পুখ্রম্বম ননীগী শৈরেং অহুম

Homeআর্টসশৈরেং

পুখ্রম্বম ননীগী শৈরেং অহুম

নাম শন্দোকপা নাম শন্দোকপা লাকই মীয়াম মরক্তা কৈথেলদা । থৱায় পানবনিনা নাম তানিংঙি । করম্বা নামনা খরা ফজবা, করি নামনো তাগদবসে? খংদে, মীপাইরবা

নাম শন্দোকপা

নাম শন্দোকপা লাকই
মীয়াম মরক্তা
কৈথেলদা ।
থৱায় পানবনিনা
নাম তানিংঙি ।

করম্বা নামনা খরা ফজবা,
করি নামনো তাগদবসে? খংদে,
মীপাইরবা পুক্নিংসে ।
সমাজগী ইহুন খংবা ঙমজদ্রবা
ভাবোকশিং অমমমনা,
উবা মশক ,নম্বা মনম, তাব নামদ
ঙাওজরিবা থম্মোয় পেন্না ।

শভমগী অকোয়বা ফিভমনা য়াওলকপা সভ্যতা,
মথৌ শংলবা অয়াকপা খোন্জেন য়ৈখায়রবা থোপসে
ৱাখল খল্লি, ৱাখলদি মীকুপ খুদিং শম্নরকত্রে,
ৱাহং কয়াগী মহুম শাররি থোপতা।

 

মতমসিগী মীনি

ঐগী কেমেরাগী লেন্সদ তারিবা
মখল কয়াগী দৃশ্যনা মচুশিংগী মরক্তা
ওনথোইরিবা মওং কয়াগী ফিভমদ য়াতারিবা।

থৈথরক্লবা পূন্সিনা
মচোয় মচোয় তানখি।
চিবক চিবক হৈনবি মওংগী য়াহিপতা
য়াওরিবা দৃশ্যশিংদু
খোমজিনজৈ অমমম তৌদুনা
ঐগী কবিতাগী ৱাহৈনা
মশক মচু থোকত্রবা
মতৎ মতৎনখ্রবা দৃশ্যশিংবু
ঐগী কেমেরাগী লেন্সদ তারিবা।

ইমা ঙসিদি নংনা
নচা ঐসে মশক খংলরোই
নচা ঐসে, নংগী পিক্লিবা সনাচৌদু নত্রে।
ঙসিদি নচা ঐসে,
পৈশা চাব হৈনবিগী লায়ননা
নারবা নচানি নমথাক তৌবগী
ট্রেনিং লৌরবনি।

নচাবু মশক খংবদা ৱারগনি,
কননানো হায়বগী শকতাকচে
য়াওদ্রবা নচা ঐসে ।
মরমদি ঐনা কৎথোকখি মীহাৎপদা
ইপানা থমবিরম্বা থাং,
পিথোকখি হুরানবদা পৈশা।
অদুবু মসিগী দলিল অমত ইনহৌদে।

অমুকসু ইমা নংগী নমীংদনি
ৱাশকলিবসে নমথাক তৌরিবসে।
চীন থিরগা অশিংবা শারিবা
মতমসিগী মীনি ঐহাক
মতমসিগী মীনি।

 

মচু কোকথরবা লাই

খুনুং ঈশৈগী ইপোমরক্তা
অনৌবা লমায় অমদি হাংদোকখিবনি,
নংগী নিংথিরবা মীস্না অনিদা।

মতম পুম্বদা নুংশিবা লৈনম শন্দোকলিবী লৈরাংগী
করিসু খনবিদ্রি নমথাক হৈরবা কুরাক,
লৈগী লৈকাদা তোংলগা ওইনজৈ অপাম্বা থিরী ।
মশক খংদবা ঊপালশিংনা হৌরকখি,
মনিং তমলরি শংবানরবা ঐগী অতিয়াদা,
নোং মঙলকখি
নোং চুথরকই।

নোংনা চামথোকলবা অয়েকপা লাই মচু কোকথরকখি,
মচু কোকথরক্লবা লাই শিং মশক খংনদ্রে,
মখোয় মশেলদা তমথিনরকই
মশা মশাগী ওইবা মচুগি ফিরালবু
মনিংতম্না পাইহননিংখি শংবানরবা অতিয়াদা।

ঐগী মাগী মরক্তা অহকপা লৈয়ি চিংনরকখি,
লোন তিনদবা শক চুদ খেৎনবা মশেলদা।
নিঙাই তৌনৈ , লমখৈ য়াথোকপগী
অকনবা খোংজং চংশিনলদুনা।

COMMENTS

WORDPRESS: 0
DISQUS: