মণিপুরী সাহিত্য পরিষদনা অৱাবা ফোঙদোরক্লি

Homeআর্টস

মণিপুরী সাহিত্য পরিষদনা অৱাবা ফোঙদোরক্লি

ইম্ফাল, জুন ০৪: লমদমসিগী মশক নাইরবা তোঙানা তোঙানবা আর্ট ফোর্মশিংদা অচৌবা থৌদাং লৌরম্লবা হিজম গৌরসিং, এলাংবম জয়চন্দ্র অমসুং রাজকুমারী সনাতোম্বীনা লৈখিদ

ইম্ফাল, জুন ০৪: লমদমসিগী মশক নাইরবা তোঙানা তোঙানবা আর্ট ফোর্মশিংদা অচৌবা থৌদাং লৌরম্লবা হিজম গৌরসিং, এলাংবম জয়চন্দ্র অমসুং রাজকুমারী সনাতোম্বীনা লৈখিদবদা মণিপুরী সাহিত্য পরিষদ ইম্ফালনা অৱাবা ফোঙদোরক্লি।
মণিপুরী সাহিত্য পরিষদ ইম্ফালগী জেনারেল সেক্রেটারি ডা. এলাংবম প্রিয়ব্রতনা থাদোরকপা চেরোল অমনা হায়, মণিপুরী সাহিত্য পরিষদ ইম্ফালগী কুমজা ২০১৮দা পাঙথোকখিবা ৮৩শুবা চহীগী মীফমদা বাদ্যরত্ন (খোল) হায়বা উপাধি পীদুনা ইকায় খুম্নখ্রবা নট সংঙ্কীর্ত্তনগী পুঙ (খোল) গী গুরু অমা ওইনা শক্নাইরবা থাংমৈবন্দ হিজম দেৱান লৈকায়দগী হিজম গৌরসিংনা হৌখিবা মে ২২ দা খঙহৌদনা লৈখিদ্রে। পুন্সিগী অঙনবা শরুক্তগী মণিপুরী নট সংঙ্কীর্ত্তনগী পুঙ হায়বা বিদ্যাদা মরু ওইনা খোলদা অচৌবা থৌদাং লৌরমদুনা মণিপুর অমসুং মণিপুরগী মপান্দা, আসাম অমসুং ত্রিপুরাগী মফম কয়াদা মশক নাইবা মহৈরোয় কয়া শেমগৎলম্মী। অসিগুম্বা গুরু অসিনা লৌরমখিবা থৌদাংশিং অসিবু শকখঙদুনা ফংখ্রবা মনাশিংদি মণিপুরী সাহিত্য পরিষদ ইম্ফালগী বাদ্যভূষন উপাধি ২০০৫, মণিপুর ষ্টেট কলা একাডেমি এৱার্দ ২০১২, সোয়াম সিধ্যশ্রী এৱার্দ, এস এস পি এলগী প্রেসিডেন্ট শ্রীমতি সাল জিন্দলনা পীখি। ষ্টেত কলা একাডেমি লাইফ টাইম এচিভমেন্ট এৱার্দ ২০১৯ পনবা য়াই।
পরিষদ অসিগী কুমজা ১৮৯৭ তা পাঙথোকখিবা ৫২শুবা চহীগী মীফমদা নাট্য ভূষণ হায়বা উপাধি পীদুনা ইকায় খুম্নখ্রবা ড্রামা ইবা ডাইরেক্টর অমদি এক্টর শক্নাইরবা কৈশামথোং এলাংবম লৈকায় লৈরক মচাদগী এলাংবম জয়চন্দ্রনা হৌখিবা মে ২৪দা লৈখিদ্রে। মহাক কুমজা ১৯৪২ দা এম দি য়ুগী এক্টর অমা ওইনা হৌরক্লগা ষ্টেজ সিঙ্গার অমসু ওইখি। কুমজা ১৯৪৯দা লীংখৎখিবা নেসনেল ত্রেনিং ড্রামা পার্টি হায়বনচিংবা মণিপুর আর্টিষ্ট ট্যুরিং ড্রামা পার্টি হায়না মানা থৌবু ওইনা লমদমসিগী কাচিন কোয়া কয়াদা ড্রামা পার্টি হায়না মানা থৌবু ওইনা লমদমসিগী কাচিন কোয়া কয়াদা ড্রামা কয়া উৎলকপদগী লৈঙাক্না হেন্না শকখঙনখি। এম দি য়ুগী হাওরং লৈশং শাফবীদা শাফবা শাবদা থোইদোক্না মমিং চৎখিবা মহাক্না হিংলিংঙৈ মতমদা ড্রামা ৭০গী মথংক্তা ইরমখি। লোয়ননা দ্রামা ৮০গী মথক্তা ডিরেক্সন পীরকখি। মহাক্না আর্ট ফোর্ম অসিদা কৎথোকপগা লোয়ননা লৌরম্বা থৌদাংশিংবু শকখঙদুনা ইকায় খুম্নবা উৎতুনা ফংখ্রবা মনাশিংদি মণিপুর ষ্টেট কলা একাডেমি এৱাদ ১৯৯২, ষ্টেট কলা একাডেমিগী ফেলো ২০০৪-০৫, সঙ্গিৎ নাটক একাডেমি নিউ দিল্লী এৱার্দ ২০০৬, পরিষদ অসিগী হাওবম ইবুংঙোয়াইমা নীংশিং শেলগী মনা (থিয়েটার ডাইরেক্টর) পনবা য়াই।
পরিষদ অসিগী কুমজা ২০১৮ দা পাঙথোকখিবা ৮১ শুবা চহীগী মীফমদা সঙ্গিট ভূষণ (নট সংঙ্কীর্ত্তন) হায়বা উপাধি পীদুনা ইকায় খুম্নখ্রবা নট সংঙ্কীর্ত্তনগী শৈশকপী কৈশাম্পাৎ কোঞ্জেং হজারি লৈকাইদগী রাজ কুমারী সনাতোম্বী হৌখিবা মে ২৮ দা লৈখিদ্রে। লৈবাক্না শকখঙনরবা গুরুশিং কালিমদন, গুলাপি, পরিজাৎনচিংবদগী নট সংঙ্কীর্ত্তনগী ঈশৈ তম্লকখিবী শক্নাইরবী অসি মশাগী চহী ২০ মুক শুরকপদা কলিকতাদা চৎতুনা গ্রামোফোন রেকোর্ডতা ঈশৈ অনী “হে চেক্লা নুংশিবী” অমদি ”নোকমি নোকমি নুশিবা” নমদুনা পুথোরকপদগী হেন্না মীয়াম্না শকখঙনখি। নটসংঙ্কীর্ত্তনবু চাওখৎনবা হোৎনবদসু মণিপুরদা নত্তনা ইন্দিয়াগী তোঙান তোঙানবা মফম কয়াদা মরু ওইনা ইস্কনগী অচৌবা মফম কয়াদা শরুক য়াদুনা আর্ট অসিবু শন্দোক্লম্মী। আকাশ বাণী ইম্ফালগী আর্টিষ্ট অমসু ওইখিবী অসিনা লৌরম্বা থৌদাংশিং অসিবু শকখঙদুনা কুমজা ১৯৯১ দা পাঙথোকখিবা রিপাব্লিক ডেগী থৌরমদা সার্টিফিকেট অব অনার পীখি। লমদমসিগী মশক নাইরবা তোঙান তোঙানবা আর্ট ফোর্মশিংদা অচৌবা থৌদাং লৌরম্বা মীওই অহুম অসিনা লৈখিদবদা কোভিদ-১৯ লায়না লাইচৎ অসিনা মরম ওইদুনা পুনবগী খুদোংচাদবনা ভার্চুয়েল কন্দোলেন্স মীটিং অমা পরিষদ অসিগী সভাপতি কাংজম ইবোহলনা থৌরম মপু ওইদুনা জুন ২দা পাঙথোক্তুনা পরিষদকী মেম্বারশিংনা মিনিট ২ তুমিন্না লেপ্তুনা থম্মোয় শোক্না অৱাবা ফোঙদোকখি। লৈখিদ্রবশিংগী ইমুং মনুংগী অৱাবদসু শরুক য়াজবগা লোয়ননা লৈখিদ্রবশিংগী থৱায়না তাইবঙ শেম্বা মপুগী মফমদা ঈংনা চিক্না লৈরুনবসু থৌনিখি হায়রি।

সোর্স : হুইয়েন লানপাউ

COMMENTS

WORDPRESS: 0
DISQUS: