পুন্সিগী ওইনা লোই থাখ্রবা অথৌবশিংগী নীংশিং য়ুম্বী — নোমিতা খোংবান্তাবম

Homeস্ক্রলবার

পুন্সিগী ওইনা লোই থাখ্রবা অথৌবশিংগী নীংশিং য়ুম্বী — নোমিতা খোংবান্তাবম

য়ুম্বী নুঙশিং অসি নুঙ অশেংবা ঙাক্তনি, অশেম্বা অহৈবা নুঙ নত্তে। লোকডাউনগী খুদোংচাদবা লৈরবসু শীংলবসু কার্ফিয়ুনা মরম ওইদুনা নুঙগী ক্বারিশিং থিংজিনখিবদগী

য়ুম্বী নুঙশিং অসি নুঙ অশেংবা ঙাক্তনি, অশেম্বা অহৈবা নুঙ নত্তে। লোকডাউনগী খুদোংচাদবা লৈরবসু শীংলবসু কার্ফিয়ুনা মরম ওইদুনা নুঙগী ক্বারিশিং থিংজিনখিবদগী ফংদদুনা ডিমাপুর তান্না চৎলগা লৌরুবনি। হৌজিক নীংশিং য়ূম্বীশিং অসিদা হক্লিবা অথৌবশিংগী মমিংশিং অসিগা ২১ নি। অর্কাইভকী রেকোর্ডতদি মীওই ২২গী মমিং লৈ।

পীকখ্রবসু চীংলৈবাক মণিপুরগী পুৱারীগা শাগোন্নরক্লিবা নীংশিং খুভমশিংগী মনুংদা অমা ওইরবা, হৌখিবা ইরাই নুমিৎ, আগস্ট ১৩, ২০২১দা মায়খুম হাংদোক্তুনা হৈকৎ লৈকৎ তমদুনা নীংশিংখ্রবা অদুঙৈ কুমজা ১৮৯১দা মণিপুরনা বৃটিশকী মখূৎতা মায়থীরবা মতুংদা বৃটিশনা আন্দামান অমসুং নিকোবর ঈথৎতা পুন্সিগী ওইনা লোই থাখ্রবা মণিপুরগী অথৌবা ২২গী নীংশিং য়ূম্বী অসিসু লমদম অসিগী পুৱারীগী লিক্লম মনুংদা চনবা হৌরে।

নীংশিং য়ূম্বী অসি মপাল কাংজৈবুংগী ফৈদাবুংদা চহী খুদিংগী লেপ্তনা পাঙথোরক্লিবা অথৌবশিংগী নীংশিং নুমিৎতা মায়খুম হাংদোক্তুনা নীংশিং য়ুম্বী অসিগী শরুকশিং ওইরিবা নুঙশিংগী মনুংদগী অপাকপা নুঙপাক অমদা হক্লিবা অথৌবশিংগী মহুৎ শিনবা মীংশিংদা হৈকৎ-লৈকৎ তমদুনা ইকায়খুম্নবা উৎখিবনি। নীংশিং য়ূম্বী অসিগী শরুক অমদা হক্লিবা মণিপুরগী অথৌবশিং অদুগী মীংশিংনা কুলচন্দ্রধজ, সেনাপতি অঙৌ, ৱাংখৈরাকপা লোকেন্দ্রজিৎ বিরজিৎ, লুৱাংনিংথৌ কর্ণেল শামু, অয়া পুরেল মেজর চোংথাম নিলমনি, মেজর চোংথাম মিয়া, মচাহল চাওবা হুদা, থোংদ্রাম গুণ, কুম্বা লাইশ্রবা, ধজ ময়েংবা, মচাহল নাম নেপ্রা, নিংথোলবা সটৱাল ত্রিলোক, শগোলশেম্বা ধোন, জেমাদার ইন্দুজাম্বা ঘুন, চিংশুবা নিংথৌবা, জেমাদার ফঞ্জাওথৌবা, জেমাদার তোঞ্জাও মংসাতাবা, সুবেদার চাওবতোল হৈগ্রুজম্বা, পরদুম্বা (অশাংবাকুট), ময়াংখাংদগী চৌকামি নাগা অমসুং গৌহো নাগানি।
বৃটিশকী মায়োক্তা মণিপুরগী নীংতম্বা ঙাক্নবগীদমক মায়থীরগনি খঙনা থেংনখিবা লানদা শরুক য়াবগীদমক মণিপুরনা লানফম অদুদা মায়থীরবা মতুংদা বৃটিশ অথোরিটিনা কুমজা ১৮৯১দা আন্দামান অমসুং নিকোবরগী ঈথৎতা লোই থাখিবা মণিপুরগী অথৌবশিংগী নীংশিং য়ূম্বী অসিগী মতাংদা মণিপুর গভর্ণমেন্টকী আর্ট এন্ড কালচারগী ডিরেক্টর ঙাঙোম উত্তমনা হায়, নীংশিং য়ূম্বীশিং অসি জুলাইদগী শাবা হৌরক্লগা অথৌবশিংগী নুমিৎ নংনবা লোইশিনখিবনি। লুপা ক্রোর ১গী বাজেট শেমগৎখিবনি। য়ুম্বী নুঙশিং অসি নুঙ অশেংবা ঙাক্তনি, অশেম্বা অহৈবা নুঙ নত্তে। লোকডাউনগী খুদোংচাদবা লৈরবসু শীংলবসু কার্ফিয়ুনা মরম ওইদুনা নুঙগী ক্বারিশিং থিংজিনখিবদগী ফংদদুনা ডিমাপুর তান্না চৎলগা লৌরুবনি। হৌজিক নীংশিং য়ূম্বীশিং অসিদা হক্লিবা অথৌবশিংগী মমিংশিং অসিগা ২১ নি। অর্কাইভকী রেকোর্ডতদি মীওই ২২গী মমিং লৈ। অদুবু বৃটিশনা আন্দামান অমসুং নিকোবরদা থারগনি হায়দুনা ওর্ডার থোক্লুরবসু হিয়ারিং চত্থরবা মতুংদা থাখিদে হায়বগী রিপোর্টকী মতুংইন্ননি। উরু সিংহ অরাবা হায়রিবা অথৌবা অসিসু লোই থাননবা ওর্ডার থোক্লুরগা অমুক ককখিবা থেংনখি। মতমদুদা অথৌবা অহুম অঙাং ওলহনখি হায়রগসু মখোয়গী মমিং মথা ফংবা ঙমদ্রি। লোই থারবা মতুংদা অমুক্কসু মফম অদুদা মীওৎ-মীনৈ চত্থবদগী লৈখিদবসু য়াওই। অদুবু মখোয়গী মমিংশিংদি অইবা ওইনসু লৈরমদবনা খঙবা ঙমদ্রি হায়রি।
ডিরেক্টরনা মখা তানা হায়, হৌজিকসু ময়ামগী ৱাকৎ লাক্তবা নত্তে। অদুম ওইনমক অথৌবশিংগী মমিং থাবদা চিত্থ-নান্থবা য়াওরবসু চিন্দা খক হায়বা নত্তনা অইবা ওইনা শক্তাক্কদবা ওইরবদি হাপকনি। পুখৎলকপা খুদিংমক কমিটি অমা শেম্লগা য়েংশিল্লবা মতুংদা হাপকনি। মসিগীদমক্তা হাপচিন্নবগী মফম চাওনা খাক্তুনা থম্লি। হৌজিক হক্লিবা অথৌবশিংগী মমিংশিং অসিদি তশেংনা রেকোর্ডতা ইদুনা লৈরম্লবা অশেংবা মমিংশিংনি। মসিদগী হক্লগা হাপ্পনি। মরম অদুনা মীয়াম্নসু ৱারৌফম থোক্তে। হাপচিনবা য়াবগী রেকোর্ডশিং পুথোরক্লগদি শোয়দনা হাপকনি। ৱাফম অসি চীফ মিনিষ্টারদসু ফোঙদোকখ্রে হায়রি।
অদুম ওইনমক লোই থাখিবা মণিপুরগী অথৌবশিং অসিগী মনুংদগী হল্লকখিবসু য়াওরিবনি। অদুবু মখোয়গী মতাংদদি চপ চানা ফংদ্রি হায়খি। নীংশিং য়ূম্বীশিং অসি তোঙান তোঙান্না মখল মরি য়ুংবনি। মসিগী মনুংদা খ্বাইদগী ৱাংমনা ফুট ২০ নি। মসিগা নক্ননা য়ুংলিবা নুঙ অসিনা ফুট ১০.৩০ ৱাংই। অদুগা মরু ওইবা নীংশিং য়ূম্বী অসিনা ফুট ১৭ পাকই। অতোপ্পা অমনা ফুট ৭ ৱাংলগা ফুট ৬ পাকপা য়ুম্বীনি। মসিদা অথৌবশিংগী মমিং হক্লগা থম্বনি হায়খি।
আর্কিওলোজিগী সুপারিন্টেন্দেন্ট কে সশিকুমারনসু নীংশিং য়ূম্বীশিংগী মতাংদা হায়, য়ূম্বীশিং অসি তেল্লবা নুমিৎ ৪৫ নিগী মনুংদা শেমগৎতুনা থম্বা ঙমখিবনি। অথৌবশিংগী মমিং হকপদা শীজিন্নরিবা লোলশিং অসি অমনা ইংলিশ ময়েকনি অদুগা অমনা মণিপুরী ময়েক্তা হকপনি। নীংশিং য়ূম্বীশিং অসিদদি বেঙ্গলি ময়েকশিং শীজিন্নদ্রে হায়রকখি।
সোর্স: হুইয়েন লানপাও

COMMENTS

WORDPRESS: 0
DISQUS: