ভেক্সিন কাপথোক্লবা মতুংদা ফংবা ঙাকথোক্নবগী পাঙ্গল অদু থা খরদা য়াম্না হন্থরকই-য়ু কে স্টাডি

Homeহকচাং পাওজেল

ভেক্সিন কাপথোক্লবা মতুংদা ফংবা ঙাকথোক্নবগী পাঙ্গল অদু থা খরদা য়াম্না হন্থরকই-য়ু কে স্টাডি

লন্ডন, আগস্ট ২৫: পৃথিবীগী লৈবাক কয়াদা কোভিদ-১৯ লাইনাদগী ঙাকথোক্নবগীদমক শীজিন্নরিবা ফাইজারগী ভেক্সিন অমসুং অস্ত্রাজেনেকাগী ভেক্সিন অসি ডোজ অনী শুনা কাপ

লন্ডন, আগস্ট ২৫: পৃথিবীগী লৈবাক কয়াদা কোভিদ-১৯ লাইনাদগী ঙাকথোক্নবগীদমক শীজিন্নরিবা ফাইজারগী ভেক্সিন অমসুং অস্ত্রাজেনেকাগী ভেক্সিন অসি ডোজ অনী শুনা কাপখ্রবা মতুংদা হকচাংদা ইম্ম্যুন রেস্পোন্স থোকপা অদু থা খরগী মনুংদা য়াম্না থুনা ঞন্থরকই হায়না য়ুনাইটেড কিংডমদা চত্থবা অনৌবা ষ্টাডি অমদা ফোঙদোকখ্রে।
মমাঙ চহীদগী হৌদুনা কোভিদ-১৯ মতাঙদা তশেং তশেংবা মালেমগী ডেটা কয়া স্টাডি তৌদুনা লাকপা জো কোভিদ স্টাডিনা হায়রিবা ভেক্সিন অনীসি ডোজ শুনা কাপথোক্লবা মতুংদা ফংবা ভাইরাসতগী ঙাকথোকপা ঙম্বগী পাঙ্গল অদু থা অমদা চাদা ৮৮ ওইরম্বদগী থা ৫-৬ তা চাদা ৭৪ দা হন্থরকখি হায়ান ফোঙদোকখি। ইন্দিয়াদা ‘কোভিসিল্ড’ হায়ান কাপ্নরিবা অস্ত্রাজেনেকাগী ভেক্সিন অসিনা ঙাকথোকপা ঙম্বগী চাং অসি চাদা ৭৭ ওইরম্বদগী থা ৪-৫ দা চাদা ৬৭ তা হন্থরকই হায়রি।
স্টাডিদা থেংনরিবা ৱাফমসিনা য়ুনাইটেড কিংডমদা মথং থাদগী হৌদুনা খ্বাইদগী ভীবম শোক্নিংঙাই ওইবশিংদা বুষ্টার ডোজ কাপ্নবা থৌরাং তৌরিবা অদু অচুম্বা খোঙথাংনি হায়না তাক্লি। “ঐকাক্কী মত্তা অহল ওইরবশিং অমসুং হেলথকেয়ার ৱার্কারশিংগী প্রোটেক্সন অসি নিংথম থা লাকপা ফাওবদা খ্বাইদগী ফীবম শোকপা মওংদা পাবদা চাদা ৫০ গী মখাদা হন্থখিবা য়াই’ হায়না জো কোভিদ ষ্টাডিগী লীড সাইন্টিষ্ট প্রোফেসর টিম স্পেক্তরনা ফোঙদোকখি।
মহাক্না ভেক্সিন কাপথোকপা মতমদা য়াম্না কন্না শন্দোক্কনবা ডেল্টা স্ট্রেনদগী ঙাকথোক্তুনা য়াম্না অরুবা ফীবম তারকপা য়অবদগীদি কনবা ঙমগনি হায়না ফোঙদোকখি। ভাইরাস ঙাকথোকপা ঙম্বগী পাঙ্গল হন্থরক্কনি হায়বসি থাজগদবনি, মসিনা মরম ওইরগা ভেক্সিন কাপ্লোইদবা নত্তে। ভেক্সিন কাপ্পা হায়বসিনা মীশিংগী মরক্তা মরু ওইনা ডেলটা স্ত্রেনদগী য়াম্না নিংথীনা ঙাকথোকপা ঙম্মী। মরম অদুনা মী কয়ানা ভেক্সিন কাপথোকপা দরকার ওই হায়না টিম স্পেক্তরনা হায়খি।
কোভিদ ভেক্সিন বুষ্টার ডোজ কাপথোক্নবগীদমক খুদক্তা থৌরাং য়াত্থোকপগী তঙাই ফদবা লৈ। অঙাংশিং ভেক্সিন কাপথোকপা অসিনা মী শিবা অমসুং হোস্পিটালদা এডমিট তৌবগী চাং হন্থরক্কদ্রা হায়বদুসু লেপথোকপা ফৈ হায়না প্রোফেসর স্পেক্তরনা হায়খি। পাক শন্না চত্থবা স্টাডি অসিদা টেস্ট রিজাল্ট মিল্লিয়ন ১.২ য়েংশিনখি, তৌবতবু মসিগী ভেক্সিন কাপ্পা অসি হৌজিক কন্না শন্দোক্লিবা ডেলতা স্ত্রেনদা ত্রায়েল তৌবদি ওইদ্রি। পাব্লিক হেলথ ইংলেন্দ (পিঐচই) না ফোঙদোকপা মতুং ইন্না কোভিদ-১৯ ভেক্সিনেশন প্রোগ্রাম্না মরম ওইদুনা ইংলেন্দদা হৌজিক ফাওবদা লাইচৎ অসিদগী মী শিবগী চাং ৮৪,০০০ রোম অমসুং ইনফেক্সনগী চাং মিল্লিয়ন ২৩ রোম ঙাকথোকপা ঙমখ্রে হায়রি।
সোর্স: হুইয়েন লানপাউ

COMMENTS

WORDPRESS: 0
DISQUS: