পুন্সিগী ঈথক ঈপোম মরক্তা “মৈ ঈশিং নুংশিৎ” শৈরেং লাইরিক অসিনা করি হায়নিংলিবাঃ মিৎয়েং অমা

Homeআর্টসৱারেং

পুন্সিগী ঈথক ঈপোম মরক্তা “মৈ ঈশিং নুংশিৎ” শৈরেং লাইরিক অসিনা করি হায়নিংলিবাঃ মিৎয়েং অমা

লাইরিক্কী মমিংঃ মৈ ঈশিং নুংশিৎ, ২০১৬ অইবাঃ নোংমাইথেম কিরনকুমার অফোঙবাঃ দ কলচরেল ফোরম, মণিপুর লাইরিক্কী মখলঃ শৈরেং। লাইরিক্কী লমায় মশিংঃ ১১৮ লাইরিক

লাইরিক্কী মমিংঃ মৈ ঈশিং নুংশিৎ, ২০১৬
অইবাঃ নোংমাইথেম কিরনকুমার
অফোঙবাঃ দ কলচরেল ফোরম, মণিপুর
লাইরিক্কী মখলঃ শৈরেং। লাইরিক্কী লমায় মশিংঃ ১১৮
লাইরিক্কী মমলঃ লুপা ২০০।

থম্মোয়দা লাৎচদুনা লাকচবী কনাগুম্বী অমবু কাওঙমদনা লাকখিগদ্রা হায়না থাজনা ঙায়জবা পুন্সিনা মথোৎ কারকপা মতমগী শক্তমনি মসিদা উরিবসি। মসিদা কবি মশাদা থোকখিবনি হায়না ঙাক্তা উবসু য়াদ্রি। মরমদি পোইটীক ইন্সপিরেসন হায়বসি অতোপ্পা মীওইশিংদা থোকপা থৌদোকশিংনসু মচাক কয়া পীদবা নত্তে। অদুবু খরা হেন্না কুপথনা মহাক্কী শৈরেংশিং অসি পারকপদা থেংনরিবসি নুংশিবা হায়বা অসিনা পুম্নমক চেৎলবা লংলা ওইদুনা পুনশিনবা পাম্বগী পুকনিং ইহুল অমদি অপাবশিংদা শোয়দনা ফাওহল্লি। নুংশিবা হায়বসি লৈরমদ্রবদি অসি য়ৌনা ফজবা ৱাহৈশিং অসি থোকলক্তবসু য়ারি। কবিনা শৈরেং অয়াম্বদা লাংতকনবা অমগা লোয়না হেক হেক ঙায়রিবসি শৈরেংগী লাইরেম্বী মহাকপু ওইরিগদ্রা হায়না খন্দবা ঙমদে।

পোকনফম লমদমদগী হেন্না নুংশিবা লমদম অমা মালেমসসিদা অনী শুনা লৈরম্লবদি পুৱারিদা থোকনখিবা অচৌবা লাঞ্জাওশিং, লৈবাক অমগা অমগগী মরক্তা মুকনরিবা পুম্নমক লৈরমদবসু য়াই। ইমা লৈবাক হায়বসি অনী শুদবদুনা ইমা লৈবাক্কীদমক লান শোকনরিবনি। ইমা লৈবাক্কি ঙমখৈ ঙাকনবা হোৎনরিবনি। ইমা লৈবাক্কীদমক অথৌবা মচাশিংনা থৱায়না পোন্থা পীদুনা নীংতম্বা পুরকনরিবনি। মালেমসিদা লৈরিবা তোঙান তোঙানবা লোনগী অশৈবা কয়ানা মমা লৈবাক মরমদম্বু শৈথাদুনা ইবা শৈরেং অসি ওন্থোকনা য়াম্না লৈ। মসিদা অশৈবা কবি অমনা ইবা নেস্নেলিজমগী স্পিরিত চেল্লবা শৈরেংশিং অসি অমনা অমদগী করিসু ফজবা হেনবা নত্রগা মগুন্দা তাবা নত্তে। অমুক্তং তাংনা পোক্লকপা মীওই মপোকসিদা পোকনফম লমদমগী নীংথিজবা শক্তম্বু শৈথাদুনা ইবা হায়বসে অশৈবা খুদিংমক্কি পুকনিংদা ফাওদবা লৈরম্লোই। নোংমাইথেম কিরনকুমারসু ইরক্লি নুংঙোল্লবা লমদম অসিবু শৈথারদুনা, “য়েংঙু য়েংঙু খুদিং নুংঙোল্লি/ চীংলোন নাপোম তাংথকশিং/ ঈংনা চেল্লিবা তুরেলশিং/ পোম হৌরিবা লৌবুকশিং/ আহ! অতিয়ানা কল্লকচবা/ঐগী পোকনফম লমদম্নি।/ …কুম কাংদে লৈকোলসু/ নোংজু থাদা খোঙ্গুমেলৈ/ লাংবন থাদা লৈবাক্লৈ/ আহ! বসন্তনা কল্লকচবা/ ঐগী পোকনফম লমদম্নি…”

অইবা নোংমাইথেম কিরনকুমার ১৯৫৭তা য়াইস্কুল মোইরাংখোম চিঙাখম লৈরক্তা পোকই। মণিপুর সরকারগী পব্লিক হেলথ ইঞ্জিন্নিয়ারিং দিপার্তমেন্তা এ ই ওইনা থবক্তগী পোত্থারে। ওল ইন্দিয়া রেদিয়ো ইম্ফালগী শকখঙলবা ঈশৈ ময়েক ইবা অমসুনি। মণিপুর লিটরেরি সোসাইতিনা মহাক্কী অহানবা শৈরেংগী লাইরিক “ ঐ ঈশৈ শৈরেং”সু ফোঙখিবা লৈরে। “ মৈ ঈশিং নুংশিৎ” লাইরিক অসিনা মহাক্কী অনীশুবা শৈরেংগী লাইরিকনি। মনিপুরি খোরিলোলগীদমক কৎথোকপা অমগা লোয়ননা থবক থৌরম কয়া লেপ্তনা চত্থরি, হৌজিক্না সাহিত্য একাদেমি নিউ দিল্লিগী মনিপুরী লেঙ্গ্যুয়েজ এদভাইজরি বোর্দকি কনভিনর ওইদুনা চোকথবা লৈতনা হোৎনরি। নোংমাইথেম কিরনকুমার দাইনামিক ওইবা অইবা অমসুনি।

“মৈ ঈশিং নুংশিৎ” হায়রিবা লাইরিক অসিদা পুন্না শৈরেং ১১৫ য়াওরি। শৈরেং অয়াম্বা লভ পোইমস ওইনা তৌই। অদুবু তেনতক তেন্তকপা শৈরেংশিং অসি ঈশৈ ময়েক্কুম্না সুর পান্দুনা শকপা য়াবা কয়া অমসু য়াওদবা নত্তে। শৈরেং অয়াম্বদা শিজিন্নরিবা ৱাহৈশিং ৱাহৈ পরেং খরতনা ৱাহন্থোক ফজনা পীবা ঙম্বতা নত্তনা ভিজ্যুএল ইফেক অমসু য়াওহল্লি “ নোংমা লাংবনগী য়াচংবদা/ মমশিল্লকপা সহরদা/ লম্বীদা মদোম থেংনখি/ শকখঙদবী নুজা অমা।/ তাথখ্রে কোরৌদি ঙান্থোরক্লে অতিয়া,/ মাসু লম্মাংনরবী/ ঐসু কঙাওনরবা।/ অতিয়াদা থাজসু ওলাং মৈশা খাংলম্মি/ মাসু মৈশা লাংলবী/ ঐসু মৈশা লাংলবা।”
ওলাংথা ওইরিবা লাংবন নুংশাগী মৈশা পুশিল্লক্তুনা চাংদম্নদুনা পুখৎক্লিবা ইমেজরি অসিনি ফজরিবসি। থম্মোয়দা লাৎচদুনা লাকচবী কনাগুম্বী অমবু কাওঙমদনা লাকখিগদ্রা হায়না থাজনা ঙায়জবা পুন্সিনা মথোৎ কারকপা মতমগী শক্তমনি মসিদা উরিবসি। মসিদা কবি মশাদা থোকখিবনি হায়না ঙাক্তা উবসু য়াদ্রি। মরমদি পোইটীক ইন্সপিরেসন হায়বসি অতোপ্পা মীওইশিংদা থোকপা থৌদোকশিংনসু মচাক কয়া পীদবা নত্তে। অদুবু খরা হেন্না কুপথনা মহাক্কী শৈরেংশিং অসি পারকপদা থেংনরিবসি নুংশিবা হায়বা অসিনা পুম্নমক চেৎলবা লংলা ওইদুনা পুনশিনবা পাম্বগী পুকনিং ইহুল অমদি অপাবশিংদা শোয়দনা ফাওহল্লি। নুংশিবা হায়বসি লৈরমদ্রবদি অসি য়ৌনা ফজবা ৱাহৈশিং অসি থোকলক্তবসু য়ারি। কবিনা শৈরেং অয়াম্বদা লাংতকনবা অমগা লোয়না হেক হেক ঙায়রিবসি শৈরেংগী লাইরেম্বী মহাকপু ওইরিগদ্রা হায়না খন্দবা ঙমদে।
হিংবগী আশা মরক্তা নুংশিবা হায়বসিনা লৌরিবা মমল নাইদ্রবা মফম অদু নঙগী নুংশিবনা ঐগী হায়বসিনা য়েংবা য়াই। –
“নঙগী নুংশিবনা ঐগী / থম্মোইবু লৈহাও চেলহল্লি/ হকচাংবু লৈহাও চেলহল্লি,/ শিরসু ঐগী মংফম/ লৈবাক লৈহাও চেল্লনি। নুংশিবা খঙলবা লৈঙোয় লৈরিক/ ইচম চম্লরোই লৈবাক লৈহাও, হৌরকপা পাম্বী পুম্নমক/ ফজবা মপাল শাৎলনি/ নুংশিবা লৈনম য়েল্লনি।”
শৈরেংসিদা পুশিল্লক্লিবা ইমেজরিশিং অসি অমুক্তং কুপ্না পাদুনা য়েংবীয়ু। মালেমসিদা লৈরিবা অচৎ চত্তা লেংলি পাল্লিবা পুম্নমক, মহৌশা অকোয়বদা লৈরিবা পুম্নমক নুংশিবা হায়বসিনা কয়াদা ফজহল্লিবা নুংঙাইহল্লিবা। পুম্নমক অসিবু লাইরেম্বী অমগুম্না কবিনা লাৎচরি। পুন্সিগী ঈথক ঈপোম অকনবা কয়া মরক্তা হিংনিংবগী আশা পীরিবী মহাকপু নীংশিংদবা ঙমদে। অদুনা হায়রক্লি, “ ঐগী থম্মোই ঈপাক থন্না/ শাৎলনি থম্বাল মশীং খঙদনা..”

নুংশিবা হায়বসি করিগুম্বা মতমদা মাংখ্রবদা মহাক্কী মতিক ময়াই অদুবু খঙনিংনা শোল্লক্লি, নুংশিবা নঙগী নশুংলাং হায়বা শৈরেংসিদা। “ নুংশিবা নঙগী নশুংলাং/ অৱা মৈচাক খাঙজগে,/ নঙবু অমুক্তং খঙজনবা/ থম্মোইসে চাম্মরক কায়জগে।/ য়ূনি কিনবা তিংখংলৈ/ ঐগী থম্মোইদা শাৎসনু/ নঙগী ণশুংলাংগীনি,/ কুমগী নোংনা কাংখ্র’সু/ নঙগী লৈখোঙ পাথোকনা/ চাইনি থম্মোই ঈরিকনা,/ নঙবু অমুক্তং খঙজনবা/ থম্মোইসে চাম্মরক কায়জগে।” কবিনা থিরিবা নুংশিবসি নকশিনবসু য়াদবা লাপথোকপসু ঙমদবা মখলগী নুংশিবা অদুনি হায়না লৌবা য়াই। চোংলিবা মিহুল অসিনি নুংশিবা হায়না মহাকনা ইতৎ তত্তনা শৈথারিবসি অমদি মসি পুন্সিবু ঙাক শেল্লিবা নুংশিবা অদুনি হায়না লৌবসু য়াই। করিগুম্বদা লভ পোইমশিং অসিদা উরিবসি নুপা নুপী অনীগী মরক্তা লৈরিবা অদুগা পাখঙ লৈশাগী ওইবা অদুগুম্বা নুংশিবা অদু ওইনসু ফাওদবা নত্তে অহানবা পাবদা।

নোংমাইথেম কিরনকুমার

য়াম্না থোৼপা মেংবা ৱাহৈশিংনা অয়াম্বা শৈরেংশিংদা চরৈ নম্থাং ফজবনা হকচাংবু লৈতেংবগুম্না ফজবা শৈরেংগী পরেং কয়া য়াওরি। ৱাহৈশিং চম্না চংখোল্লি। “ থাবল্লৈ মনম্না ইপোম হৌরি, নীংশিংলক্লি নঙগী মায়থোং থাজদো।/ মহৌশানা ঐবু তম্বিরি শৈরেং/ নীংশিংলক্লি নঙগী কুমগী পাঊজেলদো।/ লমদানা পুরক্লি য়াওশঙগী মপাউ/ নীংশিংলক্লি খূজেংদো চোংখিবা থাবলদো।/ শিন্থরক্লে পিরাং মিাহৈশিং চম্না চংখোল্লি। “ থাবল্লৈ মনম্না ইপোম হৌরি, নীংশিংলক্লি নঙগী মায়থোং থাজদো।/ মহৌশানা ঐবু তম্বিরি শৈরেং/ নীংশিংলক্লি নঙগী কুমগী পাঊজেলদো।/ লমদানা পুরক্লি য়াওশঙগী মপাউ/ নীংশিংলক্লি খূজেংদো চোংখিবা থাবলদো।/ শিন্থরক্লে পিরাং মিৼলুদৈ লেপ্তনা/ নীংশিংলক্লি নোং থুপমিন্নখিবা উখোঙদো।” অসিগুম্বা তেন্তকপা শৈরেং কয়াসু য়াওরি।

নুংশিবগী শৈরেং ময়াম মরক্তা য়াওরম্লি নীংতম্বগী শৈরেংসু। নীংতম্বা হায়বসি মীওইবগী হক অমনি হায়রবসু মসিবু মখুৎতা লৈবাক্কি চুক্লি পায়শিন্দুনা মখোয়না অপাম্বা মওংদা শিজিন্নবা অদু থম্মোয়দদি য়ানিংদে। মীওইবগী নীংতম্বা হায়বসিগী খোল্লাওসিবু কবিনা লাইশঙগী কাংশি খোঞ্জেল নত্তে/ লানগী পাউনি চেল্লিবা হায়না ইরক্লি “লেপ্পা লৈতনা খিংলি কাংশি/ মায়কৈ মরি থক-খা/ চেল্লি লানবাউ অনৌবা য়াওলগী/ পীরি পাউজেল মীওইবগী হক্কী।” ঙসিগী মালেমসে মীওইবগী হক অমদি নীংতম্বা হায়বসি হেক হেক খোঙ্গাওনবগী থৌদোক কয়া ইতৎ তত্তনা থোক্লি অদুনা কবিনসু অসিগুম্বা মীওইবগী হক অমদি নীংতম্ববু ইকায়খুম্নদ্রিবা মখোয়গী মথক্তা য়াওলগী অপুন্না থৌনা অদু উত্তুনা অম্বগুম্না কুপশিল্লিবা মীওৼ মীনৈ, মীনা মীবু ইকায়খুম্নদ্রিবা অসিবু মাংহন্নবা পাউজেল পীরি।

মহৌশা মালেম অসিদা তাংজদুনা হীংলিবা মীওইবনা খন্থরুদবা মীকুপশিংদা প্রকৃ্তিসিদা মাংহল তাক্লিবা পুম্নমক অসিগীদমক তশেংনা নীংদোল পোমজৈ, হৈয়েংদি করি ওইহৌগনি হায়না খল্লুবা মীকুপ্তা। করম্নদি ৱাদবা ঙমগনি। মালেমসে অঙকপা ফংবা হোংলে। মহৌশাগী খল কয়াম কায়রবগে হায়বসি ঙসিগী মীরোলনা হকথেংননা থেংনরবনি। লাইরিক হৈবদি মাল্লগা, ৱাখল খনবদি শারগা তৌথোক্লকলিবা থৌওংশিংনা তাক্লিবদি য়ৈখায় থিনগায়বা ঙাক্তা ওইনা তৌরি। অদুনা কবিসু মীপায়জরি মহৌশা মালেম মহাক্কীদমক। অদুনা তেংথারক্লি নিংথমথা অমখক লেন্নবা হায়না মিংথোনবা শৈরেংসিদা। “ নিংথমথা অমখক লেন্নবা/ য়ান্থদুনা চিংথখি নুংশি হৈতনা/ অহল ওইরবা উজাও কয়া/ কুইনা খঙনরক্লবা চীংমায়দুদগী।/ মতম কুইনা শাইদাংলবা/ পোম্বি চেক্লা জুরা কয়া/ চাক্তারুবৈ হল্লকপদা/ মহূম পোঞ্জেল থিবা খঙদ’/ য়াচংবদা কঙাওনখি।/ মকা লাম্না নোকচরম্বা,/ উরি ৱারি খোঙ্গুমেলৈ/ তেংথাদুনা কেনখি লৈমায়দা,/ চীংজুম ঈফুৎতু ময়াং কংখি/ কনানসু উবিদনা কনানসু তাবিদনা/…চহী য়াম্লবা মালেমসে/ কংশিল্লক্লি শিয়োমনুং/ লী ৱারী তুরেলনা/ শাই ৱারী উমংনা/ তাবিদ্রবা মখোয়গী ৱাকৎ/ কংজরনি হায়রি মখোয় অদুম্মক।” ঐখোয় কনাসু নোংমতা খন্থরুদে মালেমগী শিয়োমনুংসে তপ্না তপ্না কংশিল্লক্লি হায়বসি। শৈরেং অসিনা অপাবশিংদা শোয়দনা ৱাখল খন্থহনগনি। করিগীদি ইরোই মহৌশা অমদি মালেমসিগী। মহাক্কি ঈশিং নুংশিত্তা, মহাক্কী লৈবাক লৈহাওদা পাল্লিবা মহৈ মরোং চাদুনা হীংলীবা মীওইবনা। ইকো পোইমস অসি ইদবা য়াদবা হীরম অমসু ওইরক্লি। লাইরিক অসিদা ইকোপোইত্রিগী লমদা হেন্না কুপ্না নৈনবা য়াবা শৈরেংশিংসু য়াওরি। মিংথোল ওইরিবা “ মৈ ঈশিং নুংশিৎ” হায়রিবা শৈরেং অসিমক য়াম্না ফিলোসোফিকেল ওইবা অমদি স্পিরিচ্যুএল ওইবা শৈরেং অমনি হায়না লৌদবা ঙমদে। শেম্বীবা মপু অমা লৈ হায়বসি মীওইবা অমা ওইনা য়াদবা ঙম্লোই কনানসু। পোকপা শিবা অনীগী লাংদাইদা হীংলিবা মিকুপ খরগী কাওশিংগুম্লবা পুন্সিনা তাইবঙগী অথূপ্পা কয়া অসিবু খঙনবা হোৼনবা হায়বসি তঙাই ফদে হায়বসিনি। অদুনা ইরক্লি, “মৈ ঈশিং নুংশিৎ/ অতিয়া মালেমগী অরোনবা/ নঙগা ঐগদা লোৎলিবা/ নঙগা ঐগনা ফোঙলী/ মিৎয়েংগী ৱাংমদা লোৎলিবা/ তাইবঙ মপুগী খূৎশেমদো/ নঙগা ঐগদা লোৎলিবা/ নঙগা ঐগনা ফোঙলী/ মাগী ঈঙ্গিৎতা চৼলিবা/ অয়ুকনা নুমিদাং ওইখ্রিবা/ কোরৌহনবগী খোঙচৎকী/ সাক্ষিনি নঙ ঐ।/ মৈ ঈশিং নুংশিৎ/ অতিয়া মালেমগী অরোনবা/ নঙগী ঐগী হৌফম্নি/ নঙগী ঐগী হন্নফম্নি।”
অহৌবা অমসুং অরোইবা নাইবা মীওইবগী পুন্সিনা নীংজরিবা, পামজরিবা, হীংবগী ৱাহন্থোক অমদি ফংনিংলিবা পুম্নমক শৈরেংগী মেদিয়মদা অসুম্না লেপ্তনা ইবীরক্তুনা মনিপুরী খোরিরোলদা শৈরেং লাইরিক কয়া খুদোল তম্লকখিগনি হায়না অইবগী মফমদা থাজবা থমজরি।

COMMENTS

WORDPRESS: 1
DISQUS: