বেবী শোরাইসমগী শৈরেং অনী

Homeআর্টসশৈরেং

বেবী শোরাইসমগী শৈরেং অনী

মালেম লৈমনা ৱাকচীংগী অইংবা ঊলেনলক্তা অহীং মিৎশেল খাংদুনা থাগোন্নরদুনা পুক্নিংদা চেৎনা নঙগী মোম্মোনরা মাইথোং হরাউনা ঙাইজরি নঙবু ওকচনবা, মাই পাক

মালেম লৈমনা

ৱাকচীংগী অইংবা ঊলেনলক্তা
অহীং মিৎশেল খাংদুনা
থাগোন্নরদুনা পুক্নিংদা চেৎনা
নঙগী মোম্মোনরা মাইথোং
হরাউনা ঙাইজরি নঙবু ওকচনবা,
মাই পাক্লবা খোংচৎকি নিংথৌরেল ওইরিবা
হুন্দোক্লম্লো লাপ্না অৱাবা পুম্বা
পিরো নঙবু ফংজবগী নুঙাইজবা ।
য়েংঙু,হৈপাল লৈপালশিংদা
ঊফুলগী মরোলতনা কুপ্তুনা
থাবুম কয়া তুফক তুফাই চন্না খাংলম্বা
কেজরিবসে ৱাকচীংগী ঊনখাক লোক্তুনা
মকে শেম্লিবনি, নঙবু ওকচনবা ।
ঙাইরি খৌগংলবা লোক্লম্না
খাংলি লৈক্রক চৎনা মশাবু
অদুবু তাওরি মংলান্দা
কুপশিনখ্রবসু খৌজেং য়ৌনা
অকংবা ঊনা ৱানা, নাপি শিংবিশিংতনা,
ঈমায় চোন্না লাওনা খোংনা চেন্থখিনি খন
শেংদোকখিনি চীংজুমগী কল্লবা ঈরাওখোল পুবা ঈচেলনা,
নঙনা লাক্লবা তুংদা,
হুন্দোক্লম্লো লাপ্না অৱাবা পুম্বা
নুংশিদ্রনে নঙবু ওইরিবা শক্তমসে
দাকফমতমক ঙাইরবা ঈখৌলাংলিবা লোক্লমসে।
তাংজফম ওইজবা ঊনাশিংনা
তপ্না তপ্না কেনশিলক্লিবা পামেলগী ফৈরাদা
তনিক তনিকপা থম্মোয়বু ফাজিঞ্জনা
মরোল‌ তম্বিরি ঊচেক্না মচাশিংদা।
ৱাকচীংগী অইংবা কাওনবা
ৱারি লিবিরি, নোংঙানবা ঙাইরি
তারি ৱারি, নঙবু ঙাইনা ঙাইনা ।
হৈনিংদ্রবা কোরৌবু নাথৈরম্লদুনা
কুমথরক্লে লৈচীলসু নোংমদোলদগী
লৈচীলগী মৈখুতনা ৱাওথাংনখ্রে মালেম
খোংদোইরক্লো,
মালহৌনহল্লো মালেম
পিরো নঙবু ফংজবগী নুঙাইজবা
তম্লরো খোইথুম্নরবা নপাও হরাও তয়াম্না
ঙাইরি নঙতবু ঈখৌলাংনা, মালেম লৈমনা ।

নুংশিবদুতমক পিবিয়ু

কৈদৌঙৈ লোইগনি খংদবা মপোক্নি,
পাম্মুজৈ ফোংদোকফম খংদনা ।
ঐগী ইপোক নুমিৎতা
মাংহনবিগনু করিগুম্বা অমত্তসু পাম্মুরবা মালেমশিদগী
শাৎসনু লৈশিংনা মনিংতম্না
পাইশনু চেক্লাশিংসু শগল তুফাং খপ্তুনা
শাসনু জগোই ঊপাল ৱাপালশিংসু
ওইজগে ঐগীদি নুংশিবদুদং ।
ঐগী ইপোক নুমিৎত্তা
মাংহনবিগনু থৱায়পানবা অমৎতবু
নুংশিবা তাইবংপালশিদা লৈজনিংবনা
শক্লোল খুদিংবু কলকচরিবা থৱায়নি,
হৌজগে খারি লৌবুক থন্না
পানঞ্জগে খোইঙাং শারবা
ফৌগী চরোং ওইনা জুম জুম
লিরি হুম্বা মালংবগী তান্থাদা
নুংশিরবা লৌবুক্কি মনমনা শিল্লকপদা
শকপিরকউ খুলং ঈশৈ ।
হৌজগে লোইবী চীংমায় চীংমায়দা
অশংবা ফিজেৎনা লৈতেংজদুনা
ঊয়ুং, শহি, উচাল ওইনা,
তালা ঐগী পুন্সিনা লোইবকাল
তিঞ্জগে হন্না মালেম লৈশাসিদা।
পিখম্নখিবা থোক্লবসু ঐনা লমখাংদা
ঐনা নুংশিজবগুম নুংশিবিবা মহাক্না
খোয়দানা নুংশিনা নমদুনা
পামজনা নাপদা থেৎকদৌবা
লৈরাংগী মপোক্তুদা পোকচৌ হায়বীয়ূ
লৈরাংনা লৈশাৎ লোইখ্রবসু
চূদুনা লৈহৌনবা লৈনম্না থম্মোয়দা ।
তম্বীরক্কনু ,
অকে অম্মৌ,অরং অরাক্না খুদোল‌ ওইনা
পিবিয়ু নুংশিবদুখক ।

COMMENTS

WORDPRESS: 0
DISQUS: