মণিপুরী লোলবু ক্লাসিকেল লেংগুয়েজগী থাক্তা চলহনবগী অপাম্বা সেন্টারদা লৈরে: এম পি লৈশেম্বা

Homeস্ক্রলবার

মণিপুরী লোলবু ক্লাসিকেল লেংগুয়েজগী থাক্তা চলহনবগী অপাম্বা সেন্টারদা লৈরে: এম পি লৈশেম্বা

ইম্ফাল, আগস্ট ২০: মণিপুরী লোলগী নুমিৎকা মরী লৈননা রাজ্য সভাগী এম পি লৈশেম্বা সনাজাওবনা ঙসি মীয়ামদা থাদোরকপা পাউজেল অমদা, ইন্দিয়া গভর্ণমেন্টকী মায়কৈদগী

ইম্ফাল, আগস্ট ২০: মণিপুরী লোলগী নুমিৎকা মরী লৈননা রাজ্য সভাগী এম পি লৈশেম্বা সনাজাওবনা ঙসি মীয়ামদা থাদোরকপা পাউজেল অমদা, ইন্দিয়া গভর্ণমেন্টকী মায়কৈদগী মণিপুরী লোলবু ইন্দিয়াগী ক্লাসিকেল লেংগুয়েজগী থাক্তা চলহনবা অমসুং শেলয়েক্তা মীতৈ ময়েক হাপ্নিংবগী অপাম্বা চাউনা লৈরে হায়না ফোঙদোরক্লি।
মহাক্কী পাউজেলদা, ইন্দিয়া গভর্ণমেন্টকী অপাম্বা অসি থবক্তা ওন্থোক্নবা মণিপুর গভর্ণমেন্টকী মরী রৈনবা লোইশঙশিংনা থৱায় য়াওশিনবা অমসুং খুমাঙ চাওশিন্না থবক তৌমিন্নবা চঙই। মদু নত্ত্রবদি ইন্দিয়া গভর্ণমেন্টনা পাম্লবসু থবক ওইনা ওন্থোকপদা অৱাবা ওইগনি। ইন্দিয়ান কনস্তিত্যুসনগী নিপানশুবা সেদ্যুলদা চল্লবা মণিপুরী লোল অসিবু অৱাংবা থাক্তা থাঙ্গৎনবগীদমক মমাঙ চহীগী সেপ্টেম্বর ২২ দা পার্লিয়ামেন্ট মীফমদা লোল অসিবু ইন্দিয়ান ক্লাসিকেল লেংগুয়েজগী থাক্তা থম্বীনবা তকশিনখি। লোল কয়া লৈরিবা ইন্দিয়াদা হৌজিক ফাওবদা ক্লাসিকেল লেংগুয়েজগী থাক্তা চল্লিবা লোল অসি তরুকখক্তনি। মসিদা মণিপুরী (মীতৈ) লোল অসিনা চনবা ঙম্লবদি তরেৎশুবা ক্লাসিকেল লেংগুয়েজদা চনবা লোল ওইরগনি। মণিপুরী লোলগা ইরোইননা হৌজিক চৎনরিবা মীতৈ ময়েক অসি ইন্দিয়াগী শেলয়েক্তা হাপ্পীনবা চহী অসিগৗ ফেব্রুয়ারি ১২দা পার্লিয়ামেন্তকী মীফমদা তকশিনখি। মণিপুরী লোলবু ক্লাসিকেল লেংগুয়েজ গী থাক্তা চলহন্নবা পার্লিয়ামেন্ততা পুখৎখিবা চৈরক অসিদা ইন্দিয়াগী অতৈ লোল খরসু ক্লাসিকেল লেংগুয়েজগী থাক্তা চলহন্নবা কন্না হোৎনরি। লোলশিং অসি চন্দ্রিঙৈদা ঐখোয়গী লোলনা হান্না চলহৌনবা হোৎনহৌসি। মরম অদুনা গভর্ণমেন্ট অমসুং মরী লৈনবা ডিপার্টমেন্টশিংনা থৱায় য়াওনা চেন চোংদুনা হোৎনহৌবা তঙাইফদে।
লৈশেম্বা সনাজাওবনা হায়খি, মণিপুরী লোলনা ইং ১৯৯২ গী আগস্ট ২০দা ইন্দিয়ান কনস্তিত্যুসনগী নিপালশুবা সেদ্যুলদা চনখিবসি তরাই তরাইনা চনখিবা নত্তে। মীয়ামগী অচৌবা ঈহৌ কয়া মতম শাংনা চত্থরবা মতুংদা নুমিৎ অসিদা লোল অসি নিপালশুবা সেদ্যুলদা চনখিবনি। ইমা লোল অসি হেক য়ারিবমখৈ শীজিন্নদুনা হেন্না মশক থোকপা লোল ওইহনসি।
সোর্স: পোক্নফম

COMMENTS

WORDPRESS: 0
DISQUS: