মণিপুরি সাহিত্যদা বঙ্গবন্ধু শেখ মুজিব

Homeস্ক্রলবার

মণিপুরি সাহিত্যদা বঙ্গবন্ধু শেখ মুজিব

বাংলাদেশতা খুন্দারিবা মণিপুরিশিংসু মণিপুরি সাহিত্যদা খুত্থারি। খরদি থেংঙে মখোয়না মিকপ থোরকপসি, ১৯৭৫ খ্রিষ্টাব্দদগীতা বাংলাদেশতা মণিপুরি সাহিত্যগী

এ কে শেরাম

বাংলাদেশতা খুন্দারিবা মণিপুরিশিংসু মণিপুরি সাহিত্যদা খুত্থারি। খরদি থেংঙে মখোয়না মিকপ থোরকপসি, ১৯৭৫ খ্রিষ্টাব্দদগীতা বাংলাদেশতা মণিপুরি সাহিত্যগী খোঙচৎ হৌবনি। য়াম্না ন্যাচারেল ওইনা মখোয়গী খূৎইদা বাংলাদেশকী নীংতম লান অমসুং বঙ্গবন্ধু শেখ মুজিবকী মমি য়াম্না মরাং কায়না অমসুং নিংথিজনা তাই হায়বা য়াই। শৈরেংগী লমদা এ কে শেরাম, কারাম নীলবাবু, খোইরোম কামিনীকুমার, সনাতন হামোম, শেরাম নিরঞ্জন, অয়েকপম অঞ্জু, রওশন আরা বাঁশি খূৎহৈবমনচিংবা কবি কয়াগী কবিতাদা ঐখোয়না বঙ্গবন্ধু শেখ মুজিবুর রহমানগী মমি তাবা থেংনৈ। ৱারীমচাগী লমদনা কে. সুবোধ সিংহনা ইবা দীপান্বিতাগী অহানবা ইস্যুদা (১৬ ডিসেম্বর ১৯৭৫) ফোঙখিবা ‘কাইনমৈচাক’কী ৱা পনবা য়াই। ৱারী অসি বাংলাদেশকী নীংতম লানগা মরী লৈননা ইবনি। বাংলাদেশকী নীংতম লানদা য়ুম্ফম ওইরগা ইবা অতোপ্পা ৱারীমচা অমনা এ কে শেরামগী ‘নোঙ্গৌবী’নি। ৱারীমচা অসি অইবগী ২০০১ খ্রিষ্টাব্দদা ফোঙবা ৱারীমচাগী লাইরিক ‘নোঙ্গৌবী’দা ফোঙখ্রবনি। বাংলাদেশকী নীংতম লানদা য়ুম্ফম ওইবা নোভেল অমসু বাংলাদেশতা ফোঙখি। মদুদি, ২০১২ খ্রিষ্টাব্দদা ফোঙবা এ কে শেরামগী নোভেল লাইরিক ‘লম্মাঙনবা’নি।

বাংলাদেশকী মীওই ফুরূপ মচা মচাশিংগী মনুঙদা মণিপুরিসু অমনি। মণিপুরিশিংগী হৌরকফম অমসুং মরূ ওইবা লমদমদি হৌজিক্কী ভারতকী মণিপুরনি। মণিপুরি লোন-সাহিত্য য়াম্না লিরবা অমসুং হায়ফেৎ চাওখৎলবনি। ইতিহাসকী তাঙ্কক কয়াদা তঙাইফদ্রবা মরম কয়াদগী মণিপুরিশিং হৌরকফম লমদম মণিপুর থাদোক্তুনা থংনবা রাজ্য কয়াদা খুন্দাবা হৌখি। মখোয়গী শরূক অমা মথং মথং লাক্তুনা বাংলাদেশকী লমদম অসি য়ৌরকখি। অদুনা বাংলাদেশকা মণিপুরগা নক্‌নবা মরী অমা লৈনরকখি। লোন-সাহিত্য অমসুং সংস্কৃতিগী লমদা অমগা-অমগা পিথোক-পিশোন লৌথোক-লৌশিন তৌনরকখি। সংস্কৃতিগী লমদা বাংলাদগী মতেং কয়া লৌখিবগুম মণিপুরি সংস্কৃতিনসু বাংলাগী সংস্কৃতিদা খুদোল কয়াদং তমখি। মণিপুরি লোন-সাহিত্যগী অনৌবা ঈহৌ শাগৎপদসু বাংলা লোন-সাহিত্যগী মতেং কয়া লৌখি। মসিগী মরী অমা লৈনবসিনা বাংলাগী থৌদোক-ৱাথোক কয়াগী মনিন-মরাওখোল মতম মতমদা মণিপুরদসু য়ৌখি।

খ্রিষ্টকুম লিশিং’মগা চা মাপলগা হুম্ফুতরামাথোইদা থোকখিবা বাংলাগী নীংতম লানগী শাফুসু খুদক্তা মণিপুর য়ৌখি। মণিপুরি সাহিত্যদসু তঙাইফদনা মদুগী মমি তাখি। হুম্ফুতরামাথোইগী মার্চকী তাং কুনমঙাগী অথেংবা অহীংদা তমথীরবা পাকিস্তানি লান্মীশিংনা নিংঙাইদনা তুমখুন তাল্লিবা বাংলাগী ইপিআর, পুলিশ অমসুং ছাত্রনচিংবা মীচম প্রজা মীয়ামগী মথক্তা খঙহৌদনা লান্দারক্তুনা শাথীরবা মীহাৎ-মীনৈ তৌরক্লবদা কুইনা শাগৎলক্লবা ঈহৌগী মতুঙ ইন্না খুদক্তা নীংতম লান হৌখি। মদুগী মনিল কিলোমিটার চা’ কয়া লান্দুনা চীংলোন মাপলগী ৱাংমদা লৈবা পিক্ল’ রাজ্য মণিপুরদসু য়ৌখি। মী লাক্ষা লাক্ষা হাৎতুনা মীওৎ-মীনৈ তৌরক্লবদা মদুগী চৈথেং মণিপুরি কবিতাদা আধুনিকতাগী শক্লোন পুরকপগী লুচিংপুরেননি হায়নরিবা কবি এলাংবম নীলকান্তগী থম্মোয়দসু পানখি অমসুং মহাক্‌না থৌদোকতুগী নুমিৎ খরনি মনুঙদা বাংলাগী নীংতম লানগী মরমদা ‘ৱাহং’ কৌবা শৈরেং অমা ইখি।

বাংলাদেশ নীংতম্বগী চহী খরা মতুঙদা খ্রিষ্টকুম লিশিংমগা চা মাপলগা হুম্ফুতরামঙাগী আগস্টকী তাং তরামঙাদা বাংলাদেশ আর্মিগী লম্মুক্‌নরবা মীওই খরনা রিভোল্ট তৌদুনা বঙ্গবন্ধু শেখ মুজিবুর রহমানবু ইমুঙমনুঙ অঙাংশিং য়াওনা নুংশিহৈতনা হাৎখি। তমথীরবা থৌদোক অদুগী নুমিৎ খরনিগী মনুঙদা আগস্টকী তাং ২৭তা কবি এলাংবম নীলকান্তনা য়াম্না নুংশিরবা শৈরেং অমগা ইখি। ‘শেখ মুজিবুরনা লৈখিদবদা’ হায়বা শৈরেংসি মহাক্কী শৈরেং লাইরিক ‘তীর্থযাত্রা’ (১৯৮৫)দা য়াওখি। শৈরেংসিদি মহাক্‌না হায়বিখি-

হে বঙ্গবন্ধু!

নহাকপু কাপ্তুনা হাৎখ্রে তাবদা

পোত্থাফম খঙখিদে

মিৎকুপ্তনা য়েংদুনা লৈখি

মিহুৎ ৱাংমদা অহাঙবা অতিয়াদা

ফংঙরোইদ্রবা পাউখুমগীদমক।

..    ..    ..    ..    ..

হিংসাগী মৈরীদা চোংথোক্লকপা বাংলাদেশ

অমুকসু হিংসাগী যজ্ঞদা আহুতি কৎলিবরা

চোংশিল্লিবরা সীতাগুম্না মৈনুংদা?

..    ..    ..    ..    ..

মীহুৎথোংগী ৱাংমদা শাৎলি আতরগুলাপনা

নহাক্‌না য়েংদুনা লৈরি

অদুগা থিরি পুন্সীগী অর্থ।

অশিবনা পুন্সীগী অরোইবরা

নত্রগা অহৌবরা?

পুন্সী হায়বসিবু অহৌবা অরোইবা নাইবরা?

..    ..    ..    ..    ..    ..

মাঙদা শাৎলি আতরগুলাপনা মকা ফন্না

ঐহাক্‌না থিরি অচুম্বা

পুন্সীগী ৱাংমদা লৈরিবা পুন্সী।

অসিমদি শোয়দ্রে বঙ্গবন্ধু!

নহাক্‌না চৎখিবদা

অমম্বগী ফীজং অমদি হাইথরক্লে

মালেম পৃথিবীদা।

কবি এলাংবম নীলকান্ত খ্রিষ্টকুম লিশিংমগা চা মাপলগা মর্ফুতরাতরেৎতা বাংলাদেশ মণিপুরী সাহিত্য সংসদকী থৌরম’মা য়াওবা বাংলাদেশতা লেংবিরক্লম্মি। মতমদুদা মহাক ঢাকাদসু য়ৌরম্মি অমসুং ঢাকাদা লৈবা বঙ্গবন্ধু মিউজিয়মসু য়েংলম্মি। মদুদগী হনখিবগী খরনি মনুঙদা চহীদুগী এপ্রিলগী তাং ১৩দা ‘বঙ্গবন্ধুগী মফমদা’ হায়বা শৈরেং অমা ইবিখি। শৈরেং অসি ২০০০ খ্রিষ্টাব্দদা ফোঙবা মহাক্কী শৈরেং লাইরিক ‘পূক্‌নিং লৈকোলগী অথূপ্পদা’ হায়বদুদা য়াওবনি। মদুদা মহাক্‌না হায়বিখি-

নহাকপু কাউবদি নত্তে, হে বঙ্গবন্ধু, বাংলাদেশকী রাষ্ট্রপিতা

শরূক য়াজখি বাংলাদেশকী অৱাবদা

ইজখি শৈরেং থম্মোয় শোক্‌না নহাক্‌না লৈখিদবদা

অদুবু ঙসিদি তশেংনা উরে নহাক্কী শকফম

নহাক্কী দেশপ্রেম, নহাক্কী কত্থোকপা

ইমীৎমক্‌না উজরে নহাক্কী শঙ্গায়সিদা

নহাক্‌না সিঁড়ি কাখৎলকপদা নহাকপু কাপখিবগী

ঈরিক্কী মশক মাঙদনা থম্লিবা

..    ..    ..    ..    ..    ..    ..

নহাক্‌না জেলদগী থোরকপদা ঙাইহনখি নহাক্‌না ফারিবশিংবু

মীকুপ অমতং

অদুগা নোঞ্জখি নকোক লৈমায়দা জেলগী মমাঙদা

হাপচখি লৈরীক খরদং ফুরিৎখাউদা

করিগুম্বা শিখ্রবসু মীরৈবাক্কী কৈশুমশঙদা

নমা লমদমগী লৈনমগা লোয়ননা শিজনবা

হৌজিক্তি খঙজরে বাংলাদেশতা, ঢাকাগী

শঙ্গায় অসিদা জাতিগী জাদুঘর ওল্লবা

নহাক্‌না নজাতিবু কয়ামুক য়াম্না নুংশিরম্বগে

শোল্লদুনা নচীন্দা নজরুল ইসলাম, রবীন্দ্রনাথ

ৱাশকখি নহাক্‌না রবীন্দ্রনাথকী শৈরেংবু-

ঐহাক্কী সনাগী বাংলা, ঐনা নঙবু নুংশিজৈ-

জাতীয় সংগীত ওইহনগনি হায়দুনা

..    ..    ..    ..    ..    ..    ..

শিবনা নহাক্কী অরোইবা নত্তে, বঙ্গবন্ধু,

নহাক্কী পুন্সীদি মুৎনাইদ্রবা মৈরানি, মাঙলরোইদবনি

লৈরগদবা যুগ যুগ খুদিংদা চাক্তুনা, ঙান্দুনা।

কবি এলাংবম নীলকান্তদা নত্তে, মণিপুরগী অতৈ কবি কয়ানসু বঙ্গবন্ধুবু শৈথাদুনা শৈরেং, ৱারেং, ৱারীমচা কয়াদং ইবিখি। মদুগী মনুঙদা মণিপুরগী শক্‌নাইরবা কবি শরতচান্দ থিয়ামগী ‘বাংলাদেশ’ কৌবা শৈরেংসিগী ৱা থোইদোক্‌না পনবা য়াই। শৈরেং অসি ২০১৩ খ্রিষ্টাব্দদা ফোঙখিবা মহাক্কী শৈরেং লাইরিক ‘মহৌশা’দা য়াওখ্রবনি। শৈরেংসিদা মহাক্‌না ইবিরি-

পোকখিবা মতমদা নহাক

ঈগী লৌখোঙদি চেনখি

ঈগী লবুক্তা য়েন্নীং হুনখি অশিবা হকচাংশিং

নহাক অমা ওইরক্‌নবা মালেমসিদা।

জাতি খুদিংমক্কী অপোকপা মপা অমমম লৈরম্বা য়াই

নহাক্কীদি মহাক্‌নি

নহাক্কীদমক অপোকপা মপা হায়না মিঙ্গৌনরিবা

শেখ মুজিবুর রহমান

নুংশিনা অমুকসু বঙ্গবন্ধু।

..    ..    ..    ..    ..    ..

মায়থীখি নঙগী য়েক্‌নবশিং

চঙজখি নঙোন্দা মখোয়

নহাক্‌না ফংখি নহাক্কী নীংতম্বা।

নহাক্কী মুজিব থাদোরকখি

নহাক্কী মুজিব নীংতমখি

নহাক্কী মুজিবপুনা জাতিগী মপা অমসুং বঙ্গবন্ধু

নহাকপুনা নুংশিনা

আমার সোনার বাংলা, আমি তোমায় ভালোবাসি।

মণিপুরগী মণিপুরি সাহিত্যদা বঙ্গবন্ধু অমসুং বাংলাদেশকী মমি তাবসি শৈরেংদতা নত্তে, ৱারেং-ৱারীমচানচিংবদসু মমি কয়া তাখি। খুদম ওইনা হায়রবদা, মমিং চৎলবা ৱারীমচাগী অইবা সুধীর নাইরোইবমগী ‘য়োকচবী বাংলাদেশ’ হায়বা ৱারীমচাগী লাইরিকতা য়াওরিবা ‘য়োকচবী বাংলাদেশ’ কৌবা ৱারীমচাসিমক বাংলাদেশকী নীংতম লানগী মথক্তা য়ুম্ফম ওইরগা ইখিবা ৱারীনি। মণিপুরদা ফোঙবা লমকোয়ৱারী কয়াদসু বঙ্গবন্ধু অমসুং বাংলাদেশকী মমি তাবা থেংনৈ ঐখোয়না। খুদম ওইনা পনবা য়াবদি, ডা. থোকচোম ইবোহনবীগী ‘বঙ্গবন্ধুগী লৈবাক্তা’, কবি শরতচান্দ থিয়ামগী ‘নুংশিবী বাংলাদেশ’, কেশো সিংহ ইরেংবাগী ‘বাংলাদেশ খোঙচৎ’, ডাঃ চোংথাম যামিনীগী ‘সুরধুনী গঙ্গা মপান্দা’, কবি এলাংবম নীলকান্তগী ‘হৌজিক্কী সাহিত্য অমসুং সংস্কৃতি’ হায়বা লাইরিক্কী মনুঙ চনবা ‘বাংলাদেশ খোঙচত্তা’ অমসুং জিরিবামগী অইবা পানথোইবনা ইবা ‘বাংলাদেশ খোঙচৎ’।

আসামগী মণিপুরি সাহিত্যদসু বঙ্গবন্ধু অমসুং বাংলাদেশকী মমি তাবা কয়াদং থেংনৈ। বোরাক তোর্বানগী কবি হায়না খঙনরিবা কাছাড়গী কবি খৈরুদ্দীন চৌধুরীগী ‘নিংশিঙ মীংশেন্দা’ হায়বা শৈরেং লাইরিক্কী মনুঙ চনবা শৈরেং খরা- ‘বাংলা, নহাক্কী স্মৃতিদা’, ‘হে বাংলা বিদায়’, ‘নুংশি তীর্থদা’ অমসুং ‘অচায়বা ৱাখল খরা’দা বাংলাদেশ অমসুং বঙ্গবন্ধুগী মমি তাবা ঐখোয়না থেংনৈ। শৈরেংদতা নত্তনা সাহিত্যগী অতৈ মখলদসু বঙ্গবন্ধু শেখ মুজিবকী মমি তাবা ঐখোয়না আসামগী মণিপুরি সাহিত্যদা থেংনবা য়াওই। অদুগুম্বা খুদম অমা ওইনা পনবা য়াই কাছাড়গী শক্‌নাইরবা মণিপুরী কবি শৌগাইজম ব্রজেশ্বর সিংহগী নোভেল ‘কত্থোকপা’গী ৱা। কত্থোকপা নোভেল অসি ১৯৭১ খ্রিষ্টাব্দগী বাংলাগী নীংতম লানগা মরী লৈননা ইবনি, ইবসু ১৯৭১ খ্রিষ্টাব্দদমক্‌নি। অদুবু ফোঙখিবদি চহী খরা মতুঙদা ১৯৭৬ খ্রিষ্টাব্দদা শিলচরদগী ফোঙবনি।

ত্রিপুরাগী মণিপুরি সাহিত্যদসু বাংলাদেশকী নীংতম লান অমসুং বঙ্গবন্ধু শেখ মুজিবকী মমি কয়া তাবা ঐখোয়না থেংনৈ। ত্রিপুরাগী খোয়াইগী কবি এল. কুমার সিংহনা বাংলাদেশকী নীংতম লানগা মরী লৈননা ‘আবদুল নঙবু তারিবরা’ হায়বা য়াম্না নুংশিরবা শৈরেং অমা ইবিখি। শৈরেং অসি কবিসিগী ১৯৯৫দা ফোঙবা শৈরেং লাইরিক ‘ঈহৌরক্লবা ঈপোম’দা য়াওই। ত্রিপুরাগী অতোপ্পা শক্‌নাইরবা অইবা এল. বীরমঙ্গলনসু বাংলাদেশকী নীংতম লানগা মরী লৈননা ‘উন্নজরুরে বাংলাদেশকী ইচিন ইনাওশিংগা’ হায়বা য়াম্না নুংশিরবা নিংশিং-ৱারোল অমা ইবিখি। ৱারেং অসি ত্রিপুরা সরকারনা ফোঙবা ‘ত্রিপুরা চে’ কৌবা সাহিত্যগী চে অমদা ২০০৩ খ্রিষ্টাব্দগী নভেম্বর ইস্যুদা ফোঙখি।

বাংলাদেশতা খুন্দারিবা মণিপুরিশিংসু মণিপুরি সাহিত্যদা খুত্থারি। খরদি থেংঙে মখোয়না মিকপ থোরকপসি, ১৯৭৫ খ্রিষ্টাব্দদগীতা বাংলাদেশতা মণিপুরি সাহিত্যগী খোঙচৎ হৌবনি। য়াম্না ন্যাচারেল ওইনা মখোয়গী খূৎইদা বাংলাদেশকী নীংতম লান অমসুং বঙ্গবন্ধু শেখ মুজিবকী মমি য়াম্না মরাং কায়না অমসুং নিংথিজনা তাই হায়বা য়াই। শৈরেংগী লমদা এ কে শেরাম, কারাম নীলবাবু, খোইরোম কামিনীকুমার, সনাতন হামোম, শেরাম নিরঞ্জন, অয়েকপম অঞ্জু, রওশন আরা বাঁশি খূৎহৈবমনচিংবা কবি কয়াগী কবিতাদা ঐখোয়না বঙ্গবন্ধু শেখ মুজিবুর রহমানগী মমি তাবা থেংনৈ। ৱারীমচাগী লমদনা কে. সুবোধ সিংহনা ইবা দীপান্বিতাগী অহানবা ইস্যুদা (১৬ ডিসেম্বর ১৯৭৫) ফোঙখিবা ‘কাইনমৈচাক’কী ৱা পনবা য়াই। ৱারী অসি বাংলাদেশকী নীংতম লানগা মরী লৈননা ইবনি। বাংলাদেশকী নীংতম লানদা য়ুম্ফম ওইরগা ইবা অতোপ্পা ৱারীমচা অমনা এ কে শেরামগী ‘নোঙ্গৌবী’নি। ৱারীমচা অসি অইবগী ২০০১ খ্রিষ্টাব্দদা ফোঙবা ৱারীমচাগী লাইরিক ‘নোঙ্গৌবী’দা ফোঙখ্রবনি। বাংলাদেশকী নীংতম লানদা য়ুম্ফম ওইবা নোভেল অমসু বাংলাদেশতা ফোঙখি। মদুদি, ২০১২ খ্রিষ্টাব্দদা ফোঙবা এ কে শেরামগী নোভেল লাইরিক ‘লম্মাঙনবা’নি।

ঐগী ঙসিগী নৈন-ৱারোলসে লোইশিঞ্জরগে বঙ্গবন্ধু শেখ মুজিবকী মরমদা ইবা ঐগী শৈরেং অমা পাথোকচরগা। ‘মুত্থৎপা য়াররোইদ্রবা মিং’ কৌবা শৈরেংদা অসুম্না হায়রি-

থৌনাগী ইহুননা পীক থল্লবা মঙাল থোক্লবা খুদোন্বী অমা

নোংমা খঙহৌদনা হাইগৎখি মপাল নাইদ্রবা অতিয়া তম্না,

..    ..    ..    ..    ..    ..

মাঙ-তাক্‌নাইদ্রবা খুদোন্বী অদো

ঙসিসু লেংদনা লৈরি অৱাংবা অতিয়াদা,

নম্ফুগী লৈঙাক অমসুং ওৎ-নৈববু পুমমাঙ মাঙহনখিনবা।

..    ..    ..    ..    ..    ..

মিং অমখক্তি হৌজিকসু নিতিগী

বাংলাগী মী করোর কয়াগী থম্মোয়নুংদা ইনিল পীদুনা চৎলি।

মদুগী মিংদুদি কৈদৌঙৈসু মুত্থৎপা য়ারোই মতমগী লামায়দগী

মাঙ-তাক্‌নাইদ্রবা মিংনি মদু,

বাংলাগী থম্মোয়গী শেংলবা খোন্থোক ‘শেখ মুজিবুর রহমান’।

 

COMMENTS

WORDPRESS: 0
DISQUS: