বীর টিকেন্দ্রজিৎপু খুৎ ফংননা ফাখিবা খেলেন্দ্রো সুবেদারগী পুন্সি অমসুং থবক  – – এন দি হোদাম্বা

Homeস্ক্রলবার

বীর টিকেন্দ্রজিৎপু খুৎ ফংননা ফাখিবা খেলেন্দ্রো সুবেদারগী পুন্সি অমসুং থবক  – – এন দি হোদাম্বা

খেলেন্দ্র সুবেদার হায়রিবা পুৱারীগী চরিত্র অসিবু ড্রামাগী চরিত্র ওইনা শক্নাইরবা ড্রামা ইবা মৈত্রম বীরনা মহাক্কী ‘বীর টিকেন্দ্রজিৎ’ ইরকপ

                          এন দি হোদাম্বা

খেলেন্দ্র সুবেদার হায়রিবা পুৱারীগী চরিত্র অসিবু ড্রামাগী চরিত্র ওইনা শক্নাইরবা ড্রামা ইবা মৈত্রম বীরনা মহাক্কী ‘বীর টিকেন্দ্রজিৎ’ ইরকপা মতমদদি অচুম্বা মশক্কা ইতায় তায়ওন্নবা চরিত্র ওইনা য়েক্লকই। অপাবা অমদি অতাবা মীরোলনা ড্রামা অদুগী খুত্থাংদা সুবেদার খেলেন্দ্রবু খঙবা অসিনা অমত্তা ঙায়রবা মরম ওইবনা ড্রামা অদুনা য়েক্লিবা লমচৎ অদুমক পুৱারীগী লমচৎ ওইনা লৌরুই। অদুবু মৈত্রম বীরনা মহাক্কী ‘বীর টিকেন্দ্রজিৎ’ ড্রামাদা য়েক্লকপা সুবেদারগী মশক সুবেদারগী অশেংবা পুন্সিগদি তায়ওন্নরে হায়বসি য়েন্দ্রেম্বম কুঞ্জলালগী থিজিন হুমজিন্দুনা পুথোরকপা লাইরিক অসি পারগা খঙবা ঙম্মী।
পুৱারী হায়বসি তোঙান তোঙানবা মশক অহুমদা ফংই। অহানবগী অদুনা নিংথৌ অমুসং অঙম-অথৌশিংগী মরমদা মখোয়গী য়াথং মখাদা ইবা পুৱারী, অনীশুবা অদুনা লান্না ইশিল্লকপা নৎত্রগা শন্দোরকপা পুৱারী অমুসং অহুমশুবা অদুনা লাচনবিদনা লৈরিবা পুৱারীগী মশক অসিনি। ‘নিংথৌরোল লম্বুবা’ ‘চৈথারোল কুম্বাবা’ নচিংবসি অহানবা মখলগী পুৱারীগী মশক অসিনি। ‘শেনবী মুকাক্লৈ’ অমসুং ‘মীতম্বাল’ নচিংবা অসিনা অনীশুবা মখলগী পুৱারীগী মশক অসিনি। য়েন্দ্রেম্বম কুঞ্জলাল সিংহগী ‘খেলেন্দ্র সুবেদার’ হায়রিবা লাইরিক অসিদা য়াওরিবা ৱারীশিং অসিনা অহুমশুবা মখলগী পুৱারীগী মশক ওইনা লৈরম্বদগী খোমজিল্লক্তুনা উনম তৌথোরকপা মশক অদুনি।
মণিপুর অমসুং মণিপুরগী মপান্দা অহুমশুবা মখলগী পুৱারীগী মশক অসি মরাং কায়না কোইচাই চাইনা লৈবা অসি ঐখোয়না উবা ফংই। মসিবু খোমগত্তুনা লাচনবগী থবক তৌবা হায়বসি তরাই-তরাইবা থবক অমদি নত্তে। অদুম ওইনমক, তরাইদবা থবক অসিদা চু্ম্না পুকচেল শেংনা অমসুং থৱায় য়াওনা কত্থোকপা অমগা লোয়ননা পায়খৎলকপা ওইরবদি মদুগী অফবা মহয়না অনীশুবা মখলগী পুৱারীগী অরানবশিং অদু ফাওবদা অচুম্বা মায়ওন অমা পীবা ঙম্মী।
খেলেন্দ্র সুবেদার হায়রিবা পুৱারীগী চরিত্র অসিবু ড্রামাগী চরিত্র ওইনা শক্নাইরবা ড্রামা ইবা মৈত্রম বীরনা মহাক্কী ‘বীর টিকেন্দ্রজিৎ’ ইরকপা মতমদদি অচুম্বা মশক্কা ইতায় তায়ওন্নবা চরিত্র ওইনা য়েক্লকই। অপাবা অমদি অতাবা মীরোলনা ড্রামা অদুগী খুত্থাংদা সুবেদার খেলেন্দ্রবু খঙবা অসিনা অমত্তা ঙায়রবা মরম ওইবনা ড্রামা অদুনা য়েক্লিবা লমচৎ অদুমক পুৱারীগী লমচৎ ওইনা লৌরুই। অদুবু মৈত্রম বীরনা মহাক্কী ‘বীর টিকেন্দ্রজিৎ’ ড্রামাদা য়েক্লকপা সুবেদারগী মশক সুবেদারগী অশেংবা পুন্সিগদি তায়ওন্নরে হায়বসি য়েন্দ্রেম্বম কুঞ্জলালগী থিজিন হুমজিন্দুনা পুথোরকপা লাইরিক অসি পারগা খঙবা ঙম্মী। কুঞ্জলাল মশানসু মহাক্কী লাইরিক্কী লামায় অদু হাংদোকপীদ্রিঙৈ হায়বসিদা পল্লি-‘মৈত্রম বীরনা মাগী ড্রামাগী খোঙফম চেৎনবা হোৎনবদা সুবেদারবু মরন্নাই ওইনা উখি। অমুকসু লামায় ৮১দা হায়, ‘মৈত্রম বীরদি অঙকপা ক্রিয়েটিব রাইটারনি। নহারোল হৌগৎলকপশিংদি মাগী টিকেন্দ্রজিৎ ড্রামা অসি ইতিহাসনি হায়দুনা অদুম পারে। অসুম্না পুৱারীগী চরিত্রবু ড্রামা নৎত্রগা হন্না ইথোরকপা টেক্স নৎত্রগা লীথোকপা ৱারীদা মশাগী মরন্নাই ওইবা মীৎয়েং হাপচিন্নদুনা লান্না মশক শাগৎনবা হোৎনবসি ইনিংথৌ পামহৈবগী পুন্সিদসু থোকখি, ইনিংথৌ চীংথঙখোম্বগী পুন্সিদসু থোকখি, ইনিংথৌ চীংথঙখোম্বগী পুন্সিদসু থোকখি। মখা চত্থনা ইনিংথৌ চুড়াচান্দ মহারাজ অমসুং ইনিংথৌ বোধচন্দ্র মহারাজগী পুন্সিদসু থোকখ্রিবদুনি। মসিশিং অসি অনীশুবা মখলগী পুৱারীগী মশক ওইনা শাগৎনরকপা ঙাক্তনি।
অদুম ওইনমক, কুঞ্জলালনা মহাক্কী লাইরিক ‘খেলেন্দ্র সুবেদার’ অসি অনীশুবা মখলগী পুৱারীগী মশক ওইনা শাগৎখ্রবা ৱারী লীখুন অদুগী শেংদোক-ৱারোল ওইনা ইবমক্তি নত্তে হায়বসি উবা ফংই। মহাক্না ইরিবা অসিদি ময়োল অমসুং মাতই হোংদোক-হোংজিন তৌদুনা শাগৎপা খুৎইনি হায়বসিনি। খুদম ওইনা হায়রবদা, ইং ১৮৯১ গী এঙ্গলো মণিপুর ৱার অসি টিকেন্দ্রজিৎতা ময়োল ওইবা মীৎয়েং থম্মী অমসুং থঙ্গাল জেনারেলনা তুংদা ইন্নবা উই অদুগা খেলেন্দ্র য়াওনা অতৈনা মতাইদা থম্মী। খেলেন্দ্রদি মৈত্রম বীরনা ভিলেন ওইনা শাগৎলকই।
মাইকৈ অমরোমদা, খোংজোম লানগী মতেং পল্লকপদা পাউনা ব্রজবাসীনা ময়োলদা লৈ অদুগা চিংলেনস্নানা তুংদা ইন্নরগা অতৈনা মতাইদা লৈ। ময়োলদা লৈরম্বা যুবরাজ টিকেন্দ্রজিৎ অসি মাইনু পেমচানা ময়োল ওইবা ৱারীদদি মতাইদা লৈবা ভিলেন ওইনা উব ফংই। মতৌ অদুগুম্না পাউনা অমসুং চিংলেনস্নাখোয়না ময়োলদা লৈবা মতমদা টিকেন্দ্রজিৎ অমসুং থাঙ্গালহোয়না মতাইদা লৈখি। মিসেস গ্রিময়ুডনা ময়োল ওইবা ৱারীদসু অতৈনা মতাইদা লৈখিবা ঙাক্তনি। মীৎয়েং অসোমদগী কুঞ্জলালনসু মৈত্রম বীরনা ইং ১৮৯১ গী এঙ্গলো মণিপুর ৱারদা টিকেন্দ্রজিৎপু ময়োল ওইবা মীৎয়েং থম্লগা অতৈনা মতাইদা থম্লগা ভিলেন ওইনা শাগৎপীখ্রবা খেলেন্দ্রেদা অমুক ময়োল ওইহন্দুনা পুৱারীগী মশক ওইনা খোমজিল্লকপনি হায়বসিনি।

খেলেন্দ্রো সুবেদার অমদি মহাক্কি তালোই নিংথেম নিঙোল ওঙবী তরুনিসানা

কুঞ্জলালগী লাইরিক অসিনা অনৌবা ৱারোলশিং কয়া অমা মরাং কায়না খোমজিল্লকক্লি, মখোয়শিং অসি অমুক ফাওবা লিথোকখিদ্রিবা ৱারী ঙাক্তনা অয়াম্বনি। ময়ামগী মনুংদা মরু ওইবা ১০দি:-
১) শিলচরদা নিংথেম পুখ্রি অমা লৈ হায়বসিনি। পুখ্রি অসিবু বেঙ্গলীশিংনা ‘রাজার তলাব’ হায়না খঙনরম্মী। পুখ্রি অসি লানফা ওইরবা মীতৈ নিংথৌ মচাশিংনা তৌরম্বনি। খেলেন্দ্রগী লোইনবী নিংথেম নিঙোল তরুনিস্নানা চৈরাক পুদুনা থবক শুরিবা (মীতৈগী মীৎয়েংদা নিংথেমচাবু থবক শুহনবা হায়বসি অরোইবা থাক্তা ইকায়বা পীবনি) মবুং মৌপ্বা, মখুরা-মতোনশিংবু খেচ্রি হৌদুনা পীজখিবগী পুক্নিং নুংশিনিংঙাই ওইবা পুৱারীগী শক্লোন অদু লাইরিক অসিদা লাচল্লকই।
২) খেলেন্দ্রেগী মপুং ফাবা পুন্সিগী মশক অমা লাইরিক অসিদা উবা ফংই।
৩) খেলেন্দ্রগী লোইনবী তরুনিস্না অসি কনানো হায়বা খঙবা ঙম্বা অসিনি। মৈদিঙু পামহৈবানা ঙৌব্রাম সাই পোকই। ঙৌব্রামনা নোংচুপ লমগাই ঙম্বা ভদ্রসিং পোকই। ভদ্রসিংনা দেবেন্দ্র মহারাজ পোকই, দেবেন্দ্রনা গোকুলস্না পোকই। তরুনিস্নাসি গোকুলস্নানা কাছাড়গী বড়বিল নিঙোল হাওরোংবম চনু রজনীদা পোকপনি।
৪) টিকেন্দ্রজিৎনা খেলেন্দ্রগা নিঙোল মরীদা মশেন-মবাই থোক্নৈ হায়বসি লাইরিক অসি পাবদগী খঙবা ঙম্মী। চহীদা খেলেন্দ্রনা চহী ৮রোম হল্লবসু নিঙোল তরুনিস্না অসি শাগৈ মরীদা টিকেন্দ্রজিৎকী মচল থোকপনা মরম ওইরগা খেলেন্দ্রনা টিকেন্দ্রজিৎতা ইবাই কৌই হায়বসিনি।
৫) মৈত্রম বীরগী ড্রামাগী খুত্থাঙদগী চুম্মী-লাল্লি হায়বা খঙদনা খেলেন্দ্র সুবেদারবু হন্থবা থাক্তা মরাল শীবিদুনা চুকৎচনীংঙাই ওইবা লমচৎ ওইহল্লি। অদুবু তশেংনা মরাল লৈরবা সুবেদার মোইরাং তোঞ্জাউবুদি উৎ-ৱাইনা কুপ্তুনা থম্লি হায়বসি কুঞ্জলালগী লাইরিক অসিনা সেবাক ফাক্লগা উহল্লক্লি। (খেলেন্দ্র সুবেদার অমসুং তোঞ্জাউ সুবেদার অনী অসিগী মথক্তা ৱায়েল চত্থবা খুৎই অমা ইবদা পুক্নিং চিংশীন্নিংঙাই ওইগনি নিংই।)
৬) এঙ্গলো-মণিপুর ৱারগী তুংদা মণিপুরগী নিংথৌ চুড়াচান্দনা ওইবসিদা হকথেংননা অমসুং নাকোইননবু ওইরবসু খেলেন্দ্র সুবেদারগী খুৎ য়াওই হায়বসিনি। মসি মহাক্কী নুপী মরিরোমগী কাঙবুবু শৌগৎলম্বগী মশক অমরা হায়বসি খন্ননিংঙাই ওই। ইনিংথৌ চুড়াচান্দগী পুন্সিদা খেলেন্দ্র অমদি মহাক্কী ইমুং মনুংবু মতম পুম্নমক্তা মমল লৈনা লৌখিবা অসিনসু খূদম ওইবা য়াই ।
৭) নিংথৌ ওইদ্রিঙৈ মমাঙগী অঙাং ওইরিঙৈ ইনিংথৌ চুড়াচান্দগী পুন্সি অসি কাছাড়গী ললাং খুঙ্গংদা লৈরম্মী। খুঙ্গং অসিদা মপাবুং চাউবী য়াইমা লৈখিদবনি হায়না কুঞ্জলালনা হায়নবা হোৎনরিবা অসি ইনিংথৌ অসিনা ললাংদা খোঙলেংবীরক্লগা নিংথেম কীর্তন কৎপীরম্বা অদুনসু মপাঙ্গল হাপ্পী। ইনিংথৌগী অঙাং ওইরিঙৈ ললাংগী পুন্সি অসি য়াম্নমক ৱানা লেনখি হায়বা ৱারী শীংবুল কয়া অমসুং লৈরি। অপোকপী মমা ইবেম ললিত মঞ্জুরীনা অঙাংশিং চাউনবা য়োক্লবা হোৎনবদা টিকি ফাওবা শাখি। মরম অদুনা চুড়াচান্দ মহারাজনা নিংথৌ ওইখ্রবা মতুংদা কাছাড়দগী মীয়াম্না টিকি শাবীগী মচা ফাওবা হায়না খঙনখিবগী ৱারী লীখুন লৈরি।
৮) খেলেন্দ্র সুবেদারনা যুবরাজ টিকেন্দ্রজিৎপু ফানবা হোৎনবগী দ্ভ্রাক্না ফানবা তাঞ্জা অমদা সুবেদারনা যুবরাজবু মখোঙনা কাওখি হায়বা ৱারী অমসু য়াওরক্লি। হন্দক্কী নিংথেমচা অমদা মখোঙনা কাওরবা অসিদা নিংথেমনা ৱারৌদুনা বিয়াবী থুংলো (অঙৌবা পক্লে/উনশা পৎপগী অনাবদা নাদুনা শিরো) হায়দুনা অভিশাপ তৌরম্মী হায়রি। অভিশাপ অদু লেম্না মাঙখিদে, সুবেদারগী পুন্সিদা থুংখি অমসুং মদুনা পত্তুনা মপুন্সি লোমখি হায়দুনা লান্না তোকঙা শন্দোকপীখিবগী মতাংসু লৈখি। অদুম ওইনমক, সুবেদারগী পুন্সিদা করিগুম্বা মখল অমত্তগী লায়না শকখিবা লৈখিদে হায়না কুঞ্জলালগী লাইরিক অসিনা শেংদোরক্লি। মশেন বাগেশ্বরনা মফি থাঙ্গৎতুনা ‘ঐবু অঙৌবা হায়বদু পকপ্রা অমুক্তদি য়েংঙুসে’ হায়রগা য়েংহনখিবা মতাংগী ৱারী পল্লি। খেলেন্দ্র সুবেদার চহী ৯৫ পুন্সিরম্মী।
৯) বিলাতকী নিংথৌ কি জর্জ-৪ না নিংথৌ ওইরকপা চহী ২৫ মপুং ফারকপগী হরাও তয়াম্বা ফোঙদোকপদা খেলেন্দ্রে সুবেদারদসু মেডেল অমা শকখঙ-চে গা লোয়ননা ইং ১৯৩৫ (মতমসিদা খেলেন্দ্র মশাগী চহী ১২ রোম শুরে) দা য়ৌহল্লকখিবা অসিমকসু শীংথানিঙাই অমনি হায়না লাইরিক অসিনা লৌরি।
১০) মৈত্রম বীরনা মহাক্কী ড্রামাগী খুত্থাংদা খেলেন্দ্র সুবেদারবু মণিপুরী খুদিংমক্তা তুকৎচহনবা ঙমখ্রবসু মপান মণিপুরগী মণিপুরীশিংগী মনুংদা বৃটিশ সিফাইগী গান সেলুটকা লোয়ননা অরোইবা সংস্কার তৌখিবা মীতৈ মচাদি খেলেন্দ্র সুবেদারনা অহানবনি/মতোমতনি হায়বসি কুঞ্জলালগী লাইরিক অসিনা পাউদম্লি।
লাইরিক অসিগী অইবা কুঞ্জলালগী তোপ-তোপ্পা রাইটিং স্টাইল অমা লৈ। মসি সরাংথেম বরমনিগী মীতৈ নিংথৌরোল পাবদা মরক মরক্তা থেংনবা মতৌ অদু নীংশিংহল্লি। মখোয় ড্রামা ইবা ক্রিয়েটিব রাইটার ঙাক্তনি। মরম অদুনা মশাগী ওইবা কল্পনাগী মশক অমগা ইতিহাসকী শরুকশিং অদুগা শমজিন্নহন্নবা হোৎনবগী খুৎই মশক অসি পাবদা হেন্না নুংঙাইহল্লি হায়না লৌবা তাই।
মপান মণিপুরগী মণিপুরী পুৱারীগী লীখুনশিং থিজিনবদা খ্বাইদগী চোকথবা লৈতনা মাঙলোমদা চঙশিল্লিবা থিজিল্লোয় অমনি কুঞ্জলাল য়েন্দ্রেম্বম। মহাক্না ইবা ৱারেংশিং অমসুং সেমিনার কয়াদা পাথোকখিবা পেপারশিংদা মহাক্কী কুপ্না থিজিন হুমজিনবগী মমি নীংথিজনা তাই। লাইরিক ওইনা ‘খেলেন্দ্র সুবেদার; লান্থোরকপা অসিগুম্বা অতৈসু অফবা খুৎই কয়া কুঞ্জলালদা লৈ অমসুং হনবা লৈতনা থিজিন হুমজিনবগী থবক মখা চত্থরি হায়বসু খঙবা ঙম্মী। খেলেন্দ্র সুবেদারদা মপুং ওইবা মীৎয়েং থম্লগা লাইরিক অমা শাগৎপা অসিগুম্বা বরাক তম্পাক্কা মরী লৈনবা হিজম ইরাবত, বোধচন্দ্র মহারাজ, চুড়াচান্দ মহারাজ, নরসিংহ মহারাজ, চৌরজিৎ, মারজিৎ অমসুং গম্ভীর সিংহ মহারাজ নত্তনা ইনিংথৌ চিংথঙখোম্বা অমসুং ইনিংথৌ পামহৈবগা মরী লৈননা পুৱারীগী লীখুন কয়া হন্না লিথোক্তুনা ইথোকপা য়াই।
খেলেন্দ্র সুবেদার হায়বা লাইরিক অসি মপান মণিপুরগী মণিপুরীশিংদতা নত্তনা অপুনবা মণিপুরী পুৱারীগী মশক শাগৎপদা য়াম্নমক অচৌবা মফম কল্লগদবা অফবা লাইরিক অমনি। অসিগুম্বা অনৌবা ইনফোর্মেশন মরাং কায়না য়াওবা অফবা লাইরিক কয়া অইবা অসিদগী মখাতানা থাজবা থম্বা চুমগনি নীংই।
কর্টেসি – মরূপ

COMMENTS

WORDPRESS: 0
DISQUS: