মতম মতমগী কৌনরকপা মিঙ্গৌ

Homeৱাখল্লোন

মতম মতমগী কৌনরকপা মিঙ্গৌ

নহারোলশিংনা মখোয়না পামজবা মিংসি ইংরেজিনা অয়াম্বা ওই। ঙসিগী নুপামচাশিংনা পামজবা মিংসি রোবর্টসন, মাইকেল, জেকসন, লিওনার্দো, ত্রাজান, হারকিউলিস, আর্নল্ড

নহারোলশিংনা মখোয়না পামজবা মিংসি ইংরেজিনা অয়াম্বা ওই। ঙসিগী নুপামচাশিংনা পামজবা মিংসি রোবর্টসন, মাইকেল, জেকসন, লিওনার্দো, ত্রাজান, হারকিউলিস, আর্নল্ড। নুপীমচাশিংসু চপ মান্নৈ হেলেনা, অথেনা, এলিজাবেদ, রোজি, রেজিয়া, মার্গারেট, জুলিয়েট য়াম্না কৌনরি। য়ুম্নাক্তি ইপা ইপুগী হোংবা য়াদবনিনা মৈতৈগী য়ুম্নাক্তা লৈরি। য়ুম্নাক্কা মিংগা লৌরেম্বম হারকিউলিস, অসেম জুলিয়েট, মৈনম ত্রাজান অসিনচিংবা হায়দোকলকপদা চানদবদগী তাবদা নোকনিংবা কয়াসু লৈরি।

ল্লিঙৈগী মতমদা মীগী মমিং থোনবসি মী অদুগী মওং-মতৌ শাবান অমদি পূন্সিগা মরী লৈনবা খল্লগা থোন্নরম্মী হায়নৈ। মণিপুরদা ইবোহল, ইবোতাম্বী, ইবোয়াইমা, চাউবা, তোম্বা, বাবু, লুখোই মিং কৌনবা য়াম্না লৈ। নুপীরোমদসু ইবেচাউবী, ইবেমহল, ইবেয়াইমা, ইবেতোম্বী, ইবেম্মা, মেম্মা, মেম্মী, তোম্বী, সনাতোম্বী য়াম্না কৌনৈ। লৈগী মমিংশিংদগী লৌরগা থরো, থম্বাল, থারিকথা, কুশুমলৈ, উরিরৈ, মাধবী, সনারৈ, কবোক্লৈ, লৈরিক, নুপীওইবীশিংদা কৌনরকপা মিংশিংনি। নুপাদা লৈগী মমিং পরিজাৎ অমদি সনারৈ, কেতুকি, নাগেশ্বর কৌবসু লৈ। হৈগী মিংদগী লৌরগা মীগী মিংদা থোনবদি তাখিদ্রি। কনাগুম্বা মচিন মনাউ নুপা ঙাক্তা পোকপদা নুপী য়াওরক্লবা হায়দুনা অকোনবা পোকপা নুপাদা নুপীদা কৌনবা মিং তোম্বী, সনাতোম্বী, চাউবী, কৌনৈ। মতৌ অসুম্না, নুপী ঙাক্তা পোকলকপদা নুপা য়াওরক্নবা হায়দুনা অকোনবা পোকপা নুপীদা চাউবা কৌনৈ। মিং খরদি নুপা নুপী অনীমক্তা কৌনবসু চৎনৈ।

মহৌশাগী ফজবা উরুবদগী মীগী মিংদা থাবল, থানিল, পূর্ণিমা, নুমিৎলৈমা, থাজা, লোয়, তময়াঙানবী অসিফাওবা কৌনখি। মিং কৌবদা মান্নরকপদগী মীগী মশক মওং, মাইকৈ হাপ্তুনা খঙননবা কৌনবসু কোঙ্গাইনি। খুদুম ওইনা, চাউবা অনী শুরকপদগী মখারোমগী চাউবা, অৱাংলোমগী চাউবা, ইবোয়াইমা অচৌবা, ইবোয়াইমা মচা হায়না খঙননবা কৌনরকই। নুপীদসু ইবেয়াইমা অপাবী, ইবেয়াইমা লুখোইবী কৌনৈ। কনাগুম্বা খরদি মাগী পোকফম হৌরকফমগী লম হাপ্লগা হেন্না মিং খঙনৈ। পোক্নফম লম হাপ্লগা মিং খঙনবসিমদি খরা অখন্নবা মশক নাইবা মীওইশিংদা কৌনৈ। অয়াম্বনা জগোয় ঈশৈ, কলা সংস্কৃতিগী লমদা খোঙদাবা মীওইশিংনা কৌনৈ। খুদম ওইনা – থাঙ্গা মঙ্গোলজাউ, লমজাও তোম্বা, মোইরাং জাতি, কম্বী ইনাকখনবী, লাংঙাথেন থোইনা, সেক্তা কলা, নঙ্গোই মেরা, উয়ান ইবোমচা, লমদেং থম্বালঙৌ, য়োংলান নিত্যাই, কৈকোন চাউবা অসিনচিংবা কয়া লৈখ্রে। মাইচৌশিংগী মরক্তসু ৱাংঙু বাজি, কোনোক থেংগ্রা, লাঙ্গোল লুখোই, শমুরৌ চিগোং শিংথানখিবা ঙাক্তনি।
মাইচৌশিং অসি মিং খক হায়রগা খঙনবদগী লম হাপ্লগা হেন্না খঙনৈ। পোক্নফম লম য়াওনা খঙনবসি মীয়াম্না পীবা ইকায়খূম্নবা মিংথোলনি। মী অমদা হেক্তা হায়বা য়ারোই। মীগী মমিংদা অমুকসু ধাতুগী মিং লৌদুনা সনা, হিরা, মণি, মুক্তা কৌবা লৈনখ্রে। খরা মশা মউ খিঙবা, মখোঙ য়াংবা, থবক থৌরম থুনা তৌবা ঙম্বা মীদা মণি অপাইবী, তোম্বী অয়াঙবা, বাবুসিং ওইনা কৌনবসু লৈ। ইকায় খূম্ননা কৌবা মিঙ্গৌনি। কনাগুম্বনা শাওনবা, করেম্ননা অমদি থৌওইদনা লৌরগদি অরানবা ওইগনি। জিসি তোংব্রানা মহাক্কী ড্রামাগী কারেক্টর অমগী মমিং থোনবদা ইবোহল নুংথং কৌবা য়াওহনখি। কুচু কুমেন, শকওং-শক্তাদা য়েংলগা কৌনবা মিংশিং অঙৌ, অমুবা, ঙাংবী, অশংবী, তেনদেন, তেনবী, অপাবী, ফৈজাও, পাকচাউ অসিনচিংবা মিংশিং কয়া অমসু লৈরি।

মৈতৈনা হিন্দু লাইনিং লৌরকপদগী মৈতৈশিংগী হান্না কৌনরকপা মিং হোংনখি। মৈতৈশিংনা থায়না কৌনরকপা মিং তোক্নরগা হিন্দুগী লাইয়ামশিংগী মমিং পাম্না কৌনরকখিবা মতাং অমা লৈখি-নুপাদা নন্দ, নারান, নারায়ন, বিষ্ণু, কৃষ্ণ, গোপাল, শ্যাম কহ্নাই, সহদেব, নোকুল, রাম, লক্ষণ, ভরত, দুসন্ত অদুগা নুপীদা অমুক-যশোদা, রুহিনী, রাধা, রাধিকা, লক্ষী, দু্র্গেশ্বরী, রাশেশ্বরী অসিনচিংবা মমৈথংদদি হিন্দি ফিল্মগী ষ্টারশিংগী মিংশিং-বিজেন্তিমালা, দিলীপকুমার, দেবনন্দ, রাজেন্দ্রকুমার, হেমা, প্রিয়া, প্রিয়াঙ্কা ফাওবা য়াওনা থোন্নরকখি।

ঙল্লিঙৈদা ঐখোয়গী খুন্নাইদা মিং থোন্নরকপগা হৌজিক্কী মিং থোন্নবসিদা ৱাখল্লোন খৈন্নৈ। ঙল্লিঙৈগী মিং থোনবদি নাক য়েৎ, হৌরকফম, শাজৎ, য়েক-সলাই, মতীক মথৌনা, তৌবা ঙম্বা, মওং মতৌ, পোকফম, লৈফম, হৈনবী মওং কয়া অসি কুপ্না য়েংলগা মিং থোল্লি। মিং থোনগদৌরিবা অসিসু মপা মপু মশক নাইবা অহল লমন, মাইচৌশিংনা মচা মশুশিংগীদমক থোলহল্লি। পোকপদা থোনবা মিং মাগী মতীক মথৌনা, শাজৎকী মতুংইন্না মিং অমুক হোংদুনা থোন্নবসু চৎনৈ। মিং নৌনা হোংদুনা থোনবগী থৌরম ফাওবা লৈরকখি। মিং হোংবগী থৌরম পাঙথোকপা অসিদি অঙম অথৌ, মতীক ময়াই লৈবা খরগী ৱানি মীচমদদি থৌরম অমা ওইনা চাউনা পাংথোকপা কয়া তাদ্রি। চীংমীশিংগী মরক্তা মরিং ফুরুপকী ‘মিনফুক’ থৌরম অমা য়াওখি। হান্না কৌরকখিবা মিং অদু অহল ওইরগা অমুক নৌনা মীয়াম মাঙদা কন-থৌবা উৎলগা ষন্দং হাৎতুনা চামিন্নরগা মিং হোংবা থৌরম পাংথোকপনি। তোয়না পাঙথোকপা ঙম্নদে। মিং হোংবা শেন চংঙি। লাকপীখিবা খুনগী মীয়াম পেন্নবা শা থোংদুনা পীজগদবনি। মরিংগী ওইনা ‘মিনফুক’ মিং থোনবগী অচৌবা থৌরম অমনি।

মতৌ অসুম্না ঐখোয় তম্পাক্কী ওইনসু নিংথৌরোলশিংগী হাক্তকশিংদগী, ফম্নাইবশিংগী নৌনা মিং হোংখিবা থৌরম চাউনা পাঙথোকপা লৈখি। মৈতৈগী হান্নগী কৌনরকপা মিংসি য়াম্না শাংনা শাংনা কৌনরকই। মিং শাংনা কৌবসি ঙল্লিঙৈদা চৎনরকপগী মওং থেংনৈ। অরীবা মিংশিং অয়াম্বা সেলেবল অহুমদগী তাদনা -খেল্লৈ নুংনাং তেলহৈবা, হাওরং লৈশং শাফবী, চীঙচেং নারল পালকলপা অসিনচিংবশিং মিঙ্গৌনরকখি। হৌজিক্কী মতমসিদা চৎনবী অমা ওইনা কনাগুম্বগী অঙাং অমা পোকপদা পাঞ্জিনা অঙাং অদুগী কুঠি ইবীরকপদা মমিং থোন্নবগীদমক মিংগী অহৌবা ‘ক’ ‘খ’ ‘গ’ অসিনচিংবনা হৌরগা মিং থোন্নবা ইরকপা য়াওই। পাঞ্জিনা পীরক্লিবা মিংসি লাইরিক্কী মতুংইন্ননি হায়রি। ইমুং মনুংনা পামদবদগী অমুক ওন্থোক ওনশিন তৌনৈ। পাঞ্জিনা পীরকপা মিং থোন্দ্রগদি ফত্তবা ওইরক্কদ্রা হায়দুনা মীপাইনবা মমা মপাশিং লৈনখি। ইমুং মনুংনা পাম্না থোনখিবা মিং অঙাং অদুনা অমুক চাউরক্লগা মানা অমা অমুক মিং হোংদুনা থোনজবসু য়াওরি। নহারোলশিংনা মখোয়না পামজবা মিংসি ইংরেজিনা অয়াম্বা ওই। ঙসিগী নুপামচাশিংনা পামজবা মিংসি রোবর্টসন, মাইকেল, জেকসন, লিওনার্দো, ত্রাজান, হারকিউলিস, আর্নল্ড। নুপীমচাশিংসু চপ মান্নৈ হেলেনা, অথেনা, এলিজাবেদ, রোজি, রেজিয়া, মার্গারেট, জুলিয়েট য়াম্না কৌনরি। য়ুম্নাক্তি ইপা ইপুগী হোংবা য়াদবনিনা মৈতৈগী য়ুম্নাক্তা লৈরি। য়ুম্নাক্কা মিংগা লৌরেম্বম হারকিউলিস, অসেম জুলিয়েট, মৈনম ত্রাজান অসিনচিংবা হায়দোকলকপদা চানদবদগী তাবদা নোকনিংবা কয়াসু লৈরি। পাম্না কৌনরি অদুবু তাবদদি মরিং মরাংঙি।

মহৌশাসি ঐখোয়না অঙাং ওইরিঙৈগা মান্নদবগুম তৌই। মালেম পৃথিবীগী খোঙচৎসি খরা য়াংনা চৎপগুম্না ফাওই। অঙাং ওইরিঙৈ নোংমগী মতমসি য়াম্না শাংঙি। নুমিৎ পাক হেক্তা তাখিদবগুম তৌই। চয়োল অমা, থা অমা, চহী অমা হায়বসি য়াম্না শাংঙি খনখি। হৌজিকসিনা নোং হেক ঙানবগা ঙাইহাক লৈরগা নুমিৎ তাগুম তৌই। নোংমাইজিং অমদগী নোংমাইজিং অমা হায়বসি ইনক নকশিন্নরকপা মাল্লি। চহীসি খঙহৌদে। থায়নগী অহল লমনশিংসি ঐখোয়না শক উখিবদা চহী য়াম্লবা অহল ওইনা লোয়না উখি। মশক নাইবা লমদমসিগী মীওইশিংগী পূন্সি ৱারী পারুবদা ওইরম্লিবা চহীগা শকওং শাবানগা, শকফমগা চান্নখিদে। মৈতৈ নোংশা হায়নখিবা যুবরাজ টিকেন্দ্রজিৎ মহাক্না নোক্না ফাসিগী সগাই কাখিবদু চহী নিফু শুখিদ্রি। টিকেন্দ্রজিৎ হায়রগা চহী অহল ওইনা খল্লি। ডাক্তর কমল চহী ৩৪ খক্তনি। নুপীসু অদু মঙাই শকফমদা অহল য়াম্না মাল্লগা চহী নৌবা য়াম্না লৈরম্মী। নুপীশিংসি খরসু অহল শানীংবগুম্বা য়াওবসু থেংনখি। ঐখোয়গা লাইরিক তম্মিন্নরকখিবা চহী লেঙ্গাগী নুপীশিং নুপা খরা অহল ওইবদা ময়ুম পাল্লি হায়দুনা ঐখোয়দা ইবুংঙো কৌরকপসু লৈখি। মসি মতাং মতাংগীনি হায়বদুতা তারি। চহী লীরবা লৈশাবীনা চহী নৌবা শানিংবসু লৈখি। নুপাদদি সিগুম্বসি কয়া লৈতব্রা খল্লি। নুপাদসু রাজনীতি তৌবা ওইরগদি লিৎলিবা ফুরিৎ, ফৈজোম অদুনরা খঙদে অহল হেক্তা ওইশিনখি। অঙাংনা অহল শাবসি ইপা ইপুশিংনা অঙাংহল হায়রগা খঙনরকই। মহা কবি অঙাংহলগী মিং অসিদি অদুগী ওইরমলোই। মাঙ্গোলদা ফম্লগা ৱা চাউনা ঙাঙবশিংবু মঙ্গোলজাউ হায়না অহল লমনশিংনা হায়নখি। ঙসিদি মী মরক্তা মঙ্গোলজাউ কৌরিবসিদি অদুগদি খেন্নরে।

ঙসিগী মীরোলসিদা অমুক হান্না কৌনরম্বা মিংশিংদা মমা মপা ওইবশিংনা মচাশিংবু নোংপোকঙানবা, লনচেনবা, লনচেনবী, লনসনা, পান্থোই, থৌয়াংবা, লনচেনবী, শিল্লৈমা, লিরিখোম্বা, তাইবংঙানবা.. কন্না কৌনবা চৎনরক্লি। মিংথোনদি ঐখোয়গী ওইরে মসি অফবা খোঙথাং অমনি। ঙাঙনরিবা লোলশিংদা ইপা ইপু হাক্তক্তগী ঙাঙনরকপা লোল, পোৎচৈশিংগী মমিং ঙসিগী অঙাংশিংনা খঙনদ্রিবসিমত্তংগা খঙননবা মমা মপা ওইবশিংনা মচাগী মিংদা অনৌবা থোনবীবগুম তাকপী তম্বীদুনা খঙহনবীরগদি ঐখোয়গী ৱাহৈ, লোল হিংবা ঙমগনি।

কর্টেসীঃ হুইয়েন লানপাউ

COMMENTS

WORDPRESS: 0
DISQUS: