বাংলাদেশকী নীংতম লানদা মণিপুরিশিংঃ শম্লপ্পা ৱারী খরা

Homeৱাখল্লোন

বাংলাদেশকী নীংতম লানদা মণিপুরিশিংঃ শম্লপ্পা ৱারী খরা

বাংলা লমদমসিদা মণিপুরি কাঙলুপনা খুন্দাবা হৌবসি চহী চহুমগা য়াঙ্খৈদি হেল্লবনি। মণিপুরিশিং য়াম্না হরাও-তয়াম্বা পাম্বা, ইংনা-তপ্না হিংজবা পুন্সি-মিরেল

এ কে শেরাম

বাংলা লমদমসিদা মণিপুরি কাঙলুপনা খুন্দাবা হৌবসি চহী চহুমগা য়াঙ্খৈদি হেল্লবনি। মণিপুরিশিং য়াম্না হরাও-তয়াম্বা পাম্বা, ইংনা-তপ্না হিংজবা পুন্সি-মিরেলমদা হৈনজবা কাঙলুপনি। অদুনা লমদমসিগী থৌদোক-থৌরম নত্রগা ঈহৌ কয়াদা থোয়না মায় ওনশিন্না খক শরূক য়াখিদে। রাজনীতিগী লমদগীসু খরা তোপতক্‌না লাপতক্‌না লৈখি। অদুনা নীংতম লানগী ঈহৌ শাগৎলকপগী তাঞ্জা কয়াদা থোয়না শরূক য়াখিদ্রবসু হকথেংননা নীংতম লান হৌরক্লবদদি মখোয়সু তুমিন্না লৈথোকপা ঙমখিদে। মমা লমদম্বু নুংশিজবগী অকনবা লীচিং অমনা মরম ওইদুনা মণিপুরি নহা কয়াসু থৱায় খূৎতা হাপ্তুনা লান্মী অমা ওইনা চোংথোক্তুনা হকথেংননা লানদা শরূক য়াখি। কনা কনাগুম্বনা নীংতম্বগীদমক থৱায়গী পোন্থা পিখিবসু য়াওই।

বাঙালিগী পুৱারীদা খ্বাইদগী ময়েকলাবা মতমসি খ্রিষ্টকুম লিশিংমগা চা মাপলগা হুম্ফুতরামাথোইনি, ফংজবা খ্বাইদগী অথোইবা লননা নীংতম্বনি। হুম্ফুতরামাথোইগী মতমসিদনি বাঙালিশিং তশেংনা মিকপ থোকখিবা অমসুং বাঙালি জাতিনা নুমিৎ চনীগা হুম্ফুতরুককী মতমগী লামায়দা লেংখিবা ‘নীংতম লান’ কৌবা ময়েকলারবা মহাকাব্য অমগী পান্দমনিঙাই লৈত্রবা শক্তম। অদুননি হায়রিবা খ্রিষ্টকুম লিশিংমগা চা মাপলগা হুম্ফুতরামাথোইদা থোকখিবা নীংতম লানসি বাঙালি জাতিগী চহী লিশিং কয়াগী পুন্সিদা অথোইবা থৌদোকনি। হৌরকফমগী মীৎয়েদগী নত্রবসু লমদমসিদা মতম কুইনা লৈরকপদগী ‘বাঙালি জাতীয়তাবাদ’কী চেতনাবু থম্মোয়দা শাগোন্নরবা বাংলাগী মণিপুরিশিংসু বাংলাগী নীংতম লাননা শক্তম লৌরক্লবদা তুমিন্না লৈথোকপা ঙমখিদে। বাংলাদেশকী মীয়াম প্রজাগা লোয়ননা মশীং লীক্‌না লৈবা মৈতৈ হায়নসু খঙনবা লমদমসিগী মণিপুরিশিংসু লান্মী ওইনা ইচং-থৌনা চোংথোক্তুনা শরূক য়াখি। মণিপুরি কয়ামসু মমা লমদমগী নীংতম্বগীদমক থৱায়না পোন্থা পীদুনা শহিদ ওইখি।

খ্রিষ্টকুম ১৯৭১গী মার্চকী তাং ২৫গী অথেংবা অহিংদা পাকিস্তানগী তমথীরবা লান্মীশিংনা নিংঙাইদনা তুমখুন তাল্লিবা বাংলাগী মীচম প্রজাশিংগী মথক্তা খঙহৌদনা লান্দারক্তুনা নুংশিহৈতনা মীহাৎ-মীপুন হৌরক্লবদা বাঙালি জাতিগী অথোইবা লুচিংবা বঙ্গবন্ধু শেখ মুজিবুর রহমাননা মার্চকী তাং ২৬কী অহানবা খোঙফমদা বাংলাদেশকী নীংতম্বা লাউথোকপিরকপদগী তশেংনা নীংতম লান হায়বদু হৌখি। অদুবু তশেংবদি, বাঙালিগী নীংতম্বা তানবগী ঈহৌ অসিদি কুইরবা মতমগী মমাঙদগী হৌরক্লবনি। ১৯৪৭ খ্রিষ্টাব্দদা ব্রিটিশকী লোইলমদগী নীংতম্বা ফংদুনা পাকিস্তান কৌবা রাষ্ট্র অমা শেম্বগী মতম খরনিগী মতুঙ ১৯৪৮ খ্রিষ্টাব্দগী মার্চ থাদগী পাকিস্তান লৈঙাক্কী মায়োক্তা ‘স্টেট ল্যাঙ্গুয়েজ’কী চয়েৎনবনা মরম ওইদুনা বাংলা লোনগী ঈহৌ শাগৎপা হৌখি। মদুগী মতুঙ ইন্না য়াঙ্খৈনিথোইদা বাংলা লোনগী ঈহৌ অমসুং মথং মথং য়াঙ্খৈমরি, হুম্ফুনিথোই, হুম্ফুতরুক, হুম্ফুমাপল অমসুং হুম্ফুতরাগী ঈহৌ কয়াগী মরম ওইনা হুম্ফুতরামাথোইদা লাক্লগা খরা খরা তৌনা শাগৎলকপা ঈহৌশিংদু মপুঙ ফারবা নীংতম লানগী শক্তম লৌখি। হুম্ফুতরামাথোইগী নীংতম লানসিদি য়াম্না পাক-শন্না, বাংলাগী তম্পাক শীন্না থোকখিবা থৌদোকনি। মসিগী ইৱায়-ইনিলনা থুংদবা মফম অমত্তা য়াওখিদে, নীংতম্বগী ফোং ফোং শারবা ইপোমনা তনিকহনখি লাইর-চিত্থবা খাক্তনা মীয়ামগী থম্মোয়।

বাংলা লমদমসিদা মণিপুরি কাঙলুপনা খুন্দাবা হৌবসি চহী চহুমগা য়াঙ্খৈদি হেল্লবনি। মণিপুরিশিং য়াম্না হরাও-তয়াম্বা পাম্বা, ইংনা-তপ্না হিংজবা পুন্সি-মিরেলমদা হৈনজবা কাঙলুপনি। অদুনা লমদমসিগী থৌদোক-থৌরম নত্রগা ঈহৌ কয়াদা থোয়না মায় ওনশিন্না খক শরূক য়াখিদে। রাজনীতিগী লমদগীসু খরা তোপতক্‌না লাপতক্‌না লৈখি। অদুনা নীংতম লানগী ঈহৌ শাগৎলকপগী তাঞ্জা কয়াদা থোয়না শরূক য়াখিদ্রবসু হকথেংননা নীংতম লান হৌরক্লবদদি মখোয়সু তুমিন্না লৈথোকপা ঙমখিদে। মমা লমদম্বু নুংশিজবগী অকনবা লীচিং অমনা মরম ওইদুনা মণিপুরি নহা কয়াসু থৱায় খূৎতা হাপ্তুনা লান্মী অমা ওইনা চোংথোক্তুনা হকথেংননা লানদা শরূক য়াখি। কনা কনাগুম্বনা নীংতম্বগীদমক থৱায়গী পোন্থা পিখিবসু য়াওই। মৈতৈ জাতিগী চাউথোকচনিঙাই ওইরবা থৌনা ফরবা নীংতম লান্মীশিং অমসুং শহিদশিংগী মতাঙদা খরদং শম্লপ্না পঞ্জগে হায়না ইজবনি মসিগী ৱারেং অসে।

নীংতম লান্মী ওইনা লানদা য়াওখিবা থৌনা ফবা মণিপুরি ফ্রিদম ফাইটারশিংঃ

১. শ্রী নীলমনি সিংহ (ননী), অপোকপাঃ নিমাই সিংহ, লালাদিঘিরপাড়, সিলেট।

সিলেট শহরগী লালাদিঘিরপাড় (মৈতৈনা শাপমলৈকাই কৌবা) খুলদা ১৯৪২ খ্রিষ্টাব্দগী নভেম্বরদা পোকখি শ্রী নীলমণি সিংহ (ননী)। লাইরিক য়াম্না তম্বা ঙমখিদে, ফটোগ্রাফার ওইনা থবক তৌখি। পাকিস্তানি আর্মিশিংগী ওৎ-নৈবা খাঙবা ঙম্মক্তবদৈ এপ্রিলগী অরোয়বদা ইন্ডিয়াদা চেনশিন্দুনা নীংতম লান্মীদা মিং চনখি। কমলাপুর লোহারবন্দ ইকো ট্রেনিং সেন্টারদা ট্রেনিং লৌখি। মেগী তাং ২০ দা ট্রেনিং লোইরবা ‘তুংদা লে. কর্ণেল মীর শওকত আলীগী (কোন্না লে. জেনারেল ওইখি) লুচিং মখাদা ভোলাগঞ্জ সাব-সেক্টরদা জয়েন তৌখি। অপারেশন কয়াদা হকথেংননা শরূক য়াখি। নীংতম্লবা মতুঙ ‘ক্যামেরা হাউস’ কৌবা দোকান অমা হাংদুনা ক্যামেরা শেম্বগী থবক তৌরম্মি। হৌজিক্তি অহল ওইরকপনা থবকতগী পোত্থারে।

২. শ্রী আদিত্য শর্মা (কংকর), অপোকপাঃ অম্বিকা চরণ শর্মা, মণিপুরি রাজবাড়ি, সিলেট।

শ্রী আদিত্য শর্মা (কংকর) সিলেট শহরগী মণিপুরি রাজবাড়িদা ১৯৫৫ খ্রিষ্টাব্দগী জানুয়ারিগী তাং ১দা পোকখি। এপ্রিলদা ইন্ডিয়াদা চেনশিনখি অমসুং মেঘালয়গী লোহারবন্দ ইকো ট্রেনিং সেন্টারদা নীলমণিগা পূন্না ট্রেনিং লৌখি অমসুং ট্রেনিং লোইরগা লে. কর্ণেল শওকত আলীগী মখাদা ৪ নং সেক্টরদা জয়েন তৌখি। মহাক হৌজিক মীরৈবাকতা লৈরি।

৩. শ্রী টি. অবনী কুমার সিংহ, অপোকপাঃ টি. গোপেশ্বর সিংহ, সুবিদবাজার, সিলেট।

শ্রী টি অবনী কুমার সিংহ সিলেট শহরগী সুবিদবাজার (মৈতৈনা খুনৌ লৈকাই কৌই) খুলদা পোকই। মহাকসু নীলমণি সিংহখোয়গা পূন্না ট্রেনিং লৌবা অমসুং লানদা চঙবনি। মহাকসু মীরৈবাকতা লৈরি।

৪. শ্রী কে. দিলীপ সিংহ, অপোকপাঃ কামেশ্বর সিংহ, শিবগঞ্জ, সিলেট।

শ্রী কে. দিলীপ সিংহ ১৯৭১ খ্রিষ্টাব্দগী সেপ্টেম্বরদা নীংতম লানদা শরূক য়াবা চঙবনি। লোহারবন্দ ট্রেনিং ক্যাম্পতগী ট্রেনিং লৌরবা ’তুংদা কর্ণেল সি. আর. দত্তগী (কোন্না মেজর জেনারেল ওইখি) মখাদা ইকো সেক্টর-৪দা থবক তৌখি। মহাক সেকশন কমা-ার ওইরম্মি। হৌখিবা ২০১৪ খ্রিষ্টাব্দগী ১৯ ডিসেম্বরদা শ্রী কে. দিলীপ সিংহ ঈশ্বরগী খুয়া তানখি।

৫. শ্রী এস. কিরন সিংহ, অপোকপাঃ ক্ষীর সিংহ, শিবগঞ্জ, সিলেট।

শ্রী এস. কিরণ সিংহ ১৯৫৪ খ্রিষ্টাব্দদা সিলেট শহরগী শিবগঞ্জতা পোকপনি। ১৯৭১ দা নীংতম লান হৌরকপা মতমদুদা মহাক সিলেটকী রাজা জি,সি, হাই স্কুলদা ক্লাশ নাইনদা তম্লি। সেপ্টেম্বরগী অরোয়বদা নীংতম লান্মী ওইনা চঙখি। লোহারবন্দ ট্রেনিং ক্যাম্পতা ট্রেনিং লৌরবা ’তুংদা ইকো-৪ নং সেক্টরদা মিং চন্দুনা লান য়াওখি। অপারেশন কয়াদা হকথেংননা শরূক য়াখি। নীংতম্লবা মতুঙ শ্রী এস. কিরণ সিংহ এসএসসি পাশ তৌখি অমসুং পলিটেকনিক ইন্সটিটিউটতগী ডিপ্লোমা ডিগ্রি লৌখি। চহী খরা মীরৈবাক্তা থবক তৌদুনা লৈরুই। হৌজিক্‌না সিলেটতা প্রাইভেট ফার্ম অমদা থবক তৌরি। ২০১৪ খ্রিষ্টাব্দদা মুক্তিযোদ্ধা সংসদ মহানগর কমান্ডকী মীখলদা এসিস্ট্যান্ট ইউনিট কমান্ডার ওইনা মায় পাকখি।

৬. শ্রী থাংজম জীতেন সিংহ, অপোকপাঃ বনমালী সিংহ, শিবগঞ্জ টিলাবাড়ি, সিলেট।

শ্রী থাংজম জিতেন সিংহ ১৯৭১ খ্রিষ্টাব্দগী সেপ্টেম্বরগী অরোয়বদা মরৈকায়মচা দিলীপ অমসুং কিরণখোয়গা লোয়ননা নীংতম লান্মী ওইনা চঙখি। লানদগী হল্লক্লগা চহী ৬/৭ মতুঙদা মহাক য়াম্না নহা ওইনা ঈশ্বরগী খুয়া তানখি।

৭. শ্রী এম. মনমোহন সিংহ, অপোকপাঃ বৈকুণ্ঠ সিংহ, ভিলেজ: গোবরখোলা, পো.অ.: গাজিপুর, হবিগঞ্জ (হৌজিক্কী লৈফমঃ কেওয়াপাড়া, মীরের ময়দান, সিলেট)।

১৯৪৭ খ্রিষ্টাব্দদা শ্রী এম. মনমোহন সিংহ হবিগঞ্জ জেলাগী চুনারুঘাট উপজেলাগী মনুঙ চনবা বিশগাঁও খুঞ্জাওগী গোবরখোলা হায়বা খুলদুদা পোকখি। ১৯৭১ খ্রিষ্টাব্দদা নীংতম লান হৌরক্লবা মতুঙ বিশগাঁওগী মৈতৈ প্রজাশিং লৈবা ঙমদদুনা ইন্ডিয়াদা চেনশিল্লগা থংনবা ত্রিপুরা রাজ্যগী খোয়াইনচিংবা মফম কয়াদা চঙজফম লৌখি। অদুবু মৈতৈশিংগী মনুঙদা কনা কনাগুম্বদি লানগী ফিবম য়েংখিগে হায়না য়ুম শংদুনা লৈহৌই। মদুগী মরক্তা মনমোহন অমসুং মাগী মখুড়া নরেন্দ্রসু য়াওরম্মি। এপ্রিল থাগী অহানবদা নোংমা পাকিস্তানি আর্মিগী লোয়নবা খূৎপু রাজাকারশিং লাক্তুনা য়ুম য়ুমদা লৈহৌনবা মণিপুরিশিংবু ফাবা হৌরকখি। মী তরুক ফাখি। মদুগী মনুঙদা মনমোহনগী মখুড়াসু য়াওখি। মখোয়বু মখূৎ-মমিৎ পুনশিন্দুনা পুরগা চুনারুঘাটকী মনাক্তা খোয়াই তুরেলগী তোর্বান্দা হাৎখি। মদুদা মথৱায় নুংঙাইখিদবা মনমোহন লম্মন খুম্বগী ৱাখলমদগী নীংতম লান্মীদা মিং চনখি। অমরপুর মহকুমাগী ওম্পিনগরদা ট্রেনিং লৌখি। মদুদগী ক্যাপ্টেন এজাজ আহমদকী লুচিং মখাদা নীংতম লানদা হকথেংননা শরূক য়াখি। লানগী মতমদা মহাক সেকশন কমান্ডার ওইরম্মি। অপারেশন কয়াদা শরূক য়াখি। মদুগী মনুঙদা থোইদোক্‌না পনবা য়াবদি কালেঙ্গাগী ডালাসুন্দর অপারেশননি, মদুদা মহাক্কী ফৈরূদা নোংমৈ গুলি পানখি। ১৫ ডিসেম্বরদা মনমোহন সিংহনা লুচিংবা নীংতম লান্মী কাঙবু অমনা চুনারুঘাট থানাবু নীংতমহনখি। শ্রী মনমোহন সিংহ মুক্তিযোদ্ধা সংসদ কমান্ডকী লুচিংবা অমসু ওইরম্মি।

৮. শ্রী কারাম নীল বাবু সিংহ, অপোকপা: সানারিক খোম্বা সিংহ, ভিলেজঃ গোবরখোলা, পো.অ.: গাজিপুর, হবিগঞ্জ।

শ্রী কারাম নীলবাবু সিংহ ১৯৭১গী মে থাদা নীংতম লান্মীদা মিং চনবনি। অমরপুর ওম্পিনগর ট্রেনিং সেন্টারদা ট্রেনিং লৌরগা ক্যাপ্টেন এজাজ আহমদকী লুচিংমখাদা লানদা শরূক য়াখি। মহাক সেকশন কমান্ডারসু ওইরম্মি। মিংচৎলবা কবি অমসু ওইরিবা কারাম নীলবাবু সিংহ নীংতম্লবা মতুঙ মুক্তিযোদ্ধা সংসদ গাজিপুর ইউনিয়নগী কমান্ডারগী দায়িত্বসু পুরম্মি। মহাক ২০০৬ খ্রিষ্টাব্দগী ১৭ মেদা মশাগী লাইনানা মরম ওইদুনা ঈশ্বরগী খুয়া তানখি।

৯. শ্রী নীলচান দত্ত, ভিলেজঃ দুধপাতিল, পো.অ.: গাজিপুর, হবিগঞ্জ (হৌজিক্কী লৈফম: কেয়ার অফ-সত্যরায়, ব্লক-জি, রোড-২, মীরপুর-১, ঢাকা)।

শ্রী নীলচান দত্তসু ১৯৭১ খ্রিষ্টাব্দগী ১০ মেদা মনমোহন সিংহ অমসুং কারাম নীলবাবুগা লোয়ননা অমুক্তদা নীংতম লান্মী ওইখি। ট্রেনিং অমসুং লান য়াওবসু মখোয় পূন্না য়াওমিন্নখি। লান হৌগৎলকপদা মহাক মথৱায় নুংঙাইতবা অমদগী পাকিস্তানি লান্মী অমতা ওইরবসু মখূৎমক্‌না হাৎপা ঙমদ্রিফাওবা চাক চাবদা য়েঞ্ছাং চারোই হায়না ৱাশকখি। ৱাশক অদু মহাক য়াম্না চেৎনা ঙাকখি অমসুং লানগী লোইরমদাইদা লাক্লগা পাকিস্তানি আর্মি অমবু মখূৎমক্‌না হাৎলগা য়েঞ্ছাং চাবা হৌখি।

১০. শ্রী কেএইচ. নীলবাবু সিংহ, অপোকপাঃ মৌর সিংহ, ভিলেজ: যাত্রাগাঁও, পো.অ.: গাজিপুর, হবিগঞ্জ (হৌজিক্কী লৈফম: সুবিদবাজার, সিলেট)।

১৯৫৫ খ্রিষ্টাব্দগী ১৫ ফেব্রুয়ারিদা শ্রী কেএইচ. নীলবাবু সিংহ হবিগঞ্জ জেলাগী চুনারুঘাট উপজেলাগী মনুঙ চনবা বিশগাঁওগী যাত্রাগাঁও খুলদা পোকখি। ১৯৭১ খ্রিষ্টাব্দগী লোইরমদাইদা এ কে শেরামগী মরম ওইনা মহাক কমিউনিস্ট পার্টি, ন্যাপ অমসুং ছাত্র ইউনিয়ননা থৌরাংবা নীংতম লান্মীদা শরূক য়াখি। আসামগী তেজপুর সালনিবাড়ি ট্রেনিং ক্যাম্পতা ট্রেনিং লৌখি। অদুবু ট্রেনিং লোইরকপদা ভারতনা বাংলাদেশপু রিকগনিশন পীদুনা হকথেংননা লান হৌরক্তুনা বাংলাদেশকী নীংতম্বা লাক্লবদা নীলবাবুখোয়গী গ্রুপতো লানদা য়াওবা ফংহৌদে। ২০১৩ খ্রিষ্টাব্দগী ১৩ অক্টোবরদা মহাক খঙহৌদনা লাইগী খুয়া তানখি।

১১. শ্রী মাইবম প্রমোদ সিংহ, অপোকপাঃ মাইবম বাবাতোন সিংহ, ফাতাবিল, গাজিপুর, হবিগঞ্জ।

শ্রী মাইবম প্রমোদ কেএইচ নীলবাবুগা লোয়ননা অমুক্তদা লান্মী ওইখিবনি। বাংলাদেশ নীংতম্লবা মতুঙ চহী খরগী মতুঙদা মহাক য়াম্না নহা ওইনা ঈশ্বরগী খুয়া তানখি।

১২. শ্রী খোমদ্রাম প্রতাপ চন্দ্র সিংহ, অপোকপাঃ খো. রাজমোহন সিংহ, ভিলেজ: নলধরী, পো.অ.: কর্মধা, কুলাউড়া, মৌলভীবাজার।

১৯৪৯ খ্রিষ্টাব্দগী ৩ ফেব্রুয়ারিদা পোকপা শ্রী খোমদ্রাম প্রতাপ চন্দ্র সিংহ ১৯৬৩ খ্রিষ্টাব্দদা এসএসসি পাশ তৌখি। কলেজ তম্লিঙৈদগীনা ছাত্র ইউনিয়ন য়াওদুনা রাজনীতিগী লমদা কুমথখি। কমিউনিস্ট পার্টিগীসু মেম্বার ওইখি। মে থাগী থাখায়দা নীংতম লান্মী ওইনা চঙখি। কৈলাশহরগী টিলাবাজারদা ট্রেনিং লৌখি। মদুদগী ক্যাপ্টেন হামিদকী মখাদা ৪ নং সেক্টরদা মিং চন্দুনা লানদা শরূক য়াখি। অপারেশন কয়াদা শরূক য়াখি। মদুগী মনুঙদা মহাক্‌না ময়েক লানা নিংশিংলিবদি কর্মধা ইউনিয়ন অফিস খুদুম চন্দুনা খূৎলাই কয়াদং ফংখিবদুনি। বাংলাদেশ নীংতম্লবা মতুঙ প্রাইমারি স্কুলগী ওজা ওইখি। হৌজিক থবক্তগী পোত্থারে। কমিউনিস্ট পার্টি অব বাংলাদেশ (সিপিবি)গী কুলাউড়া উপজেলা কমিটিগী প্রেসিডেন্ট ওইনা ফম পুরি।

১৩. শ্রী ঙৈরাংবম অরবিন্দ সিংহ (লৈরিজাউ), অপোকপাঃ মানিক সিংহ, ভিলেজ: নলধরী, পো.অ.: কর্মধা, কুলাউড়া, মৌলভীবাজার।

১৯৭১ খ্রিষ্টাব্দদা নীংতম লান হৌগৎলকপদা নীংতম লান্মী ওইনা চঙখিবনি। মদুগী মমাঙদগী মহাক ন্যাপকী রাজনীতিদা য়াওরম্মি। লানগী মতমদা মহাক য়াম্না থৌনা ফবা লান্মী অমনি হায়না ময়াম্না শোন্নখি। হৌজিক মীরৈবাকতা লৈরি।

১৪. শ্রী য়ূমখাম ললিত সিংহ, অপোকপাঃ য়ূমখাম বাবাতোন সিংহ, ভিলেজ: নলধরী, পো.অ.: কর্মধা, কুলাউড়া, মৌলভীবাজার।

শ্রী য়ুমখাম ললিত সিংহ লৈরিজাউগা অমুক্তদা লানদা চৎমিন্নবনি। মহাকসু ন্যাপ রাজনীতিদা থৱায় য়াওরম্বা মীনি। মহাকসু হৌজিক মীরৈবাকতা লৈরি।

১৫. শ্রী হেনাম সানাতোন সিংহ, অপোকপাঃ হেনাম বাবাহন সিংহ, ভিলেজঃ নলধরী, পো.অ.: কর্মধা, কুলাউড়া, মৌলভীবাজার।

শ্রী হেনাম সানাতোন সিংহ লৈরিজাউ অমসুং ললিতগা লোয়ননা পূন্না লানদা চঙবনি। লানদা য়াম্না থৌনা ফৈ হায়না ময়াম্না থাগৎনৈ। লান লোইর’ মতুঙ অতৈ নীংতম লান্মী ময়াম্মগা লোয়ননা মৌলভীবাজারগী গভর্ণমেন্ট হাইস্কুলদা লৈরিঙৈদা ১৮ ডিসেম্বর তারিখতা পাকিস্তানি আর্মিনা ফুমলম্বা মাইন পোকখাইরকপদা মী ময়াম্মা শিখি। মদুগী শহিদ ওইবশিংদা সানাতোনসু য়াওখি।

১৬. শ্রী হেনাম প্রহ্লাদ সিংহ, ভিলেজঃ নলধরী, পো.অ.: কর্মধা, কুলাউড়া, মৌলভীবাজার।

১৯৪৬ খ্রিষ্টাব্দগী ১০ অক্টোবরদা পোকখি। ১৯৭১ খ্রিষ্টাব্দগী জুলাই থাদা নীংতম লান্মী ওইনা চঙখি। সেক্টর কমান্ডার সিআর দত্তগী মখাদা থবক তৌখি। অপারেশন কয়াদা শরূক য়াখি। অদুগুম্বা অপারেশন অমদা বোমা পোকখায়বগী মখোলদা মনা পংশিনখি। মদুদগী হৌবা মহাকপু লানদা থাদনা ক্যাম্পকী চাবা-থকপা পান্নবগী থবক তৌহনখি।

১৭. শ্রী ঙৈরাংবম দেবেন্দ্র সিংহ, অপোকপাঃ মানিক সিংহ, ভিলেজ; নলধরী, পো.অ.: কর্মধা, কুলাউড়া, মৌলভীবাজার।

শ্রী দেবেন্দ্র সিংহ ১৯৬৩ খ্রিষ্টাব্দদা এসএসসি পাশ তৌখি। আওয়ামী লীগকী রাজনীতি তৌরম্মি। মেগী তাং ৪দা নীংতম লান্মীদা চঙখি। মাছিমপুরদা ট্রেনিং লৌখি। ট্রেনিং লোইরগা কমান্ডার আবদুল হামিদকী মখাদা ৪নং সেক্টরদা থবক তৌখি। অপারেশন কয়াদা শরূক য়াখি। মদুগী মনুঙদা শিংথাবা য়াবদি চাতলাপুর অমসুং মুরোইছড়াগী অপারেশননি। লানগী মনুঙদা মহাক পাকিস্তানি আর্মিগী খূৎতা অমুক বন্দি ওইখি। অদুবু মরাইবক ফবদগী আর্মি অমগী মপালদগী মুক্তি ফংখি।

১৮. শ্রী এল. হরেন্দ্র সিংহ, অপোকপাঃ এল. বিদ্যা সিংহ, ভিলেজঃ বরইতলি, পো.অ.: সাগরনাল, কুলাউড়া, মৌলভীবাজার।

১৯৫৪ খ্রিষ্টাব্দগী ৯ এপ্রিলদা পোকখি। ১৯৭১ খ্রিষ্টাব্দদা লানগী মতমদুদা মহাক এসএসসি পরীক্ষা থাগদবা ছাত্র ওইরম্মি। লান হৌরক্লবদা লৈকাই ময়ামগা লোয়ননা ইন্ডিয়াদা চেনশিন্দুনা ধর্মনগরগী উপ্তাখালি ক্যাম্পতা লৈখি। মদুদগী কমান্ডেন্ট মানিক চৌধুরীনা রিক্রুট তৌদুনা নীংতম লান্মী ওইনা থাবনি। ট্রেনিং লোইরগা ফ্লাইট লেফটেনেন্ট কাদিরগী লুচিং মখাদা ৪ নং সেক্টরগী কুকিতল সাবসেক্টরদা মিং চন্দুনা লান য়াওখি। মহাক্‌না য়াওখিবা অপারেশন কয়াগী মনুঙদা থোইদোক্‌না শিংথাবা য়াবদি জুড়ী ক্যাম্প খুদুম চনবগী অপারেশনদুনি। বাংলাদেশ নীংতম্লবা মতুঙদা এসএসসি, এইচএসসি অমসুং বিএ পাশ তৌখি। ১৯৮০ খ্রিষ্টাব্দদা সোনালী ব্যাংককী চাকুরিদা জয়েন তৌখি অমসুং ২০১৪ খ্রিষ্টাব্দদা থবক্তগী পোত্থাখি। মহাক হৌজিক শ্রীমঙ্গলদা লৈরি।

১৯. শ্রী থোঙাম ধীরেন্দ্র সিনহা, অপোকপা: ধ্বজ সিংহ, রামনগর, শ্রীমঙ্গল, মৌলভীবাজার।

১৯৫২ খ্রিষ্টাব্দগী ৩ জানুয়ারিদা পোকই। ১৯৭১ খ্রিষ্টাব্দদা কলেজতা তম্লিঙৈদা নীংতম লান হৌরকপদগী মহাক ইন্ডিয়াদা চেনশিন্দুনা নীংতম লান্মী ওইখিবনি। কলেজ তম্লিঙৈদা মহাক ছাত্র লীগকী রাজনীতি তৌরম্মি। ট্রেনিং লৌরবা ’তুংদা শ্রী ধীরেন্দ্র সিনহা ক্যাপ্টেন সাজ্জাদুর রহমানগী মখাদা ৪ নং সেক্টরদা থবক তৌখি। বাংলাদেশ নীংতম্লবা মতুঙ মহাক প্রাইমারি স্কুলগী ওজা ওইখি। ২০০৪ খ্রিষ্টাব্দদা মহাক প্রাইমারি স্কুলগী হেডমাস্টার ওইনা থবকতগী পোত্থাখি। মহাক খুন্নায়গী থবক-থৌরম কয়াদা শরূক য়াবা জাতিগীদমক্তা ৱাখল তৌবা মীনি।

২০. শ্রী পুতুল সিংহ, অপোকপাঃ কালাচান সিংহ, রামনগর, শ্রীমঙ্গল, মৌলভীবাজার।

শ্রী পুতুল সিনহা ১৯৪৯ খ্রিষ্টাব্দগী ২৪ ফেব্রুয়ারিদা পোকই। ঢাকা শেরেবাংলানগরদা কৃষি ডিপ্লোমা কোর্সতা তম্লিঙৈদা ১৯৭১ খ্রিষ্টাব্দগী নীংতম লান হৌবনি। মহাক রাজনীতিগী ৱাখল লৈবা মীনি, ১৯৭১গী ৭ মার্চতা বঙ্গবন্ধু শেখ মুজিবনা ঢাকা রেসকোর্সকী লম্পাকতা পীখিবা ঐতিহাসিক ভাষণদু মহাক মশামক মফমদুদা য়াওনা তাহৌবা মীনি। লোহারবন্দ ট্রেনিং ক্যাম্পতগী ট্রেনিং লৌরবা’তুংদা ক্যাপ্টেন সাজ্জাদুর রহমানগী মখাদা ৪ নং সেক্টরদা থবক তৌখি। বাংলাদেশ নীংতম্লবা মতুঙ শ্রী পুতুল সিনহা সরকারগী লোয়শঙ’মদা থবক তৌরম্মি। হৌজিক পোত্থারে।

২১. জনাব মো. আব্দুল হামিদ, তেঁতইগাও, আদমপুরবাজার, কমলগঞ্জ।

১৯৫৩ খ্রিষ্টাব্দগী ১৩ সেপ্টেম্বরদা পোকই। ১৯৭১ খ্রিষ্টাব্দগী লানগী মতমদুদা মহাক চট্টগ্রামগী নারাংগিরি পাইলট হাইস্কুলগী ছাত্র ওইরম্মি, এসএসসি ক্যান্ডিডেটনি। কেআরসি রেয়ন মিলদসু থবক তৌরম্মি। ছাত্র ইউনিয়নগী রাজনীতিগা মরী লৈনরম্মি। লান হৌরক্লবদা মো. আবদুল হামিদ থবক তৌমিন্নবা মী ১০০ মুককা পূন্না নীংতম লানদা শরূক য়াখি। ওম্পিনগর মেগাভাট ট্রেনিং সেন্টারদা ট্রেনিং লৌখি। মহাক মখোয়গী গ্রুপতুগী এসিস্ট্যান্ট কমান্ডার ওইখি। মে থাদা নকশী হায়বা মফমদুদা শোক্‌নখিবা লান অমদা মহাক্কী লোয়নবা নীংতম লান্মী ১১ থৱায় থাখি। মাদি মরাইবক ফবদগী হিংহৌরি। নীংতম্লবা মতুঙ লাইরিক তমথখি অমসুং হান্না থবক তৌরম্বা চন্দ্রঘোনাগী কেআরসি রেয়ন মিলদা অমুক চাকরিদা চঙখি। ২০০২ খ্রিষ্টাব্দদা থবকতগী পোত্থাখি। মুক্তিযোদ্ধা সংসদ কমলগঞ্জ উপজেলা কমান্ডকী এসিস্ট্যান্ট কমান্ডার ওইনা ২০০৪দা পাঙথোকখিবা মীখলদা মায় পাকখি।

নীংতম লানগী মতমদা পাকিস্তানি আর্মি অমসুং মখোয়গী কাঙবুশিংগী খূৎতা থৱায়গী পোন্থা পীদুনা শহিদ ওইখ্রবা মণিপুরি অথৌবশিংঃ

১. শ্রী খা. রমন সিংহ, আম্বরখানা, সিলেট; ২. শ্রী নোংমাইথেম গৌরমোহন সিংহ, গোয়াইপাড়া, সিলেট; ৩. শ্রী খো. খগেন্দ্র সিংহ (বোগে), সুবিদবাজার, সিলেট; ৪. শ্রী খো. খোমদোন সিংহ, সুবিদবাজার, সিলেট; ৫. শ্রী কারাম আতেন সিংহ, ভিলেজ: গোবরখোলা, গাজিপুর, হবিগঞ্জ; ৬. শ্রী ই. কূলচন্দ্র সিংহ, ভিলেজ: গোবরখোলা, গাজিপুর, হবিগঞ্জ; ৭. শ্রী থোকচোম কৃষ্ণমোহন সিংহ, ভিলেজ: গোবরখোলা, গাজিপুর, হবিগঞ্জ; ৮. শ্রী থোকচোম অক্ষয় কুমার সিংহ, ভিলেজ: গোবরখোলা, গাজিপুর, হবিগঞ্জ; ৯. শ্রী এম. নরেন্দ্র সিংহ, ভিলেজ: গোবরখোলা, গাজিপুর, হবিগঞ্জ; ১০. শ্রী ৱাহেংবম গৌরচন্দ্র সিংহ, ভিলেজ: ছোটধামাই, জুড়ি, মৌলভীবাজার; অমসুং ১১. শ্রী তমাল সিংহ, ভিলেজ: মঙ্গলপুর, পো.অ.: কেরামতনগর, কমলগঞ্জ, মৌলভীবাজার।

COMMENTS

WORDPRESS: 0
DISQUS: