ফেব্রুৱারী, ২১, ২০২১ ইন্তরনেস্নেল মাদর লেঙ্গুএস দে

Homeআর্টসৱারেং

ফেব্রুৱারী, ২১, ২০২১ ইন্তরনেস্নেল মাদর লেঙ্গুএস দে

“Fostering multilingualism for inclusion in education and society,” করম্না কাওগনি মালেমগী মীয়াম্না নুমিৎ অসিবু। লোলগীদমক ঈখেংনা ইরম্লবা পুৱারীন

তোংব্রম অমরজিৎ

Fostering multilingualism for inclusion in education and society,”

করম্না কাওগনি মালেমগী মীয়াম্না নুমিৎ অসিবু। লোলগীদমক ঈখেংনা ইরম্লবা পুৱারীনি বঙ্গলাদেশকি। মালেমসিদা লৈরিবা মমা লোল লৈজবা অপিকপা কাংলুপ ফুরুপ কয়াদা থৌনাগী মৈরি চুখৎলমখিবনি বঙ্গলানা। ইকায়খুম্নফম থোকই লোল অমনা লোল অমবু। অদুনা য়ুনেস্কোনা মীফম অমা ১৯৯৯গী নভেম্বর ১৭তা ফমদুনা ফেব্রুৱারী ২১বু ইন্তরনেসনেল মাদর লেঙ্গুএস দে হায়না লাওথোক্লকখি। অসুম্না মথংগী চহী ২০০০গী ফেব্রুৱারী ২১দগী হৌদুনা মালেম শিনবা থুংনা মালেমগী ইমালোলগী নুমিৎ হায়না নীংশিং থৌরম পাঙথোকপা হৌখি।

মালেমসিদা খুন্দা লৈতাদুনা লৈরিবা মীওই ফুরুপ কাংলুপ কয়াগী মরক্তা ই-পাউ ফাওনদুনা, লাইরিক লাইশুগী লমদা, সাইন্স অমসুং তেকনোলোজিগী হীরমদা, পুৱারী নৈনরকপদা অমদি হীরম কয়াদা খ্বাইদগী মরু ওইরিবসি লোল হায়বসিনি। লোল হায়বসিদা য়াওরি লাইনিং লাইশোল, কলচর, পুৱারী, আইদেন্তিতি। মীওইবগী লৌশিংগী পূক্কৈসু মীরোল অমদগী মীরোল অমদা চিন্থাংদা অদুগা অইবা লাইরিকশিংদা মথং মথং শমথাদুনা লাক্লি। মসিদা লোল হায়বসি লৈরমদ্রবদি লমলক্কী শা-কৈ, ঊচেক ৱায়াগী পুন্সি মহিংগা খেন্নবা থোইনা লৈরমলোই। লোল হায়বসি লৈরম্বনা ঙসি মীওইবনা থা লৈবাক্তা খোংদাবা ফাওবা ঙম্লকলি। ইং ২০২১গী ফেব্রুৱারী ফাওবদা মালেমসিদা লৈরিবা মীওই মশিং অসি ৭ .৮ বিলিয়ননি। য়ামখ্রবা মীয়াম অসিনা নুমিৎ খুদিং পাউ ফাওনদুনা হীংলিবা চৎলিবা পুম্নমক লোল হায়বসিগী মেদিয়ম অসিদনি।  অদুনা হায়নরিবনি লোলনা ইমানি ময়েকনা ইপানি। তৎন-থানবা য়াদ্রবা তাইবঙ মপোক্কী শরুক অমা হায়রবদি ইমালোল হায়বসিনা ওইগনি।

মালেমগী ইমালোলগী নুমিৎকী পুৱারীঃ  

করিগীদমক ফেব্রুৱারী ২১বু পৃথিবী শিনবা থুংনা মালেমগী ইমালোন নুমিৎ হায়না পাংথোক্লিবনো হায়বসি নৈননিংঙাইনি। মীওইবা খুন্নাইদা লৈরিবা তোঙান তোঙানবা লাইনিং লাইশোল চৎপা মীওই ফুরুপ কাংলুপ কয়া লৈরি। মখোয় খুদিংমক্কি মাগী মাগী তোপ তোপ্পা লোল, ময়েক কয়া লৈরি। অমগা অমগা অমত্তা মান্নদে। মীওইবনা মালেমদা লৈবা হৌরকপদগী হৌনা অকনবনা অশোনববু তুহৎপা অদুগা অপিকপা ফুরুপ কাংলুপপু পাঙ্গল কনবা লৈবাক নীংথৌনা লোই চন্দুনা কন থৌরবা লৈবাকশিং অদুগী মখাদা মীখা পোন্দুনা লৈখিবা লৈবাক কয়াগী পূৱারী কয়া লৈরি। অসিগুম্বা মীশিং য়ামজদবা অপিকপা ফুরুপশিংদি অচৌবা ফুরুপশিংদা তিনশিনখিদুনা মশাগী লোল, কলচর অমদি দাইদেন্তি মাংখিবা য়াওদবা নত্তে। মীওই লাখ কয়ানা মতম অমদা ঙাংনরম্বা অদুগা মরু ওইবা কলচরগী, লাইনিং লাইশোলগী তেক্স কয়া ইরম্লিবা সংস্কৃত হায়বা লোল অসিফাওবা হৌজীক মসিবু ঙাংনরিবা, ইনরিবা মীওই মশিং মরাং কায়না লৈশিল্লকত্রিবনি। ইমা লোনগী মরু ওইবসি মালেমসিদা বঙ্গলাদেশনা নৌনা মীকপ থোকহনখিবনি হায়না লৌদবা য়ারোই। ইমালোন হায়বসিগীদমক থৱায়না পোন্থা পীবা হায়বসিসু মালেমদা অতাংবনি। মসি পুম্নমক বঙ্গলাদেশকি পুৱারীদা সনাগী ময়েকনা ইদুনা লৈরি। ইং ১৯৪৮কি মতমসিদা পাকিস্তান লৈঙাক্কি লুচিংবা জিন্নাহনা ধাকাগী রেসকোর্স লম্পাক্তা পাংথোকপা মীয়ামগী মীফম অমদা পাকিস্তান লৈবাক্কী স্তেতকি লোলদি উর্দু নত্তনা অতোপ্পা লোলনা ওইবা য়ারোই হায়না লাওথোকলকখি। করিগুম্বা মসিবু থৌওইদ্রবদি মীওইশিং অদু পাকিস্তানগী য়েকনবা ওইনা লৌগনি হায়রক্লবদা বঙ্গলানা মমা লোল ওইজরিবা মহৈরোইশিং অমদি নহারোলশিং তুমিন্না লৈথোকপা ঙমখিদে। য়ানিংদবগী খোল্লাও কয়া থোক্লকখি। ঢাকা সহর অমদি অতৈ মফমশিংদা শাথিরবা লম্মৈ চাকপগুম্না ইহৌ শাগৎপা অমদি য়ানিংদবগী খোল্লাও হেনগৎলকখি। মরম চাবা ইহৌ ওইবনা অখঙ অহৈ ওজা কয়াসু য়াওশিল্লকখি। চোংথোকনরকখি মমালোল বঙ্গলাগীদমক অতৎ অখম লৈতনা জিন্নাহগী ৱাহৈশিংদুগী ময়োক্তা লেপ্লদুনা জয় বঙ্গলা লাওরদুনা। লোলগী ঈহৌ খংকন কনশিল্লকখি ১৯৫২গী ফেব্রুৱারি হেক য়ৌশিল্লকপদা। মহৈরোইশিংগী ঈহৌ শাথিনা কনশিল্লকখি। ধাকাগী মফম কয়াদা খুৎলায় পায়বা সিফাইনা পুমচায় চায়দুনা ইরাং লাকসিন্নবা হোৎনখি। ইস্ত বেঙ্গল লেজিস্লেতিব এসেমব্লীগী অকোয়বদা মশিং য়াম্লবা সীফায়শিংনা কোয়শিন্দুনা ঙাক শেনখি। অসোমদা মশিং য়াম্লবা মহৈরোইশিংনা গ্রুপ শেমদুনা লেপ্তনা খোল্লাও লাওরকখি, বঙ্গলাবু স্তেত লেঙ্গুএস ওইহল্লু হায়না। নুমিৎ অসি এসেমব্লীগী বাজেৎ সেসন হৌবা নুমিৎসু ওইখি। ঈরাং কনশিল্লকখিবনা লানবুং অমা ওইখি। ঈরাং লাকশিন্নবা তিয়ার গ্যাস কাপখি, লীচৈনা কনখি। চরাংনখি। মহৈরোই কয়া অশোক অপন নংখি। নোংমৈ মখোলনা নিনখি। নুমিৎ অসিগী নুমিদাংৱাইমদদি পুলিসনা ৱার্নিং অমত্তা পীদনা ওপন ফায়র তৌখি। ধাকা মেদিকেল কলেজগী কেম্পস্তা ঈখেংলক্তা পুন্সি পিখম্নখি মনিকগঞ্জ কলেজগী মহৈরোই রাফিকুদ্দিন পুলিসনা মথোং মরম খঙদনা কাপশিল্লকখিবা নোংমৈ মরুনা পান্দুনা। মীওই কয়া অমনা শাথিনা শোক্তুনা ধাকা মেদিকেল কলেজদা লায়কন্নখি। নুমিৎসিমক্তদা ধাকা য়ুনিভর্সিতিদা পোলিতিকেল সাইন্সতা তম্লিবা আবুল বরকতসু নোংমৈনা পান্দুনা লায়কন্নবা ঙমদনা অরোইবা য়াহীপ তানখি। লাইবক থিবা নুমিৎ অসিগী নোংমৈ কাপ্পগী থৌদোক অসিদা কস্তমস দিপার্টমেন্টতা থবক তৌবা আব্দুস সলামসু লায়কন্নবা ঙমখিদে। দুকান ফমদুনা লৈজবা আবদুল জব্বারসু পুলিসকী নোংমৈনা পান্দুনা অরোইবা য়াহিপ তানখি।ইমালোলগী ঈহৌদা থৱায়না পোন্থা পীখ্রবা অথৌবশিং অদুগী মফমদা অরোইবা ওইনা ইকায় খুম্নবা উৎপগী মীয়ামগী খোঙচৎ অমা চৎখি মহৈরোই কয়ানা অমুবা বেজ থেত্তুনা মথংগী নুমিত্তা। মমালোল বঙ্গলা থাদোক্লগা উর্দু ঙাংগদবনি হায়দুনা নম্ফুদা তৌরক্লিবা থৌওং অদুদা তপথবা ঙমখিদে। খোয়শাওনবা হেল্লকখি। খোঙচৎ অসিবু থুগায়নবা খুৎলাই পায়বা পুলিসশিংনা অমুক্কা ওপন ফায়র তৌখি। লাইবক থিবা নুমিৎ অসিগী থৌদোক্তা ধাকা হায়কোর্টতা থবক তৌদুনা লৈবা সফিউর রহমান পুন্সি পীখম্নখি। বঙ্গলা লোলগীদমক চংশিনখিবা খোঙজং অসিদা অথৌবা মঙানা থৱায়না পোন্থা পীখি। লোলগী কল্লবা ঈহৌ অসিনা মরম ওইদুনা বাংলাদেশ কৌবা লৈবাক অমা শেমখি ১৯৭১দা।

করম্না কাওগনি মালেমগী মীয়াম্না নুমিৎ অসিবু। লোলগীদমক ঈখেংনা ইরম্লবা পুৱারীনি বঙ্গলাদেশকি। মালেমসিদা লৈরিবা মমা লোল লৈজবা অপিকপা কাংলুপ ফুরুপ কয়াদা থৌনাগী মৈরি চুখৎলমখিবনি বঙ্গলানা। ইকায়খুম্নফম থোকই লোল অমনা লোল অমবু। অদুনা য়ুনেস্কোনা মীফম অমা ১৯৯৯গী নভেম্বর ১৭তা ফমদুনা ফেব্রুৱারী ২১বু ইন্তরনেসনেল মাদর লেঙ্গুএস দে হায়না লাওথোক্লকখি। অসুম্না মথংগী চহী ২০০০গী ফেব্রুৱারী ২১দগী হৌদুনা মালেম শিনবা থুংনা মালেমগী ইমালোলগী নুমিৎ হায়না নীংশিং থৌরম পাঙথোকপা হৌখি।

মালেমসিদা লৈরিবা লোলগী ফিভমঃ

মালেমসিদা খুন্দাদুনা লৈরিবা য়ামখ্রবা মীওই বিলিয়ন কয়া অসিনা ঙাংনরিবা লোল অসি ওন্থোকনা য়ামই। রেকোর্দকী মতুং ইন্না মালেমসিদা লোল ৬০০০ ঙাংনরি। ঙাংনরিবা লোল খুদিংমক মশাগী ময়েক লৈজবদি মশিং য়ামদে। লাক্কদৌরিবা চহীচাম্মা খরসিদা লোল ফনা য়াম্নদি মাংখিবগী মীপায়বা পোক্তবা নত্তে। মসিগী মরম কয়া য়ুনেস্কোনা পীরি। মীশিং য়াম্বা কাংলুপশিংগী মরক্তা লৈবা অপিকপা ফুরুপ কাংলুপশিংনা মশাগী লোল ময়েক লৈজরগসু লোল অদু ইমুংদা ঙাংবদগী হেণ্ণা শিজিন্নদ্রবা অদুগা হৌরক্লিবা অঙাংশিংনা মমালোল অদু শিজিন্নরক্তবা মতমদা তপ্ন-তপ্না অদুম লোল অমা মাংশিল্লকনবগী মরমশিং ওইরকই। অদুগা করিগুম্বা লোল অমা মমা মপা ওইবশিংনদি ঙাংনবা অদুগা মচা মশুশিং অদুনদি খঙদ্রবা অদুগুম্বা লোল অদুসু মুৎখিবা য়াবগী মীপায়বা লৈরি। লোল কয়াদি খঙনা খঙনা মালেমগী লৈমায়দগী মূৎখিবা য়াওরক্লি। থাজবা ঙম্লোই কমদৌনা লোল অমনা মুৎখিবনো হায়বসি। মেক্সিকোগী খা থংবদা লৈবা অয়াপা খুঙ্গং অসিদা ঙাংনরিবা অয়াপানেকো কৌবা লোল অসি ২০শুবা চহীচাগী তংখায় চল্লকপা মতমদনি মরাই চাইথরকখি। ফুরুপ অসিগী মীওইশিংসু মশিং য়ামশিল্লকখিদে। নৌনা হৌরক্লিবা অঙাংশিংনা মমালোলদা লাইরিক তম্বা অদুগা ৱারী ৱাতাই শানরকখিদে। স্পেনিসখক্তমক ঙাঙগদবনি হায়রকখি। হীংনবা হোৎনবদা অপিকপা ফুরুপ কাংলুপশিংনা মালেমগী মফম কয়াদা খুন হোংদুনা চৎনখি। মসিদা য়াওখি অয়াপানেকো লোল ঙাঙলিবা মীওইশিংসু। লোল অমনা হীংদুনা লৈরিবসি ঙাঙনদুনা লৈবা অদুদনি অদুগা মদু হেক ঙাঙনখিদবা মতমদদি অদুমক কাওথোক্লকপা তাবনি। মসিমক থোকখি অয়াপানেকো লোলদসু। মানুয়েল সেগোবিয়ানা পাম্বৈ কয়া পুথোকচদুনা মমালোল অয়াপাণেকোবু হীংনবা কন্না হোৎনজরমখি। থম্মোয় শোকনা মহাক হায়, ঐনা অঙাং ওইরিঙৈদদি মীপূম খুদিংমক ইমালোল অসি ঙাঙলম্মী। অদুদগীদি শিজিন্নবগী চাং অসি তপ্ন-তপ্না হন্থরকখি। হৌজীক্তি ঐহাকনা শিখিবদা লোল অসিসু য়াওনা অসুম শিখ্রনি। মসিদি খুদম খরগী ৱানি। অসিগুম্বা অপিকপা কাংলুপ ফুরুপ কয়া লৈরি মালেমসিদা। অদুনা ফেব্রুৱারী ২১ মালেমগী ইমালোলগী নুমিৎ হায়দুনা লৈবাক কয়াদা পাঙথোকনবসু পুকনিং থৌগৎলি য়ুনেস্কোনা।

ইন্দিয়াদা সাহিত্যা একাদেমিনা অমদি কন্সতিত্যুসন্না শকখনঙলবা লোল ২২ লৈরি। মনিপুরী লোলসু মসিদা য়াওরি। কমদৌনা ইন্দিয়ান কন্সতিত্যুসন্না শকখঙখিবনো হায়বদুগী পুৱারী লৈতবা নত্তে। মশাগী লোল ময়েক লৈজবা মনিপুরী লোল অসি লৈরম্বনা ঙসি চাওথোকচনা হীংবা ঙম্লি মনিপুরীশিংনা। মনিপুরনা ইন্দিয়াদা তিল্লবা তুংদা কন্সতিত্যুসনগী নীপালশুবা সেদ্যুলদা য়াওদনা মশক খঙদনা ফনা কুইনা লৈখি। তৌইগুম্বসুং সাহিত্য একাদেমিনদি মনিপুরী লোলবু শকখঙখি ১৯৭২দা। পাচা মীতৈগী নোবেল ‘ইম্ফাল অমসুং মাগী ঈশিং নুংশিৎকী ফিভম’দা অহানবা মনিপুরী লোলগী ওইনা সাহিত্য একাদেমি মানা পীখি। নীপালশুবা সেদ্যুলদা য়াওদবগী অকনবা খোঙজংশিং চংশিনখি। ঐখোয়গী অইবা অইবীশিং তুমিন্না লৈথোকপা ঙমখিদে। ১৯৯২দা, কংলাগী মনিং থংবদা লৈরিবা জোনস্তোন স্কুলগী নোংপোকথংবা মায়কৈদা জনুৱারী ৯দগী ফেব্রুৱারী ৬ফাওবা মনিপুরগী অইবশিংনা খুত্থাং চারা হেনবগী কল্লবা খোঙজং অমা চংশিনখি মনিপুরী লোলবু নীপালশুবা সেদ্যুলদা চন্নবা হায়দুনা। কাওবা য়াররোইদবা তাংকক অমনা শকনাইরবী অইবী এম কে বিনোদিনি অমসুং তি থোইবী দেবীনা লুচিংদুনা চারা হেনবগী খোঙজং চংশিনখিবা অসিনি। ইমালোলগীদমক মনিপুরী অইবশিংনা তুমিন্না লৈথোকখিদে হায়বগী ময়েক লারবা খুদম অমনি। ইহৌ অসি মায় পাকনবা হোৎনবদা মনিপুরী লেঙ্গুএস দিমান্দ কো ওর্দিনেতিং কমিতিনা চাওরবা থৌদাং লৌখি। কমিতি অসিগী কনভেনরনা লৈহাওথাবম সরতচন্দ্রনা ওইখি। মতমসিদা এমসুনা চাওরবা থৌদাং লৌখি। ইহৌ অসিগী খোঙজংশিং মথং মথং চত্থদুনা ইন্দিয়াগী কেপিতেল ওইরিবা দেল্লি ফাওবা য়ৌখি। খোঙজং অসিদা মীওই কয়াসু পুলিসকা মুকনবদা অশোক অপন্ নংখি। কাওবা য়াররোইদবা পুৱারীগী লমায় অমদি ওইদুনা লৈরি ঙসিসু। নম্থাবা য়ারোইদবা অমদি অশেংবা অচুম্বা ইহৌ ওইখিবনা ১৯৯২গী আগস্তকী ২০দা ইন্দিয়ান কন্সতিত্যুসন্না শকখঙলবা লোল অমা ওইখি মনিপুরী লোলসু।

ইমালোল চাওখৎনবা হোৎনবদা খোরিরোল অমসুং অইবশিং থৌদাংঃ

খোরিরোলদা লোল হায়বসিনা থৱায় ওইরি হায়বসি খঙবনা মনিপুরদা সাহিত্য থৌপাং লূপ (সাথৌলূপ)না ২০১৩দগী হৌদুনা সুই জেনরিস মাদর লেঙ্গুএস এৱার্দ অহানবা ওইনা লৈহাওথাবম সরতচন্দ্রদা অমদি এমসুদা পীখি। মথংদা খ্বাইরাকপম লোকেন্না মহৈরোই অমা ওইনা অমদি মীয়ামগী মীহুৎ ওইনা ইমালোল অসিবু থাক ৱাংনা পুখৎনবা হোৎনবদা লৌরিবা থৌদাং অদুগী সুই জেনরিস মাদর লেঙ্গুএস এৱার্দ পীখি অসুম্না সিলচরদা লৈবা ওক্রম চুরামনী, লমাবম গোজেন্দ্র, চানম হেমচন্দ্রদা মথং মথং মানাশিং পীদুনা ইকায়খুম্নবা অমদি তৌবীমল খঙবা উৎখি। হেন্না নুংঙাইজবা অমদি পুকনিং থৌগৎনীংঙাই ওইবদি, মনিপুরদা অসিগুম্বা য়াম্না মরু ওইবা নুমিৎ অমা ওইরিবা মালেমগী ইমালোলগী নুমিৎ ফেব্রুৱারী ২১ বু স্তেতকী থাক্তা লূপ কয়ানা অমদি মনিপুর লেঙ্গুএস প্লান্নিং এন্দ ইমপ্লিমেন্টেসনগী দাইরেক্তোরেট য়াওনা নীংশিং থৌরমশিং পাঙথোকনরকপসিনি। মনিপুরদা মৈতৈশিংতা নত্তনা লৈরিবা তোঙান তোঙানবা লোল ঙাঙবা কাংলুপ ফুরুপ কয়া লৈরি মখোয়শিংদুগী মনুংদা কবুই ফুরুপসু অমনি। কবুই ফুরুপ অসিগী লোলবু হীংনবা কন্না হোৎনরিবা থৌমী অমা হায়রগদি দি এল কবুইসু অমনি অদুনা ২০২০দা মহাকপু সাথৌলূপ্না খুম্বোংময়ুম গৌরহরি মাধুমতি মাদর লেঙ্গুএস এৱার্দ পীদুনা ইকায়খুম্নবা উৎখি। ২০২১গী ওইনা মনা অসিগীদমক প্রোফেসর চুংখাম য়াশৱান্তাদা পীদুনা ইকায়খুম্নবা উৎকনি। কোভিদ পেন্দেমিক মরক অসিদসু অইবা অইবীশিংনা লৈবাক্কিদমক ৱাজরি। লাচনবা লেপ্তে পুন্সি অমদি খুনাইগী শক্তমশিং ঙসিসু। সাহিত্য একাদেমিসু তুমিন্না লৈথোক্তে। অদুনা একাদেমিনা শিন্দুনা মলতি লিঙ্গুএল পোইটস মিত পাঙথোক্লি লেপ্তনা মরমদি লোল হায়বসি ইবা অমসু ঙাঙদ্রবদি মশানা অদুম তপ্ন- তপ্না হেক্তা শিজিল্লকই। মসিদা অইবশিংগী থৌদাং য়াম্না চাওনা য়াওরি। ভর্চুএল প্লেটফোমশিংদা মালেমসিদা লৈরিবা গ্লোবেল মনিপুরী কম্ম্যুনিতিগী প্লেতফোর্ম অমা ওইরিবা মনিপুরী মিররদা সাহিত্য, কলা, কলচর, লোল, পুন্সি মহিং, হরাও কুম্মৈ কয়াগী মরমদা নুমিৎ খুদিং নৈনরি খন্নরি। মসিমক য়াম্না পুকনিং থৌগৎনীংঙাই ওই। মনিপুরগী এম পী ইনীংথৌ লৈসেম্বা সনাজাওবনা মনিপুরী লোলবু ইন্দিয়াগী ক্লাসিকেল লেঙ্গুএসকী থাক্তা পুখৎনবা রাজ্য সভাদা পুখৎপসি য়াম্না মতাং চাবা অমদি থাগৎনিংঙাই ওই। নাকল অমরোমদা বঙ্গলাদেশতা খুন্দা লৈতাদুনা লৈরিবা মনিপুরীশিংনা মনিপুরী লোল অমদি খোরিরোলবু য়োকখৎনবা অমদি তুংগী মীরোলদা মসিবু শিজিন্নবা লৌখৎলিবা খোঙথাংশিং শিংথানিংঙাইনি। শকনাইরবা অইবা একে সেরাম, খোইরোম ইন্দ্রজিৎ, সনাতোন হামোম, সেরাম নিরঞ্জন, মাইস্নাম রাজেসনচিংবা কয়ানা স্পিরিত অমগা লোয়ননা হোৎনরি মনিপুরী লোলগী অমদি কলচরগীদমক। বঙ্গলাদেশ মনিপুরী সাহিত্য সংষদ, ত্রিপুরা, আসাম, মেঘলয় অসিনচিংবদা লৈরিবা খোরিরোলগী লুপশিংনা ইমালোল চাওখৎনবা হোৎনরিবা থবক থৌরমশিং শিংথানিংঙাইনি। ইন্দিয়াগী ওইনা লাক্লিবা নেসনেল ইদুকেসন পোলিসি, ২০২০দা হায়রিবসি অমুক্তা কুপ্পা য়েংমিন্নবা মথৌ তাগনি। মসিদা হায়রি প্রাইমরি স্কুলশিংদা অঙাংশিংদা মাগী মাগী মমালোলদা লাইরিক তমহনবীগদবনি হায়না। মমালোলদা লাইরিক তমহনবনা হেন্না অঙাংশিংনা লৌশিং তানশিনবদা য়াম্না থুনা খঙবা হৈবগী চাং হেনগৎলি হায়বসি অখঙ অহৈশিংনা হায়নবা লৈ। য়ুনেস্কোনসু হায়রি অঙাংশিংবু মমালোলদা লাইরিক তমহন্নবা।

COMMENTS

WORDPRESS: 0
DISQUS: