মণিপুর মর্জর এগ্রিমেন্টগী মতাংদা খন্ন-নৈনখ্রে

Homeস্ক্রলবার

মণিপুর মর্জর এগ্রিমেন্টগী মতাংদা খন্ন-নৈনখ্রে

ইম্ফাল, সেপ্টেম্বর ২১ : মণিপুরনা কুমজা ১৯৪৯দা লৈবাক অসিগী শরুক অমা ওইনা য়াওশিনবগী মর্জর এগ্রিমেন্ট খূৎয়েক পীনরুবা মতুংদগী ঙসি ফাওবদা ওইরক্লিবা ফীভমশিং

ইম্ফাল, সেপ্টেম্বর ২১ : মণিপুরনা কুমজা ১৯৪৯দা লৈবাক অসিগী শরুক অমা ওইনা য়াওশিনবগী মর্জর এগ্রিমেন্ট খূৎয়েক পীনরুবা মতুংদগী ঙসি ফাওবদা ওইরক্লিবা ফীভমশিংগী মতাংদা নোংমগী ওইবা খন্ন-নৈনবা থৌরম অমা এমসু, অমকিল অমসুং য়ু পি এফনা পূন্না শীন্দুনা দি এম য়ুনিভার্সিটিগী কেম্পাসতা লৈবা এমসু ময়াম লোয়শঙগী মাল্টিপার্পাজ হোলদা পাঙথোকখ্রে।
খন্ন-নৈনবা অসিদা রিসোর্স পার্সন ওইখিবা রিমসকী বাইও ষ্টেটিষ্টিক্স ডিপার্টামেন্টকী হেদ প্রোফেসর আর কে নরেন্দ্রনা হায়, মণিপুরনা মর্জর এগ্রিমেন্ট খুৎয়েক পীরবা মতুং কুমজা ১৯৫০-৫১ গী মতমদগী মণিপুরদা মীশিং হেনগৎলকপদগী হৌজিকসু লেপ্তনা হেনগৎলক্লি। বৃটিশনা মণিপুর থাদোক্লম্লবা মতুং সেপ্টেম্বর ২১, ১৯৪৯ দা মর্জর এগ্রিমেন্ট খূৎয়েক পীনরবা মতুংদা ওইরক্লিবা ফীভমশিং অসি সাইন্টিফিক ওইবা মওংদা নৈনবা চংই। মণিপুরগী জিওগ্রাফিকেল লোমদা য়েংলবসু ষ্টেট অসিদা চঙলক্লিবা মীওইশিং মশক খঙনবগী লো অব ফোরেন্নার পার্মিট সিষ্টেম চৎনদুনা লাকই। মতমদুদা লৈরম্বা ফোরেন্নার পার্মিট অসিনা মণিপুরদা কয়াম কুইনা লৈগদবনো হায়বদুসু খঙলম্মী। অদুবু মতম অদুগী চীফ কমিশনার হিমটনা পার্মিট অদু লৌথোকপদগী কুমজা ১৯৫১ দা মণিপুরগী মীশিং খংহেন হেনগৎলকখি। মরম অসিনা হৌজিক্তি ঈশিং ঈচাওগুম্না হেনগৎলক্তুনা লমদম অসিগী য়েলহৌমীদা চৈথেং ফংলে হায়খি।
লৈফম চিনবা হেনগৎলক্লে, খুনগী মমিংদা তোঙান্না থোনবা হেনগৎলক্লে। খুন মশীং হেনগৎলকপা হায়বসি মীশিং হেনগৎলকপগী খুদমনি। মতম অদুগী ফোরেন্নার পার্মিট সিষ্টেম লৌথোকখিবগী চৈথেং অদুসু মায়োক্নরে। হৌজিক মণিপুরদা মীশিং হেনগৎলকপগী থেংনরিবা অসি সিষ্টেম অনীদনি। অহানবা সিষ্টেমনা ইন্টারনেলগীনি অদুগা অনীশুবা সিষ্টেমনা এক্সটার্নেলদগীনি। মহৌশাদগী লৈমিন্নরক্লবা য়েলহৌমীশিংনা চীং অমসুং তমদা লৈমিন্নরকপদা মান্নদবা থাক অমদগী নুংশিনদবা লাকপসিদা তংদু লৈতাদবা থোকহল্লে। মসিদা য়েলহৌ ফুরুপ খুদিংমক মান্নবা থাক অমদা লাক্লবা মতমদা তংদু লৈতাবা ফীবম ওইহল্লক্কদৌরিবনি হায়খি।
রেকোর্ডকী মতুংইন্না হৌজিক মীশিং য়াম্না হেনগৎলক্লিবশিংগী মনুংদা অকক্নবা ফুরুপ অনীগী মীওইশিং য়াওরি। মপূং ওইবা ফুরুপকী ওইনদি মশীং হন্থরে হায়বা য়াই। কুমজা ১৯৫১গী রেকোর্ডতগীনা ২০১১ ফাওবগী ওইবা রেকোর্ডতি ষ্টেট অসিনা দিষ্ট্রিক্ট ৯ খক্তমক লৈরিঙৈগীনি। কুমজা ১৯৫১ দা সেনাপতিদা মীশিং ৮.০৬ লৈরম্বা অদু ২০১১ দা ১৬.৭৮ দা হেনগৎলকখি। তমেংলোংদসু ৫.৮০ লৈরম্বদগী খরা হেনগৎলক্লবসু য়াম্বদি ওইদ্রি। চুড়াচান্দুপুরদনা ৭.৭গী চাংদা লৈরম্বদগী ৯.৬তা লৈরে। চান্দেলদসু ৪.৬ কী চাংদা লৈরম্বা অদু ৫.০৪দা রৈরে। অদুম ওইনম উখ্রুলগী ওইনদি চাদা ৭কী চাংদা লৈরম্বদগী হন্থরে হায়খি।
চীংগী ওইনা লৈরম্বা মীশিংগী চাং অসি চাদা ৩২.৮৬ ওইরম্বদু হৌজিক্তি৪২দা হেনগৎলকখ্রে। অদুগা তম্পাক্কী ওইনা ইম্ফাল ইষ্ট, ওয়েষ্ট হায়বা লৈত্রিঙৈদা পুল্লগা মীশিংগা চাং চাদা ৩০.৯৫ ওইরম্বদু হৌজিক্তি হন্থরকপগা লোয়ননা কুমজা ২০০১ গী মীকোক থিবদনা অমুক্কসু হন্থরে হায়খি। কুমজা ১৯৬১ দা চীংগী লমদা খুন ১২৮৮ খক্তা লৈরম্বদু কুমজা ২০১১ দদি চাদা ২.৮২ গী চাংদা খুনশিংগী মশীং হেনগৎলকখ্রে হায়খি।
ওইরক্লিবা ফীভম অসি লৈঙাক্নসু য়েংশিনবা চঙই। লোয়ননা খুন মশীং হেনগৎলক্লিবা অসি মতৌ করম্না হোংলকপা অওনবনো হায়বদুসু য়েংশিনগদবনি। লৈমিন্নিরিবা ফুরুপশিংগী মনুংদা অকক্নবা ফুরুপ অনীখক্কী মীওইশিংনা খ্বাইদগী মশীং য়াম্না মীশিং হেনগৎলকপা ওইরি। পুম্নমক অসি লৈরিবা ডাটা/রেকোর্ডকী মতুংইন্ননি। সেন্সস রিপোর্ট হায়বসিদা মশাগী অশেংবা হৌরকফম শেংনা ইবা নত্তে। হংলুবদা মফম অমদগীনি হায়রগসু হেক্তা য়াই। অদুবু মখোয়গী অশেংবা হৌরকফম খঙদ্রগদি ভোট থাদবা য়াবগী রাইট ফাওবা পীরোইদবনি হায়খি।
থৌরম অসিদা শরুক য়াখিবা অমকিলগী প্রেসিডেন্ট লৌরেম্বম ঙানবীনা হায়, সেপ্টেম্বর ২১, ১৯৪৯দা নিংথৌনা ঙম্মী হায়দুনা মর্জর এগ্রিমেন্ট খুৎয়েক পীরগসু থবক অদু তৌফম থোক্তবা অমদি তুংদা নীংঙমদবা লাক্কনি হায়বসি ইন্দিয়া লৈঙাক্না খঙফম থোকপনি। বৃটিশতগী নীংতম্লবা মতুংদা ঐখোয়গী কন্সটিট্যুসন লৈজদুনা এসেমব্লি ফাওবা লৈজরম্লবা লৈবাকনি। নিংথৌ লৈবা লৈবাক ওইরবসু অওনবগী মতুংইন্না ইলেক্সন তৌদুনা মীয়ামগী মীহুৎনা লৈঙাকখিবা মতমনি। মসিদা নমথাক তৌরগা মর্জর এগ্রিমেন্টতা খূৎয়েক পীহল্লগা অক্টোবর ১৫, ১৯৪৯ দা লৈবাক অসিদা তিল্লে হায়না লাউথোরকখিবনি। মরম অসিনা নুমি’ অসিবু অমম্বা নুমিৎ হায়না পাঙথোক্লিবসি মখা তানা অদুমক পাঙথোকখিগনি হায়খি।
এমসুগী প্রেসিডেন্ট হাওবিজম চলাম্বনা হায়, সেপ্টেম্বর ২১, ১৯৪৯গী মর্জর এগ্রিমেন্ট করিনো হায়বসি খঙদবা কয়া লৈবদগী মসিবু খঙহন্নবগীদমক ঙসিগী খন্ন-নৈনবগী থৌরম অসি পাঙথোকপনি। ঐখোয়গী হৌখিবা পুৱারী খঙদ্রগদি মরৈবাক নুংশিবা অমসুং মলৈবাক নীংবা ঙম্লোই। নিংথৌ পাল্লিঙৈদা নিংথৌ মচাশিংগী লান কয়াদা লিংজেল মান্নদবদগী অৱাগী মখূত্তা অৱাবা নংলুরে। নুপী কয়া ইকায়খুম্নবা মাঙহনবগা লোয়ননা মীওই কয়া হাৎখিবা লৈখ্রে। কুমজা ১৮৯১ দা বৃটিশকী মখাদা লৈবা পামদবদগী এঙলো মণিপুরী লান থোকখিবনি। অদুবু কুমজা ১৯৪৯ নম্ফুদা বোধচন্দ্রবু নমথাক শরৌ লাং শিন্দুনা শিলোংদা কৌরগা মর্জর এগ্রিমেন্টদা খূৎয়েক পীহনখিবনি। মসিগী মতুং ইকুই কুইদনা কবো ভেল্লি পীথোকখিবনি। মর্জর এগ্রিমেন্টগী মতুংদনা হৌজিক চীং-তম খাইদোক্নদুনা নুংশিনহন্দনবা হোৎনবসু লেপত্রিবনি। মরম অসিনা হৌরক্লিবা মীওইশিংনা মণিপুরগী পুৱারী খঙগদবনি হায়খি।

সোর্স: হুইয়েন লানপাউ

পাংথোকখিবা থৌরম অদুগী You Tube লিঙ্কস —

 

 

COMMENTS

WORDPRESS: 0
DISQUS: