মণিপুরগী থাজ ৱারী অমদি লাইনীং লাইচৎতা মরু ওইবা মফম কন্দুনা লৈরিবা ওক  — ডা: নোংমাইথেম প্রমোদিনী

Homeঅন্যান্য

মণিপুরগী থাজ ৱারী অমদি লাইনীং লাইচৎতা মরু ওইবা মফম কন্দুনা লৈরিবা ওক — ডা: নোংমাইথেম প্রমোদিনী

লাই হাক্তক্তগী লৈরক্লবা ওক অসি লমদম অসিদা তারক্কদবা অৱা অনা ঙাকথোকপদা মরু ওইবা থৌদাং লৌদুনা য়েলহৌ লাইথৌ তীন্থৌগা শাগোন্নরিবা শানি হায়বসি শাক

লাই হাক্তক্তগী লৈরক্লবা ওক অসি লমদম অসিদা তারক্কদবা অৱা অনা ঙাকথোকপদা মরু ওইবা থৌদাং লৌদুনা য়েলহৌ লাইথৌ তীন্থৌগা শাগোন্নরিবা শানি হায়বসি শাকোক লম্লেন্নচিংবা পুয়াদা য়াওরিবা লাই-তীল থাজ ৱারীনা ময়েক শেংনা উৎলি। মৈদিংঙু নাওফংবনা পানবা মতমদা মীরম গুরু অমা থুংলবগা লোয়ননা চাককা য়ুথক, লাইনীং লাইচৎনচিংবা হোংহন্নবা হোৎনরকখি, অদুবু ঙমখিদে। নিংথৌগী শঙ্গাই যুমজাও শাবদা মীরম গুরু অসিনা পরিং থাবা উরেপ উয়ুং তম্বদু মওং মরীল নাইদবা ফীভমদা লৈরম্মী। মতম অদুদা অশাংবম শাগৈগী চহী তরাহুমদোইখক্তমক ঙায়রিবা পূম্নমক খঙবা, উব ঙম্বা লাইপোক ওইরবা লাইবা কৌবা নুপামচা অমা লৈরম্মী। লৈবাক মরা চেৎনবগীদমক অতিয়া শিদবনা লাংওন্দুনা পোকখিবনি। মহাক্কী লোয়নবা ওইনবা ওক অমসু অরাম্বমগী পিবা হোঙবা কৌবা নুপা অমগী য়ূমদা লাংওনখি।
মণিপুরদা খুন্দারিবা মীওই কয়ানা পাম্না চানবা চিঞ্জাকশিংগী মনুংদা ওকসু অমনি। কাঙলূপ খরগী ওইনদি নামুং শানি, য়েংবা ফাওবা তৌহৈদবগী ফীভমদা লৈ। অদুবু ওক লোয়রগা ইমুং পুবা, মচা মশু শেম্বা কয়া অমসুং য়াওদবা নত্তে। মকোন্দা লৈজবা ওক্তু য়োন্থোকখিবা মতমদা মমদা মানা চৎলোইদবগী কপ-লাউবদু নুংশিখ্রজাৎনি, য়েংবা ঙমদে। অসিগুম্লবা ওক অসি লমদম অসিগৗ নাৎ অমসুং লাইনীং লাইচৎকা থাদোক্নবা য়াদনা লৈরক্লি হায়বসি অহল লমনশিংনা মীরোল মথং মথং লান্না থঙথবীরকখিবা ৱারী লাইরিকশিং অমদি লাইথৌ তীন্থৌগী থৌরমশিংদা য়াওবা ওক শরেন চনবদগী খঙবা ঙম্মী। উমং লাই হরাউবদা ওক শরেন চনবগী মতাং য়াওরিবনি। হৌজিক হৌজিকমকসু ফয়েংগী লোয়ালাকপা অমসুং কৌব্রু, অৱাং সেকমাইগী কৌব্রুনচিংবা লাইশিং, অন্দ্রোগী পনম নিংথৌ অমসুং পুলৈরোম্বা হরাউবদা ওক্না শরেল চল্লি। ককচীং হরাওবদা ওক শরেন চল্লম্বগী ৱাফম অখঙ অহৈশিংনা থম্বী। ওক্কী মহুৎ শরেংনা শিনখ্রে। লৈশেম্লোন মিথতসু অতিয়া শিদবনা লৈনুং পিশানুগা ৱাতান্নদুনা ওক পোকখি হায়বগী ৱারোল লৈথক লৈখারোল হায়না মিংথোনবা পুয়াদা যাওরি। মালেম লৈশেম্বা মতমদা লৈবাক মরোল অমা ওক্না পুখি। মহাক্কী মথক্তা পাফনগী নাওফম থাবগা লোয়ননা মনাক্তা সুরাই নীংতোঙবা, চাওরা মপাল থাবা অমসুং লৈনুং পীশিলনু লৈখি।
লাই হাক্তক্তগী লৈরক্লবা ওক অসি লমদম অসিদা তারক্কদবা অৱা অনা ঙাকথোকপদা মরু ওইবা থৌদাং লৌদুনা য়েলহৌ লাইথৌ তীন্থৌগা শাগোন্নরিবা শানি হায়বসি শাকোক লম্লেন্নচিংবা পুয়াদা য়াওরিবা লাই-তীল থাজ ৱারীনা ময়েক শেংনা উৎলি। মৈদিংঙু নাওফংবনা পানবা মতমদা মীরম গুরু অমা থুংলবগা লোয়ননা চাককা য়ুথক, লাইনীং লাইচৎনচিংবা হোংহন্নবা হোৎনরকখি, অদুবু ঙমখিদে। নিংথৌগী শঙ্গাই যুমজাও শাবদা মীরম গুরু অসিনা পরিং থাবা উরেপ উয়ুং তম্বদু মওং মরীল নাইদবা ফীভমদা লৈরম্মী। মতম অদুদা অশাংবম শাগৈগী চহী তরাহুমদোইখক্তমক ঙায়রিবা পূম্নমক খঙবা, উব ঙম্বা লাইপোক ওইরবা লাইবা কৌবা নুপামচা অমা লৈরম্মী। লৈবাক মরা চেৎনবগীদমক অতিয়া শিদবনা লাংওন্দুনা পোকখিবনি। মহাক্কী লোয়নবা ওইনবা ওক অমসু অরাম্বমগী পিবা হোঙবা কৌবা নুপা অমগী য়ূমদা লাংওনখি। মৈদিংঙুগী সনা শঙ্গায় পরিং থাবা উরেপ উয়ুং শোয়রে হায়বসি অখঙ অহৈশিংনা ঙাঙনরকপদগী লাইবনা তারম্মী। নিংথৌগী নাক্তা লাক্তুনা উরেপ উয়ুং অদুনা লাইনিঙথৌগী পাখংবগী ময়াংলেন্দা নল্লে হায়দুনা শোয়রে হায়বদু খঙহল্লম্মী। অসুম্না নিংথৌ অমদি অঙম অথৌ য়াওনা খন্নরম্মী। মীরম গুরুগা লাইবগা মরৈ তৌনরকপদা নিংথৌ অমদি অঙম অথৌশিংনা লাইবগী ৱাফম্বু য়ানীংলম্মী। লাইবগী মরী মখোঙ খঙবগা লোয়ননা অরায়বা মী নত্তে হায়বসু খঙলম্মী। কৌব্রু চীং, লাঙ্গোল চীং, পিশুম চীং, হৈবোক চীং, থাংজীং চীং, লাঙ্গোল চীংনচিংবা মমিংলৈবা চীং ময়ামদগী য়ানবা মমিং নাইবা উ অথোই অহেন, থাঙ্গ করাংচীংগী ৱা অমদি লাংমাইচীংদগী ইনচিংবনা শঙ্গায় য়ূমজাও শাগদবনি হায়বা লাইবগী ৱাফমদু নিংথৌ য়াওনা পূম্নমক্না হরাউনা য়ারম্মী। মীরম গুরুগী অশোয়বদু উৎলগে হায়দুনা লাইবনা লাইশোল শোল্লগা হান্নগী উরেপ উয়ুং অদুদা খুবাক্না তরেৎলক থাবদা য়ূম্বী পূম্নমক ফুক্তোক্লগা পাইখিদুনা লোক্তাক্তা তাখি। য়ূম্বী মখুলশিং অদুদগী ঈ-ফৃ-ফৃ কাপথোরকখি। অসিগুম্লবা অকি তুজুংলবা ফীভম অসি কোকহন্দুনা য়াইফনবা পাম্বৈ নিংথৌনা লাইবদা হংলম্মী। পূম্নমক অসি ইবুধৌ পখংবগী মতিক উৎপনি হায়বা খঙহনবগা লোয়ননা মহাকপু কাউদনবা লাইবনা হায়রম্মী।
লাইবনা লোয়নরকখিবা অতিয়া শিদবগী লাংওন ওইবা অরাম্বম পিবা হোঙবগী য়ূমদা লৈবা মমায় লাংবা লাইবক অমদি মখোং মরিমক ঙৌবা ওক পুকচাও অদু লৌরুরগা মহাকসু য়াওনা ঈরাৎ থৌনিগদবনি হায়রম্মী। ৱারোল অদু তারবদা থীন্থবা তৌদনা ওক অদু লৌরুনবগীদমক মনাই তরেৎ হোঙবগী য়ুমদা ফুম্বঙনরম্মী। অদুবু নিংথৌগী য়াথং হীক্তোকপা য়াদবনা পীখিবা তারম্মী। ওক অদু মকোন্দগী হোইদোক্নবা হোৎনরুবা মতমদা মরাঙ হৌরবা ওক অদুনা লাউ খোংবদগী কনামত্তনা চঙবা ঙমদ্রে। হোঙবা মশামক য়াওনা নিংথৌ মনাইশিং অকি তুজুংনা চেল্লক্লগা নিংথৌদা পাউদম্লম্মী। মাগী মশক উদবননি মহাক চৎকে হায়দুনা লাইবসু য়াওনা চৎখ্রে। লা লাতোন অমদা চেঙকুপ খরা, তিংথৌ মতোন তরামঙা অমদি কোনয়াই হাপ্তুনা কৎলগা মখোয় অনী নিংথৌ নাউফংবগীদমক মালেমদা পোকমিন্নরকখিবদু মতম ওইরে চৎলসি হায়না লাইবনা থেম্লম্মী। মতৌ অসুম্না ওক অদু মকোন্দগী থোরক্তুনা লাইবগী মাঙ থারগা হোঙবা য়াওনা মায়ামসু কোনুংদা য়ৌরক্লম্মী। লাইবনা হায়বা মতুংইন্না ওক্কোন অমা খুদক্তা শাদুনা মদুদা ওক পুকচাও থম্লম্মী। মথং নুমিৎকী অহিং নোংয়াই চবুক্তা নিংথৌ, লাইবা, হোঙবা অমদি ওক পুকচাও মখোয় মরি শঙ্গাই য়ূমজাও য়ূম্ফমদা থোরক্লম্মী। শঙ্গাই য়ূমজাও কা মাপন অদুদা হোঙবনা শেন্নরগা থাদোক্লম্মী। লাইবগা নিংথৌগা খা ৱাংদা লেপ্লগা ওক অদুগী মচিন্না লৈবাক লৈতুমশিং ইন ইন্দুনা ঈকা পাথোরকখিবা য়ূম্বী মখুনশিং অদু মেনশিল্লম্মী। লোয়ননা মখা, অৱাং, নোংচুপ, নোংপোক লাইজি চিথেক মরিমক্কী লৈবাক খোগায়দুনা য়ূম্ফম অদু লৈতেম মান্ননা শেম্লম্মী। মতৌ অসুম্না সনা শঙ্গাই য়ূমজাওগী পরিং উরেপ ঊয়ুং লানবদগী নিংথৌ অমদি লৈবাক মীয়াম অৱাফমদা তারমগদবগী অতিয়া শিদবনা লাংওনখিবা অশাংবম লাইবা অমসুং ওক পুকচাওনা কনবীদুনা নুংঙাইয়াইবী মরাং কায়না ঈংনা চিক্না পানখিবগী ৱারী অসি সাকোক লমলেলনে হায়বা অরিবা লাইরিক অসিদা য়াওরি। মতৌ অসুম্না লমদম অসিদা য়েলহৌঙৈদগী লৈরক্লবা ওক অসি ইচ চম্বা শা ওইরমদ্রে। মশাগী ঈ কত্থোক্তুনা তাইবঙ মীওইবগী অৱা অনা কয়াবু মহুৎ শিন্দুনা পুবীখিবা ঙম্বা শানি হায়বসি লমদম অসিগী লাইথৌ তিন্থৌগী থৌরমশিংদা ওক শরেন চল্লম্বসিনা ময়েক শেংনা উৎলি। থাঙ্গৈশেংনমক হায়রবদা লাইগী মতিক ময়াই চেল্লবা ওকনি।

COMMENTS

WORDPRESS: 0
DISQUS: