি। বাংলাদেশতসু লেপ্তনা থবক কয়া পায়খৎলি। মসিনা মমি শাম্লুরবা শক্তমদু নৌহৌনা ময়েক থোকহল্লক্লি। মসিদা অইবশিংনা লৌরিবা থৌদাং য়াম্না মমল য়াম্মি। খুনাই অমনা তুমদুনা লৈরুবদা মিকপ থোকহল্লীবসি অইবশিংননি হায়বদা হায়মনবা থোকলোই।
মনিপুর উনিংহনখিবা মহাক্কী মফমদা হায়দুনা দেদিকেট তৌরি “ ইমা মনিপুরদি উনিংঙিদা” হায়না মিংথোনবা শৈরেং অসিমক কবি শরতচান্দগী মফমদা। সনাতননা মনিপুর উনিংলকপদা “কবি হিজম ইরাবত উবা ফংঙি, ইমাবু হেক খল্লুবদা কবি এলাংবম নীলকান্তা উবা ফংঙি/ ইমাবু হেক উনিংবদা/ কবি শরতচান্দ থিয়ামদি ইমাংদা হেক লেপ্তুনা লৈরম্মি… ইমালোল নুংশিবগী ঈচেল্লক্তা ইমা লৈবাক নুংশিবদি য়াওদুনা অদুমক লাক্লবদি। লোল নুংশিবনা পোক্লকখিবনি বাংলাদেশমকসু। মালেমগী ইমালোল নুংমিৎসু বাংলাদেশনা মালেমদা খুদোল তমখিবনি। বাংলাদেশ মনিপুরী সাহিত্য সংসদকি থৌপুরেল কবি এঃ কেঃ শেরামনা বাংলাদেশতা লৈরিবা মনিপুরীশিংবু নৌহৌনা ইরোল ইয়েক চাওখৎনবা হোৎনবা অমদি মহাক্কী মপাল নাইদ্রবা থৌদাং অদুবু ইকায়খুম্নবা ওইনা অমদি ইরোন্না ইনিংহনখিবা মহাক্কী মফমদা হায়দুনা কবিনা এঃ কেঃ শেরামদা দেদিকেট তৌবা ভানুগাছকি অতিয়াদা হায়না মিংথোন্দুনা খুঙ্গং অসিদা লৈরিবা খুঞ্জা তরামরিগী হৌরক্লিবা মীরোলদা ইমালোলদা লাইরিক লাইশু তমহন্নবা ইথিল পীবদা কবি শেরামগী থৌদাং অদুবু শিংথাদুনা ইরি।
শৈরেং লাইরিক অসিগী মিংথোল ওইরিবা লৈ কৎলুরা থাং কৎলুরা হায়রিবা শৈরেং অসিদা কবি সনাতন্না ইমা মনিপুরগী মরাইবক থিরবা অমুবা ৱায়েলগী থারবা ফিজং মরুমদা মরাল লৈতনা পুন্সি পীখম্নখ্রবা ইচিল ইনাও ইচে ইচলশিং অদুগীদমক লমন খুম্নিংলি। মীশিং য়ামজখিদ্রবা লমদম অসিগী মরাইবক করি ওইগদগে মীপাইজরি। তুশোল্লবা ইচে ইচলশিংবু ঙাক শেন্দুনা লৈনিংলি। মখোয়গী পীরাং তৈথোকনিংলি। করিগুম্বা অসুম তুহৎ নৈহৎপনা হেল্লকলবদি খাঙবা ঙম্লোই মখুৎতা খুৎলাই পায়রক্কনি হায়না ইঙ্গিত পীরি। অদুনা ইমা মনিপুরগী মফমদা হংজরি লৈখিদ্রবা মরাল লৈজদ্রবা মখোয়গী “মোংফমদা লৈ কৎলুরা নত্রগা থাং কৎলুরা?” (লাঃ ৮০)
নীংশিংবা য়াবদি কবি সনাতন হামোমনা বাংলাদেশতা মনিপুরী লোল অমসুং সাহিত্য চাওখৎনবা হোৎনরিবা অদুবু শকখঙবা ওইনা চহী অনী/অনী কান্নরগা পীবা সাহিত্য থৌপাং লূপকি লেমজনিংঙাই ওইরবা থিয়াম লাইরিকমচা ইন্তরনেস্নেল এৱাদ ২০১৩ পীদুনা ইকায়খুম্নবা উৎখি। ইমালোলনা ইয়েকনা লাইরিক কয়াসু লেপ্তনা ইরক্তুনা মনিপুরী খোরিলোলদা চাওরবা খুদোল কয়া তৌবীরক্কনি হায়না থাজবা থমজরি।

COMMENTS

WORDPRESS: 1
DISQUS: